ၾၢႆႇမၢႆမီႈလႄႈၾၢႆႇႁူမ်ႇလူမ်ႈ ၶွင်တပ်ႉပလိၵ်ႈ မိူင်းၸိုင်ႈတႆး ႁဵတ်းပၢင်သပ်းၸႅင်ႈၶၢဝ်ႇ တီႈဝဵင်းတူၼ်ႈတီး မိူဝ်ႈႁၢင်လိူၼ်ၼိူဝ်ႊဝႅမ်ႊၿိူဝ်ႊၼႆႉ။ သပ်းၸႅင်ႈၼႄဝႃႈ  ၼႂ်းပီ 2014 ၼႆႉၵူၺ်း၊ တီႉၺွပ်းလႆႈယႃႈမဝ်းၵမ်ၼႂ်း မိူင်းတႆး 2 ႁဵင်ပွၵ်ႈပၢႆ။

ဢၼ်ၸႂ်ႉ သူႇ သမ်း ၵိၼ်ယႃႈမဝ်းၵမ်သေ မဝ်း ယွင်ႇယႃႈမဝ်းၵမ်သေ ၶႃႈႁႅမ်တၢႆၵူၼ်းလႄႈ ပဵၼ်ၶၻီး (ဢမု) ၼၼ်ႉ လွင်ႈၵၼ်ႉၸၼ်လူလၢႆၼၢင်းယိင်းၼႆႉ ၼမ်လိူဝ်တၢင်ႇပိူင်- ၽူႈၵွၼ်းပလိၵ်ႈ ဝိၼ်းထုၼ်း လၢတ်ႈ။

ပၢင်သပ်းလႅင်းၸႅင်ႈၶၢဝ်ႇ

ၵူၼ်းထုင်ႉပူင်းၵေႃႉၼိုင်ႈလၢတ်ႈဝႃႈ- ဢၼ်သွင်ႁဵင်ၶၻီး (ဢမု)ပၢႆၼႆႉ ပဵၼ်ၾၢႆႇပလိၵ်ႈၶဝ်ႁၼ် ၶဝ်တီႉၺွပ်း လႆႈသေ ၶဝ်လၢတ်ႈမႃးၵူၺ်း။ ဢၼ်ၶဝ်ဢမ်ႇတီႉလႆႈ၊ ဢၼ်သူႇ သမ်း ၵိၼ်ယႃႈယူႇၼႂ်းဝၢၼ်ႈ ၼႂ်းသူၼ်ၼႆႉ မီးထႅင်ႈတင်းၼမ်တင်းလၢႆ၊ မိူၼ်ၼင်ႇႁူဝ်ၵႄႇမၼ်း ၶဝ်ဢမ်ႇၵႂႃႇတီႉ၊ ၶဝ်ၵႂႃႇတီႈပၢႆယွႆႈမၼ်းၵူၺ်း၊ ၵူၼ်းၶၢႆမၼ်း တႄႉတႄႉ ဢၼ်ၶဝ်ဢမ်ႇတီႉသေပွႆႇပႅတ်ႈၵေႃႈယင်းမီး- ဝႃႈၼႆ။

ဢၼ်သပ်းၸႅင်ႈၶၢဝ်ႇသေ ဢွၵ်ႇၽိုၼ်လိၵ်ႈၼႄတင်းၼမ်ၼၼ်ႉဝႃႈ- ၾၢႆႇပလိၵ်ႈ တီႇယႃႉသူၼ်ယႃႈတီႈၼႂ်း ၸႄႈတွၼ်ႈတူၼ်ႈတီး/ လွႆလႅမ်/ ၵဵင်းတုင်ၼႆႉ တင်းၼမ်ဢေႇၵႃႉမၼ်းမွၵ်ႈ 9,900 ။ ၼႂ်းၼၼ်ႉ ၼမ်သုတ်း ပဵၼ်ၼႂ်းၸႄႈဝဵင်းသီႇသႅင်ႇ/ ပၢင်လွင်း/ ႁူဝ်ပူင်း ဢၼ်မီးၼႂ်းၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း။