သုၼ်ၵၢၼ်လွင်ႈငမ်းယဵၼ်မၢၼ်ႈ MPC ႁွတ်ႈထိုင်ၵဵင်းမႆႇ၊ ႁပ်ႉႁူပ်ႉထူပ်းတူဝ်တႅၼ်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း NCCT ။ ၵၢႆႇၵႂၢမ်းၶႂ်ႈႁႂ်ႈၸုမ်းၸၢဝ်းၶိူဝ်း မိူဝ်းဢုပ်ႇဢူဝ်း ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်း ႁူမ်ႈတုမ် (UPWC) ၼႂ်းမိူင်း၊ ႁႂ်ႈတူၵ်းလူင်းၵိုတ်းယိုဝ်း ပတ်းပိုၼ်ႈတူဝ်ႈမိူင်း ၵွၼ်ႇပီၼႆႉသဵင်ႈ။

သုၼ်ၵၢင်လွင်ႈငမ်းယဵၼ်မၢၼ်ႈ (MPC) ႁွတ်ႈၽႅဝ်မႃးတီႈၵဵင်းမႆႇ မိူင်းထႆးသေ ဝၼ်းတီႈ 27/11/2014 (မိူဝ်ႈဝႃး) ႁပ်ႉႁူပ်ႉထူပ်း တူဝ်တႅၼ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉ ၸိုင်ႈမိူင်း (NCCT) ၊ တီႈႁူင်းႁႅမ်း ၶႂၼ်ႊၻႃႊၼႃႊ၊ ဢိူင်ႇပႃႇလႅတ်ႇ ဝဵင်းၵဵင်းမႆႇ။

ၾၢႆႇ MPC  မီးဢူးလႃႉမွင်ႇသူၺ်ႇ ဢွၼ်ႁူဝ် မိူၼ်ၼင်ႇ ၺူဝ်ႇဢူင်းမိၼ်ႉ၊ ဢွင်ႇၼၢႆႇဢူး ၶဝ်ၸိူဝ်းၼႆႉ လၢႆလၢႆၵေႃႉ။ ၾၢႆႇၸုမ်း NCCT မီးၸွမ်ႁၢၼ်ၵုၼ်ႇမေႃႇ၊ ႁူဝ်ၼႃႈၸုမ်းၸၢဝ်းၶိူဝ်း NCCT ၼၢႆႁူင်သႃ၊ ၶုၼ်ဢူၵ်ႉၵႃႇ လႄႈ လၢႆလၢႆၵေႃႉ။  ႁူပ်ႉထူပ်းၵၼ် တင်ႈတႄႇပွတ်းၼႂ် ယၢမ်း 10:00 တေႃႇထိုင် 13:00 မူင်း။ ယၢမ်းဝၢႆးဝၼ်း MPC ႁပ်ႉႁူပ်ႉထူပ်းထႅင်ႈ ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ။ ၾၢႆႇ RCSS/SSA မီးတူဝ်တႅၼ်း ၸဝ်ႈႁၢၼ်လၢဝ်သႅင်၊ မႁႃငိုၼ်း။ ပၢင်ႁူပ်ႉထူပ်းၵၼ် ယဝ်ႉတူဝ်ႈၵႂႃႇဝၢႆးဝၼ်း မွၵ်ႈယၢမ်း 3 မူင်း- ၼႆယဝ်ႉ။

လွင်ႈဢၼ်လႆႈႁူပ်ႉၵၼ်ၼႆႉ ႁူဝ်ၼႃႈၸုမ်းၸၢဝ်းၶိူဝ်း (NCCT) ၼၢႆႁူင်သႃ လၢတ်ႈဝႃႈ- ၾၢႆႇ MPC မႃးလၢတ်ႈဝႃႈ ၶႂ်ႈႁႂ်ႈမိူဝ်းႁူပ်ႉထူပ်းဢုပ်ႇဢူဝ်း  ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ၵွၼ်ႇပႆႇထိုင် ၶရိတ်ႊသမၢတ်ႊ။ ႁႂ်ႈမိူဝ်းဢုပ်ႇဢူဝ်းၵၼ်ၶိုၼ်း ၶၵ်ႉတွၼ်ႈဢၼ်လႆႈၸိူင်ႉၵၢတ်ႈ/ လွင်ႈဢုပ်ႇဢူဝ်း ဢၼ်လႆႈၶွင်ႉၶမ်ၵၼ်မႃး မိူဝ်ႈၼႂ်းႁၢင်လိူၼ်သႅပ်ႊထႅမ်ႊၿိူဝ်ႊ။ ဢၼ်ၶွင်ႉၶမ်ၵၼ်ဝႆႉၼၼ်ႉ ၵဵဝ်ႇၵပ်း လွင်ႈႁူမ်ႇလူမ်ႈ ပိူဝ်ႈတႃႇတေပူတ်းၵွင်ႈၵၢင်ႇသေ ႁဵတ်းတပ်ႉသိုၵ်းဢၼ်လဵဝ်၊ ဢၼ်ၾၢႆႇလူင်ပွင်ၸိုင်ႈ တၢင်ႇယိုၼ်ႈမႃး၊ ဢၼ်ၾၢႆႇၸၢဝ်းၶိူဝ်းဢမ်ႇႁပ်ႉလႆႈလႄႈ မီးလွင်ႈဢမ်ႇၶဝ်ႈၵၼ်သေ ႁဵတ်းႁႂ်ႈၵၢၼ်ၵေႃႇသၢင်ႈ လွင်ႈငမ်းယဵၼ် ၶႂ်ႈၵိုတ်းၵႂႃႇ။ ပိူဝ်ႈတႃႇတေမိူဝ်းၵႄႈၶိုၼ်း ပူမ်ဢၼ်ၶွင်ႉၶမ်ၵၼ်မႃးၼၼ်ႉ MPC မႃးလၢတ်ႈ ၶႂ်ႈႁႂ်ႈမိူဝ်းဢုပ်ႇၵၼ် ၵွၼ်ႇပႆႇထိုင်ဝၼ်း ၶရိတ်ႊသမၢတ်ႊ (ၵွၼ်ႇပီ 2014 ပႆႇသဵင်ႈ)- ၾၢႆႇဢူးလႃႉမွင်ႇသူၺ်ႇ ၶဝ်မႃးလၢတ်ႈၸိူင်ႉၼႆ။

ၵဵဝ်ႇၵပ်းလွင်ႈၼႆႉ ၼၢႆႁူင်သႃ MPC လၢတ်ႈဝႃႈ- ႁဝ်းဢမ်ႇၸၢင်ႈတႅပ်းတတ်းသင်၊ လွင်ႈၼႆႉ ပဵၼ်ၾၢႆႇၶဝ်ၶႂ်ႈပဵၼ်။ ၾၢႆႇႁဝ်းၶႂ်ႈပဵၼ်ၵေႃႈ ႁဝ်းတေဢုပ်ႇဢူဝ်းၵၼ်။ ပေႃးဝႃႈ NCCT ဢုပ်ႇဢူဝ်းၵၼ်မႃးၸိုင် ဢၼ်ဢူးလႃႉမွင်ႇသူၺ်ႇ MPC မႃးဢုပ်ႇလၢတ်ႈၶႆႈၼႄၼႂ်းပၢင်ၵုမ်မိူဝ်ႈဝႃးၼႆႉ တေဢဝ်လၢတ်ႈၼႄၶိုၼ်း ၼႂ်းပၢင်ၵုမ်လူင် NCCT ။ ပၢင်ၵုမ်ၼႆႉ တေၸတ်းၼႂ်းႁၢင်လိူၼ်ၼူဝ်ႊဝႅမ်ႊၿိူဝ်ႊ ဢမ်ႇၼၼ် ၼႂ်းႁူဝ်လိူၼ် ၻီႊသႅမ်ႊၿိူဝ်ႊၼႆႉ။ ပေႃးႁူပ်ႉထူပ်းဢုပ်ႇၵုမ်ၵၼ်ယဝ်ႉ ၸင်ႇတေဢဝ်ၶေႃႈတႅပ်းတတ်းသေ ပွင်ႇၶၢဝ်ႇၸူးၶဝ် (MPC) ဝႃႈတေပဵၼ်ႁူပ်ႉ ဢမ်ႇပဵၼ်ႁူပ်ႉ- ဝႃႈၼႆ။

ၾၢႆႇဢူးလႃႉမွင်ႇသူၺ်ႇ လၢတ်ႈဝႃႈ- တီႈတႄႉမၼ်း ႁဝ်းၶႂ်ႈႁူပ်ႉ NCCT ၼႂ်းလိူၼ်ၼႃႈ ဝၼ်းတီႈ 04/12/2014 ၼႆႉ။ ၵူၺ်းၵႃႈ ၾၢႆႇ NCCT ပႆႇႁပ်ႉ၊ ပႆႇတူဝ်ႈတၼ်းလႄႈ ဢမ်ႇယွမ်းႁူပ်ႉ။ တီႈပၢင်ဢုပ်ႇဢူဝ်းၵၼ်ၼႆႉ ဢူးလႃႉမွင်ႇသူၺ်ႇလၢတ်ႈပႃးဝႃႈ- ၵၢၼ်မိူင်းၼႆႉ လိူဝ်သေဢဝ်လၢႆးၵၢၼ်မိူင်းၵႄႈလိတ်ႈ မၼ်းဢမ်ႇမီး၊ ထုၵ်ႇလႆႈမႃးႁူပ်ႉထူပ်းၵၼ်သေ ဢုပ်ႇဢူဝ်းၼိူဝ်ၽိူၼ်ၵၢၼ်မိူင်း- ဝႃႈၼႆ။

လွင်ႈတၢင်းဢၼ် ႁဵတ်းႁႂ်ႈၸိူင်ႉၵၢတ်ႈၵၼ်ထႅင်ႈၼႆႉ ပူၼ်ႉမႃးမိူဝ်ႈဝၼ်းတီႈ 19/11/2014 သိုၵ်းမၢၼ်ႈ ဢဝ်ၶိူင်ႈၵွင်ႈလူင်ယိုဝ်းသႂ်ႇ ႁူင်းၾိုၵ်းသွၼ်ၽူႈမီးၸၼ်ႉ တီႈလၢႆႇၸႃႇ၊ ငဝ်ႈငုၼ်းတပ်ႉသိုၵ်းၶၢင်လွတ်ႈလႅဝ်း (KIA) ၸိူဝ်းၼႆႉၵေႃႈ ပဵၼ်လွင်ႈၶွင်ႉၶမ်။

ၵပ်းၵၢႆႇလွင်ႈၼႆႉ ၼၢႆႁူင်သႃ လၢတ်ႈဝႃႈ- ၼႂ်းပီ 2014 ၼီႈၼႆႉတႄႉ တႃႇတေၵိုတ်းယိုဝ်းပတ်းပိုၼ်ႉတူဝ်ႈမိူင်းၼႆႉ ဢမ်ႇပဵၼ်လႆႈယဝ်ႉ။ ဢၼ်ၶႂ်ႈပဵၼ်ၼႆႉ ပဵၼ်ၾၢႆႇလူင်ပွင်ၸိုင်ႈၵူၺ်း၊ ၾၢႆႇၸၢဝ်းၶိူဝ်းတႄႉ လႅပ်ႈတေဢမ်ႇ ပဵၼ်လႆႈယဝ်ႉ။ လွင်ႈဢၼ်ပဵၼ်ၵႂႃႇၼႆႉ မၼ်းတုမ်ႉတိူဝ်ႉလွင်ႈယုမ်ႇယမ် ဢၼ်ၵေႃႇသၢင်ႈလွင်ႈၽွမ်ႉႁူမ်ႈၵၼ်၊ တုမ်ႉတိူဝ်ႉလွင်ႈ ၵၢၼ်ၵေႃႇသၢင်ႈလွင်ႈငမ်းယဵၼ်ၸိူဝ်းၼႆႉ တင်းသဵင်ႈ။ ၵွပ်ႈၼႆ ၼႂ်းပီ 2014 ၼႆႉ တႃႇတေၵိုတ်းယိုဝ်း ပတ်းပိုၼ်ႉၸိုင်ႈမိူင်းၼႆႉ တေပဵၼ်ဢမ်ႇပဵၼ် ပႆႇၸၢင်ႈဝႃႈ။ ၵူၺ်းၵႃႈ ၼင်ႇႁိုဝ်တေ ၸၢင်ႈမိူဝ်းဢုပ်ႇဢူဝ်းလႆႈတင်း UPWC ၵွၼ်ႇၶရိတ်ႊသမၢတ်ႊၼႆႉတႄႉ တေဢုပ်ႇဢူဝ်းၵၼ်ထႅင်ႈ- ဝႃႈၼႆ။