ဢိင်ၼိူဝ် ၶွင်ႊသီႊဢဝ်ၶိုၼ်းၸိုင်ႈတႆး (RCSS) တင်း သုၼ်ၵၢင်လွင်ႈငမ်းယဵၼ်မၢၼ်ႈ (MPC) ႁူပ်ႉထူပ်း ဢုပ်ႇဢူဝ်းၵၼ် ၼႂ်းၵဵင်းမႆႇ ၸိုင်ႈထႆးသေ ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ်၊ ၸဝ်ႈႁၢၼ်လၢဝ်သႅင် ၽူႈၶၢၼ်ပၢၵ်ႇ (RCSS/SSA) တွပ်ႇလၢတ်ႈ။

ထၢမ်- မိူဝ်ႈၼႆႉ လႆႈႁူႉဝႃႈ RCSS တင်း MPC လႆႈႁူပ်ႉၵၼ်။ လွင်ႈၼႆႉ ပဵၼ်ၸိူင်ႉႁိုဝ်၊ ဢုပ်ႇဢူဝ်းၵၼ်သင်ၶႃႈ။

တွပ်ႇ- MPC ၶဝ် ႁွတ်ႈမႃးတီႈၼႂ်းမိူင်းထႆး ၼႂ်းၵဵင်းမႆႇ၊ တေမႃးႁူပ်ႉထူပ်း (ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း) NCCT ႁဝ်း၊ ၵဵဝ်ႇၵပ်းလူၺ်ႈလွင်ႈ ၵႄႈလိတ်ႈပၼ်ႁႃ ဢၼ်ၶွင်ႉၶမ်ယူႇလႄႈသင်။ ဢၼ်ႁဵတ်းဝႆႉ (ၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်း) NCA ဢၼ်ပႆႇၵႂႃႇလႆႈၼၼ်ႉ တေႁႃလၢႆးမၼ်း ႁႂ်ႈပေႃးၵႂႃႇလႆႈထႅင်ႈ။ ႁဝ်းၶႃႈ RCSS ဢမ်ႇၸႂ်ႈလုၵ်ႈၸုမ်းၼႂ်း NCCT လႄႈ ငဝ်းလၢႆးၵၢၼ်မိူင်း ၼႂ်းၸိုင်ႈမိူင်းႁူမ်ႈတုမ်လႄႈသင်၊ ၵဵဝ်ႇလွင်ႈၵၢၼ်မိူင်း တီႈၼေႇပျီႇတေႃႇလႄႈသင်၊ တီႈတႃႈၵုင်ႈလႄႈသင် ဢၼ်ပဵၼ်မီးယူႇၸိူဝ်းၼၼ်ႉ ၶဝ်ၶိုၼ်းမႃးတေႃႉတႆႇၶႆႈၼႄၶိုၼ်း။ ၶဝ်လႆႈဢုပ်ႇ NCCT ၸိူင်ႉႁိုဝ်၊ ငဝ်းလၢႆး NCCT ပဵၼ်ၸိူင်ႉႁိုဝ်ၼႆၵေႃႈ ၶဝ်ၶိုၼ်းမႃးဢုပ်ႇၼႄႁဝ်းၶႃႈ။ ႁဝ်းၶႃႈတႄႉ ပဵၼ်ၾၢႆႇထွမ်ႇ။

ထၢမ်- ၼင်ႇဢၼ်ၸဝ်ႈႁဝ်းၶဝ် လႆႈၵႂႃႇထွမ်ႇမႃးၼၼ်ႉ ဢၼ်ၶွင်ႉၶမ်ဝူင်ႈၵၢင် NCCT တင်း UPWC မီးလွင်ႈသင်၊ ၶႅၼ်းတေႃႈလၢတ်ႈၼႄပၼ်ၽွင်ႈၶႃႈ။

တွပ်ႇ-ဢၼ်ၶဝ်ဢုပ်ႇဢူဝ်းၵၼ်မႃး ၵဵဝ်ႇၵပ်းလူၺ်ႈ NCA ၼၼ်ႉ မီးယူႇတင်းမူတ်းၶေႃႈတင်းၼမ်မၼ်း 120 ပၢႆ၊ ဢၼ်ၶဝ်ဢုပ်ႇဢူဝ်းၵၼ်ၼႆႉ လႆႈၵမ်ႈၼမ်၊ ၵိုတ်ႇယူႇမွၵ်ႈ 4-5 ၵၼ်၊ ပဵၼ်ၵၼ်ဢၼ်လမ်ႇလွင်ႈမၼ်း။ မိူဝ်ႈၵူႈပွၵ်ႈၵေႃႈ ပေႃးမႃးႁွတ်ႈၵၼ် ဢၼ်ၶိုၵ်ႉၶမ်ႇလမ်ႇလွင်ႈ၊ ဢၼ်ၼၵ်းၼႃပႃးပၼ်ႈ မိူၼ်ၼင်ႇႁူဝ်ၶေႃႈ ၵၢၼ်မိူင်းၸိူဝ်းၼႆႉ ၵွပ်ႈပိူဝ်ႈမၼ်းဢုပ်ႇဢူဝ်းၵၼ်ယၢပ်ႇလႄႈ ၶဝ်ၶၢမ်ႈမႃး။ ဢုပ်ႇဢူဝ်းၵၼ်ဢၼ်ငၢႆႈ မၼ်းပူၼ်ႉၵႂႃႇယဝ်ႉ၊ ၵမ်းၼႆႉ ၸမ်တေယဝ်ႉယဝ်ႉလႄႈ သမ်ႉမႃးၶွင်ႉၶမ်တီႈ ႁူဝ်ၶေႃႈလမ်ႇလွင်ႈ မိူၼ်ၼင်ႇဝႃႈၼၼ်ႉ။ မၼ်းပဵၼ်ႁူဝ်ၶေႃႈဢုပ်ႇဢူဝ်းၵၼ် ဢမ်ႇႁႃလႆႈၶေႃႈတူၵ်းလူင်းၵၼ်လႆႈသေ ၶမ်ဝႆႉၸိူင်ႉၼၼ်။

ဢၼ်ၶိုၵ်ႉတွၼ်းၼႆႉပဵၼ် ၵဵဝ်ႇၵပ်း တႃႇတေဢုပ်ႇဢူဝ်းၵေႃႇတင်ႈဝၢၼ်ႈမိူင်း လူၺ်ႈလွၵ်းပိူင်ၸိုင်ႈမိူင်းႁူမ်ႈတုမ် ၾႅတ်ႊၻရႄႊလ်လႄႈသင်၊ တႃႇႁူမ်ႈၵၼ်တင်ႈတပ်ႉသိုၵ်းမိူင်းႁူမ်ႈတုမ် ၾႅတ်ႊၻရႄႊလ်လႄႈသင်၊ ဢၼ်ၼႆႉ ပဵၼ်လွင်ႈၶိုၵ်ႉၶမ်ႇလမ်ႇလွင်ႈမၼ်း ဢၼ်မႃးၶမ်ၵၼ်ဝႆႉ။ ၼႂ်းၵႄႈဢုပ်ႇဢူဝ်းၵၼ်ၼႆႉ တၢင်းလူင်ပွင်ၸိုင်ႈသမ်ႉ ဢဝ်မူႇ 6 ၶေႃႈ (လၵ်းၵၢၼ် 6 ၶေႃႈ)သေၶဝ်ႈမႃးဢုပ်ႇ၊ မူႇ 6 ၶေႃႈၼႆႉ ဢၼ်လမ်ႇလွင်ႈမၼ်း တေလႆႈႁဵတ်းသၢင်ႈတိုဝ်းၵမ်ၸွမ်း ပိူင်ငဝ်ႈပိုင်းမိူင်း 2008 ။ ဢၼ်ၼႆႉ ၾၢႆႇၸၢဝ်းၶိူဝ်း NCCT ဢမ်ႇႁပ်ႉလႆႈ။ ၼႂ်းၵႄႈၼႆႉၵူၺ်းၼင်ႇၵဝ်ႇ ဢၼ်ဢုပ်ႇဢူဝ်းၵၼ်သေၶမ်ဝႆႉယူႇၼႆႉ သမ်ႉမီးၵၢၼ်တိုၵ်းယိုဝ်းၵၼ်မႃး ၼႂ်းၸႄႈမိူင်းၶၢင်ႁၢဝ်ႈႁႅင်း၊ မိူၼ်ၼင်ႇဝၼ်းတီႈ 19 လိူၼ်ၼႆႉ တၢင်းၾၢႆႇလူင်ပွင်ၸိုင်ႈၶဝ် လႆႈဢဝ်ၵွင်ႈလူင် 105mm ယိုဝ်းသႂ်ႇတီႈႁူင်းၾိုၵ်းသွၼ်ၽူႈမီးၸၼ်ႉ တီႈ KIA ၼႆလႄႈ ႁဵတ်းႁႂ်ႈၵူၼ်းသိုၵ်း ဢၼ်ၾိုၵ်းသွၼ်ယူႇတီႈ ႁူင်းႁဵၼ်းၽူႈမီးၸၼ်ႉၼၼ်ႉ လႆႈလူႉတၢႆၵႂႃႇ 23 ၵေႃႉ လႄႈ ဝၢတ်ႇၸဵပ်းၵႂႃႇတင်းၼမ်။ လွင်ႈၼႆႉ မႃးႁဵတ်းႁႂ်ႈပဵၼ်ပၼ်ႁႃလူင် ထႅင်ႈဢၼ်ၼိုင်ႈယူႇယဝ်ႉ၊ ၶဝ်ၸဝ်ႈၵေႃႈ ၼင်ႇႁိုဝ်မၼ်းပေႃးတေ ၵႂႃႇလႆႈငၢႆႈ၊ တေႁဵတ်းႁိုဝ်ၶဝ်ႈၸႂ်ၵၼ် ၶိုၼ်းလႆႈၼၼ်ႉ မႃးဢုပ်ႇဢူဝ်းၼွၵ်ႈလႅၵ်ႈမၼ်းထႃႈ၊ ဢုပ်ႇဢူဝ်းၵၼ် တူၺ်းဝႃႈ တေၶႂ်ႈႁဵတ်းႁိုဝ် ၶႂ်ႈပဵၼ်ႁိုဝ်၊ တၢင်းၾၢႆႇၸၢဝ်းၶိူဝ်း ၶႂ်ႈႁဵတ်းၸိူင်ႉႁိုဝ်။ တၢင်းလူင်ပွင်ၸိုင်ႈသမ်ႉ မီးဝႆႉငဝ်းလၢႆးၸိူင်ႉႁိုဝ် ၸိူဝ်းၼႆႉၶိုၼ်းမႃးဢုပ်ႇဢူဝ်းၵၼ်။ ဢၼ်ၶွင်ႉၶမ်တႄႉ မီးၸိူင်ႉၼႆ။

ထၢမ်-မိူၼ်ၼင်ႇ RCSS ဢၼ်ဢမ်ႇပဵၼ်လုၵ်ႈၸုမ်းၽႂ်လႂ်ၼႆႉ ၶႃႈလူး၊ တၢင်း UPWC သမ်ႉတေၵႂႃႇၸိူင်ႉႁိုဝ်၊ ၽွင်းယၢမ်း NCCT ၶွင်ႉၶမ်ဝႆႉယူႇ ၸိူင်ႉၼႆၶႃႈ။

တွပ်ႇ- RCSS တႄႉ ၸဵမ်ပိုင်းၵေႃႈ တိုၼ်းလႆႈပိုၼ်ၽၢဝ်ႇဝႆႉတႅၵ်ႇလႅင်းယဝ်ႉ ဝႃႈ- ဢၼ်ၶိုၵ်ႉၶမ်ႇလမ်ႇလွင်ႈ၊ ဢၼ်ၸၢဝ်းၶိူဝ်းႁဝ်းၶႃႈၶႂ်ႈလႆႈၼႆႉ ပဵၼ်ပိူဝ်ႈတႃႇၵႄႈလိတ်ႈပၼ်ႁႃၵၢၼ်မိူင်း ဢၼ်ၵိူတ်ႇၶိုၼ်ႈယူႇ ၼႂ်းၸိုင်ႈမိူင်းႁူမ်ႈတုမ်ႁဝ်းၶႃႈ၊ ဢၼ်ႁဝ်းၶႃႈႁူမ်ႈတုမ်ၵၼ်မႃး တင်ႈတႄႇဝၢႆးလႆႈလွတ်ႈလႅဝ်း ၵွၼ်းၶေႃမႃး။ ပိူင်ပိုင်းၸိုင်ႈမိူင်းႁဝ်းၶႃႈၼႆႉ မၼ်းဢမ်ႇႁဵတ်းႁႂ်ႈပဵၼ်ၵႂႃႇၸွမ်းၼင်ႇ ၶေႃႈယိူင်းဢၢၼ်း ဢၼ်ႁဝ်းၶႃႈၶႂ်ႈပဵၼ်၊ မိူၼ်ၼင်ႇဝႃႈ လွင်ႈၽဵင်ႇပဵင်းၵၼ်၊ လွင်ႈတႅပ်းတတ်းတူဝ်ၵဝ်ႇႁင်းၶေႃလႄႈ ပဵၼ်ၸိုင်ႈမိူင်းႁူမ်ႈတုမ် ၾႅတ်ႊၻရႄႊ ၸိုၼ်ႈၸၢင်ႇၼၼ်ႉ မၼ်းဢမ်ႇပဵၼ်မႃး၊ ၼင်ႇႁိုဝ်ပေႃးတေၵႄႈၶႆလႆႈ ပၼ်ႁႃၵၢၼ်မိူင်း ဢၼ်မၼ်းပႆႇပဵၼ်ၼၼ်ႉ တိုၼ်းတေလႆႈႁူပ်ႉထူပ်း ဢုပ်ႇဢူဝ်းၵၼ်တၢင်းၵၢၼ်မိူင်း။ ၵွပ်ႈပိူဝ်ႈ ဢမ်ႇမီးတိုဝ်ႉတၢင်းဢုပ်ႇဢူဝ်းၵၼ်လႄႈ ႁဝ်းၶႃႈၸင်ႇလႆႈယိပ်းၵွင်ႈၵၢင်ႇသေ တေႃႇသူႈမႃးပၢၼ်သိုပ်ႇပၢၼ်။

ၸူဝ်ႈလူင်ပွင်ၸိုင်ႈတဵင်းၸဵင်ႇ ၶိုၼ်ႈမႃးၽွင်းငမ်းၼႆႉ ၶဝ်ၸဝ်ႈၵေႃႈပိုၼ်ၽၢဝ်ႇဝႃႈ ၶႂ်ႈၵႄႈၶႆပၼ်ႁႃၵၢၼ်မိူင်း။ ၵွၼ်ႇၵႄႈၶႆပၼ်ႁႃၵၢၼ်မိူင်းၼႆႉ ႁဝ်းၶႃႈထုၵ်ႇလႆႈမႃးၵိုတ်းတိုၵ်းၵၼ်၊ လွင်ႉၼႆႉ ႁဝ်းၶႃႈၵေႃႈ လႆႈၵိုတ်းတိုၵ်း ၵႂႃႇယဝ်ႉ။ ၵိုတ်းတိုၵ်း ၸၼ်ႉၸႄႈမိူင်းလႄႈသင်၊ ၸၼ်ႉၸိုင်ႈမိူင်းႁူမ်ႈတုမ်လႄႈသင် ယဝ်ႉၵႂႃႇယဝ်ႉ။ ဢၼ်ၵိုတ်းဝႆႉ ပႆႇလႆႈလူင်းလၢႆးမိုဝ်း တင်းလူင်ပွင်ၸိုင်ႈတဵင်းၸဵင်ႇၼႆႉ မိူၼ်ၼင်ႇၶၢင်လႄႈ ထႅင်ႈလၢႆၸုမ်း။ ၸိူဝ်းၼႆႉၵေႃႈ ၶႂ်ႈမႃးၵိုတ်းတိုၵ်း ပတ်းပိုၼ်ႉၸိုင်ႈမိူင်း။

NCA ၼႆႉ ႁဵတ်းလႆႈၵေႃႈလီ၊ ဢမ်ႇႁဵတ်းလႆႈၵေႃႈလီ၊ ပေႃးဝႃႈ ဢုပ်ႇဢူဝ်းၵၢၼ်မိူင်းၵၼ်လႆႈၵေႃႈ တေၶဝ်ႈပႃးဢုပ်ႇဢူဝ်းၵၢၼ်မိူင်းယူႇ၊ သင်ၸိူဝ်ႉဝႃႈၵူႈမူႇၵူၸုမ်းၼၼ်ႉ ႁပ်ႉသေႁဵတ်းသၢင်ႈၸွမ်းလႆႈယူႇ။ သင်ဝႃႈ ဢမ်ႇမီးၽႂ်ႁဵတ်းသၢင်ႈလႆႈၸွမ်းၼႆၵေႃႈ ႁဝ်းၸုမ်းလဵဝ်ၵူၺ်း ဢမ်ႇၸၢင်ႈဢုပ်ႇဢူဝ်းၵၢၼ်မိူင်းၵၼ်လႆႈၼင်ႇၵဝ်ႇ၊ ၵႃႈလႆႈပႂ်ႉၸွမ်းၵၼ် ဢုပ်ႇဢူဝ်းၵၼ်ႁႂ်ႈပႃးၵူႈၾၢႆႇ ၼႂ်းၵၢၼ်ၵႄႈလိတ်ႈ ပၼ်ႁႃၵၢၼ်မိူင်း၊ ၵွပ်ႈဝႃႈမၼ်းဢမ်ႇၸႂ်ႈ ပၼ်ႁႃႁဝ်းၶႃႈၵေႃႉလဵဝ် ၸုမ်းလဵဝ်၊ မၼ်းၵဵဝ်ႇၶွင်ႈၵူၼ်းမိူင်းတႆးႁဝ်းၶႃႈတင်းပိုၵ်း။ ၵွပ်ႈၼၼ် ႁႂ်ႈပေႃးၽွမ်ႉ တူဝ်ႈတၼ်းၵၼ်သေ ဢုပ်ႇဢူဝ်းၼၼ်ႉ ၸၢင်ႈပဵၼ်လွင်ႈလီလႄႈ ၸၢင်ႈႁွတ်ႈထိုင်တီႈပဵၼ်ၵၢၼ်ယဝ်ႉတူဝ်ႈ ၵႂႃႇလႆႈယူႇ ႁဝ်းၶႃႈမုင်ႈႁၼ်ၼင်ႇၼႆ။

ထၢမ်- မိူဝ်ႈၼႆႉ လႆႈငိၼ်းဢူးလႃႉမွင်ႇသူၺ်ႇ ဢုပ်ႇလၢတ်ႈတီႈၸုမ်း ၽူႈသိုဝ်ႇၶၢဝ်ႇၶဝ်ဝႃႈ ၵွၼ်ႇ/ဢွၼ်တၢင်း ပႆႇထိုင်ၶရိတ်ႊသမၢတ်ႊ၊ ၵွၼ်ႇပီ 2014 ပႆႇသဵင်ႈၼႆႉ တေၶႂ်ႈႁႂ်ႈပဵၼ် NCA ဝႃႈၼႆ။ လွင်ႈၼႆႉၶႃႈလူး ၸွင်ႇတေပဵၼ်မႃးလႆႈၶႃႈ ပေႃးယူႇတီႈ RCSS တူၺ်းငဝ်းလၢႆးၸၢဝ်းၶိူဝ်း လႄႈ တင်းလူင်ပွင်ၸိုင်ႈမၢၼ်ႈ တင်းသိုၵ်းမၢၼ်ႈ ဢၼ်ပဵၼ်ယူႇယၢမ်းလဵဝ်ၼႆႉ။

တွပ်ႇ-လွင်ႈၶႂ်ႈလႆႈၶႂ်ႈပဵၼ်ၼႆႉ ၶႂ်ႈပဵၼ်ၵေႃႉလဵဝ် ၶႂ်ႈပဵၼ်ၾၢႆႇလဵဝ်ၵေႃႈ တေဢမ်ႇလႆႈ။ မၼ်းတေလႆႈၶႂ်ႈလႆႈ ၶႂ်ႈပဵၼ်ၼင်ႇၵၼ်သေ ႁႃၶေႃႈတူၵ်းလူင်းႁူမ်ႈၵၼ်၊ တႃႇတေလႆႈၶေႃႈတူၵ်းလူင်းႁူမ်ႈၵၼ်ၼႆႉ ပေႃးဢမ်ႇ ဢုပ်ႇဢူဝ်းၵၼ်ၵေႃႈ မၼ်းဢမ်ႇပဵၼ်ၵႂႃႇလႆႈ။ ၶေႃႈတူၵ်းလူင်း NCA ၵိုတ်းတိုၵ်းပတ်းပိုၼ်ႉၸိုင်ႈမိူင်းၼႆႉ ဢုပ်ႇဢူဝ်းၵၼ်မႃးႁိုင်ၼၢၼ်းယဝ်ႉ၊ တေႃႇမိူဝ်ႈလဵဝ်ၵေႃႈ ဢုပ်ႇဢူဝ်းတူၵ်းလူင်းၵၼ် ပႆႇယဝ်ႉတူဝ်ႈလႆႈ၊ ၵွပ်ႈဝႃႈ တၢင်းၾၢႆႇၼိုင်ႈၶႂ်ႈလႆႈပိူင်ၼိုင်ႈ၊ ထႅင်ႈၾၢႆႇၼိုင်ႈသမ်ႉ ၶႂ်ႈလႆႈပိူင်ၼိုင်ႈ၊ မၼ်းၶွင်ႉၶမ်ၸိူင်ႉၼင်ႇၼႆ၊ မၼ်းဢမ်ႇသိုပ်ႇၵႂႃႇလႆႈ။ လႆႈၶွင်ႉၶမ်မႃးႁိုင်၊ တေႃႇထိုင်ဝၼ်းမိူဝ်ႈၼႆႉၵေႃႈ ယင်းပႆႇႁႃၶေႃႈ ဢၼ်တေတူၵ်းလူင်း ၵၼ်လႆႈ။

ၾၢႆႇ MPC ဝႃႈ ၶႂ်ႈႁႂ်ႈႁဵတ်းလႆႈ ၵွၼ်ႇၶရိတ်ႊသမၢတ်ႊ ဢၼ်ဝႃႈၼၼ်ႉ ၶႃႈဝူၼ်ႉဝႃႈ ပဵၼ်ၵၢင်ၸႂ်ၾၢႆႇ ၶဝ်ၶႂ်ႈပဵၼ်ၵူၺ်း၊ မၼ်းပႆႇၸႂ်ႈၵၢင်ၸႂ်ၵူႈၾၢႆႇၵူႈတၢင်း။ ၾၢႆႇလူင်ပွင်ၸိုင်ႈၵေႃႈ တေလႆႈတူၺ်းတၢင်း ၵၢင်ၸႂ်ၼႂ်းလူင်ပွင်ၸိုင်ႈ၊ ၾၢႆႇတၢင်းတပ်ႉသိုၵ်းၵေႃႈလႆႈတူၺ်းပႃး၊ တၢင်းသၽႃးၵေႃႈ တေလႆႈတူၺ်းပႃး၊ ၸုမ်းၵၢၼ်မိူင်းၶဝ်ၵေႃႈ တေလႆႈတူၺ်းပႃး၊ လၢႆးၵႂႃႇမၼ်းလူင်ႈဝႆႉဢိတ်းဢိတ်း။ ဢွၼ်တၢင်း လူင်ပွင်ၸိုင်ႈၼႆႉ မၼ်းပဵၼ်ဝႆႉယူႇ 3 ၾၢႆႇ။ ၾၢႆႇၼိုင်ႈလႄႈၾၢႆႇၼိုင်ႈ ၶေႃႈႁၼ်ထိုင်ယင်းပႆႇမိူၼ်ၵၼ်။ ၾၢႆႇတၢင်း ၸၢဝ်းၶိူဝ်းၵေႃႈ လႆႈထုၵ်ႇတၢင်းလူင်ပွင်ၸိုင်ႈ ဢဝ်မၢၵ်ႇလူင်ယိုဝ်းသႂ်ႇသေ လႆႈလူႉတၢႆဝၢတ်ႇၼမ်ၼၼ်ႉ လွင်ႈၼႆႉ တႃႇတေဢုပ်ႇဢူဝ်းႁႃၶေႃႈတူၵ်းလူင်းၵၼ်တႄႉ ၼႂ်းဝႆးဝႆးၼႆႉ တေပႆႇပဵၼ်လႆႈ။

ထၢမ်-ၾၢႆႇၼိုင်ႈ ဢိင်ၼိူဝ် KNU ၽၢတ်ႇဢွၵ်ႇ UNFC သေ၊ ၾၢႆႇၼိုင်ႈၵေႃႈ ၵႆႉၶဝ်ႈဢွၵ်ႇ RCSS ။ ၾၢႆႇၼိုင်ႈၵေႃႈ မိူဝ်ႈၼႆႉ ဢူးလႃႉမွင်ႇသူၺ်ႇဝႃႈ KNU တင်း RCSS တႄႉ ဢုပ်ႇငၢႆႈယူႇ၊ ဢမ်ႇမိူၼ်ၵၼ်တင်း NCCT ။ ၾၢႆႇၼိုင်ႈၵေႃႈ ၵူၼ်းမိူင်းဝႃႈ RCSS ၼႆႉ ပေႃႇလသီႇမၼ်းၶႂ်ႈဢူၼ်ႈမႃး၊ ၸမ်ၸႂ်သိုၵ်းမၢၼ်ႈလိူဝ်မႃး။ လွင်ႈၼႆႉ ယူႇတီႈ RCSS ၶႂ်ႈတွပ်ႇၵႄႈ ႁႂ်ႈပေႃႈမႄႈၵူၼ်းမိူင်း ပေႃးလႆႈႁူႉၸွမ်းၸိူင်ႉႁိုဝ်ၶႃႈ။

တွပ်ႇ- ႁဝ်းၶႃႈယိူင်းဢၢၼ်း ၶႂ်ႈဢုပ်ႇဢူဝ်းၵၢၼ်မိူင်း၊ ၶႂ်ႈၵႄႈလိတ်ႈပၼ်ႁႃၵၢၼ်မိူင်း ဢၼ်ၶွင်ႉၶမ်ၵၼ်မႃးယူႇ ၼႂ်းၶၢဝ်းတၢင်း 60 ပၢႆ ဢၼ်ႁဝ်းၶႃႈတင်ႈ ၸိုင်ႈမိူင်းႁူမ်ႈတုမ်မႃးၸွမ်းၵၼ်ၼႆႉ။ ဢၼ်ဝႃႈၶဝ်ႈႁႃလူင်ပွင်ၸိုင်ႈ ႁႅင်းဝႆႉ ဢၼ်ဝႃႈၼၼ်ႉၵေႃႈ ၶဝ်ႈႁႃပိူဝ်ႈတႃႇတေႁႂ်ႈၸဵဝ်းလႆႈဢုပ်ႇဢူဝ်းၵၢၼ်မိူင်း ဝႆးဝႆးၼၼ်ႉၶႃႈယဝ်ႉ။ ပေႃးဝႃႈႁဝ်းၶႃႈ ဢမ်ႇလႆႈဢုပ်ႇဢူဝ်းၵၢၼ်မိူင်းၵၼ်၊ ပၼ်ႁႃၵၢၼ်မိူင်းဢၼ်ပဵၼ်ဝႆႉယူႇၵေႃႈ ႁဝ်းၶႃႈဢမ်ႇၸၢင်ႈ ၵႄႈလိတ်ႈသေပွၵ်ႈ၊ ၸင်ႇႁႃလၢႆးလွင်ႈၼႆႉသေ ၶဝ်ႈႁႃၶဝ်။