ၵူၼ်းဝၢၼ်ႈတၢတ်ႇမွၵ်ႇ ၸႄႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း၊ ၵႂႃႇႁႆႈၵႂႃႇသူၼ်ယဝ်ႉ ပွၵ်ႈႁိူၼ်း၊ ၺႃးသိုၵ်းမၢၼ်ႈၸွမ်းတၢင်းသေ သိုၵ်းမၢၼ်ႈတီႉၺွပ်း ဢဝ်ၵႂႃႇထၢမ်ပေႃႉထုပ်ႉ ၶၢဝ်းတၢင်းၼိုင်ႈလိူၼ် ၸင်ႇပွႆႇပွၵ်ႈၶိုၼ်းႁိူၼ်း။

ၸၢႆးမိၼ်ႉၵျေႃႇ ၵေႃႉထုၵ်ႇသိုၵ်းမၢၼ်ႈတီႉၺွပ်းၵႂႃႇ တွင်ႈထၢမ် ပေႃႉထုပ်ႉ

ပူၼ်ႉမႃးၽွင်းႁူဝ်လိူၼ်ၼူဝ်ႊဝႅမ်ႊၿိူဝ်ႊ (2014)ၼႆႉၸၢႆးမိၼ်ႉၵျေႃႇ၊ လုၵ်ႈလုင်းယၼ်ႇၼ+ပႃႈၶမ်းသႃႇ၊ ယူႇဝၢၼ်ႈတၢတ်ႇမွၵ်ႇ ၵႂႃႇႁႆႈၵႂႃႇသူၼ်သေပွၵ်ႈၶိုၼ်းႁိူၼ်း၊ ၸွမ်းတၢင်းမႃးႁိုၵ်ႉၺႃးသၢႆသိုၵ်းမၢၼ်ႈ ပႃႈတႂ်ႈတိူင်းသိုၵ်းဝၼ်းဢွၵ်ႇၵၢင် (ယလၶ) ၶူဝ်လမ် ဢၼ်ဢွၵ်ႇၼႃႈသိုၵ်းသေပွၵ်ႈၶိုၼ်း၊ သိုၵ်းမၢၼ်ႈ ထၢင်ႇထိူမ်ပဵၼ်သိုၵ်းတႆးၼႆသေ တီႉၺွပ်းၵႂႃႇ တွင်ႈထၢမ် ပေႃႉထုပ်ႉ ႁိုင်လိူၼ်ၼိုင်ႈယဝ်ႉ ၸင်ႇပွႆႇၶိုၼ်း။

ၵဵဝ်ႇၵပ်းလွင်ႈၼႆႉ ပီႈၼွင်ႉၸမ်ၸႂ်မၼ်းၸၢႆး (ၸၢႆးမိၼ်ႉၵျေႃႇ) လၢတ်ႈဝႃႈ- သိုၵ်းမၢၼ်ႈႁၼ်ၸွမ်းတၢင်းသေ တီႉၺွပ်းၵႂႃႇ မိူဝ်ႈႁူဝ်လိူၼ်ၼူဝ်ႊဝႅမ်ႊၿိူဝ်ႊ (2014)၊ ၽိူဝ်ႇလိူၼ်ၻီႊသႅမ်ႊၿိူဝ်ႊ ဝၼ်းတီႈ 11 ဝၼ်းၶွပ်ႈတဵမ်လိူၼ်ၼႆႉ ပွႆႇမၼ်းမႃးၶိုၼ်း။ မၼ်းမႃးလၢတ်ႈၼႄဝႃႈ သိုၵ်းမၢၼ်ႈထၢင်ႇထိူမ်ဝႃႈ ပဵၼ်သိုၵ်းတႆးၼႆသေတီႉၺွပ်းၵႂႃႇ၊ ထတ်းထၢမ်မၼ်းဝႃႈ ပဵၼ်သိုၵ်းတႆးႁႃႉ၊ ၵပ်းသိုပ်ႇတိတ်းတေႃႇၵၼ်တင်း သိုၵ်းတႆးႁႃႉၸိူဝ်းၼႆႉ ပေႃႉထုပ်ႉသေထၢမ်ၵူႈဝၼ်း။ မႃးထိုင်ႁိူၼ်းယဝ်ႉ ၽႂ်ထၢမ်သင်ၵေႃႈ ဢမ်ႇလႆႈၶေႃႈသင်- ဝႃႈၼႆ။

ထဝ်ႈဝၢၼ်ႈထဝ်ႈၼႃး ၵူၼ်းတၢတ်ႇမွၵ်ႇ ဢၼ်ႁွတ်ႈတီႈလၢႆးၶႃႈ ၵေႃႉၼိုင်ႈၵေႃႈလၢတ်ႈဝႃႈ- ၸၢႆးမိၼ်ႉၵျေႃႇၼႆႉ မၼ်းပဵၼ်ၸဝ်ႈႁႆႈၸဝ်ႈၼႃး ႁဵတ်းၵိၼ်ၵၢၼ်ႁႆႈ သႆႉၵိၼ်ၵၢၼ်ၼႃးၵူၺ်း၊ မၼ်းဢမ်ႇၸႂ်ႈသိုၵ်းတႆး၊ ဢမ်ႇၵဵဝ်ႇၵပ်းသိုၵ်း ဢမ်ႇတိတ်းတေႃႇၵပ်းသိုပ်ႇသိုၵ်းသင်၊ မၼ်းၼႆႉဢႃႇယုမီးမွၵ်ႈ 30 ၊ မၼ်းပဵၼ်ၵူၼ်းမင်ႈသင်ႈ၊ ပဵၼ်ၵူၼ်းပၢႆးယူႇလီၶႅမ်ႉလႅပ်ႈၵေႃႉၼိုင်ႈ- ဝႃႈၼႆ။

ယူႇတီႈၽူႈမီးပုၼ်ႈၽွၼ်း လုမ်းတိတ်းတေႃႇလႄႈပွင်ႇၶၢဝ်ႇငၢဝ်း ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တီႈၶူဝ်လမ် (ၶူဝ်ၶမ်း) ၵေႃႉၼိုင်ႈၵေႃႈလၢတ်ႈဝႃႈ- ပေႃးဝႃႈပီႈၼွင်ႉၵူၼ်းဝၢၼ်ႈ ၵူၼ်းသူၼ်ၶဝ်ထုၵ်ႇတီႉၺွပ်းၸိူင်ႉၼႆၼႆႉ ပေႃႈမႄႈပီႈၼွင်ႉမၼ်း တင်းၾၢႆႇၽွင်းငမ်း၊ တင်းၵူၼ်းဝၢၼ်ႈၵမ်ႈၽွင်ႈ လီလႆႈမႃးတီႈလုမ်း RCSS ႁဝ်းသေ ဢုပ်ႇၵုမ်ႁဝ်း၊ ႁဝ်းၵေႃႈၸင်ႇတေၸၢင်ႈၸွႆႈထႅမ်ပၼ်။ ၼင်ႇႁိုဝ်တေၸၢင်ႈၸွႆႈထႅမ်ပၼ် တၢင်းယၢပ်ႇၽိုတ်ႇၵူၼ်းမိူင်းလႆႈၼၼ်ႉ ဝႆႉယဝ်ႉ- ဝႃႈၼႆ။

ၵူၼ်းမိူင်းလၢႆးၶႃႈ ၶဝ်ၵေႃႈလၢတ်ႈဝႃႈ- ၼႂ်းႁၢင်ပီၼႆႉ ၵူၼ်းဝၢၼ်ႈ ဢၼ်ထုၵ်ႇသိုၵ်းမၢၼ်ႈထၢင်ႇထိူမ်ဝႃႈ ပဵၼ်သိုၵ်းတႆးၼႆသေ တီႉၺွပ်းၵႂႃႇထဵတ်ႈထၢမ်ၼႆႉၵေႃႈ ႁၼ်ၼမ်မႃးၶိုၼ်းတႄႉတႄႉ- ဝႃႈၼႆ။