ဢိင်ၼိူဝ် ၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA) လႆႈၵႂႃႇတီႈ ၵျီႊၼီႊဝိူဝ်ႊၶေႃႊလ် (Geneva Call) သေ ၸုမ်းၶၢဝ်ႇ ၽူႈတွႆႇႁွၵ်ႈ လႆႈတွင်ႈထၢမ်ငဝ်းလၢႆး လွင်ႈၼႆႉ တီႈၽူႈၶၢၼ်ပၢၵ်ႇ RCSS/SSA ၸဝ်ႈႁၢၼ်လၢဝ်သႅင် တွပ်ႇလၢတ်ႈၼင်ႇၼႆ။

ထၢမ်- လွင်ႈဢၼ်တပ်ႉသိုၵ်း RCSS/SSA ၊ SSPP/SSA ၵႂႃႇၵျီႇၼီႊဝိူဝ်ႊၶေႃႊလ် ၼႆၼၼ်ႉ ၵႂႃႇတင်းသွင်ၸုမ်းၼႆ ၸွင်ႇၸႂ်ႈၶႃႈ။ ဢၼ်လႆႈၵႂႃႇၼႆႉ ပဵၼ်လွင်ႈတၢင်းၸိူင်ႉႁိုဝ် ၶႅၼ်းတေႃႈမွၵ်ႇလၢတ်ႈၼႄ ပီႈၼွင်ႉၵူၼ်းမိူင်းတႆး ႁူႉၸွမ်းၽွင်ႈၶႃႈ။

တွပ်ႇ- ၸႂ်ႈၶႃႈဢေႃႈ။ တီႈ ၵျီႊၼီႊဝိူဝ်ႊၶေႃႊလ် ၼႆႉ တေမီးၸုမ်း ဢၼ်မႃးတိုၵ်းသူၼ်း (Campaign) ၵဵဝ်ႇၵပ်းလွင်ႈၸႂ်ႉ ႁႅင်းၵၢၼ်လုၵ်ႈဢွၼ်ႇ တၢင်းၾၢႆႇၵၢၼ်သိုၵ်း။ 1.ဢမ်ႇဢဝ်လုၵ်ႈဢွၼ်ႇဢႃႇယုပႆႇတဵမ် ၶဝ်ႈႁၢပ်ႇၵိုတ်ႉၵၢၼ်သိုၵ်းၸိူဝ်းၼႆႉ။ 2.ၵဵဝ်ႇၵပ်းမၢၵ်ႇမႅင်း။ မၢၵ်ႇမႅင်းဢၼ်ၵၢင်ၼိူဝ်လိၼ်၊ ၾင်ဝႆႉၼႂ်းလိၼ်သေ ယဵပ်ႇၺႃးလႄႈသင်၊ ၽႃႇၺႃးလႄႈသင် လွင်ႈၼိုင်ႈ။ 3. ၵဵဝ်ႇၵပ်းလွင်ႈသုၼ်ႇလႆႈ ၶွင်ၼၢင်းယိင်း။ 3 လွင်ႈၼႆႉ ၶဝ်ပၼ်တၢင်းႁူႉ တၢင်းၶႆႈၸႂ် တီႈၾၢႆႇမူႇၸုမ်းယိပ်းၵွင်ႈၵၢင်ႇ ဢၼ်သၢၼ်ၶတ်းၾၢႆႇလူင်ပွင်ၸိုင်ႈ၊ တိုၵ်းတေႃးၵၼ်တင်းလူင်ပွင်ၸိုင်ႈ ၵူႈမိူင်းမိူင်း။ ၵူႈမိူင်းမိူင်းၵေႃႈပႃး ဢမ်ႇၸႂ်ႈတီႈၼႂ်းမိူင်းႁူမ်ႈတုမ်ႁဝ်းၼႆႉၵူၺ်း။

ထၢမ်- မိူဝ်ႈၵႃႈၵွၼ်ႇပူၼ်ႉမႃး ႁဝ်းၶႃႈယၢမ်ႈလႆႈငိၼ်းဝႃႈ ၵဵဝ်ႇၵပ်းသိုၵ်းလုၵ်ႈဢွၼ်ႇၼႆႉ ၶဝ်ယင်းပႆႇမွတ်ႇၸိုဝ်ႈ RCSS/SSA တင်း ပႃႇတီႇမႂ်ႇသုင်ၸိုင်ႈတႆး (SSPP/SSA) ။ လွင်ႈၼႆႉၶႃႈလူး ပဵၼ်ၸိူင်ႉႁိုဝ်ၶႃႈ။

တွပ်ႇ- ၵဵဝ်ႇၵပ်းလွင်ႈၼႆႉ ႁဝ်းၶႃႈၵေႃႈလႆႈႁူပ်ႉထူပ်းတင်းၶဝ် လၢႆပွၵ်ႈယူႇ၊ တီႈၵျီႇၼီႇဝိူဝ်ႊၶေႃႊလ်ၼႆႉ၊ မိူဝ်ႈၵွၼ်ႇပူၼ်ႉမႃး 4-5 ပီၸိူဝ်းၼႆႉ ၼိုင်ႈပီလႂ်ၼိုင်ႈပွၵ်ႈ ၶဝ်သူင်ႇၽူႈမီးပုၼ်ႈၽွၼ်းၶဝ်သေ မႃးႁူပ်ႉထူပ်းၵၼ်တင်းမုၵ်ႉၸုမ်းႁဝ်းၶႃႈ၊ ႁဝ်းၶႃႈၵေႃႈလႆႈႁပ်ႉႁူပ်ႉထူပ်းၶဝ်၊ ၶဝ်ၵေႃႈလၢတ်ႈၼႄယူႇ။ ၶဝ်လၢတ်ႈဝႃႈၼႄႁဝ်းဝႃႈ လွင်ႈၸႂ်ႉသိုၵ်းလုၵ်ႈဢွၼ်ႇၼၼ်ႉ RCSS ၵေႃႈပႃး သၢႆမၢႆဝႆႉယူႇ။ ႁဝ်းၶႃႈၵေႃႈလႆႈ ၶိုၼ်းတွပ်ႇၵႄႈဝႃႈ တင်ႈတႄႇႁဝ်းၶႃႈ လႆႈမႃးတႄႇတင်ႈၶွင်ႊသီႊ ဢဝ်ၶိုၼ်းၸိုင်ႈတႆးမႃးၼႆႉ လွင်ႈၸႂ်ႉႁႅင်းၵၢၼ် လုၵ်ႈဢွၼ်ႇ ဢၼ်ဢႃႇယုပႆႇတဵမ် 18 ဢဝ်ၶဝ်ႈႁၢပ်ႇၵိုတ်ႉၵၢၼ်သိုၵ်းၼၼ်ႉ ႁဝ်းၶႃႈလႆႈငိူင်ႉဝႄႈမႃးယဝ်ႉ။ ဢၼ်ၼႆႉ ၵွပ်ႈပိူဝ်ႈပဵၼ်လူၺ်ႈပၵ်းပိူင် ၵူႈမိူင်းမိူင်း ၼႂ်းလူၵ်ႈႁဝ်းၶႃႈတမ်းဝၢင်းဝႆႉလႄႈ ႁဝ်းၶႃႈ ဢမ်ႇလႆႈဢဝ် လုၵ်ႈဢွၼ်ႇၸိူဝ်းဢႃႇယုပႆႇတဵမ်ၼၼ်ႉ မႃးႁၢပ်ႇၵိုတ်ႉၵၢၼ်သိုၵ်း။ ပေႃးဝႃႈၶႂ်ႈႁူႉၶႂ်ႈႁၼ်တႄႉတႄႉၼၼ်ႉ ယႃႇပေထွမ်ႇၵႂၢမ်းတီႈၵႆၵူၺ်း၊ ၶႂ်ႈႁႂ်ႈတူဝ်ၶဝ်ၼၼ်ႉ ၶိုၼ်ႈမိူဝ်းထတ်းတူၺ်း ၼႂ်းတပ်ႉသိုၵ်းႁဝ်းၶႃႈပႃးၼႆ ႁဝ်းၶႃႈလႆႈဢုပ်ႇဢူဝ်းတင်း ၶဝ်ၸဝ်ႈၸိူင်ႉၼၼ်၊ ၶဝ်ၸဝ်ႈၵေႃႈ ဢမ်ႇမိူဝ်းထတ်းတူၺ်းသေပွၵ်ႈ။ လႆႈႁူပ်ႉထူပ်းၵၼ်တင်း ၽူႈမီးပုၼ်ႈၽွၼ်း ၵျီႊၼီႊဝိူဝ်ႊၶေႃႊလ် မိူဝ်ႈလႂ်ၵေႃႈ ႁဝ်းၶႃႈလႆႈဢုပ်ႇပႃးလွင်ႈၼႆႉယူႇ။ ၶဝ်ၸဝ်ႈၵေႃႈဝႃႈ မၼ်းလီၶိုၼ်ႈမႃးယူႇ၊ လႆႈႁပ်ႉႁူႉၶေႃႈမုလ်းၸိူဝ်းၼႆႉယူႇ ၶဝ်ၶိုၼ်းတွပ်ႇပၼ်ၼင်ႇၼႆ။

ထၢမ်- ပွင်ႇဝႃႈ ဢၼ်တဵၵ်းႁႂ်ႈလူင်းလၢႆးမိုဝ်း၊ မိူၼ်ၼင်ႇဝႃႈ လႆႈလူင်းလၢႆးမိုဝ်း တေဢမ်ႇႁဵတ်းၸိူဝ်းၼႆႉ (ၵဵပ်းလုၵ်ႈဢွၼ်ႇႁဵတ်းသိုၵ်း) ဢမ်ႇမီးသင်ၶႃႈၼေႃႈ။

တွပ်ႇ- ၵူႈပွၵ်ႈတႄႉ ၶဝ်ၶတ်းၸႂ်မႃးသူၼ်းတုမ် ႁႂ်ႈႁဝ်းၶႃႈလူင်းလၢႆးမိုဝ်းပႃးဝႃႈ ၸုမ်းႁဝ်းၶႃႈ တပ်ႉသိုၵ်းႁဝ်းၶႃႈၼႆႉ ဢမ်ႇၸႂ်ႉႁႅင်းၵၢၼ်လုၵ်ႈဢွၼ်ႇ။ ႁဝ်းၶႃႈဝႃႈ ၵၢၼ်လူင်းလၢႆးမိုဝ်းၼႆႉ မၼ်းဢမ်ႇယၢပ်ႇသင်၊ ႁဝ်းၶႃႈၶႂ်ႈႁဵတ်းႁႂ်ႈမၼ်းပဵၼ်တၢင်းၵၢၼ် လီလီငၢမ်းငၢမ်း၊ ႁဝ်းလူင်းလၢႆးမိုဝ်းၵႂႃႇယဝ်ႉ သူၸဝ်ႈသမ်ႉတိုၵ်ႉဝႃႈ ႁဝ်းၶႃႈတိုၵ်ႉၸႂ်ႉႁႅင်းၵၢၼ်လုၵ်ႈဢွၼ်ႇယူႇ ၼႆၵေႃႈဢမ်ႇၶႂ်ႈႁႂ်ႈပဵၼ်။ ပေႃးဝႃႈလူင်းလၢႆးမိုဝ်းယဝ်ႉ ႁဝ်းၶႃႈၵေႃႈၶႂ်ႈႁႂ်ႈမၼ်းပဵၼ် ဢၼ်ၵူႈၾၢႆႇၾၢႆႇႁပ်ႉႁွင်းႁဝ်းၶႃႈတႄႉတႄႉ၊ ႁဝ်းၶႃႈလႆႈတၢင်ႇလၢတ်ႈဝႆႉတီႈၶဝ် ၸိူင်ႉၼၼ်။

ထၢမ်- ပေႃႇလသီႇဢၼ်ဝႆႉၼိူဝ်လုၵ်ႈဢွၼ်ႇၼႆႉ RCSS တမ်းဝႆႉၸိူင်ႉႁိုဝ်ၶႃႈ။

တွပ်ႇ- လုၵ်ႈဢွၼ်ႇ ဢၼ်ဢႃႇယုပႆႇတဵမ် 18 ၼၼ်ႉ ႁဝ်းၶႃႈတိုၼ်းဢမ်ႇဢဝ်ႁၢပ်ႇၵိုတ်ႉၵၢၼ်သိုၵ်းၼႆ ပၵ်းပိူင် ၶွင်ႊသီႊဢဝ်ၶိုၼ်းၸိုင်ႈတႆးၼၼ်ႉ ပႃးဝႆႉယူႇ။ ပေႃးဝႃႈဢႃႇယုလႆႈ 18 ယဝ်ႉ ႁဝ်းၶႃႈၸင်ႇႁပ်ႉ ၶဝ်ႈၼႂ်းတပ်ႉသိုၵ်း။ ၵူၺ်းၵႃႈ ဢၼ်ၵူၼ်းၵမ်ႈၼမ် ၵႆႉၶဝ်ႈၸႂ်ၽိတ်းၼႆႉ ဢၼ်ႁဝ်းၶႃႈမႃးႁပ်ႉ ပုၼ်ႈၽွၼ်းလဵင်ႉလူ လုၵ်ႈလၢၼ်ၵူၼ်းမိူင်းတႆးႁဝ်းၶႃႈ ၸိူဝ်းဢၼ်ၼႃႈႁိူၼ်းတႃယေး ယၢပ်ႇၽိုတ်ႇၶၢၼ်ၸႂ် လႄႈသင်၊ ဢၼ်ပေႃႈမႄႈလႆႈၽၢတ်ႇပၢႆႈယၢၼ် ၽေးသိုၵ်းသေယဝ်ႉ ဢဝ်လုၵ်ႈလၢၼ်တုၵ်ႉၶယူႇ ၸွမ်းၼႂ်းဝၢၼ်ႈၼႂ်းၶူင်ႇလႄႈသင်၊ မၢင်ပွၵ်ႈသမ်ႉ ၸိူဝ်းပဵၼ်လုၵ်ႈလၢၼ်တီႈပေႃႈမႄႈ လႆႈလူႉတၢႆၵႂႃႇ ၵွပ်ႈၽေးသိုၵ်းသိူဝ် ဢၼ်ၵိူတ်ႇၶိုၼ်ႈမႃးယူႇ 60 ပီပၢႆပၢႆၼႆႉ။ ဢၼ်လႆႈထူပ်းၽေးၸိူဝ်းၼႆႉ ပဵၵ်ႉသမ်ႉဝႃႈ ဢႃႇယုၶဝ်ပႆႇတဵမ်ၵေႃႈ သင်ၸိူဝ်ႉဝႃႈၼႂ်းဝၢၼ်ႈၼႂ်းၶူင်ႇ ႁၼ်လီဝႃႈ ဢဝ်မွပ်ႈပၼ်တပ်ႉသိုၵ်း ၶွင်ႊသီႊဢဝ်ၶိုၼ်းၸိုင်ႈတႆးႁဝ်းၶႃႈၼႆ ႁဝ်းၶႃႈႁပ်ႉဢဝ်ယူႇ၊ ႁပ်ႉဢဝ်သေတႃႉၵေႃႈ ႁဝ်းၶႃႈဢဝ်မႃးယူႇ ႁူင်းႁဵၼ်းႁဝ်းၶႃႈ တီႈငဝ်ႈၸိုင်ႈလွႆတႆးလႅင်း၊ ဢၼ်မီးတေႃႇထိုင်ၸၼ်ႉသုင် ၸၼ်ႉၵဝ်ႈ ၸၼ်ႉသိပ်း၊ ႁဝ်းၶႃႈမႃးလဵင်ႉလူသေ ဢဝ်သွၼ်ႁဵၼ်းပၺ်ႇၺႃႇယူႇတီႈ ငဝ်ႈငုၼ်းႁဝ်းၶႃႈ။

ဢၼ်ၼႆႉ ၵမ်ႈၼမ်ၶဝ်ႈၸႂ်ၽိတ်းဝႃႈ ႁဝ်းၶႃႈၵဵပ်းလုၵ်ႈဢွၼ်ႇမႃးႁဵတ်းသိုၵ်း၊ တီႈတႄႉမၼ်းဢမ်ႇၸႂ်ႈ၊ မၼ်းပဵၼ်လုၵ်ႈဢွၼ်ႇၽၢၼ်ပေႃႈမႄႈ။ ႁဝ်းၶႃႈမုၵ်ႉၸုမ်းႁပ်ႉဢဝ်ပုၼ်ႈၽွၼ်းသေ မႃးလဵင်ႉလူ သွၼ်ပၼ်ပၺ်ႇၺႃႇၶဝ်သေ ယူႇတီႈလွႆတႆးလႅင်း ၸိူင်ႉၼႆၵူၺ်းၶႃႈ။ ၶဝ်ၸိူဝ်းၼၼ်ႉ ပေႃးဝႃႈဢႃႇယုတဵမ် 18 ယဝ်ႉ၊ ဢမ်ႇၶႂ်ႈသိုပ်ႇႁဵၼ်းလိၵ်ႈယဝ်ႉ၊ ႁဵၼ်းလိၵ်ႈၵေႃႈထိုင် ၸၼ်ႉ 9 ၸၼ်ႉ 10 ၸွမ်းၼင်ႇႁူင်းႁဵၼ်းႁဝ်းၶႃႈ တီႈလွႆတႆးလႅင်း ႁဝ်းမီးပၼ်ႁဵၼ်းယူႇၼၼ်ႉ ပေႃးဝႃႈၶဝ်ပူၼ်ႉၸၼ်ႉယဝ်ႉ ၶဝ်ၶႂ်ႈႁၢပ်ႇၵိုတ်ႉၵၢၼ်သိုၵ်းၼႆၵေႃႈ ၸင်ႇၵွႆႈႁပ်ႉၶဝ်ႈ ၼႂ်းတပ်ႉသိုၵ်းၵႂႃႇ။ ၵမ်ႈၼမ်တႄႉ မီးဝႆႉပေႃႇလသီႇ ဢႃႇယုပႆႇတဵမ် 18 ၼၼ်ႉ ႁဝ်းၶႃႈဢမ်ႇဢဝ်ႁဵတ်းသိုၵ်း၊ ဢမ်ႇဢဝ်ႁၢပ်ႇၵိုတ်ႉၵၢၼ်သိုၵ်း၊ ဢႃႇယုတဵမ် 18 ယဝ်ႉ ၸင်ႇၵွႆႈဢဝ်ႁၢပ်ႇၵိုတ်ႉ ၵၢၼ်သိုၵ်းၼႆၼၼ်ႉ တႅတ်ႈတေႃးယူႇၶႃႈ။ လွင်ႈၶဝ်ႈၸႂ်ၽိတ်းၵေႃႈ ပဵၼ်လွင်ႈဢၼ်ႁဝ်းၶႃႈ လႆႈႁပ်ႉဢဝ်လုၵ်ႈဢွၼ်ႇၽၢၼ်ပေႃႈမႄႈ မႃးလဵင်ႉလူ ႁဵၼ်းသွၼ်ပၼ်ပၺ်ႇၺႃႇ။ လွင်ႈၼႆႉ ႁဝ်းၶႃႈၵေႃႈလႆႈလၢတ်ႈ တၢင်ႇပႃးၼႄတီႈတၢင်း ၵျီႊၼီႊဝိူဝ်ႊၶေႃႊလ်ၶဝ်ယူႇၶႃႈ။
ထၢမ်- ၵဵဝ်ႇၵပ်းလွင်ႈမၢၵ်ႇမႅင်း မၢၵ်ႇၾင်လိၼ်ၼႆႉ ပဵၼ်ၸိူင်ႉႁိုဝ်ၶႃႈ။

တွပ်ႇ- ၶဝ်ၽူႈမီးပုၼ်ႈၽွၼ်း ၵျီႊၼီႊဝိူဝ်ႊၶေႃႊလ်ၵေႃႈ လႆႈမႃးသပ်းလႅင်းၼႄႁဝ်းၶႃႈ လွင်ႈၽေးမၢၵ်ႇမႅင်း။ မၢၵ်ႇမႅင်းဢၼ်ၵၢင်ယူႇၼၼ်ႉ မၼ်းမီးၽေးတေႃႇၵူၼ်းမိူင်း ၸိူဝ်းဢမ်ႇၸႂ်ႈသိုၵ်း ဢမ်ႇယူႇၼႂ်းတပ်ႉသိုၵ်းၾၢႆႇလႂ်၊ ယဝ်ႉၵေႃႈ သတ်းဢၼ်ၵူၼ်းမိူင်းလဵင်ႉလူလႄႈသင်၊ သတ်းထိူၼ်ႇလႄႈသင်၊ ၶဝ်လႆႈႁူပ်ႉထူပ်းၺႃးၽေး မၢၵ်ႇမႅင်းၼႆႉသေ ပဵၼ်တုၵ်ႉၶိတၵႂႃႇလႄႈသင်၊ လူႉတၢႆၵႂႃႇၸိူဝ်းၼၼ်ႉၵေႃႈၼမ်။ ၵဵဝ်ႇၵပ်းလွင်ႈၼႆႉ ၸွမ်းၼင်ႇပၵ်းပိူင်ၵူႈၸိုင်ႈမိူင်း ၼႂ်းလုမ်ႈၾႃႉမီးဝႆႉၼၼ်ႉ ၶဝ်ၸဝ်ႈမႃးသပ်းလႅင်းၼႄႁဝ်းၶႃႈဝႃႈ ယွၼ်းႁၢမ်ႈသီး၊ ဢမ်ႇၶႂ်ႈႁႂ်ႈမုၵ်ႉၸုမ်း ဢၼ်ႁဵတ်းၵၢၼ်သိုၵ်းယူႇၼႆႉ ၸႂ်ႉမၢၵ်ႇမႅင်းသေမႃးတေႃႇသူႈၵၼ်၊ ၵွပ်ႈမၼ်းပဵၼ်ၽေး တေႃႇၵူႈၾၢႆႇၾၢႆႇလႄႈ ၶႂ်ႈႁႂ်ႈၵိုတ်းယိုတ်းပၼ်၊ ၶဝ်လၢတ်ႈသပ်းလႅင်းၼႄႁဝ်းၶႃႈ ဝႆႉၸိူင်ႉၼႆ။

ထၢမ်- တေႃႈလဵဝ် ငဝ်းလၢႆးၼႃႈသိုၵ်း တၢင်းမိူင်းတႆးႁဝ်းၶႃႈတႄႉ ၾၢႆႇၼိုင်ႈၵေႃႈလူတ်းယွမ်းၵႂႃႇၽွင်ႈယူႇ။ ၾၢႆႇၼိုင်ႈၵေႃႈ လွင်ႈၸႂ်ႉမၢၵ်ႇမႅင်း ၸိူဝ်းၼႆႉတႄႉ တေဢမ်ႇပေႃးမီးၶႃႈယဝ်ႉယူဝ်ႉ၊ လွင်ႈၼႂ်းမိူင်းႁဝ်းၵေႃႈ လၢတ်ႈၼႄပၼ်ၽွင်ႈၶႃႈ။

တွပ်ႇ- တင်ႈတႄႇႁဝ်းၶႃႈလႆႈႁူပ်ႉထူပ်းဢုပ်ႇဢူဝ်းၵၼ်တင်း ၽူႈမီးပုၼ်ႈၽွၼ်းၾၢႆႇလူင်ပွင်ၸိုင်ႈသေ လႆႈတႄႇလူင်းလၢႆးမိုဝ်းၵိုတ်းတိုၵ်းၵၼ်မႃး တေႃႇထိုင်ယၢမ်းမိူဝ်ႈလဵဝ်ၼႆႉ လႆႈမႃးယဝ်ႉၶၢဝ်းတၢင်း 3 ပီယဝ်ႉ။ ပေႃးထတ်းသၢင်တူၺ်း လွင်ႈတုမ်ႉတိူဝ်ႉၵၼ်ၼႂ်းပွတ်းတွၼ်ႈ ဢွင်ႈတီႈၸိူဝ်းၼႆႉ ပဵၼ်ၸၼ်ႉပႃႈတႂ်ႈၶဝ် ဢမ်ႇၶဝ်ႈၸႂ်ၵၼ်သေ လႆႈပဵၼ်ၵႂႃႇၵူၺ်း။ ၵွပ်ႈၼၼ်လႄႈ တႃႇတေသၢင်ႈလွင်ႈငမ်းယဵၼ် ဢၼ်ႁဝ်းၶႃႈ မုင်ႈမွင်းယူႇမႃး ပီယၢဝ်းၶၢဝ်းႁိုင်ၼၼ်ႉ ႁႂ်ႈမၼ်းပေႃးၸၢင်ႈသိုပ်ႇၵႂႃႇလႆႈၼၼ်ႉ ၵၢၼ်တိုၵ်းယိုဝ်းၵၼ် ၵဵဝ်ႇၵပ်းတၢင်းၵၢၼ်သိုၵ်းၼၼ်ႉ ႁဝ်းၶႃႈၵိုတ်းယိုတ်းၵႂႃႇလႄႈ လွင်ႈတိုၵ်းၵၼ်ဢေႇၵႂႃႇ။ လွင်ႈၶႂ်ႈလႆႈ (လူဝ်ႇ) ၾၢႆႇၵၢၼ်သိုၵ်းၵေႃႈဢေႇမႃး။ လွင်ႈႁဵတ်းၵၢၼ်ၵဵဝ်ႇၵပ်းၵၢၼ်သိုၵ်း တႄႇဢဝ်ၵၢၼ်ယိုဝ်းၵၼ်၊ ၵၢၼ်ႁၢင်ႈမၢၵ်ႇတေႃႇၵၼ်ၸိူဝ်းၼႆႉ မၼ်းၵေႃႈလူတ်းယွမ်းၵႂႃႇၸွမ်းၵၼ်မႃး။ ၵွပ်ႈၼၼ်လႄႈ မိူဝ်ႈၶၢဝ်းယၢမ်းႁဝ်းၶႃႈၵိုတ်းယိုဝ်းၵၼ်ယူႇၼႆႉတႄႉ လွင်ႈၵၢၼ်ၸႂ်ႉမၢၵ်ႇမႅင်းၼၼ်ႉ ႁဝ်းၶႃႈၵေႃႈဢမ်ႇလႆႈၸႂ်ႉ၊ ဢမ်ႇလႆႈႁဵတ်းဢွၵ်ႇမႃးထႅင်ႈ ဢၼ်မႂ်ႇမႂ်ႇမၼ်းသေ ဢဝ်မႃးၵၢင်သႂ်ႇၵၼ် တိုၵ်းၵၼ်၊ ၼႆႉၵေႃႈ ပဵၼ်ငဝ်းလၢႆးဢၼ်ပဵၼ်ယူႇမီးယူႇၸိူင်ႉၼႆၶႃႈ။