ၸၢႆးဢၢႆႈပဝ်း ႁူဝ်ၼႃႈပႃႊတီႊသိူဝ်ၽိူၵ်ႇ (SNDP) လၢတ်ႈဝႃႈ- ပေႃးလႆႈပဵၼ်လူင်ပွင်ၸိုင်ႈမိူင်းတႆး၊ တေႁႃၵၢၼ်ပၼ်ၵူၼ်းမိူင်းတႆး ၸိူဝ်းတူၵ်းဝႆႉတီႈမိူင်းထႆး တႃႇ 1 လၢၼ်ႉၵေႃႉ။

ၸၢႆးဢၢႆႈပဝ်း လူင်းဢႅဝ်ႇယဵမ်ႈတူၺ်းပိုၼ်ႉတီႈ ၸွမ်းၶႅမ်ႊၵေႃႇသၢင်ႈ ၼႂ်းမူႇဝၢၼ်ႈတမ်ႇၼၵ်း ဢိူင်ႇမႄႈႁႄႇ ၸႄႈဝဵင်းႁၢင်ၻူင်း မိူင်းၵဵင်းမႆႇ

ပေႃးပၢင်လိူၵ်ႈတင်ႈပီ 2015 ၼႆႉ ယဝ်ႉတူဝ်ႈၵႂႃႇသေ ပေႃးဝႃႈ ပႃႊတီႊသိူဝ်ၽိူၵ်ႇလႆႈပဵၼ်လူင်ပွင်ၸိုင်ႈမိူင်းတႆး၊ တေႁွင်ႉဢဝ်ၵူၼ်းၵႂႃႇႁဵတ်းၵၢၼ်မိူင်းထႆး 1 လၢၼ်ႉပၢႆၼၼ်ႉ ပွၵ်ႈၶိုၼ်းႁိူၼ်း ဝၢၼ်ႈၵဝ်ႇမိူင်းလင်သေ တေၸွႆႈထႅမ်ပၼ် ႁႂ်ႈမီးၵၢၼ်မီးငၢၼ်း- တူဝ်ႁူဝ်ပဝ်ႈ ပႃႊတီႊသိူဝ်ၽိူၵ်ႇ ၸၢႆးဢၢႆႈပဝ်း လၢတ်ႈမိူဝ်ႈဝၼ်းတီႈ 29/11/2014 ပႃးၼႂ်းလိၵ်ႈပိုၼ်ၽၢဝ်ႇ NBF ဝႃႈၼႆ။

ၸၢႆးဢၢႆႈပဝ်း ပႃႊတီႊသိူဝ်ၽိူၵ်ႇလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ- မိူဝ်ႈဝၼ်းတီႈ 31/10/2014 မိူဝ်ႈႁူပ်ႉထူပ်းၵၼ်တင်း ၽူႈယႂ်ႇၵူၼ်းလူင် ၸိၵ်းၸွမ်ၼႂ်းမိူင်းမၢၼ်ႈ 14 ၵေႃႉၼၼ်ႉၵေႃႈ မၼ်းၸဝ်ႈ လႆႈတၢင်ႇလၢတ်ႈၼႄ ၸွမ်ၸိုင်ႈယူႇ။ တူဝ်မၼ်းၸဝ်ႈၵေႃႈ ယၢမ်ႈမႃးထူပ်းပီႈၼွင်ႉတႆး ၼႂ်းမိူင်းထႆးယူႇ။ ၵွပ်ႈၼၼ် တေၶတ်းၸႂ်ႁႂ်ႈပေႉ ပၢင်လိူၵ်ႈတင်ႈပီ 2015 ၼႆႉ။ ပေႃးပေႉၵၢၼ်လိူၵ်ႈတင်ႈၵေႃႈ တေၶွတ်ႇၽွတ်ႈ လူင်ပွင်ၸိုင်ႈသေ ႁွင်ႉဢဝ်ၶိုၼ်းၵူၼ်းမိူင်းတႆးၼႂ်းမိူင်းထႆးပွၵ်ႈၶိုၼ်းသေ တေႁႃပၼ်ၵၢၼ်ငၢၼ်း ႁႂ်ႈမီးၵၢၼ်ႁဵတ်း၊ ႁႂ်ႈလႆႈယူႇသဝ်းသၢင်ႈ ၼႂ်းမိူင်းတႆး- ဝႃႈၼႆ။

တီႈၼႂ်းၽိုၼ်လိၵ်ႈ NBF ၼၼ်ႉ တႅမ်ႈဝႆႉပႃးဝႃႈ  တေပၼ်ၵၢၼ်ၵူၼ်းမိူင်းတႆး မိူၼ်ၼင်ႇၵၢၼ်တီႈလိၼ်သူၼ် ႁႆႈ ၼႃး၊ ၵၢၼ်ၾၢႆႇပႃႇမႆႉ၊ ၾၢႆႇၶုတ်းမိူင်ႁႄႈ၊ ၾၢႆႇၽုၵ်ႇသွမ်ႈၸိူဝ်းၼႆႉ- ၼႆယဝ်ႉ။

ၸၢႆးဢၢႆႈပဝ်းၼႆႉ လႆႈႁွတ်ႈထိုင်ၵဵင်းမႆႇ ၸိုင်ႈထႆး မိူဝ်ႈလိူၼ်ဢွၵ်ႊထူဝ်ႊၿိူဝ်ႊ ပီ 2013 ။ လႆႈလူင်းဢႅဝ်ႇယဵမ်ႈ တူၺ်းပိုၼ်ႉတီႈ ၸွမ်းၶႅမ်ႊၵေႃႇသၢင်ႈ (တီႈႁွင်ႈယူႇသဝ်းလိုဝ်ႈယင်ႉၵူၼ်းမိူင်းတႆး ၸိူဝ်းၶဝ်ႈ ႁဵတ်းၵၢၼ် ၼႂ်းမိူင်းထႆး) ၼႂ်းမူႇဝၢၼ်ႈတမ်ႇၼၵ်း ဢိူင်ႇမႄႈႁႄႇ ၸႄႈဝဵင်းႁၢင်ၻူင်း မိူင်းၵဵင်းမႆႇၸိူဝ်းၼႆႉ။ ၼႂ်းတိုဝ်ႉတၢင်း ဢႅဝ်ႇယဵမ်ႈပီႈၼွင်ႉတႆးပွၵ်ႈၼၼ်ႉ လႆႈႁူပ်ႉထူပ်းဢုပ်ႇၵုမ် တင်းၵူၼ်းပီႈၼွင်ႉႁႅင်းၵၢၼ် ႁိုင်မွၵ်ႈ 1 ၸူဝ်ႈမူင်း။

ပႃႊတီႊသိူဝ်ၽိူၵ်ႇၼႆႉ မိူဝ်ႈၵၢၼ်လိူၵ်ႈတင်ႈပီ 2010 လႆႈတီႈၼင်ႈဝႆႉၼႂ်းသၽႃး 50 ပၢႆ။ ၽွင်းပၢင်လိူၵ်ႈတင်ႈ 2010 ၼၼ်ႉ ပဵၼ်ၽွင်းၸဝ်ႈၶုၼ်ထုၼ်းဢူး ၽူႈၼမ်းပႃႊတီႊႁူဝ်သိူဝ် (SNLD) တူၵ်းၶွၵ်ႈဝႆႉ။ ယွၼ်ႉပိူဝ်ႈ ဢမ်ႇမီးပႃႊတီႊႁူဝ်သိူဝ် ႁဵတ်းတႃႇၵူၼ်းမိူင်းတႆးလႄႈ ၼႂ်းပီ 2010 ၸင်ႇလႆႈၶွတ်ႇၽွတ်ႈၶိုၼ်ႈမႃး ပႃႊတီႊ သိူဝ်ၽိူၵ်ႇသေ တူင်ႉၼိုင် ႁဵတ်းတႃႇၵူၼ်းမိူင်းတႆး။