ပႃႊတီႊႁူဝ်သိူဝ် (SNLD) ၶဵၼ်ႇတႅမ်ႈယုၵ်းယၢင်ႇယူင်ႉၶၢပ်ႈ ၵၢၼ်မိူင်း၊ တႃႇၸုမ်း UNA ၊ တေၼမ်းဢဝ်တၢင်ႇ ႁၢႆးငၢၼ်း (ရၢႆးငၢၼ်း) ၼႂ်းပၢင်ၵုမ် UNA ပိူဝ်ႈတႃႇၵမ်ႉထႅမ်လႆႈၸႂ် ႁပ်ႉႁွင်း ၸႂ်ႉတိုဝ်းၵႂႃႇ။

ဢိင်ၼိူဝ်ၸုမ်းဢူၺ်းလီၸၢဝ်းၶိူဝ်းၽွမ်ႉႁူမ်ႈ (UNA) တေႁဵတ်းပၢင်ၵုမ်လူင် ၼႂ်းဝူင်ႈတေမႃးၼႆႉသေ ယူႇတီႈငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) လႆႈၶဵၼ်ႇတႅမ်ႈဝႆႉ ယုၵ်းယၢင်ႇယူင်ႉၶၢပ်ႈဢုပ်ႇဢူဝ်းၵၢၼ်မိူင်း။ လွင်ႈၼႆႉ တေႁၢႆးငၢၼ်း (ရၢႆးငၢၼ်း)ၼႂ်းပၢင်ၵုမ် UNA ၊ သင်ဝႃႈမီးလွင်ႈၵမ်ႉထႅမ်/လႆႈၸႂ်ၵၼ်ၵေႃႈ တေႁပ်ႉႁွင်းပဵၼ်ယူင်ႉၶၢပ်ႈၶွပ်ႇပိူင် ဢုပ်ႇဢူဝ်းၵၢၼ်မိူင်း၊ တွၼ်ႈတႃႇ UNA ၸႂ်ႉတိုဝ်းၵႂႃႇ ၼႂ်းၶၵ်ႉတွၼ်ႈၵၢၼ်ငမ်းယဵၼ်၊ ဢမ်ႇၼၼ် တေတၢင်ႇၼႄၵႂႃႇ ၼႂ်းၶၵ်ႉတွၼ်ႈၵၢၼ်ငမ်းယဵၼ် တၢင်းၼႃႈ- ၼႆယဝ်ႉ။

ၵဵဝ်ႇၵပ်းလွင်ႈ ၶဵၼ်ႇတႅမ်ႈယုၵ်းယၢင်ႇယူင်ႉၶၢပ်ႈၵၢၼ်မိူင်းၼႆႉ ၽူႈၶဝ်ႈပႃးၼႂ်းၶွမ်ႊမတီႊၶဵၼ်ႇတႅမ်ႈ ယုၵ်းယၢင်ႇယူင်ႉၶၢပ်ႈၵၢၼ်မိူင်း ၸၢႆးထုၼ်းဢေး လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ- ယူႇတီႈ SNLD သေ ၶဵၼ်ႇတႅမ်ႈယူင်ႉၶၢပ်ႈၵၢၼ်မိူင်းမႃးၼႆႉ ပဵၼ်ႁူဝ်လိူၼ်ယဝ်ႉ၊ ပိူင်လူင်တႄႉ ပိူဝ်ႈတႃႇတၢင်ႇၼႄ UNA သေ ဢဝ်ၸႂ်ႉႁႂ်ႈပဵၼ်ၶွင် UNA ၵႂႃႇ။ ပိူင်လူင်မၼ်း ဢၼ် UNA ၶဵၼ်ႇတႅမ်ႈၼႆႉ ဢမ်ႇမိူၼ်တၢင်ႇၸုမ်း။ တၢင်ႇၸုမ်းၼႆႉ မိူၼ်ၼင်ႇၾၢႆႇသိုၵ်း၊ တေၵိုတ်းတိုၵ်းယဝ်ႉ ၸင်ႇၵွႆႈမႃးဢုပ်ႇဢူဝ်းလွင်ႈၵၢၼ်မိူင်း။ တၢင်ႇမူႇတၢင်ႇၸုမ်းသမ်ႉ ဢုပ်ႇဢူဝ်းၵၢၼ်မိူင်းၵွၼ်ႇ ၸင်ႇၵွႆႈၵိုတ်းတိုၵ်းၵၼ်၊ မၼ်းပဵၼ်ၸိူင်ႉၼႆ။ ၵူၺ်းၵႃႈ ယူႇတီႈဢၼ် SNLD ၶဵၼ်ႇတႅမ်ႈဝႆႉ ယုၵ်းယၢင်ႇယူင်ႉၶၢပ်ႈၵၢၼ်မိူင်းၼႆႉတႄႉ တေၸႂ်ႉၵႂႃႇၸွမ်းၵၼ်။ ၾၢႆႇၼိုင်ႈ ၵၢၼ်သိုၵ်းၵေႃႈဢုပ်ႇဢူဝ်းၵႂႃႇ၊ ထႅင်ႈၾၢႆႇၼိုင်ႈ ၵၢၼ်မိူင်းၵေႃႈဢုပ်ႇဢူဝ်းၵႂႃႇ၊ တေၸႂ်ႉၵႂႃႇၸိူင်ႉၼႆ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ (SNLD) ၸၢႆးလဵၵ်ႉ ၵေႃႈလၢတ်ႈဝႃႈ- ပၢင်ၵုမ်လူင် UNA ၼႆႉ တေၸတ်းႁဵတ်းဝၼ်းတီႈ 20 တေႃႇထိုင်ဝၼ်းတီႈ 24 ။ ၼႂ်းဝၼ်းတီႈ 20 တေႃႇထိုင် 21 ၼႆႉ ယူႇတီႈ UNA တေဢုပ်ႇဢူဝ်းၵၢၼ်ငၢၼ်းၶွင် UNA သေ တေႁၢႆးငၢၼ်းပႃး လွင်ႈဢၼ်ၶဵၼ်ႇတႅမ်ႈဝႆႉယူင်ႉၶၢပ်ႈၵၢၼ်မိူင်း၊ ပေႃးဝႃႈ UNA ႁၼ်လီၵမ်ႉထႅမ် ႁပ်ႉႁွင်းယဝ်ႉ တေပဵၼ်ပိူင်ၶွင် UNA ၵႂႃႇ- ဝႃႈၼႆ။

ဢူးဢေးတႃႇဢွင်ႇ ၽူႈၶဝ်ႈပႃႊတီႊၸၢဝ်းၶိူဝ်းရၶႅင်ႇ ၼႂ်း UNA လၢတ်ႈဝႃႈ- ပေႃးဝႃႈ SNLD ႁပ်ႉပုၼ်ႈၽွၼ်း ၶဵၼ်ႇတႅမ်ႈဝႆႉသေတၢင်ႇလၢတ်ႈမႃးၼႆ ပဵၼ်ၵၢၼ်လွင်ႈလီ၊ တေၸၢင်ႈဢဝ်ၸႂ်ႉတိုဝ်းၵႂႃႇ၊ ယွၼ်ႉပိူဝ်ႈတၢင်ႇမူႇတၢင်းၸုမ်းၵေႃႈ ၶဵၼ်ႇတႅမ်ႈယုၵ်းယၢင်ႇယူင်ႉၶၢပ်ႈ ဢုပ်ႇဢူဝ်းၵၢၼ်မိူင်းဝႆႉႁင်းၽႂ်ႁင်းမၼ်း။ ဢၼ်ၶဵၼ်ႇတႅမ်ႈယုၵ်းယၢင်ႇယူင်ႉၶၢပ်ႈဝႆႉၼႆႉ ၾၢႆႇလူင်ပွင်ၸိုင်ႈၵေႃႈ ၶဵၼ်ႇတႅမ်ႈဝႆႉယဝ်ႉ၊ ၾၢႆႇ NLD ၵေႃႈၶဵၼ်ႇတႅမ်ႈဝႆႉ၊ ၾၢႆႇၸၢဝ်းၶိူဝ်းလႄႈ ၸုမ်းယိပ်းၵွင်ႈၵၢင်ႇ ဢိၵ်ႇပႃးမူႇၸုမ်း ဢၼ်ယူႇၸွမ်းလႅၼ်လိၼ်ၵေႃႈ ႁူမ်ႈၵၼ်ၶွတ်ႇၽွတ်ႈ WGEC (ၸုမ်းႁဵတ်းၵၢၼ်ပိူဝ်ႈတႃႇၵပ်းသၢၼ်ၼႂ်းၵႄႈၵၢင်ၸၢဝ်းၶိူဝ်း)သေ  ႁူမ်ႈၵၼ်ၶဵၼ်ႇတႅမ်ႈဝႆႉ၊ မီးယူႇလၢႆမူႇလၢႆၸုမ်း ဢၼ်ၶဵၼ်ႇတႅမ်ႈဝႆႉယုၵ်းယၢင်ႇယူင်ႉၶၢပ်ႈၵၢၼ်မိူင်း။ ပေႃးထိုင်ၶၢဝ်းဢုပ်ႇဢူဝ်းၵၢၼ်မိူင်းမႃး ပိူင်ၽႂ်ပိူင်မၼ်းၵေႃႈ တေတၢင်ႇလၢတ်ႈမႃးၼႂ်းပၢင်ၵုမ်သေ တေဢဝ်ဢုပ်ႇဢူဝ်း၊ လိူၵ်ႈဢၼ်လီမၼ်းသေ တေႁဵတ်းသၢင်ႈၵႂႃႇ- ဝႃႈၼႆ။

ပၢင်ၵုမ် UNA ၼႆႉ ဝၼ်းတီႈ 20-21/12/2014 မီးလုၵ်ႈၸုမ်း UNA ဢၼ်ယၢမ်ႈပေႉၵၢၼ်လိူၵ်ႈတင်ႈ မိူဝ်ႈပီ 1990 ၶဝ်ႈႁူမ်ႈ။ ဝၼ်းတီႈ 22-23-24/12/2014 (ၶၢဝ်းတၢင်း 3 ဝၼ်း) တေမီးဢူၺ်းလီၸုမ်း UNA ၸိူဝ်းဝွၵ်ႇၸိူၼ်းဝႆႉ မိူၼ်ၼင်ႇပႃႊတီႊၵၢၼ်မိူင်း/ ၸုမ်းယိပ်းၵွင်ႈၵၢင်ႇၸိူဝ်းၼႆႉၵူႈမူႇၵူႈၸုမ်းၶဝ်ႈႁူမ်ႈ၊ ပၢင်ၵုမ်ၼႆႉ တေၸတ်းတီႈ တေႃႇဝိၼ်ႇၼိၼ်းၸီႇ ဝဵင်းတႃႈၵုင်ႈ- ၼႆယဝ်ႉ။

ၸုမ်းဢူၺ်းလီၸၢဝ်းၶိူဝ်းၽွမ်ႉႁူမ်ႈ (UNA) မိူဝ်ႈလဵဝ်ၼႆႉ လုၵ်ႈၸုမ်း ၵမ်ႈၼမ်ပဵၼ်ပႃႊတီႊ ဢၼ်ပေႉၵၢၼ်လိူၵ်ႈတင်ႈမႃး မိူဝ်ႈပီ 1990 ၊ ၼႂ်းၼၼ်ႉ ပႃးငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၶိူဝ်းတႆး (SNLD) ပႃႊတီႊၼိုင်ႈ။