ပႃႊတီႊႁူဝ်သိူဝ် (SNLD) တေၶဝ်ႈလိူၵ်ႈတင်ႈ ၼႂ်းပၢင်လိူၵ်ႈတင်ႈပီ 2015 ၊ ၸွမ်းၼင်ႇငဝ်းလၢႆးပၼ်မႃး လႄႈ ဢၼ်ထုၵ်ႇလီႁဵတ်းသၢင်ႈ တႃႇသုၼ်ႇလႆႈ ၵူၼ်းမိူင်း။

ၽူႈၶၢၼ်ပၢၵ်ႇ ငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ၸၢႆးလဵၵ်ႉ လၢတ်ႈဝႃႈ- ပႃႊတီႊႁူဝ်သိူဝ်းႁဝ်းၶႃႈ တေၶဝ်ႈလိူၵ်ႈတင်ႈ ၼႂ်းမိူင်းတႆးပတ်းပိုၼ်ႉၵူၺ်းပႆႇပေႃး၊ တေၶဝ်ႈလိူၵ်ႈတင်ႈပႃး ၼႂ်းၸႄႈမိူင်းၶၢင်၊ ၸႄႈမိူင်းယၢင်းလႅင်၊ တိူင်းမၼ်းတလေး (တိူင်းဝဵင်းတႃႈလိူဝ်ႇ) လႄႈ တိူင်းၸၵႅင်းပႃးထႅင်ႈ- ဝႃႈၼႆ။

မိူဝ်ႈတႄႇမၼ်းဝႃႈ ပေႃးဢမ်ႇမူၼ်ႉမႄး ပိူင်ငဝ်ႈပိုင်းမိူင်း 2008 တေဢမ်ႇၶဝ်ႈလိူၵ်ႈတင်ႈ။ ၵူၺ်းၵႃႈ ယွၼ်ႉငဝ်းလၢႆးသူၼ်းဢီး ႁႂ်ႈပဵၼ်ၶဝ်ႈလိူၵ်ႈတင်ႈလႄႈ ၸင်ႇလႆႈတႅပ်းတတ်းဝႃႈတေၶဝ်ႈလိူၵ်ႈတင်ႈ၊ ၼင်ႇႁိုဝ်တေပဵၼ်မႃးလွင်ႈၽဵင်ႇပဵင်း ဢၼ်ယိူင်းမၢႆႁဝ်းၶႃႈမီးဝႆႉၼၼ်ႉ။ ၵွပ်ႈၼၼ် ႁဝ်းၶႃႈလႆႈဝူၼ်ႉၶိုၼ်း ဢၼ်ထုၵ်ႇလီပဵၼ်/လီႁဵတ်းသေ တေႁဵတ်းသၢင်ႈၵႂႃႇ- ၸၢႆးလဵၵ်ႉ သိုပ်ႇလၢတ်ႈ။

ၵႃႈပူၼ်ႉမႃး လၢႆၾၢႆႇထၢမ်ဝႃႈ ပေႃးဝႃႈပႃႊတီႊႁူဝ်သိူဝ် (SNLD) တေၶဝ်ႈလိူၵ်ႈတင်ႈၼႆ ၸွင်ႇတေ ဢုပ်ႇၵုမ်ၵၼ်သေ ၸႅၵ်ႇၼႃႈလိၼ်ပိုၼ်ႉတီႈၵၼ်တင်း ပႃႊတီႊသိူဝ်ၽိူၵ်ႇ (SNDP) ။

ၵဵဝ်ႇၵပ်းလွင်ႈၼႆႉ ၸၢႆးလဵၵ်ႉလၢတ်ႈဝႃႈ- ယွၼ်ႉပိူဝ်ႈပႃႊတီႊႁဝ်းၶႃႈၼႆႉ ပဵၼ်ပႃႊတီႊယိပ်းဝႆႉပိူင် ၻီႊမူဝ်ႊၶရေႊၸီႊလႄႈ ဢဝ်ၵၢင်ၸႂ်ၵူၼ်းမိူင်းတႅပ်းတတ်း၊ ဢဝ်ၵၢင်ၸႂ်ၵူၼ်းမိူင်းတွတ်ႈၶႅပ်းပၼ်ၵူၺ်း၊ ၵူၼ်းမိူင်းပၼ်ႁႅင်းပႃႊတီႊလႂ်ၵေႃႈ တေတွတ်ႈၶႅပ်းၵၢင်ၸႂ်ပၼ်ပႃႊတီႊၼၼ်ႉ။ ၼင်ႇႁိုဝ်ၵူၼ်းမိူင်း တေဢမ်ႇလိုမ်းဝႃႈ ၶဝ်မီးသုၼ်ႇလႆႈတွတ်ႈၶႅပ်းၵၢင်ၸႂ် တွၼ်ႈတႃႇၸိူဝ်ႉၸၢတ်ႈၸၢဝ်းၶိူဝ်း၊ သုၼ်ႇလႆႈ ၻီႊမူဝ်ႊၶရေႊၸီႊလႄႈ သုၼ်ႇလႆႈတိုဝ်ႉတၢင်းၸိူဝ်းၼၼ်ႉ ႁဝ်းၶႃႈလႆႈသပ်းလႅင်းၼႄမူတ်းယဝ်ႉ၊ တႃႇတေတွတ်ႈၶႅပ်းၵၢင်ၸႂ်ၼႆႉ သွၼ်ႇႁႂ်ႈပီႈၼွင်ႉၵူၼ်းဝၢၼ်ႈၵူၼ်းမိူင်း ယႃႇပေၵၢတ်ႈၼၼ်ႉၵူၺ်း- ဝႃႈၼႆ။

ပႃႊတီႊႁူဝ်သိူဝ် (SNLD) ၼႆႉ တင်ႈတႄႇဝၼ်းတီႈ 1-10/12/2014 ႁူဝ်ပဝ်ႈၸဝ်ႈၶုၼ်ထုၼ်းဢူး ဢွၼ်ႁူဝ်မူႇၸုမ်း/လုၵ်ႈၼွင်ႉသေ လူင်းသူၼ်းတုမ် ႁူပ်ႉထူပ်းပီႈၼွင်ႉၵူၼ်းမိူင်းတႆး တင်ႈတႄႇပွတ်းၵၢင် ၶိုၼ်ႈၵႂႃႇထိုင်ပွတ်းလႃႈသဵဝ်ႈ။

ၾၢႆႇၼိုင်ႈတၢင်းၼိုင်ႈ၊ မိူဝ်ႈပၢင်ၵုမ်ၽူႈၼမ်းတႆး ၼႂ်းလိူၼ်ဢွၵ်ႊထူဝ်ႊၿိူဝ်ႊ တီႈမိူင်းၵွၵ်ႇ (ၵုင်းထဵပ်ႈ) ၼၼ်ႉၵေႃႈ လၢႆၵေႃႉလၢႆၾၢႆႇလၢတ်ႈဝႃႈ- ဢမ်ႇၶႂ်ႈႁႂ်ႈသူၸဝ်ႈၶေႉၵၼ် ၼႂ်းပိုၼ်ႉတီႈလဵဝ်၊ ပေႃးသူၸဝ်ႈၶေႉၵၼ် ၼႂ်းပိုၼ်ႉတီႈလဵဝ်ၸိုင် ၵူဝ်ၶၼႅၼ်ႊသဵင်တႅၵ်ႇသေ ၽႂ်ၵေႃႈဢမ်ႇလႆႈ၊ ပိူၼ်ႈတေလႆႈၵႂႃႇ၊ ပိူၼ်ႈၸၢင်ႈပေႉႁဝ်း။ ပေႃးႁဝ်းဢမ်ႇလႆႈၶေႉၵၼ် တိုဝ်ႉတၢင်းႁဝ်းတႃႇတေလႆႈမီးၼမ်- ၼႆယူႇ။