ၽွင်းတႅၼ်းပႃႊတီႊသၢင်ႇသီႈ (USDP) တင်းလုၵ်ႈၸုမ်း ႁူမ်ႈ 5 ၵေႃႉ၊ လူင်းပိုၼ်ႉတီႈ ၵႂႃႇသူၼ်းတုမ်ၵူၼ်းဝၢၼ်ႈ တီႈဝၢၼ်ႈၼမ်ႉထမူဝ် ၸႄႈဝဵင်းလွႆလႅမ်၊ တေသိူဝ်ႇတၢင်းပၼ်ၵူၼ်းဝၢၼ်ႈ။

မိူဝ်ႈဝၼ်းတီႈ 12/12/2014 ၶၢဝ်းယၢမ်း 11:00 မူင်း၊ ၽွင်းတႅၼ်းသၽႃးၵူၼ်းမိူင်း (ပျီႇတူႉလုတ်ႉတေႃႇ) ဢူးၶိၼ်ႇမွင်ႇတီႇ၊ ၽွင်းတႅၼ်းသၽႃးၸႄႈမိူင်း (ပျီႇၼႄႇလုတ်ႉတေႃႇ) ဢူးၶုၼ်ႇတီႇၵေႃး လႄႈ လုၵ်ႈၸုမ်းပႃႊတီႊသၢင်ႇသီႈ 5 ၵေႃႉ၊ လူင်းပိုၼ်ႉတီႈ ၵႂႃႇႁွတ်ႈဝၢၼ်ႈၼမ်ႉထမူဝ် တီႈဝတ်ႉၼမ်ႉထမူဝ်သေ ႁွင်ႉပၢင်ဢုပ်ႇဢူဝ်း တိုၵ်းသူၼ်းၵူၼ်းဝၢၼ်ႈ။ ၵူၼ်းဝၢၼ်ႈဢၼ်မႃးၶဝ်ႈႁူမ်ႈမီး 60 ၵေႃႉ၊  ပႃးၵူၼ်းဝၢၼ်ႈပၢင်လႅမ်း၊ ဝၢၼ်ႈၼမ်ႉထမူဝ်၊ ဝၢၼ်ႈၶၢႆးမႆႉသေႃႉ ၸိူဝ်းၼႆႉ။

ဢွၼ်တၢင်းသုတ်း ၸိူဝ်းၶဝ် (ပႃႊတီႊသၢင်ႇသီႈ)လႄႈ ၵူၼ်းဝၢၼ်ႈတင်းသဵင်ႈ ဢွၼ်ၵၼ်လမ်ႁူဝ် (ၵၼ်ႇတေႃး) ႁပ်ႉသိလ်ႁႃႈတီႈ သြႃႇၸဝ်ႈဝၢၼ်ႈၼမ်ႉထမူဝ်။ တႄႇပၢင်ၵုမ်ယၢမ်း 12 မူင်း၊ ယဝ်ႉတူဝ်ႈၵႂႃႇဝၢႆးဝၼ်းယၢမ်း 3 မူင်း။

တီႈပၢင်ၵုမ်ၼၼ်ႉ ၽွင်းတႅၼ်းသၽႃးၵူၼ်းမိူင်း ဢူးၶိၼ်ႇမွင်ႇတီႇ လၢတ်ႈၶေႃႈၵႂၢမ်း ၵဵဝ်ႇၵပ်းလွင်ႈဝၢၼ်ႈမိူင်း၊ သပ်းလႅင်းၼႄၼႃႈၵၢၼ်ၼႂ်းသၽႃး။ ပီ 2015 ၼႆႉ တေသိူဝ်ႇပၼ်သဵၼ်ႈတၢင်း ၼႂ်းၵႄႈဝၢၼ်ႈၼမ်ႉထမူဝ် လႄႈဝၢၼ်ႈၶၢႆးမႆႉသေႃႉ၊ တေဢဝ်ၼမ်ႉမႃးပၼ် ဝၢၼ်ႈၼမ်ႉထမူဝ်- ၼႆယဝ်ႉ။

ဢူးၶုၼ်ႇတီႇၵေႃး သပ်းလႅင်းၼႄပၼ်ၾၢႆႇၽႃသႃပဢူဝ်း၊ ၸၢႆးသႅင်မူၼ်း ဝဵင်းမိူင်းပွၼ် သပ်းလႅင်းၼႄၾၢႆႇတႆး။ ႁူဝ်ပဝ်ႈဢိူင်ႇၼမ်ႉထမူဝ် ၸၢႆးသၢင်ႇၶိတ်ႈ လၢတ်ႈၼႄၵူၼ်းဝၢၼ်ႈဝႃႈ - သင်ဝႃႈႁဝ်းၶႂ်ႈယွၼ်းသင်ၼႆၵေႃႈ ႁႂ်ႈလႆႈႁိပ်ႈၼႅတ်ႈသေ တၢင်ႇပၼ်ၵူၼ်းလူင် ႁႂ်ႈလႆႈႁူႉ- ဝႃႈၼႆ။

ၼွၵ်ႈသေၼၼ်ႉ ၵူၼ်းဝၢၼ်ႈလႆႈတုၵ်းယွၼ်းထႅင်ႈ ႁႂ်ႈသိူဝ်ႇပၼ်သဵၼ်ႈတၢင်းဝၢၼ်ႈၼမ်ႉထမူဝ် တေႃႇထိုင်ဝၢၼ်ႈလူင်ဢွင်။ ၸၢႆးသၢင်ႇၶိတ်ႈ တုၵ်းယွၼ်းႁႂ်ႈလႆႈႁဵတ်းၶူဝ် တႃႇဝၢၼ်ႈပၢင်လႅမ်း။ ဝၢႆးပၢင်ၵုမ်ယဝ်ႉ ၸုမ်းဢူးၶိၼ်ႇမွင်ႇတီႇၶဝ် ပွၵ်ႈၶိုၼ်းမိူဝ်းၵႂႃႇဝဵင်းမိူင်းပွၼ် ယၢမ်းဝၢႆးဝၼ်း 3 မူင်းၶိုင်ႈ- ၼႆယဝ်ႉ။