ပၢင်ပွႆးဝၼ်းၵိူတ်ႇ ၸဝ်ႈတူၼ်ၶူးလူင် Prof. Dr. ၶမ်းမၢႆ ထမ်မသႃမိ ဝတ်ႉဢွၵ်ႊသ်ၾိူတ်ႊ ပုတ်ႉထဝိႁႃရ မိူင်းဢင်းၵိတ်ႉ၊ ၶွပ်ႈၶူပ်ႇ 50 ပီ၊ ပီၵွၼ်းၶမ်း၊ တေၸတ်းႁဵတ်းတီႈ ဝတ်ႉ/ၵျွင်းႁူဝ်လွႆ ဝၢၼ်ႈၼွင်ပၢင်ႇ၊ ပွၵ်ႉ 7 ဝဵင်းလၢႆးၶႃႈ ၸိုင်ႈတႆးပွတ်းၸၢၼ်း။

ပၢင်ပွႆးၼႆႉ တႄႇဝၼ်းတီႈ 17-30/12/2014 (လိူၼ်ၸဵင်လွင်ႈ 11 ၶမ်ႈ တေႃႇထိုင်လိူၼ်ၵမ်မႂ်ႇ 10 ၶမ်ႈ) ။ ၼႂ်းၽိုၼ်လိၵ်ႈဝွၵ်ႇၸိူၼ်း (ၽိတ်ႈမွၵ်ႇ) လၢတ်ႈဝႃႈ- ႁဝ်းၶႃႈ သြႃႇတၵ်ႉၵႃႇ တူင်ႇဝဵင်းလၢႆးၶႃႈတင်းသဵင်ႈလႄႈ လုၵ်ႉၼွင်ႉပွင်ႈပၢႆ၊ ႁူမ်ႈတင်းသတ်ႉထႃးတီႈၸမ်တီႈၵႆ ၼႂ်းၸၢဝ်းၶိူဝ်းတင်းလၢႆ လၢႆလၢႆမိူင်းႁူမ်ႈၵၼ်သေ တေႁဵတ်းပဵၼ်ပၢင်ပွႆး ႁူမ်ႈၸူမ်းဝၼ်းၵိူတ်ႇ ယွင်ႈယေႃးမုၼ် ၸဝ်ႈတူၼ်ၶူးလူင် Prof. Dr. ၶမ်းမၢႆ ထမ်မသႃမိ ဢႃႇယုထူၼ်ႈတဵမ် 50 ပီ၊ ပီၵွၼ်းၶမ်းလႄႈ ပၢင်ၵုမ်ၶွၼ်ႊၾရႅၼ်ႊလိၵ်ႈလူင် ပွၵ်ႈၵမ်း 2 ။ ၶႅၼ်းတေႃႈ ပီႈၼွင်ႉ ၸဝ်ႈၸေႇတၼႃႇ ၽူႈၵူၼ်းလီႁဝ်းၶဝ် ယေႃးၶိင်းမႃးၶဝ်ႈႁူမ်ႈသေ ႁပ်ႉဢဝ်ၽွၼ်းလီၵုသူလ် ၸွမ်းႁဝ်းၶႃႈ ယႂ်ႇယႂ်ႇၼမ်ၼမ် ၸွမ်းၼင်ႇၶပ်းမၢႆၼႆႉသေၵမ်း- ၼႆယဝ်ႉ။

ၶပ်းမၢႆပၢင်ပွႆး
ဝၼ်းတီႈ 17-18-19/12/2014 မီးပၢင်ၵုမ် ၶွၼ်ႊၾရႅၼ်ႊ ပႃႇလိ လႄႈ ပၢင်သွၼ်ဝိပသ်သၼႃ ဝဵင်းတူၼ်ႈတီး။

ပၢင်ပွႆးပီၵွၼ်းၶမ်း တီႈလၢႆးၶႃႈ
ဝၼ်းတီႈ 20/12/2014 ၵၢင်ၼႂ် ယၢမ်း 09:00 မူင်း မီးပၢင်မင်ႇၵလႃႇ ပိုတ်ႇပၢႆႉပွႆးဝၼ်းၵိူတ်ႇ၊ ပိုတ်ႇပၢႆႉႁွင်ႈၼႄပိုၼ်း တီႈဝတ်ႉ/ၵျွင်းႁူဝ်လွႆလႄႈ ပိုတ်ႇႁွင်ႈယႃမႂ်ႇသင်ၶ၊ ပိုတ်ႇႁွင်ႈယႃဢဝ်ၵုသူလ် ၾၢႆႇၶဵဝ်ႈ၊ တႃလႄႈယူတ်းယႃၵူႈလွင်ႈလွင်ႈ၊ ဝဵင်းလၢႆးၶႃႈ။

ဝၼ်းတီႈ 20-23/12/2014 (ၶၢဝ်းတၢင်း 4 ဝၼ်း) တႄႇၵၢင်ၼႂ်ယၢမ်း 08:00 မူင်း တေႃႇႁူဝ်ၶမ်ႈ ယၢမ်း 4 မူင်း၊ မီးပၢင်ယူတ်းယႃဢဝ်ၵုသူလ် ၾၢႆႇၶဵဝ်ႈ၊ တႃလႄႈ ယူတ်းယႃပၼ်ၵူႈလွင်ႈလွင်ႈ ၵႂႃႇၵူႈဝၼ်း။

ဝၼ်းတီႈ 21/12/2014 ၵၢင်ၼႂ်ယၢမ်း 08:00 မူင်း၊ မီးပၢင်ယၢတ်ႇၼမ်ႉ တၢင်ႇထီး ထတ်ႈၸေးၻီးမင်ႇၵလႃႇ ၸုမ်ႉမိူင်း လႄႈ ထတ်ႈၸေးၻီးပေႃးရႃႇၼ။ မူႇၸုမ်း “ဝူင်းမဵတ်ႉတႃႇ မူႇၸေႈ” ပိုတ်ႇႁွင်ႈယူတ်းယႃ ဢဝ်ၵုသူလ် ၾၢႆႇၶဵဝ်ႈ။

ဝၼ်းတီႈ 21-26/12/2014 တၢမ်းၶမ်ႈ 5 မူင်းၵူႈၶမ်ႈ ၸုမ်းဝႆႈၽြႃးႁူမ်ႈၶေႃႈ ဢဝ်လမ်ႇသဵင် ၶူးဝႃးဝုၼ်းၸုမ်ႉ သေ ႁူမ်ႈၵၼ်သုတ်ႇမူၼ်းဝႆႈၽြႃး တီႈၸေႊၻီးပေႃးရႃႇၼ ႁိမ်းၼွင်ၶမ်း။

ဝၼ်းတီႈ 21-24/12/2014 (ၶၢဝ်းတၢင်း 4 ၶမ်ႈ)၊ ယၢမ်းၶမ်ႈ 6 မူင်းၶိုင်ႈ မီးပၢင်ႁေႃးထမ်း/တြႃး ထွမ်ႇတြႃး။

ဝၼ်းတီႈ 25/12/2014 ယၢမ်းၶမ်ႈ 6 မူင်းၶိုင်ႈ၊ မီးပၢင်ႁေႃးၿူးၸႃး(ပူႇၸေႃႇ)လိၵ်ႈလူင်။

ဝၼ်းတီႈ 24-25/12/2014 မီးပၢင်ၼင်ႈတြႃး ၾၢႆႇၵူၼ်းၼုမ်ႇၶဝ်လႄႈ ပၢင်ၼႄလၢႆးႁဵတ်းတၢင်းၵိၼ်ယႅမ်ႉတႆး။ ဝၼ်းတီႈ 23-24-25/12/2014 ၵၢင်ၶမ်ႈ မီးပၢင်မူၼ်ႈသိူဝ်း ပၢႆးမွၼ်းၵဝ်ႇ/မႂ်ႇ (တႃႇသၢမ်ၶိုၼ်း)။

ဝၼ်းသင်ၶၶူပ်းထူၼ်ႈ
ဝၼ်းတီႈ 23/12/2014 သင်ၶၸဝ်ႈၸိူဝ်း ၼိမၼ်တၼ (ၽိတ်ႈပၢင်း) ၸမ်/ၵႆ ယေႃးၶိင်းၽႅဝ်မႃး။

ဝၼ်းႁပ်ႉတွၼ်ႈၶႅၵ်ႇ လႄႈ လူႇတၢၼ်းယၢတ်ႇၼမ်ႉ
ဝၼ်းတီႈ 23-24-25/12/2014 ၵၢင်ၼႂ်ယၢမ်း 8 မူင်း တေႃႇထိုင် 12 မူင်းၵၢင်ဝၼ်း။ တၢမ်းၶမ်ႈ 4 မူင်း တေႃႇထိုင် 6 မူင်း ပိုတ်ႇၵၢတ်ႇၼိပ်ႉပၢၼ်း ႁပ်ႉတွၼ်ႈလဵင်ႉလူ ပီႈၼွင်ႉၶဝ်ႈႁူမ်ႈပၢင်ပွႆး။

ဝၼ်းတီႈ 24/12/2014 ၵၢင်ၼႂ် 8 မူင်း မီးပၢင်ၿူးၸႃး(ပူႇၸေႃႇ) ၵႃရဝလမ်ႁူဝ် (ၵၼ်ႇတေႃး) ၵူၼ်းထဝ်ႈ ဢႃႇယုယႂ်ႇ 70 ၶိုၼ်ႈၼိူဝ် တႃႇ 700 ၵေႃႉ။ ဝၢႆးဝၼ်း 1 မူင်း ယွၼ်းပွလ်း လူႇတၢၼ်းယၢတ်ႇၼမ်ႉ ပွႆးဝၼ်းၵိူတ်ႇၸဝ်ႈၶူးလူင် ၻွၵ်ႊတိူဝ်ႊၶမ်းမၢႆ ထမ်မသႃမိ (ၾၢႆႇမၢၼ်ႈ၊ ၾၢႆႇထႆး၊ ၾၢႆႇဢင်းၵိတ်း)။

ဝၼ်းတီႈ 25/12/2014 ၵၢင်ၼႂ်ယၢမ်း 8 မူင်း၊ ထပ်းၵမ်(ထၢပ်ႈၵၢမ်ႇ) ၿူးၸႃး(ပူႇၸေႃႇ)သြႃႇၸဝ်ႈလူင်ၶဝ် (ၸိူဝ်းယၢမ်ႈပဵၼ်သြႃႇၸဝ်ႈၶူးလူင်မႃး) လႄႈ ၸဝ်ႈၶူးလူင် Prof. Dr. ထမ်မသႃမိ ၶမ်းမၢႆ ။ ဝၢႆးဝၼ်း 1 မူင်း ယွၼ်းသပွလ်းလူႇတၢၼ်းယၢတ်ႇၼမ်ႉ ပွႆးဝၼ်းၵိူတ်ႇ ၸဝ်ႈၶူးလူင် ထမ်မသႃမိ (ၾၢႆႇတႆး)။

ဝၼ်းတီႈ 26/12/2014 ဝၼ်းႁၢင်ႈႁႅၼ်းပၢင်ၵုမ်ၶွၼ်ႊၾရႅၼ်ႊ လႄႈ ဝၢႆးဝၼ်း တေမီးပၢင်သွၼ် လၢႆးႁဵတ်း Catalogue ။

ဝၼ်းတီႈ 27/12/2014 ၵၢင်ၼႂ် မီးပၢင်ပူင်သွၼ်လၢႆးတႅမ်ႈလိၵ်ႈ (Academic Writing Workshop) ။

ဝၼ်းတီႈ 28-29/12/2014 မီးပၢင်ၵုမ်ၶွၼ်ႊၾရႅၼ်ႊ လိၵ်ႈလူင်တႆး ပွၵ်ႈၵမ်း 2 တီႈဝတ်ႉ/ၵျွင်းႁူဝ်လွႆ ဝဵင်းလၢႆးၶႃႈ။

ဝၼ်းတီႈ 30/12/2014 မီးၵၢၼ်ၵႂႃႇဢႅဝ်ႇ လဵပ်ႈႁဵၼ်း ထုင်ႉဝဵင်းမိူင်းၵိုင်။

ပိူဝ်ႈတႃႇ ၸဝ်ႈၽူႈၵူၼ်းလီ၊ ၸဝ်ႈၽူႈၶႂ်ႈႁူႉလွင်ႈတႅတ်ႈတေႃး/ယွႆႈယႅမ်းထႅင်ႈ မိူၼ်ၼင်ႇၶူဝ်းလူႇၶူဝ်းတၢၼ်း ဢၼ်ႁွမ်းတၢၼ်းလႆႈလႄႈသင်၊ တီႈတိတ်းတေႃႇၵပ်းသိုပ်ႇလူႇတၢၼ်းလႄႈသင်၊ ပိုၼ်းၵႅပ်ႈလႄႈၼႃႈၵၢၼ် ၸဝ်ႈတူၼ်ၶူးလူင် ၻွၵ်ႊတိူဝ်ႊထမ်မသႃမိ ၶမ်းမၢႆ လႄႈသင်၊ ၶပ်းမၢႆပၢင်ပွႆးလႄႈသင် ၶႅၼ်းတေႃႈလူဢၢၼ်ႇ ၼႂ်းလိၵ်ႈဝွၵ်ႇၸိူၼ်း (ၽိတ်ႈမွၵ်ႇ) ၼႆႉ။