ၼႂ်းၶၢဝ်းတၢင်းလၢႆလၢႆဝၼ်းထပ်းၵၼ်မႃးၼႆႉ ၼႂ်းၸိုင်ႈတႆး ပွတ်းႁွင်ႇ၊ တပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းၸၢဝ်းၶိူဝ်း (FUA) ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၵူတ်ႉၶၢႆ/ မၢၼ်ႈတူင်ႈ ၸိူဝ်းၼႆႉၶိူဝ်းယႂ်း၊ တင်းသွင်ၾၢႆႇမီးလွင်ႈလူႉသုမ်းတၢႆၼင်ႇၵၼ်။

သိုၵ်းၶၢင် Photo:internet

ဝၼ်းတီႈ 10/12/2014 တေႃႇထိုင်ဝၼ်းတီႈ 13/12/2014 ၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ သိုၵ်းမၢၼ်ႈပႃႈတႂ်ႈ တပ်ႉၸုမ်းလူင် (တပ်ႉမ) 88 ၊ တပ်ႉမ 11 ၊ ငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း (ၸၵၶ) 16 ၸိူဝ်းၼႆႉ  တင်း တပ်ႉသိုၵ်းမိူင်းႁူမ်ႈတုမ်ၾႅတ်ႊၻရႄႊလ် (FUA) ပဵၼ်ပၢင်တိုၵ်းၵၼ်ႁၢဝ်ႈႁႅင်း၊ ၼႂ်းတပ်ႉသိုၵ်း FUA ၼၼ်ႉ  မီးတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ၊ တပ်ႉသိုၵ်းၶၢင်လွတ်ႈလႅဝ်း (KIA) ၊ တပ်ႉသိုၵ်းဢူၺ်းလီ ၻီႊမူဝ်ႊၶရေႊၸီႊၵူႈၸၢဝ်းၶိူဝ်းမိူင်းမၢၼ်ႈ (MNDAA) ၊ တပ်ႉသိုၵ်းၸိုင်ႈတႆး (SSPP/SSA) ၸိူဝ်းၼႆႉ။

မိူဝ်ႈဝၼ်းတီႈ 10 ၼၼ်ႉ ပွတ်းၼႂ် ပဵၼ်ပၢင်တိုၵ်း ၼႂ်းၸႄႈဝဵင်းၵူတ်ႉၶၢႆ တႃႈမိူင်းငႄး၊ သၢႆးၶၢဝ်၊ ဝၢၼ်ႈႁူဝ်ပုင်ႇ ၸိူဝ်းၼႆႉ။ တီႈဝၢၼ်ႈႁူဝ်ပုင်ႇၼၼ်ႉ ပဵၼ်တင်ႈတႄႇၵၢင်ၼႂ်ယၢမ်း 5 မူင်း တေႃႇထိုင်ၵၢင်ၶမ်ႈ 5 မူင်းၶိုင်ႈ၊ ယိုဝ်းၵၼ်တင်းဝၼ်း။ ၾၢႆႇသိုၵ်းမၢၼ်ႈ ဢၼ်လႆႈလူႉတၢႆၵႂႃႇ ပႃးၽူႈၵွၼ်းတပ်ႉၽႄ၊ ၽူႈၵွၼ်းငႃးသိုၵ်း လႄႈ ၵူၼ်းသိုၵ်း 12 ၵေႃႉ၊ ဝၢတ်ႇၸဵပ်း 20 ပၢႆ။ ၾၢႆႇသိုၵ်းၸၢဝ်းၶိူဝ်းၵေႃႈ မီးလွင်ႈတၢႆဝၢတ်ႇၽွင်ႈ။

မိူဝ်ႈဝၼ်းတီႈ 10 ၵူၺ်းၼင်ႇၵဝ်ႇ၊ ၼႂ်းၸႄႈဝဵင်းမၢၼ်ႈတူင်ႈ တၢင်းဝၢၼ်ႈႁွင်ႈၼမ်ႉပႃ ၼၼ်ႉၵေႃႈ လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း။ ၵူၺ်းၵႃႈ ပၢင်တိုၵ်းၼႆႉ ပႆႇလႆႈႁူႉႁူဝ်ယွႆႈမၼ်း ႁၢၼ်ႉတေႃႇယၢမ်းလဵဝ်။

မိူဝ်ႈဝၼ်းတီႈ 13 ယူႇတီႈတပ်ႉသိုၵ်း FUA တင်းသိုၵ်းမၢၼ်ႈ ပဵၼ်ပၢင်တိုၵ်းၵၼ် ၼႂ်းၸႄႈဝဵင်းသႅၼ်ဝီ၊ ၼမ်ႉၸလၢပ်ႈ၊ ၼမ်ႉတီးၸိူဝ်းၼႆႉ ၶႂ်ႈတင်းဝၼ်း။ ယွၼ်ႉပိူဝ်ႈပဵၼ်ပၢင်တိုၵ်းၸိူဝ်းၼႆႉသေ ၾၢႆႇသိုၵ်းမၢၼ်ႈၵေႃႈၽိူမ်ႉထႅမ် ႁႅင်းသိုၵ်းမႃးထႅင်ႈ၊ ဢၼ်မီးယူႇၼႃႈသိုၵ်း ၽွင်းပဵၼ်ပၢင်တိုၵ်းၼႂ်းဝၼ်းတီႈ 10 ၼၼ်ႉ မီးၼႂ်းၵႄႈ 400-500 - ၼႆယဝ်ႉ။

ဢိင်ၼိူဝ်ပဵၼ်ပၢင်တိုၵ်းသေ ၵူၼ်းယူႇၼႂ်းပိုၼ်ႉတီႈၵေႃႈ လႆႈပၢႆႈၽေးသိုၵ်းသိူဝ်၊ ၵမ်ႈၽွင်ႈၵေႃႈပၢႆႈမူၵ်းယွမ်ႇမူၵ်းယုမ်း၊ ၵမ်ႈၽွင်ႈၵေႃႈပၢႆႈလူင်းၸူးဝဵင်း၊ ၵမ်ႈၽွင်ႈၵႂႃႇတၢင်းမိူင်းၶႄႇ၊ ၵမ်ႈၽွင်ႈၵေႃႈ ၵႂႃႇတၢင်းၼမ်ႉၶမ်း/ မူႇၸေႈ ၸိူဝ်းၼႆႉၵေႃႈမီး။

ၼိူဝ်ႈလိူၼ်ၻီႊသႅမ်ႊၿိူဝ်ႊ 2014 ၼႆႉၵူၺ်း တပ်ႉသိုၵ်းမၢၼ်ႈ တင်း တပ်ႉသိုၵ်းႁူမ်ႈတုမ်ၾႅတ်ႊၻရႄႊလ် ပဵၼ်ပၢင်တိုၵ်းၵၼ် ႁၢဝ်ႈႁႅင်းလၢႆပွၵ်ႈ။

တပ်ႉသိုၵ်းမိူင်းႁူမ်ႈတုမ်ၾႅတ်ႊၻရႄႊလ် (FUA) ၼႆႉ ၶွတ်ႇၽွတ်ႈမႃးၸဵမ်မိူဝ်ႈႁူဝ်ပီ 2011 ။ ၼႂ်းၼၼ်ႉ မီးၸုမ်းယိပ်းၵွင်ႈၵၢင်ႇ 12 ၸုမ်း။