ပႃႇတီႇပီႈၼွင်ႉၸၢဝ်းၶိူဝ်း NBF ဢွၵ်ႇလိၵ်ႈပိုၼ်ၽၢဝ်ႇ တိုၵ်းသူၼ်းၵၢၼ်ဝၢၼ်ႈ ၵၢၼ်မိူင်း၊ ၽွင်းလူင်ပွင်ၸိုင်ႈ မၢၼ်ႈ ၸတ်းပၢင်ၵုမ်သၽႃး တီႈၼေႇပျီႇတေႃႇ။

ၼႂ်းတိုဝ်ႉတၢင်း ပၢင်ၵုမ်သၽႃး ဢၼ်လူင်ပွင်ၸိုင်ႈမၢၼ်ႈ ၸတ်းတႄႇၸတ်းႁဵတ်း ဝၼ်းတီႈ 13-20/11/2014 တီႈၼေႇပျီႇတေႃႇၼႆႉ ပူၼ်ႉမႃးမိူဝ်ႈဝၼ်းတီႈ 13/11/2014 ၸုမ်းပႃႊတီႊပီႈၼွင်ႉၸၢဝ်းၶိူဝ်း (NBF) ဢွၵ်ႇလိၵ်ႈ ပိုၼ်ၽၢဝ်ႇ တိုၼ်းသူၼ်းပၢင်ၵုမ်သၽႃးၼင်ႇၼႆ။

1.ပေႃးဢဝ်ပိူင်ငဝ်ႈပိုင်းမိူင်းဝႃႈ ပႃႊတီႊဢၼ်တႅၼ်းတၢင်/တၢင်တူဝ်ၸၢဝ်းၶိူဝ်းၼႆႉ ထုၵ်ႇလႆႈပဵၼ်ၸၢဝ်းၶိူဝ်း ဢၼ်တႄႉ ဢၼ်ဢိင်ၼိူဝ်ငဝ်းလၢႆးပိုၼ်ႉတီႈသေ ၶွတ်ႇၽွတ်ႈဝႆႉ။ လွင်ႈဢၼ်ဢမ်ႇၸႂ်ႈၸၢဝ်းၶိူဝ်းတႄႉသေ မႃးဢၢင်ႈဢိင်ဢဝ်ၸိုဝ်ႈၸၢဝ်းၶိူဝ်း ဝႃႈပဵၼ်ၸၢဝ်းၶိူဝ်းၼၼ်ႉ NBF သၢၼ်ၶတ်း၊ ဢမ်ႇႁၼ်လီ။

2.ယူႇတီႈၸိုင်ႈမိူင်းသေ ႁဵတ်းပၢင်ၵုမ်ၵဵဝ်ႇၵပ်းၵၢၼ်မိူင်းၼၼ်ႉ ပေႃးဝႃႈၸုမ်းဢၼ်ဢၢင်ႈဢိင်ဢဝ်ၸိုဝ်ႈ ၸၢဝ်းၶိူဝ်း / ႁဵတ်းၸုမ်းၸၢဝ်းၶိူဝ်းပွမ်သေ ၵႂႃႇၶဝ်ႈပၢင်ၵုမ်ၵၢၼ်မိူင်း ဢၼ်လူင်ပွင်ၸိုင်ႈ တေဢွၼ်ႁဵတ်းၼၼ်ႉ မၼ်းတေဢမ်ႇဢွၵ်ႇမႃး ၽွၼ်ႈပၢင်ႈဢၼ်တႄႉမၼ်း။ ၵၢၼ်ဝၢၼ်ႈၵၢၼ်မိူင်း ၶွင်ၸိုင်ႈမိူင်းႁူမ်ႈတုမ်ၼႆႉ တေဢမ်ႇတဵမ်ထူၼ်ႈလႆႈ။

3.ပေႃးဝႃႈ တေၵေႃႇသၢင်ႈၸိုင်ႈမိူင်းႁူမ်ႈတုမ် ၾႅတ်ႊၻရေႊလ်ၸိုၼ်ႈၸၢင်ႇ ဢၼ်မီးသုၼ်ႇလႆႈ လွင်ႈၽဵင်ႇပဵင်း ၵၼ်ၼႆၸိုင် ဢမ်ႇၵိုင်ႇလီလၢတ်ႈဢဝ်ၵူၺ်း၊ တေလႆႈလူင်းမိုဝ်းႁဵတ်းသၢင်ႈ လူၺ်ႈတူဝ်ထူပ်းသေ ႁဵတ်းသၢင်ႈပၼ် တွၼ်ႈတႃႇၸၢဝ်းၶိူဝ်းတႄႉတႄႉ၊ ပေႃးၼၼ်ၸင်ႇ တေၵေႃႇသၢင်ႈလႆႈၸိုင်ႈမိူင်းႁူမ်ႈတုမ် ဢၼ်တႄႉ ဢၼ်ၸိုၼ်ႈၸၢင်ႇ။

4.မိူဝ်ႈဢၼ်သၽႃးမိူင်းႁူမ်ႈတုမ် ဢုပ်ႇၵုမ်လွင်ႈ ပိူင်ငဝ်ႈပိုင်းမိူင်းၼၼ်ႉ ၼႂ်းၵၢၼ်ၶၵ်ႉတွၼ်ႈၵေႃႇတင်ႈ ၾႅတ်ႊၻရေႊၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇၼၼ်ႉ ယူႇတီႈတပ်ႉသိုၵ်းမၢၼ်ႈသေ ႁႂ်ႈသၢၼ်မိုဝ်းၵၼ်တင်း ၵူၼ်းမိူင်း ၸၢဝ်းၶိူဝ်း- ယူႇတီႈ NBF လႆႈတိုၵ်းသူၼ်းၼင်ႇၼႆ။