ၵူၼ်းမိူင်းသွင်ၵေႃႉဢွၵ်ႇတၢင်း ၼုင်ႈသိူဝ်ႈၶူဝ်းမၢႆတွင်း ပီၵွၼ်းၶမ်း ပႃႊတီႊမႂ်ႇသုင်ၸိုင်ႈတႆး (SSPP) ထုၵ်ႇသိုၵ်း မၢၼ်ႈ ပႂ်ႉၶူဝ်ၼမ်ႉပၢင်၊ ႁႄႉၵိုတ်းၵူတ်ႇထတ်း ထဵတ်ႈထၢမ်။

မိူဝ်ႈဝၼ်းတီႈ 12/11/2014 ၸၢႆးၸိင်ႇ လႄႈ ၸၢႆးယုင်း၊ ၵူၼ်းမိူင်းဢၢၵ်ႇ ဢိူင်ႇဝၢၼ်ႈသေႃႉ ၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း၊ ၼုင်ႈသႂ်ႇသိူဝ်ႈၶူဝ်းပီၵွၼ်းၶမ်း ပႃႊတီႊမႂ်ႇသုင်ၸိုင်ႈတႆး (SSPP) သေ ဢွၵ်ႇၶၢဝ်းတၢင်း၊ ထုၵ်ႇသိုၵ်းမၢၼ်ႈ ဢၼ်ပႂ်ႉဝႆႉတီႈၶူဝ်ၼမ်ႉၵတ်း (ၼိူဝ်မႄႈၼမ်ႉပၢင်) ႁႄႉၵိုတ်း ၵူတ်ႇထတ်းထၢမ်ထဵတ်ႈ တင်ႈတႄႇယၢမ်းဝၼ်းတဵင်ႈ တေႃႇထိုင်ႁူဝ်ၶမ်ႈ- ၼႆယဝ်ႉ။

ၵူၼ်းဝၢၼ်ႈသွင်ၵေႃႉၼႆႉ သႂ်ႇသိူဝ်ႈၶူဝ်းပီၵွၼ်းၶမ်း SSPP သေ လတ်းမႃးၼႃႈတပ်ႉ ၶူဝ်ၼမ်ႉၵတ်း ၶူဝ်ၶၢမ်ႈ ၼမ်ႉပၢင်။ သိုၵ်းမၢၼ်ႈဢၼ်ပႂ်ႉၶူဝ်ၼၼ်ႉ ႁႄႉၵိုတ်းႁွင်ႉဝႆႉသေထဵတ်ႈထၢမ်၊ ပဵၼ်ၵူၼ်းဝၢၼ်ႈတီႈလႂ်၊ ၽူႈၵွၼ်း ဝၢၼ်ႈၼႃးၸၢမ် ၵႂႃႇလၢတ်ႈဝႃႈမ် ၵူၼ်းဝၢၼ်ႈသွင်ၵေႃႉၼႆႉ ႁဝ်းႁူႉၸၵ်းၶဝ်ယူႇ၊ ၽူႈၵွၼ်းဝၢၼ်ႈႁပ်ႉႁွင်း သူၶဝ်ပဵၼ်သိုၵ်းႁႃႉ၊ ပဵၼ်ၵူၼ်းသင်ၸိူဝ်းၼႆႉ တင်ႈတႄႇၵၢၼ်ဝၼ်းတဵင်ႈ တေႃႇထိုင်ႁူဝ်ၶမ်ႈ။ လွင်ႈၼႆႉ ဢဝ်ၶႃသွင်ၵေႃႉသေ ၸင်ႇလႆႈဢွၵ်ႇမိူဝ်း- ဝႃႈၼႆ။

ၵပ်းၵၢႆႇလွင်ႈၼႆႉ မိူဝ်ႈဝၼ်းတီႈ 24/11/2014 တၢင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၸတ်းပၢင်ပွႆးၶုၵ်းထူပ်း ပီၵွၼ်းၶမ်း (ၶွပ်ႈၶူပ်ႇ 50 ပီ) SSPP တီႈငဝ်ႈငုၼ်းဝၢၼ်ႈႁႆး။ မီးၵၢၼ် ၸႅၵ်ႇသိူဝ်ႈၶူဝ်း တီႈမၢႆတွင်းပီၵွၼ်းၶမ်း ပၼ်ၵူၼ်းမိူင်း ၸိူဝ်းၶဝ်ႈႁူမ်ႈပၢင်ပွႆး။ သိူဝ်ႈပီၵွၼ်းၶမ်း တႃႇၵူၼ်းမိူင်းၼုင်ႈ ပဵၼ်သီလမ် ဢမ်ႇၼၼ် သီၶၢဝ်၊ တႃႈသိုၵ်းၼုင်ႈ ပဵၼ်သီၶဵဝ်။

လွင်ႈၼႆႉ ၵူၼ်းမိူင်းသူႈ ၵေႃႉၼိုင်ႈလၢတ်ႈဝႃႈ- ၵူၼ်းမိူင်းသႂ်ႇသိူဝ်ႈၸိူင်ႉၼႆၼႆႉ မၼ်းဢမ်ႇၸႂ်ႈပဵၼ်ၵူၼ်းသိုၵ်း၊ လႆႈၵႂႃႇၶဝ်ႈႁူမ်ႈပွႆး မိူဝ်ႈပီၵွၼ်းၶမ်း ဢၼ်ၸတ်းမိူဝ်ႈလိူၼ်ဢေႊပရိူဝ်ႊလ် ဝၼ်းတီႈ 24 သေ ပိူၼ်ႈၸႅၵ်ႇပၼ် သိူဝ်ႈၶူဝ်းၵူၺ်း။ လွင်ႈၼႆႉ ၵွမ်ႉၵႃႈသႂ်ႇသိူဝ်ႈၵူၺ်းတႄႉ ဢမ်ႇလီပဵၼ်ၸိူင်ႉၼႆ။ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း တူၵ်းၸႂ်သေ သိူဝ်ႈဢၼ်လႆႈမႃးတီႈပၢင်ပွႆးၼၼ်ႉၵေႃႈ တေဢမ်ႇမီးၽႂ်ႁတ်းၼုင်ႈယဝ်ႉ- ဝႃႈၼႆ။

တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၵ်ႉသမ်ႉတူၵ်းလူင်းၵိုတ်းယိုဝ်း၊ ၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် တင်းလူင်ပွင်ၸိုင်ႈမၢၼ်ႈသေတႃႉ တေႃႇထိုင်မိူဝ်ႈလဵဝ် ယင်းပႆႇၵတ်းယဵၼ်ၼိမ်သဝ်း၊ တင်းတပ်ႉသိုၵ်းမၢၼ်ႈ ယင်းတိုၵ်ႉပဵၼ်ပၢင်တိုၵ်းၵၼ်ယူႇ။  ၾၢႆႇၼိုင်ႈ တီႈတႃႈၽႃသွင်ႇၵေႃႈ ၾၢႆႇတပ်ႉသိုၵ်း ၸိုင်ႈတႆး (SSPP/SSA) ထွၼ်ဢွၵ်ႇပၼ်ယဝ်ႉသေတႃႉ ၾၢႆႇသိုၵ်းမၢၼ်ႈဢမ်ႇယွမ်းထွၼ်ဢွၵ်ႇ ၸွမ်းၼင်ႇ ၵႂၢမ်းမၼ်ႈ သိုၵ်းမၢၼ်ႈလၢတ်ႈဝႆႉဝႃႈ ပေႃးသိုၵ်းတႆးထွၼ်ဢွၵ်ႇ သိုၵ်းမၢၼ်ႈၵေႃႈတေထွၼ်ဢွၵ်ႇ။ သိုၵ်းမၢၼ်ႈ ဢမ်ႇထွၼ်ဢွၵ်ႇၵူၺ်းပႆႇပေႃး၊ ယင်းမႃးပုတ်ႈပၵ်းဢဝ်တီႈယူႇဝႆႉထႅင်ႈ။

ၵွပ်ႈၼၼ် ၾၢႆႇၼိုင်ႈၵေႃႈ သိုၵ်းမၢၼ်ႈဢမ်ႇဝၢင်းၸႂ်သိုၵ်းတႆး၊ သိုၵ်းတႆးၵေႃႈ ဢမ်ႇဝၢင်းၸႂ်သိုၵ်းမၢၼ်ႈ။ သိုၵ်းမၢၼ်ႈတင်းသိုၵ်းတႆးၵေႃႈ ယူႇဢမ်ႇႁၢင်ႇၵႆၵၼ်တႄႉတႄႉ၊ ငႃၵၼ်ဝႆႉယူႇ၊ ယိုဝ်းၵၼ်လႆႈၵူႈၶၢဝ်းယၢမ်း၊ ပၢင်တိုၵ်းၼႆႉ ၸၢင်ႈၵိူတ်ႇၶိုၼ်ႈၵူႈၶၢဝ်းယၢမ်း။ လွင်ႈၼႆႉ တုၵ်းယွၼ်းၽူႈမီးပုၼ်ႈၽွၼ်းတင်းသွင်ၾၢႆႇ ပႃးၸဵမ် ၾၢႆႇသိုၵ်းတႆး သိုၵ်းမၢၼ်ႈ ႁႂ်ႈၵူၼ်းမိူင်းလႆႈၸၢမ်ႇပူၺ်ႈ လွင်ႈၵတ်းယဵၼ်ၼိမ်သဝ်းသေ ႁႂ်ႈမီးလွင်ႈထၢင်ႇႁၢင်ႈ ၵႂႃႇမႃးလွတ်ႈလႅဝ်းသေၵမ်း- ၵူၼ်းၼုမ်ႇ ၼႂ်းဢိူင်ႇဝၢၼ်ႈသေႃႉ ၸၢႆးပၢင်ႇ လၢတ်ႈ။