ၸဝ်ႈသြႃႇတႃသႅင် သင်ၶၸဝ်ႈၽူႈႁေႃးထမ်း/တြႃး ၵတ်ႉၶႅၼ်ႇ ၼႂ်းသင်ၶတႆး လွၼ်ႇသဵင်ႈသုတ်းမုၼ် ၵႂႃႇတီႉဝတ်ႉသႃလႄး ၸႄႈဝဵင်းမႄႈႁွင်ႈသွၼ် ၸိုင်ႈထႆး။

Photo: internet

ၸၢႆးၸၢႆး တၵ်ႉၵႃႇသတ်ႉထႃး ဝတ်ႉသႃလႄး လၢတ်ႈဝႃႈ- “ၸဝ်ႈသြႃႇတႃသႅင်ၼႆႉ သဵင်ႈၵမ်သုတ်းမုၼ် ၵႂႃႇလူၺ်ႈတၢင်းပဵၼ်မၢၵ်ႇႁူဝ်ၸႂ်။ ဢွၼ်ၼႃႈၼႆႉ မၼ်းၸဝ်ႈမႃးၶဝ်ႈႁူင်းယႃ ၵဵင်းမႆႇရၢမ်း တီႈၵဵင်းမႆႇ၊ ဝၢႆးသေယူတ်းယႃၶႅၼ်းယဝ်ႉသေ ပွၵ်ႈမိူဝ်းၵႂႃႇ။ မၼ်းၸဝ်ႈ ယင်းလၢတ်ႈဝႃႈ တေမိူဝ်းႁေႃးထမ်း/ တြႃး ဢၼိတ်ႉၸ တုၵ်ႉၶ ဢၼတ်ႉတႃး ပၼ်တၵ်ႉၵႃႇသတ်ႉထႃး ၵူၼ်းဝၢၼ်ႈၵူၼ်းမိူင်းၶဝ်၊ ဝၢႆးႁွတ်ႈထိုင်တီႈ ဝတ်ႉယဝ်ႉၵေႃႈ လႆႈႁေႃးထမ်းယဝ်ႉတူဝ်ႈၵႂႃႇ။ ဝၢႆးမႃးၵေႃႈ ပၢႆးယူႇလီၶႅမ်ႉလႅပ်ႈယူႇ။ ၵူၺ်းၵႃႈ ၽိူဝ်ႇထိုင်မႃးၵၢင်ၼႂ်ၸဝ်ႉ ဝၼ်းတီႈ 10/11/2014 (မိူဝ်ႈၼႆႉ) ယၢမ်း 04:30 ၼၼ်ႉ တၢင်းတၵ်ႉၵႃႇသတ်ႉထႃး ၶိုၼ်ႈမိူဝ်းတူၺ်းမၼ်းၸဝ်ႈ တီႈဝတ်ႉ၊ တူဝ်မၼ်းၸဝ်ႈပေႃးၶႅင်ယဝ်ႉ” (လွၼ်ႇသဵင်ႈသုတ်းမုၼ်ၵႂႃႇယဝ်ႉ)- ဝႃႈၼႆ။

ဢွၼ်ၼႃႈၼႆႉ ၸဝ်ႈသြႃႇတႃသႅင် ၼင်ႈဝတ်ႉသႃလႄး ဝၢၼ်ႈသႃလႄး ဢိူင်ႇၼႃးပူႇပွမ်ႈ၊ ၵိင်ႇၸႄႈဝဵင်း ပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ် ၸိုင်ႈထႆး။ လွၼ်ႇသဵင်ႈၵမ်သုတ်းမုၼ် ၽွင်းဢႃႇယုၸဝ်ႈလႆႈ 72 ပီ။

မုၼ်ၸဝ်ႈတႃသႅင်ၼႆႉ ၸႃႇတိတီႈၵိူတ်ႇ ပဵၼ်ပွတ်းမိူင်းၸၢင်၊ ၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း။ ၵိူတ်ႇမိူဝ်ႈလၵ်းၼီႈပီတႆး 2036 ၼီႈ၊ ပီၵေႃးၸႃႇ 1304 ၼီႈ၊ လိူၼ်ၸဵင်လွင်ႈ 2 ၶမ်ႈ ဝၼ်းၽတ်း။ မိူဝ်ႈဢႃႇယု 3 ၶူပ်ႇ ၸပ်းပႅၼ်းတၢင်းပဵၼ် “တူင်းတႃၶႆႇ” ယူတ်းယႃဢမ်ႇႁၢႆ ၵူၺ်းဢမ်ႇၵႃး ယွၼ်ႉဢၢၼ်ႇၵျၢမ်းယႃႈယႃ လိၵ်ႈတႆးပၢၼ်ၵဝ်ႇ ၽိတ်းၽိတ်းၽူၼ်ၽူၼ်၊ ဢၼ်တႅမ်ႈဝႃႈ- ဢီႈယႃၼႆႉ ဢဝ် “ၼွၵ်းလေႃးၼမ်ႉၵိူၼ်ႇသေ ၶၢတ်ႈႁၢႆယဝ်ႉႁေႃႈ” ၼႆၼၼ်ႉ ၵႂႃႇလူၽိတ်းဝႃႈ “ၼွၵ်းလေႃးၼၢမ်ၵိုၼ်သေၶၢတ်ႈႁၢႆယဝ်ႉႁေႃး” ၼႆလႄႈ တႃသွင်ၶွၼ် ၸင်ႇပေႃးလႆႈလူႉမွတ်ႇၵႂႃႇၸဵမ်လဵၵ်ႉ- ဝႃႈၼႆ။

ထိုင်မႃးဢႃႇယု 5 ၶူပ်ႇ ပေႃႈမႄႈ လပ်းတႃလိုမ်းမိူင်း လမ်းလွႆးၵၼ်ၵႂႃႇသေ ယွၼ်ႉပိူဝ်ႈပဵၼ်လုၵ်ႈၸၢႆး ၵေႃႉလဵဝ်လႄႈ ပိုင်ႈဢိင်ယူႇသဝ်းၸွမ်းပေႃႈၼႃႉ လုင်းဢၢဝ်မႃး။ ဢမ်ႇႁိုင်ဢမ်ႇၼၢၼ်း (ၵမ်ႈၽွင်ႈဝႃႈ ၽွင်းဢႃႇယု 8 ၶူပ်ႇ) ၼုင်ႈသၢင်ႇၵၢၼ်းပဵၼ်သၢင်ႇ၊ ထိုင်မႃးပီသႃသၼႃ 2508 ၊ ပီၵေႃးၸႃႇ 1326 ၊ မိူဝ်ႈဢႃႇယုလႆႈ 22 ပီ ၶိုၼ်ႈပဵၼ်ၸၢင်း တီႈမိူင်းၸၢင်။ ယွၼ်ႉပိူဝ်ႈတႃဢမ်ႇႁၼ် ဢမ်ႇၸၢင်ႈႁဵၼ်းသွၼ် မေႃလိၵ်ႈလၢႆးလႆႈလႄႈ ၸင်ႇလႆႈထွမ်ႇငိၼ်း လဵပ်ႈႁဵၼ်း ၵဵပ်းတွင်းႁႃႁူႉ ဢဝ်တၢင်းႁူႉတၢင်းႁၼ် ၵႃႈတီႈၽူႈႁူႉယႂ်ႇႁၼ်ၵႂၢင်ႈၶဝ်သေ ၾိုၵ်းႁေႃးထမ်း/တြႃး ပူင်လၢတ်ႈၵႂၢမ်းထမ်းမႃး ၸဵမ်မိူဝ်ႈဢႃႇယုလႆႈ 16 ပီ။

မိူဝ်ႈပဵၼ်မုၼ်ၸၢင်းၼၼ်ႉ လႆႈႁေႃးထမ်း/တြႃး ၶေႃႈသင်ႇသွၼ် ပုတ်ႉထၸဝ်ႈ မႃးတီႈပွတ်းတွၼ်ႈ ၼႂ်းမိူင်းၸၢင်၊ ၶုမ်ႇပၢင်၊ ၵဵင်းလိူၼ် ၸိူဝ်းၼႆႉ ႁိမ်း 20 ပီပၢႆ။ ၵူၺ်းၵႃႈ ပၢၼ်ၼၼ်ႉ ယင်းပႆႇပႃႈမီးၶႅပ်း ဢတ်းသဵင်ထမ်း/တြႃး ပိုၼ်ၽႄႈဢွၵ်ႇလႄႈ ပီႈၼွင်ႉမိူင်းတႆးတၢင်ႇတီႈ ယင်းပႆႇပႃႈႁူႉငိၼ်းၸိုဝ်ႈသဵင် လွင်ႈမုၼ်ၸဝ်ႈတႃသႅင်ၵႃႈႁိုဝ်။

ထိုင်မႃးမိူဝ်ႈပီ 1975 ၸင်ႇလႆႈဢွၵ်ႇဢႅဝ်ႇဝၢၼ်ႈလၢဝ်းမိူင်း ၶၢမ်ႈမႃးတၢင်းဢွၵ်ႇၶူင်း၊ ယူႇထင်ပွတ်းမိူင်းပူး မိူင်းပဵင်းၸိူဝ်းၼႆႉသေ ႁေႃးတြႃးမႃး၊ မီးၶႅပ်းထမ်း/တြႃး ဢတ်းသဵင်ပိုၼ်ၽႄႈဢွၵ်ႇမႃး၊ ၵူၼ်းတင်းၼမ်ၸင်ႇႁူႉ ၸိုဝ်ႈသဵင် မၼ်းၸဝ်ႈမႃး။ ဝၢႆးၼၼ်ႉ မၼ်းၸဝ်ႈသိုပ်ႇၶဝ်ႈ မႃးတၢင်းမိူင်းထႆးသေ ႁေႃးထမ်းတြႃး ပၼ်ပီႈၼွင်ႉတႆး ၼႂ်းမိူင်းထႆးတီႈၼိုင်ႈယဝ်ႉတီႈၼိုင်ႈ၊ ႁၢၼ်ႉတေႃႇမၼ်းၸဝ်ႈ ပေႃးလွၼ်ႇသဵင်ႈၵမ် သုတ်းမုၼ်ၵႂႃႇၼႆႉ။