သုၼ်ၵၢင်လွင်ႈငမ်းယဵၼ်မၢၼ်ႈ တင်းၸုမ်းၸၢဝ်းၶိူဝ်း ႁူပ်ႉထူပ်းၵၼ် ၼႂ်းၵဵင်းမႆႇ ၸိုင်ႈထႆး။ ဢုပ်ႇဢူဝ်းလွင်ႈ သိုၵ်းမၢၼ်ႈယိုဝ်းသႂ်ႇပၢင်သွၼ် ၽူႈမီးၸၼ်ႉ တီႈလၢႆႇၸႃႇ၊ လွင်ႈၵိုတ်းယိုဝ်းပတ်းပိုၼ်ႉၸိုင်ႈမိူင်း။

ဝၼ်းတီႈ 27/11/2014 (မိူဝ်ႈၼႆႉ) ယၢမ်း 10:00-12:00 မူင်း၊ ၸုမ်းၸၢဝ်းၶိူဝ်း ၶွမ်ႊမတီႊၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCCT) တင်း သုၼ်ၵၢင်လွင်ႈငမ်းယဵၼ်မၢၼ်ႈ (MPC) ႁူပ်ႉထူပ်း ဢုပ်ႇဢူဝ်းၵၼ်တီႈ ၼႂ်းၵဵင်းမႆႇ ၸိုင်ႈထႆး။

ပိူင်လူင်မၼ်း ဢုပ်ႇဢူဝ်း- 1.လွင်ႈသိုၵ်းမၢၼ်ႈ ဢဝ်ၵွင်ႈလူင်ယိုဝ်းသႂ်ႇ ပၢင်သွၼ်ၽူႈမီးၸၼ်ႉ တီႈဝဵင်းလၢႆႇၸႃႇ၊ ငဝ်ႈငုၼ်းတပ်ႉသိုၵ်းၶၢင်လွတ်ႈလႅဝ်း (KIA) မိူင်းၶၢင်၊ လႅၼ်လိၼ်မၢၼ်ႈ-ၶႄႇ၊ ႁဵတ်းႁႂ်ႈၵူၼ်းတၢႆ 20 ပၢႆ။ လွင်ႈၼႆႉတေႁဵတ်းႁိုဝ်ၵႄႈလိတ်ႈ။
2.လွင်ႈပိူဝ်ႈတႃႇလူင်းလၢႆးမိုဝ်းၵိုတ်းယိုဝ်း ပတ်းပိုၼ်ႉတူဝ်ႈမိူင်း။ လွင်ႈၼႆႉ ဢၢၼ်းႁဵတ်းၼႃႈဝၼ်းတီႈ 25/12/2014 (ၵွၼ်ႇဝၼ်းၶရိတ်ႊသမၢတ်ႊ) ။ ၵူၺ်းၵႃႈပႆႇတတ်းမၵ်းဝၼ်း၊ လွင်ႈၼႆႉ တေႁူပ်ႉၵၼ်ထႅင်ႈၵမ်းၼိုင်ႈ။

ပၢင်ႁူပ်ႉထူပ်းဢုပ်ႇဢူဝ်းပွၵ်ႈၼႆႉ ၾၢႆႇ MPC မီးဢူးလႃႉမွင်ႇသူၺ်ႇ တင်း ဢူးယႄးထုတ်ႉ ဢွၼ်ႁူဝ်။ ၾၢႆႇ NCCT မီးၶုၼ်ဢူၵ်ႉၵႃႇ တင်းၸွမ်သိုၵ်းၵုၼ်ႇမေႃႇ ဢွၼ်ႁူဝ်- ၼႆယဝ်ႉ။

တွၼ်ႈဝၢႆးဝၼ်းၼႆႉ MPC တင်း ၶွင်ႊသီႊဢဝ်ၶိုၼ်းၸိုင်ႈတႆး RCSS ႁူပ်ႉထူပ်းဢုပ်ႇဢူဝ်းၵၼ်- လႆႈႁူႉၼင်ႇၼႆ။