ၽွင်းႁၢင်လိူၼ်ပူၼ်ႉမႃးၼႆႉ ႁူင်းငဝ်းတူင်ႉလူင် မိူင်းထႆး ၼႄငဝ်းတူင်ႉလွင်ႈၽီ (ၽီၽဵတ်ႇ) ၸိုဝ်ႈ ၽီထူင်းၶိုၼ်း ၼႂ်းၼၼ်ႉ ပႃးၼွင်ႉၼႅၼ်း၊ ႁႅင်းငၢၼ်းတႆး ဢၼ်ၶဝ်ႈႁဵတ်းၵၢၼ်ယူႇၼႂ်းမိူင်းထႆး။

ငဝ်းတူင်ႉထႆး ၽီထူင်းၶိုၼ်း [The Return (ၽီၽဵတ်ႇယွၼ်းၶိုၼ်း၊ ဝိၺၢၼ်ႇၸဵပ်းၸႂ်) ] ဢၼ်တႄႇၼႄ ၼႂ်းႁူင်းငဝ်းတူင်ႉ ပူၼ်ႉမႃးမိူဝ်ႈဝၼ်းတီႈ 27/11/2014 ၼႆႉ ပႃးၼၢင်းၼမ်းၸိူင်း (ၼၢင်းဢဵၵ်ႇ) မိူင်းလၢဝ်း 2 ၵေႃႉ။ မိူင်းၵမ်ႇပူးၶျႃး 1 ၵေႃႉ။ ၸိုင်ႈမိူင်းႁူမ်ႈတုမ်မၢၼ်ႈ 1 ၵေႃႉ၊ ၸိုဝ်ႈၼွင်ႉၼႅၼ်း ႁိုဝ် ၼွင်ႉၼုတ်း၊ ယိင်းသၢဝ်တႆးထုင်ႉပူင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း။ ၸၢႆးၼမ်းၸိူင်း (ၽရႃႉဢဵၵ်ႇ) ဢွမ် ဢၵ်ႉၶၽၼ်း၊ ပဵၼ်ၸၢႆးၼမ်းၸိူင်း ၸိုဝ်ႈယႂ်ႇလိုဝ်းလင် ၼႂ်းမိူင်းထႆးၵေႃႉၼိုင်ႈ။ ၽူႈၵမ်ၵပ်း (Director) သၵ်ႇၶျၢႆး ၻီးၼၢၼ်း။

ၸိူင်းလိူင်ႈၼႆႉ ပိူင်လူင်မၼ်း ပဵၼ်လိူင်ႈႁႅင်းၵၢၼ်ယၢၼ်မိူင်းႁိမ်းႁွမ်းမိူင်းထႆး ဢၼ်ၶဝ်ႈမႃးႁဵတ်းၵၢၼ်ၼႂ်း မိူင်းထႆးသေ ထုၵ်ႇၶႃႈတၢႆ။ ၸိူဝ်းၶဝ်တၢႆၵႂႃႇယဝ်ႉ ၵႂႃႇပဵၼ်ၽီပဵၼ်ၽဵတ်ႇ ယဝ်ႉၵေႃႈၶဝ်ယင်းတိုၵ်ႉၶႂ်ႈ ပွၵ်ႈမိူဝ်း ႁိူၼ်းၶိုၼ်းယူႇ။

ၼႂ်းငဝ်းတူင်ႉၼႆႉ ၼွင်ႉၼႅၼ်း (ၼုတ်းၶျၼတ်း သီထွင်း) လႆႈလဵၼ်ႈၼႂ်းလွၵ်းတွၼ်ႈ ပဵၼ်မႄႈလုၵ်ႈဢွၼ်ႇ ၵေႃႉၼိုင်ႈ ယူႇဝဵင်းတႃႈၶီႈလဵၵ်း လႅၼ်လိၼ်တႆး-ထႆး။ ၵေႃႉပဵၼ်ၽူဝ်မၼ်းၼၢင်း ၶဝ်ႈႁဵတ်းၵၢၼ်ၼႂ်းမိူင်းထႆးသေ ထုၵ်ႇၶႃႈတၢႆ၊ မၼ်းၼၢင်းၵေႃႈ လႆႈမႆႈၸႂ်ၸွမ်းၸဝ်ႈၽူဝ်မၼ်းၼၢင်း- ၸိူဝ်းၼႆႉ။

ၼွင်ႉၼႅၼ်း (ၼွင်ႉၼုတ်း)ၼႆႉဢွၼ်တၢင်း ပဵၼ်ၸၼ်ႉၵူၼ်း ၸႂ်ႉႁႅင်းၵၢၼ်ၵေႃႉၼိုင်ႈသေ လႆႈၶဝ်ႈမႃးၼႂ်း တူင်ႇဝူင်းၾၢႆႇပၢႆးမွၼ်း၊ လွင်ႈလႆႈႁူပ်ႉတၢင်းယၢပ်ႇၽိုတ်ႇ ၸိူင်ႉႁိုဝ်လၢႆလၢႆၼၼ်ႉ မၼ်းၼၢင်းၵေႃႈလၢတ်ႈၼႄ။

“လႆႈႁူပ်ႉတၢင်းယၢပ်ႇၽိုတ်ႇတႄႉတႄႉဝႃႈဝႃႈ။ ၵွပ်ႈဝႃႈ ဢမ်ႇၸႂ်ႈမိူင်းႁဝ်းသေ သမ်ႉဢမ်ႇၸႂ်ႈၵူၼ်းယူႇၼႂ်း တူင်ႇဝူင်းပၢႆးမွၼ်းမႃး။ ဢၼ်ႁဝ်းဢမ်ႇယၢမ်ႈႁူႉ ဢမ်ႇယၢမ်ႈႁၼ်ၵေႃႈမီးၼမ်။ မိူဝ်ႈထၢႆႇႁၢင်ႈငဝ်းတူင်ႉၼၼ်ႉ လႆႈႁႆႈတိၵ်းတိၵ်း၊ မိူဝ်ႈႁႆႈလႆႈ ၼမ်ႉတႃဢွၵ်ႇသမ်ႉ ၽူႈၵူၼ်းထၢႆႇငဝ်းတူင်ႉၶဝ်ပႆႇတူဝ်ႈတၼ်း၊ ၽိူဝ်ႇၶဝ် တူဝ်ႈတၼ်း ႁႆႈယူႇၵေႃႈၼမ်ႉတႃသမ်ႉဢမ်ႇဢွၵ်ႇ၊ ၵႃႈၽူႈၵမ်ၵပ်းမၼ်းဢမ်ႇထုၵ်ႇၸႂ်ၼၼ်ႉ လႆႈႁႆႈယူႇ တိၵ်းတိၵ်း။ ၵူၺ်းၵႃႈ ႁဵတ်းၵၢၼ်သင်ၵေႃႈယဝ်ႉ ၵၢၼ်ငၢႆႈငၢႆႈၼၼ်ႉ ဢမ်ႇတွၼ်ႉမီး၊ ၵူၺ်းၵႃႈ ပေႃးၶတ်းၸႂ်ၵေႃႈ တိုၼ်းတေပူၼ်ႉလႆႈတၢင်းယၢပ်ႇၽိုတ်ႇယူႇၼႆ- လွင်ႈၼႆႉ ဢဝ်သႂ်ႇဝႆႉၼႂ်းၸႂ်သေ လႆႈၶတ်းၸႂ်မႃး။ ၽိူဝ်ႇလႆႈမႃး ႁၼ်ၶိုၼ်း ၽွၼ်းပၢင်ႈမၼ်း ဢၼ်ဢွၵ်ႇမႃးၸိူင်ႉၼႆၵေႃႈ မီးတၢင်းႁၢၼ်ႉၸႂ်တႄႉတႄႉ၊ ႁိူဝ်ႉပေႃးႁၢႆၵႂႃႇ- ဝႃႈၼႆ။

ၼွင်ႉၼႅၼ်းၼႆႉ လုၵ်ႉမိူင်းတႆးၶဝ်ႈႁဵတ်းၵၢၼ်မိူင်းထႆး လႆႈၶၢဝ်းတၢင်း 8 ပီပၢႆ။ ပူၼ်ႉမႃးမွၵ်ႈ 1-2 ပီၼႆႉ လႆႈထူပ်း ၵၼ်တင်းၸုမ်းထၢႆႇႁၢင်ႈ ပီႈၼွင်ႉၵူၼ်းထႆးၵဵင်းမႆႇသေ ႁွင်ႉၵႂႃႇထၢႆႇႁၢင်ႈၼၢင်းငၢမ်းလဝ်း (Model) သေ ၸိုဝ်ႈယႂ်ႇလိုဝ်းလင်မႃးၼႂ်း တူင်ႇဝူင်းဢွၼ်ႊလၢႆႊ။ တေႃႇထိုင်မိူဝ်ႈလဵဝ်ၼႆႉ လႆႈႁွတ်ႈၽႅဝ်မႃးၼႂ်းတူင်ႇဝူင်း ပၢႆးမွၼ်း ထၢႆႇငဝ်းတူင်ႉလူင်။ ၼွၵ်ႈသေၼၼ်ႉ လႆႈထၢႆႇၶူဝ်းသၼႃး ယႃႈတႃးႁူဝ် သလ်ႊသိလ်ႊ (Sunsilk) ၼႂ်းထီႊဝီႊ (TV) ဢၼ်ပဵၼ်ၵၢၼ်ၸုင်ၸၼ်ၸႂ် ႁႂ်ႈၵူၼ်းတင်းၼမ်ၶႂ်ႈသိုဝ်ႉၶူဝ်းၶွင်မႃး။ လိူဝ်သေၼၼ်ႉ ၶွမ်ႊပၼီႊ ဢႃႊ သယၢမ်ႊ တိတ်းတေႃႇၵပ်းသိုပ်ႇဝႆႉ ႁႂ်ႈမၼ်းၼၢင်းႁွင်ႉဢွၵ်ႇၽဵင်းၵႂၢမ်းထႅင်ႈ- ၼွင်ႉၼႅၼ်း လၢတ်ႈၼႄၼင်ႇၼႆ။