လွင်ႈတၢင်း လႆႈပဵၼ်မႃးပၢင်တိုၵ်းပွၵ်ႈၵမ်းၼႆႉ လႆႈႁူႉဝႃႈ ပူၼ်ႉမႃး မွၵ်ႈဝၼ်းတီႈ 10-11/12/2014 မီးၵူၼ်းဝၢၼ်ႈၼမ်ႉတွင်း ၵႂႃႇႁႃပႅၵ်ႇ၊ ၵႂႃႇၺႃးသိုၵ်းမၢၼ်ႈ ဢၼ်ဢဝ်ႁူမ်ႇလူမ်ႈသဵၼ်ႈတၢင်း ယိုဝ်းၵွင်ႈ လွၵ်ႇငိုတ်ႈၵူၼ်းဝၢၼ်ႈ၊ ၼႄးၵူၼ်းဝၢၼ်ႈပဵၼ်ၵူၼ်းထိူၼ်ႇ၊ ထၢမ်ၵူၼ်းဝၢၼ်ႈဝႃႈ သိုၵ်းတႆးမီးလႂ် ၸိူဝ်းၼႆႉ။ ႁဵတ်းႁႂ်ႈၼႂ်းဝူင်ႈၵၢင် သိုၵ်းမၢၼ်ႈတင်းသိုၵ်းတႆး မီးပၼ်ႁႃၵၼ်သေ ထိုင်မႃးဝၼ်းတီႈ 14 ၽွင်းသိုၵ်းမၢၼ်ႈ ၵႂႃႇတူင်ႉၼိုင်တၢင်းၸဵတ်းႁၢတ်ႇၼၼ်ႉ ထိုင်တီႈလႆႈ ပဵၼ်ပၢင်တိုၵ်းၵၼ်တင်း တပ်ႉသိုၵ်းၸိုင်ႈတႆး (RCSS/SSA) - ၼႆယဝ်ႉ။

ၸဵတ်းႁၢတ်ႇၼႆႉ မီးႁိမ်းဝၢၼ်ႈၵၼ်ႉၵၼ် ၼႂ်းဢိူင်ႇၼွင်ႁီး ၸႄႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း။

သိုၵ်းမၢၼ်ႈ ဢၼ်ဢဝ်ႁူမ်ႇလူမ်ႈသဵၼ်ႈတၢင်း ၼႂ်းၸႄႈဝဵင်းမိူင်းပၼ်ႇ မီး 2 သဵၼ်ႈ။ သဵၼ်ႈၼိုင်ႈ လုၵ်ႉၼမ်ႉတွင်း ႁဵတ်း/ၽွၵ်ႈၵႂႃႇၸူးတႃႈသူပ်းပၢတ်ႈ၊ (သဵၼ်ႈတၢင်းမိူင်းပၼ်ႇ-ၼမ်ႉတွင်း- တႃႈသူပ်းပၢတ်ႈ)။ ထႅင်ႈသဵၼ်ႈၼိုင်ႈ လုၵ်ႉၼမ်ႉတွင်း ၽွၵ်ႈၵႂႃႇၸူးတႃႈသူပ်းတဵင်း (သဵၼ်ႈတၢင်းမိူင်းပၼ်ႇ- ၼမ်ႉတွင်း- တႃႈသူပ်းတဵင်း)။

ၾၢႆႇၼိုင်ႈၵေႃႈ သိုၵ်းမၢၼ်ႈဢၼ်ၵႂႃႇဢဝ်ႁူမ်ႇလူမ်ႈသဵၼ်ႈတၢင်းၼႆႉ လွၵ်ႇငိုတ်ႈပေႉၵိၼ် ၵူၼ်းဝၢၼ်ႈၵူၼ်းမိူင်း၊ သမ်ႉထႅင်ႈ ထၢမ်ႁႃသိုၵ်းတႆးမီးလႂ်ၸိူဝ်းၼႆႉသေ လႆႈတွၵ်ႉတႅၵ်ႉၵၼ်တင်း တပ်ႉသိုၵ်းတႆး။ မိူဝ်ႈဝၼ်းတီႈ 14 ၵၢင်ၼႂ်ယၢမ်း 9 မူင်းၼၼ်ႉ သွင်ၾၢႆႇ လႆႈယိုဝ်းၵၼ်။ ထိုင်မႃးဝၼ်းတီႈ 15 ၼႆႉ သိုၵ်းမၢၼ်ႈမႃးၽိူမ်ႉထႅမ်ႁႅင်းသိုၵ်း ထႅင်ႈတင်းၼမ်၊ ၵူၼ်းဝၢၼ်ႈၵူၼ်းသူၼ်တႄႉ မႆႈၸႂ်ဝႃႈ ၵူဝ်ပဵၼ်ပၢင်တိုၵ်းထႅင်ႈယူႇ- ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ။

ၼႂ်းၸိုင်ႈတႆးပွတ်းႁွင်ႇ ၸႄႈဝဵင်းၵျွၵ်ႉမႄးၵေႃႈ သိုၵ်းမၢၼ်ႈတင်းသိုၵ်းတႆး (RCSS/SSA) ပဵၼ်ပၢင်တိုၵ်းၵၼ်၊ ၵူၼ်းၼႂ်းပိုၼ်ႉတီႈဝႃႈ မီးလွင်ႈဝၢတ်ႇၸဵပ်းတင်းသွင်ၾၢႆႇ- ၼႆယဝ်ႉ။