တပ်ႉသိုၵ်းမၢၼ်ႈ ႁၢင်ႈႁႅၼ်းသိုၵ်း လၢႆတပ်ႉၵွင် မႃးလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) တၢင်းတႃႈၽႃသွင်ႇ၊ ၵွင်းမုင်ႈမိူင်း၊ ၼမ်ႉပုၵ်း၊ တႄႇႁူဝ်လိူၼ်ဢွၵ်ႊထူဝ်ႊၿိူဝ်ႊထိုင်ႁၢင်လိူၼ်ၼၼ်ႉ သိုၵ်းမၢၼ်ႈၸႂ်ႉပႃးဢဵၼ်ႁႅင်း ၸုမ်းပီႇတုၸိတ်ႉႁဵင်ပၢႆ။

ပၢင်တိုၵ်း ၼႂ်းၸႄႈဝဵင်းၵေးသီး/ သီႇပေႃႉ/ မိူင်းယႆ ဢၼ်တပ်ႉသိုၵ်းမၢၼ်ႈ (သိုၵ်းလူင်ပွင်ၸိုင်ႈ) ႁၢင်ႈႁႅၼ်းသိုၵ်း မႃးလေႃႇတိုၵ်းတပ်ႉပၢင်သဝ်း တပ်ႉသိုၵ်းၸိုင်ႈတႆး (SSPP/SSA) တင်ႈတႄႇ ဝၼ်းတီႈ 2-30/10/2014 ၼႆႉ တင်းမူတ်းပဵၼ်ပၢင်တိုၵ်း 41 ပွၵ်ႈ၊ ၼႂ်းၵႃႈႁႅင်းသိုၵ်း ဢၼ်မႃးလေႃႇတိုၵ်းတပ်ႉသိုၵ်းတႆးၼၼ်ႉ ပႃးဢဵၼ်ႁႅင်း ပီႇတုၸိတ်ႉႁဵင်ပၢႆ။

ၽူႈဢွၼ်ႁူဝ်ၸုမ်းပီႇတုၸိတ်ႉ ၵေႃႉၼိုင်ႈလၢတ်ႈဝႃႈ- ပီႇတုၸိတ်ႉ ဢၼ်မႃးလေႃႇတိုၵ်း တပ်ႉသိုၵ်းၸိုင်ႈတႆး ၸွမ်းသိုၵ်းမၢၼ်ႈၼႆႉ ပဵၼ်ပီႇတုၸိတ်ႉ ၼႂ်းၸိုင်ႈတႆးပွတ်းၸၢၼ်း တင်းပွတ်းႁွင်ႇ ၼိုင်ႈၸုမ်း 50 ၵေႃႉ။ ပီႇတုၸိတ်ႉပွတ်းၸၢၼ်း ပဵၼ်ၸိူဝ်းလႆႈသူင်ႇၵႂႃႇတီႈ ၵဵင်းတွင်းသေ ၾိုၵ်းၵၢၼ်သိုၵ်း။ ပွတ်းႁွင်ႇသမ်ႉ ပဵၼ်ၸိူဝ်းလႆႈသူင်ႇၵႂႃႇ ၾိုၵ်းၵၢၼ်သိုၵ်းတီႈဝၢၼ်ႈၵၢတ်ႈ ၸႄႈဝဵင်းတၢင်ႉယၢၼ်း။ ပေႃးဝႃႈႁဵၼ်းၵၢၼ်သိုၵ်း ယဝ်ႉၵေႃႈ ၶဝ်လႆႈႁူမ်ႈႁွမ်းသိုၵ်းမၢၼ်ႈသေ ၶိုၼ်ႈလေႃႇတပ်ႉသိုၵ်းၸိုင်ႈတႆး- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈၵွၼ်းၼႃႈသိုၵ်း SSPP/SSA ၸဝ်ႈၼိုင်ႈၵေႃႈလၢတ်ႈဝႃႈ- တပ်ႉဢၼ်မႃးပုတ်ႈယူႇပၢင်သဝ်း မိူဝ်ႈလဵဝ်ၸိူဝ်းၼႆႉ လၢတ်ႈၵႂၢမ်းတႆးၵူၺ်း၊ ၵႂႃႇတဵၵ်းၼမ်ႉ ၵႂႃႇဢၢပ်ႇၼမ်ႉၸိူဝ်းၼႆႉ လၢတ်ႈၵႂၢမ်းတႆးၵူၺ်း။ မၢင်ပွၵ်ႈမႃး ႁွင်ႉလႃႇသိုၵ်းတႆးၵေႃႈ လၢတ်ႈၵႂၢမ်းတႆးၵူၺ်း။ မိူဝ်ႈၽွင်း ဢၼ်ၶဝ်မႃးလေႃႇတိုၵ်းႁၢဝ်ႈႁႅင်းသေ သိုၵ်းတႆးၵႂႃႇငွႆးယိုဝ်းၸိူဝ်းၼႆႉ ယင်းႁွင်ႉလၢတ်ႈဝႃႈ- “ယႃႇပေမႃးငွႆးယိုဝ်းႁဝ်းလႄႈ၊ ႁဝ်းၵေႃႈ ဢမ်ႇလိူဝ်လႆႈ လႄႈမႃးၵူၺ်း” ဝႃႈၼႆ။

ၵူၼ်းလူင်ဝၢၼ်ႈ ၵေႃႉၼိုင်ႈၵေႃႈလၢတ်ႈဝႃႈ- ၵူၼ်းၸိူဝ်း ထုၵ်ႇသိုၵ်းတႆးမူၵ်းယိုဝ်းသေ တၢႆၵၢင်တႃႈ ၵၢင်တၢင်းၸိူဝ်းၼႆႉလႄႈသင်၊ ဢၼ်ပဵၼ်ပၢင်တိုၵ်းၵၼ်သေတၢႆၸိူဝ်းၼႆႉလႄႈသင်၊ သိုၵ်းမၢၼ်ႈၼႆႉ ပေႃးဝႃႈလူင်းမႃးၵဵပ်းတူဝ်တၢႆၵူၼ်းသိုၵ်းမၢၼ်ႈၵေႃႈ ဢမ်ႇၵဵပ်းပႃးတူဝ်တၢႆ ပီႇတုၸိတ်ႉ၊ ၵဵပ်းတူဝ်တၢႆသိုၵ်း မၢၼ်ႈၵူၺ်း။ မိူၼ်ၼင်ႇ ဢၼ်ၵဵပ်းတူဝ်တၢႆသေ သူင်ႇၵႂႃႇတီႈၵေးသီး 9 ၵေႃႉၼၼ်ႉၵေႃႈ ဢမ်ႇပႃးတူဝ်တၢႆပီႇတုၸိတ်ႉသေၵေႃႉ။ ပိူင်လူင်မၼ်း ၵွပ်ႈၵူဝ်တုမ်ႉတိူဝ်ႉဝၢၼ်ႈလႄႈ   ၵူၼ်းၼႂ်းပိုၼ်ႉတီႈလႄႈ သင်ၶၸဝ်ႈၸိူဝ်းၼႆႉ လႆႈၵႂႃႇႁဵတ်းတၢင်းလီပၼ်သေ ၾင်ပၼ်- ဝႃႈၼႆ။

တပ်ႉသိုၵ်းမၢၼ်ႈ ဢၼ်ႁႅၼ်းသိုၵ်းလေႃႇ တပ်ႉသိုၵ်းၸိုင်ႈတႆး၊ ဢၼ်ဢွၼ်ပီႇတုၸိတ်ႉမႃးၼႆႉ ပဵၼ်ၶမယ 522 လႃႈသဵဝ်ႈ၊ ၶလယ 240 သႅၼ်ဝီ။ ၶလယ 267 ၼမ်ႉၸလၢပ်ႈ။ ၶလယ 147 ၼွင်ၵေႃႇ၊ ၶလယ 33 မိူင်းၵၢဝ် တၢင်ႉယၢၼ်း။ တႂ်ႈတိူင်းသိုၵ်း ဝၼ်းဢွၵ်ႇၵၢင် (ၶူဝ်လမ်) ၶလယ 296 တႃႈၵေႃႈ။ ၶမယ 525 , 575 , 577, 569 ၸိူဝ်းၼႆႉ။ တီႈမႃးလေႃႇတိုၵ်း ပဵၼ်တပ်ႉတႃႈၽႃသွင်ႇ၊ ၵွင်းၸဝ်ႈမိူင်း၊ တပ်ႉၵွင်းမၢၵ်ႇႁိၼ်တင်ႈ၊ ၵွင်းမုင်ႈမိူင်း၊ ၵွင်းမႆႉၺွင်ႇ၊ တပ်ႉၼမ်ႉပုၵ်း ၸိူဝ်းၼႆႉ။

ဢိင်ၼိူဝ်သိုၵ်းမၢၼ်ႈ မႃးလေႃႇတိုၵ်းသေ ၾၢႆႇတပ်ႉသိုၵ်းၸိုင်ႈတႆးၵေႃႈ လႆႈႁႅၼ်းသိုၵ်း၊ လႆႈႁဵတ်းသိုၵ်းမုတ်းသေ ငွႆးမူၵ်းယိုဝ်းငႃးသိုၵ်းမၢၼ်ႈၸိူဝ်းၼႆႉ ပဵၼ်ၼႂ်းၸႄႈဝဵင်းမိူင်းယႆ၊ သီႇပေႃႉ၊ ၵေးသီးလႄႈ မိူင်းၼွင်ၸိူဝ်းၼႆႉ လၢႆလၢႆတီႈ။ ယွၼ်ႉပဵၼ်ပၢင်တိုၵ်းၸိူဝ်းၼႆႉသေ သွင်ၾၢႆႇမီးလွင်ႈလူႉသုမ်းၼမ်ၵူၺ်းပႆႇပေႃး၊ ၵူၼ်းဝၢၼ်ႈ ၵူၼ်းမိူင်းၵေႃႈ လႆႈတၢႆၵႂႃႇၸွမ်း 4 ၵေႃႉ။ ၾၢႆႇတပ်ႉသိုၵ်းၸိုင်ႈတႆး (SSPP/SSA) လႆႈသုမ်းၵႂႃႇ တပ်ႉတႃႈၽႃသွင်ႇ တင်းတပ်ႉၵွင်းမုင်ႈမိူင်း။

ၾၢႆႇၼိုင်ႈၵေႃႈ ၸွမ်းၼင်ႇၶေႃႈတူၵ်းလူင်းၵၼ်ၼၼ်ႉ ပေႃးဝႃႈသိုၵ်းတႆးထွၼ်ဢွၵ်ႇ တႃႈၽႃသွင်ႇၼႆ သိုၵ်းမၢၼ်ႈၵေႃႈတေထွၼ်ဢွၵ်ႇ။ ၵူၺ်းၵႃႈ သိုၵ်းတႆးထွၼ်ဢွၵ်ႇသေတႃႉ သိုၵ်းမၢၼ်ႈဢမ်ႇထွၼ်ဢွၵ်ႇ ၵူၺ်းပႆႇပေႃး ယင်းမႃးပုတ်ႈတႅၼ်းယူႇသေ ၶၢၼ်းႁႅင်းၵူၼ်းဝၢၼ်ႈၵူၼ်းမိူင်း သူင်ႇမႆႉသူင်ႇၶႃး၊ ၶုတ်းလုၵ်းထႅၼ်ႉလုၵ်းပဵမ်ႇ၊ မႄးၵုမ်းတပ်ႉၸိူဝ်းၼႆႉမႃး ႁၢၼ်ႉတေႃႇထိုင်ယၢမ်းလဵဝ်။

ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၼႆႉ တူၵ်းလူင်းၵိုတ်းယိုဝ်း၊ လႆႈၸႂ်ၵၼ်တင်း လူင်ပွင်ၸိုင်ႈမၢၼ်ႈ ၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် မိူဝ်ႈဝၼ်းတီႈ 28/01/2012 ။ ၵူၺ်းၵႃႈ ၵိုတ်းယိုဝ်းၵၼ်မႃးယဝ်ႉၵေႃႈ ဢမ်ႇၵိုတ်းပၢင်တိုၵ်းလႆႈတႄႉတႄႉ။ ဝၢႆးမႃး သွင်ၾၢႆႇဢုပ်ႇဢူဝ်းၵၼ်သေ ႁႃလၢႆးၶိုင်ၶွတ်ႇၽွတ်ႈ ၶွမ်ႊမတီႊပူၵ်းပွင် ၶိုၼ်ႈယႂ်ႇမႂ်ႇသုင် လႄႈၵတ်းယဵၼ်ၼိမ်သဝ်း ၼႂ်းပိုၼ်ႉတီႈ၊ ၵူၺ်းၵႃႈ ႁၢၼ်ႉတေႃႇမိူဝ်ႈလဵဝ် ၶွမ်ႊမတီႊဢၼ်ၼႆႉၵေႃႈ ပႆႇပဵၼ်တင်ႈ။