ဝၼ်းတီႈ 24/02/1993 (မႅၼ်ႈလိူၼ်သီႇမႂ်ႇ 4 ၶမ်ႈ) ဝၼ်းပုတ်ႉ၊ ယၢမ်း 11:45 မူင်း၊ မႅၼ်ႈမိူဝ်ႈဢွၵ်ႇတၢင်း ၵႂႃႇလွင်ႈၼႃႈၵၢၼ်သေ ဢမ်ႇထၢင်ႇဢမ်ႇမုင်ႈမွင်း လႆႈၵႂႃႇႁူပ်ႉႁၼ်မုၼ်ၸဝ်ႈတႃသႅင် မႃးပူင်ၵႂၢမ်းပၼ်ပိုၼ်ႉႁူႉ လွၼ်ႉမွၼ်းထမ်း တီႈပီႈၼွင်ႉတႆး ၵူၼ်းမိူင်းထႆး ၸွမ်းၶွပ်ႇၼမ်ႉလႅၼ်လိၼ် တီႈဝၢၼ်ႈထုင်ႉသႃလႄး၊ ဢိူင်ႇၼႃးပူႇပွမ်ႈ၊ ၵိင်ႇၸႄႈဝဵင်း ပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ်။

တင်ႈတႄႇယၢမ်း 20:00 မူင်း တေႃႇထိုင် 23:00 မူင်းပၢႆပၢႆ လႆႈမူၼ်ႈၼူဝ်ၶူဝ်သိူဝ်း ၸွမ်းၼမ်ႉထမ်းၵႂၢမ်းၶမ်း မုၼ်ၸဝ်ႈတႃသႅင်ႁဝ်းပူင်လၢတ်ႈ သင်ႇသွၼ်ၵႂႃႇၼၼ်ႉလႄႈ ၼႂ်းပပ်ႉမၢႆဝၼ်းၼၼ်ႉ ၸင်ႇပေႃးလႆႈတႅမ်ႈဝႆႉဝႃႈ- “လိူၼ်သီႇမႂ်ႇ 4 ၶမ်ႈ၊ ဝၼ်းၵမ်ႈသၢင်ႇတေႃႇ၊ လႆႈၵေႃႇတၢင်းလီ၊ လိုမ်းတၢင်းၶီၽၢၼ်၊ ၸူဝ်ႈပၢၼ်လႆႈၺႃး၊ ၵႂၢမ်းထမ်း/တြႃးမုၼ်ၸဝ်ႈတႃသႅင်၊ ဢမ်ႇလႆႈၼႅင်ၸႂ် ငဝ်မိုင်၊ တင်းႁိုင်လႆႈသိူဝ်းၼူဝ် မူၼ်ႈၶူဝ်ဢမ်ႇတႅၵ်ႈလႆႈ၊ တၢင်းမႆႈၵႆယၢၼ်၊ ပဵၼ်လွင်ႈသုၼ်ႇမၢၼ်လူင်တႄႉတႄႉ” - ၼႆယဝ်ႉ။

ယွၼ်ႉပိူဝ်ႈၶုၵ်းထူပ်းဝူၼ်ႉႁၼ်ဝႃႈ ပေႃးၵၢမ်ႇဢၼ်သုၼ်ႇ မုၼ်ဢမ်ႇတေႃႇ ဢမ်ႇမီးၼမ်ႉယၢတ်ႇၸၢတ်ႈၵွၼ်ႇ ပၢၼ်ဢွၼ်ၸုင်ၸူးၵေႃႈ တေဢမ်ႇၼပ်ႉတေႃႈႁူပ်ႉတေႃႇႁၼ်ပႃး ဢမ်ႇလႆႈမႃးထွမ်ႇ ၶေႃႈပူင်ၵႂၢမ်းလၢတ်ႈ ၵႂၢမ်းမျၢတ်ႈ ၵႂၢမ်းလီ မၼ်းၸဝ်ႈ။

မိူဝ်ႈပႆႇတႄႇပၢင်ပူင်ၼမ်ႉထမ်း ၵႂၢမ်းၶမ်းတြႃးသင်ႇသွၼ်ၼၼ်ႉ လႆႈၵႂႃႇသုတ်ႉၸမ်ဢိူမ်ႈၸူးသေ တူင်ႉတၵ်ႉ မုၼ်ၸဝ်ႈတႃသႅင်လႄႈ တွင်ႈထၢမ်ႁူႉထိုင်ပိုၼ်းၵႅပ်ႈမၼ်းၸဝ်ႈ မိူၼ်ၼင်ႇတီႈတႂ်ႈၼႆႉ။

မုၼ်ၸဝ်ႈတႃသႅင်ၼႆႉ ၸႃႇတိတီႈၵိူတ်ႇမၼ်းၸဝ်ႈ ပဵၼ်ပွတ်းမိူင်းၸၢင်၊ ၸႄႈဝဵင်းမိူင်းသူႈ။ ၵိူတ်ႇမိူဝ်ႈလၵ်းၼီႈပီတႆး 2036 ၼီႈ၊ ပီၵေႃးၸႃႇ 1304 ၼီႈ၊ လိူၼ်ၸဵင်လွင်ႈ 2 ၶမ်ႈ ဝၼ်းၽတ်း။ (ၽွင်းၼၼ်ႉ ဢႃႇယုၸဝ်ႈယဵပ်ႇၶဝ်ႈ 51 ပီ)။

ၸဵမ်မိူဝ်ႈဢႃႇယု 3 ၶူပ်ႇ၊ မိူဝ်ႈပီၵေႃးၸႃႇ 1307 ၼီႈၼၼ်ႉ ၸပ်းပႅၼ်းတၢင်းပဵၼ် “တူင်းတႃၶႆႇ” ယူတ်းယႃဢမ်ႇႁၢႆ ၵူၺ်းဢမ်ႇၵႃး ယွၼ်ႉၵူၼ်းၵူႈပွၵ်ႈႁေႃးၺႃး ၵျၢမ်းယႃႈယႃ လိၵ်ႈတႆးဢမ်ႇတၢႆတူဝ် ၽိတ်းၽိတ်းၽူၼ်ၽူၼ်၊ ဢၼ်တႅမ်ႈဝႃႈ- ဢီႈယႃၼႆႉ ဢဝ် “ၼွၵ်းလေႃးၼမ်ႉၵိူၼ်ႇသေၶၢတ်ႈႁၢႆယဝ်ႉႁေႃႈ” ၼႆၼၼ်ႉ ၵႂႃႇလူၽိတ်းဝႃႈ “ၼွၵ်းလေႃးၼၢမ်ၵိုၼ်သေၶၢတ်ႈႁၢႆယဝ်ႉႁေႃး” ၼႆလႄႈ တႃသွင်ၶွၼ် ၸင်ႇပေႃးလႆႈလူႉမွတ်ႇၵႂႃႇၸဵမ်လဵၵ်ႉ- ဝႃႈၼႆ။ ၼႆႉၵေႃႈ ယွၼ်ႉလိၵ်ႈႁဝ်း ဢမ်ႇတၢႆတူဝ်လႄႈ တႃၵူၼ်းပေႃးလႆႈမွတ်ႇယွၼ်ႉမၼ်းမႃး။

ထိုင်မႃးဢႃႇယု 5 ၶူပ်ႇၼၼ်ႉ ၵူၼ်းထဝ်ႈယိင်းထဝ်ႈၸၢႆးၵေႃႈ လပ်းတႃလိုမ်းမိူင်း လမ်းလွႆးၵၼ်ၵႂႃႇသေ ယွၼ်ႉပိူဝ်ႈပဵၼ်လုၵ်ႈၸၢႆးၵေႃႉလဵဝ်လႄႈ ၵူၺ်းလႆႈယူႇၸွမ်းပေႃႈၼႃႉ လုင်းဢၢဝ်မႃး။ ဢမ်ႇႁိုင်ဢမ်ႇၼၢၼ်းၵေႃႈ ၼုင်ႈသၢင်ႇၵၢၼ်းပဵၼ်သၢင်ႇၸဵမ်လဵၵ်ႉ။ ထိုင်မႃးပီသႃသၼႃ 2508 ၊ ပီၵေႃးၸႃႇ 1326 ၊ မိူဝ်ႈဢႃႇယုလႆႈ 22 ပီၼၼ်ႉ ၸင်ႇၶိုၼ်ႈပဵၼ်ရႁၢၼ်း တီႈမိူင်းၸၢင်။ ယွၼ်ႉပိူဝ်ႈဢမ်ႇၸၢင်ႈႁဵၼ်းသွၼ် မေႃလိၵ်ႈလၢႆးလႆႈလႄႈ ၸင်ႇလႆႈထွမ်ႇငိၼ်း လဵပ်ႈႁဵၼ်း ၵဵပ်းတွင်းႁႃႁူႉ ဢဝ်တၢင်းႁူႉတၢင်းႁၼ် ၵႃႈတီႈၽူႈႁူႉယႂ်ႇႁၼ်ၵႂၢင်ႈၶဝ်သေ ၾိုၵ်းႁေႃးထမ်း/တြႃး ပူင်လၢတ်ႈၵႂၢမ်းထမ်းမႃး ၸဵမ်မိူဝ်ႈဢႃႇယုလႆႈ 16 ပီ။

မိူဝ်ႈပဵၼ်ရႁၢၼ်း မုၼ်ၸၢင်းၼၼ်ႉ သမ်ႉဝႃႈလႆႈႁေႃးထမ်း/တြႃး ပၢၵ်ႈလွင်ႈၼႄတၢင်း ပိုတ်ႇပၼ်တၢင်းႁူႉ ၼမ်ႉထမ်းၵႂၢမ်းၶမ်း သႃသၼႃၶေႃႈသင်ႇသွၼ် ပုတ်ႉထမႃးတီႈပွတ်းတွၼ်ႈ ၼႂ်းမိူင်းၸၢင်၊ ၶုမ်ႇပၢင်၊ ၵဵင်းလိူၼ် ၸိူဝ်းၼႆႉ ယူႇပဵၼ်ႁိမ်း 20 ပီပၢႆၵေႃႈ ယင်းပႆႇပႃႈမီးၶႅပ်းဢတ်းသဵင်ထမ်း/တြႃး ပိုၼ်ၽႄႈဢွၵ်ႇလႄႈ ပီႈၼွင်ႉမိူင်းတႆးတၢင်ႇတီႈ ယင်းပႆႇပႃႈႁူႉငိၼ်း လွင်ႈမုၼ်ၸဝ်ႈတႃသႅင်ၵႃႈႁိုဝ်။

ထိုင်မႃးမိူဝ်ႈပီ 1975 ၸင်ႇလႆႈဢွၵ်ႇလႄႇဝၢၼ်ႈလၢဝ်းမိူင်းသေ ၶၢမ်ႈမႃးတၢင်းဢွၵ်ႇၶူင်း၊ ယူႇထင်ပွတ်းမိူင်းပူး မိူင်းပဵင်းၸိူဝ်းၼႆႉ ႁေႃးတြႃးမႃးလႄႈ မီးၶႅပ်းထမ်း/တြႃး ဢတ်းသဵင်ပိုၼ်ၽႄႈဢွၵ်ႇသေ ၵူၼ်းတင်းၼမ်ၸင်ႇႁူႉၸိုဝ်ႈသဵင် ၼမ်ႉၵတ်ႉတၢင်းလၢတ်ႈ မုၼ်ၸဝ်ႈတႃသႅင်မႃး။ တြႃးဢၼ်လႆႈထွမ်ႇမိူဝ်ႈ ႁေႃးတီႈထုင်ႉသႃလႄးၼႆႉ ၸိုဝ်ႈႁူဝ်ၶေႃႈမၼ်းဝႃႈ- “ဢၢႆႈလမ် ၸႂ်လမ်ၵိၼ်ထၢၼ်ႇမီႈ” - ၼႆယဝ်ႉ။

ယူႇတီႈၵေႃႉတႅမ်ႈလိၵ်ႈ ပဵၼ်ၽူႈလဵပ်ႈႁဵၼ်း လွင်ႈၾိင်ႈငႄႈလိၵ်ႈလၢႆး၊ လွင်ႈလွၼ်ႉၵႂၢမ်းပူႇမွၼ်ႇ၊ လွင်ႈမွၼ်းၵႅၼ် ၼမ်ႉၵႂၢမ်း ၶိုၵ်ႉၶမ်ႇၵူႈပွၵ်ႈၼၼ်ႉသေ လႆႈမႃးထွမ်ႇငိၼ်း ၶေႃႈပူင်ၵႂၢမ်းသင်ႇသွၼ်မုၼ်ၸဝ်ႈတႃသႅင်ၼႆႉ ပဵၼ်ဢၼ်လႆႈႁူႉငိၼ်းတွင်းမၢႆ ၶေႃႈၵႂၢမ်းၶႅမ်ႉတွၼ်း ၵဝ်ႇမွင် ဢၼ်ၸိၵ်းၶိၵ်းၸွၵ်းၶွၵ်း ၸွၵ်ႉၶွၵ်ႉ ၸႅၼ်ၶႅၼ်း မီးတီႈပွင်ႇလိုၵ်ႉၵႂၢင်ႈတင်းၼမ်။

ပဵၼ်ဢၼ်ယုမ်ႇယမ် ယွင်ႈယေႃး မၵ်းမၼ်ႈၼႂ်းၸႂ်ဝႃႈ- မုၼ်ၸဝ်ႈတႃသႅင်ႁဝ်းၼႆႉ ပဵၼ်ၸဝ်ႈယႂ်ႇတူၼ်ၶူး ဢၼ်ပႂ်ႉပႃးလူလွမ်ထိင်းသိမ်း ယုၵ်ႉယွင်ႈၵႂၢမ်းလၢတ်ႈ၊ ၾိင်ႈငႄႈႁိတ်ႈထုင်းပူႇမွၼ်ႇႁဝ်း ႁႂ်ႈမၼ်ႈၵိုမ်း ယိုၼ်းယၢဝ်းၸဝ်ႈၼိုင်ႈ။ ဢဝ်ၵုၼ်းမုၼ် ၾၼ်ငဝ်းမၼ်းၸဝ်ႈ ပဵၼ်ၼင်ႇၽူႈၵႅတ်ႇၶႄၽႄႈတိူၼ်းပၼ် ၼမ်ႉလွၼ်ႉမွၼ်းၵႅၼ် ၵႂၢမ်းသင်ႇသွၼ်ပူႇမွၼ်ႇႁဝ်းၸဝ်ႈၼိုင်ႈတႄႉတႄႉဝႃႈဝႃႈ ၵမ်းလဵဝ်။

ၸၢႆးၽိုတ်ႉႁဵၼ်း 25/02/1993

(မၢႆတွင်း) ပွင်ႈၵႂၢမ်းၼႆႉ ၶိုၼ်းၵဵပ်းဢဝ်ၼႂ်းပပ်ႉ ပၢႆးႁၼ် (Out Look) vol.2, 1994 ဢၼ်ၸိုဝ်ႈပၢႆၵမ်ဝႃႈ ၸၢႆးၽိုတ်ႉႁဵၼ်း 25/02/1993 ၼၼ်ႉယဝ်ႉ။