ယိူင်းဢၢၼ်း ပိူဝ်ႈတႃႇႁူမ်ႈၵၼ်တိုၵ်းတေႃး ယႃႈမဝ်းၵမ်သေ ၸၢဝ်းၶိူဝ်းၶၢင်၊ တဢၢင်း၊ တႆး သၢမ်ၸၢဝ်းၶိူဝ်း ႁူမ်ႈၵၼ်ၸတ်းႁဵတ်း ပၢင်တၢၼ်ႈၶႆႈ တိုၵ်းတေႃးယႃႈမဝ်းၵမ် တီႈၸိုင်ႈတႆးပွတ်းႁွင်ႇ။

ပၢင်တၢၼ်ႈၶႆႈ တိုၵ်းတေႃးယႃႈမဝ်းၵမ်ၼႆႉ ၸတ်းႁဵတ်းၵႂႃႇတီႈ ဝၢၼ်ႈမေႃႈတွင်း ဢိူင်ႇမေႃႈတွင်း ၸႄႈဝဵင်း မူႇၸႄႈ ဝၼ်းတီႈ 3-4/11/2014 ၵၢင်ၶမ်ႈ ယၢမ်း 7-9 မူင်း။

ၸၢႆးဝၼ်းလႅင်း လုၵ်ႈၸုမ်း ၸုမ်းၵပ်းသၢၼ်ၵူၼ်းၼုမ်ႇတႆး (Tai Youth Network) ၵေႃႉလႆႈၵႂႃႇ လၢတ်ႈၵႂၢမ်း တီႈပၢင်တၢၼ်ႈၶႆႈ လၢတ်ႈၼႄဝႃႈ- ပၢင်တၢၼ်ႈၶႆႈ ဢၼ်ၸတ်းမိူၼ်တီႈၼႆႈၼႆႉ ဢမ်ႇတွၼ်ႉ ယၢမ်ႈမီးမႃး သေပွၵ်ႈ၊ ပေႃးလၢတ်ႈၼႄၵေႃႈ ၵူၼ်းမိူင်းလႆႈႁူႉၽွၼ်းၸႃႉ ယႃႈမဝ်းၵမ်။ ၼွၵ်ႈသေ ပၢင်တၢၼ်ႈၶႆႈၼႆႉ ယင်းၶႂ်ႈလႆႈထႅင်ႈ ပၢင်သွၼ် ၵဵဝ်ႇၵပ်းၽေးယႃႈမဝ်းၵမ်- ဝႃႈၼႆ။

ၶမ်ႈဢွၼ်တၢင်းသုတ်း ၸၢႆးဝၼ်းလႅင်း လၢတ်ႈႁူဝ်ၶေႃႈလွင်ႈ ၽွၼ်းၸႃႉၵၢၼ်ၽုၵ်ႇယႃႈ လႄႈ ၵၢၼ်ၸႂ်ႉတိုဝ်းယႃႈမဝ်းၵမ်။ ၶမ်ႈတီႈ 2 မၢႆးဢၢႆႈၼေႃႇ ၵူၼ်းၼုမ်ႇတဢၢင်း လၢတ်ႈၼႄပိုၼ်းယႃႈမဝ်းၵမ် ၽႄႈတိူၼ်းမႃး ၼႂ်းမိူင်းတႆးၸိူင်ႉႁိုဝ်။ ၸၢႆးဝၼ်းလႅင်း လၢတ်ႈၼႄႁူဝ်ၶေႃႈ လွင်ႈႁဵၼ်းသွၼ်ႁူႉမေႃပၺ်ၺႃသေ သၢၼ်ၶတ်း တိုၵ်းတေႃး ဝႄႈယၢၼ်ၽေးၶဵၼ်ယႃႈမဝ်းၵမ်- ၼႆယဝ်ႉ။
ၸၢႆးယီႈပူး ၽူႈၵွၼ်းဝၢၼ်ႈၵေႃႉၼိုင်ႈ လၢတ်ႈဝႃႈ- ႁဵတ်းပၢင်ပွႆး တၢၼ်ႈၶႆႈယဝ်ႉသေတႃႉ ပႆႇယဝ်ႉၵၢၼ်၊ တၵ်းတေလႆႈၵွင်ႉမိုဝ်းၵၼ် ႁဵတ်းသၢင်ႈ ႁႂ်ႈဢွၵ်ႇၼမ်ႉဢွၵ်ႇတူဝ် ၵႂႃႇတင်းၼမ်ၵွၼ်ႇ ၸင်ႇတေထိုင်တီႈ- ဝႃႈၼႆ။

ၶၢဝ်းတၢင်း 2 ၶမ်ႈၼၼ်ႉ ပေႃးဝႃႈပၢင်တၢၼ်ႈၶႆႈ ယဝ်ႉတူဝ်ႈယဝ်ႉ မီးတၢင်းၵႃႈၸၢဝ်းၶိူဝ်း တင်းသၢမ်ၸၢဝ်းၶိူဝ်း ၵႃႈၼႄၼႂ်းပၢင်ပွႆး၊ မေႃႁွင်ႉၽဵင်းၵႂၢမ်းတႆး ၸၢႆးၸွမ်လၢဝ်ၶိူဝ်း၊ မေႃႁွင်ႉၵႂၢမ်းၶၢင် လသႅၼ်းၶႃးလီႇ၊ ဢွင်ႇၶမ်း၊ လၽၢႆႇဢွင်ႇသၢႆႇ၊ ၸီးပူႇ၊ ၶေႃးၼမ်။ မေႃႁွင်ႉၵႂၢမ်းတဢၢင်း မၢႆးၸႃႇလူႇ ၸိူဝ်းၼႆႉမူၼ်ႈၸႂ်ပၼ်- ၼႆယဝ်ႉ။

ၵူၼ်းၼႂ်းပိုၼ်ႉတီႈ ၸၢႆးသၢမ် လၢတ်ႈဝႃႈ- မၢင်ၸိူဝ်းတႄႉ ပႆႇၶဝ်ႈၸႂ်လီ၊ တႃႇမႃးႁူမ်ႈၵၼ်ႁဵတ်းၸိူင်ႉၼႆ ၶဝ်ၵုမ်ႇမိုင်ႉႁႃငိုၼ်း၊ ၵူဝ်ၶၢဝ်းယၢမ်းႁႃၵၢၼ်မၢၵ်ႈမီးၶဝ် လူႉသုမ်းယူႇ၊ တီႈတႄႉမၼ်း လီၽႃႈဝႆႉဝၢင်းၵၢၼ်သေ မႃးၸွႆႈတႃႇ ဢိုတ်းႁႄႉႁၢမ်ႈတၢပ်ႈၽေးၶဵၼ်လူင် ယႃႈမဝ်းၵမ်ၼႆႉ။ သင်ဢမ်ႇၼၼ် ႁဝ်းႁဵတ်းႁႃၵၢၼ်မၢၵ်ႈမီး ၼမ်ၵႃႈႁိုဝ်ၵေႃႈယဝ်ႉ ၵမ်းလိုၼ်းသုတ်း လုၵ်ႈလၢၼ်ႁဝ်းပဵၼ်ၶီႈယႃႈၶီႈၾိၼ်ႇၵႂႃႇ တေမီးလွင်ႈသင်၊ ဢၼ်ႁႃဝႆႉ တေၵွႆၸွမ်းၵႂႃႇဢမ်ႇႁၢင်ႉ- ဝႃႈၼႆ။
လႆႈႁူႉထႅင်ႈဝႃႈ တင်းသၢမ်ၸၢဝ်းၶိူဝ်း တႆး၊ ၶၢင်၊ တဢၢင်းၼႆႉ လႆႈၶွတ်ႇၽွတ်ႈဝႆႉ ၶွမ်ႊမတီႊၽဵဝ်ႈမူၺ်ႉ ယႃႈမဝ်းၵမ်၊ မီးႁူင်းတိုတ်းယႃႈဝႆႉႁင်းၽႂ်မၼ်း။ ဝၢႆးသေႁဵတ်းလွင်ႈတူင်ႉၼိုင် သၢၼ်ၶတ်း ၽဵဝ်ႈမူၺ်ႉ ယႃႈမဝ်းၵမ်မႃးယဝ်ႉ ၵူၼ်းသူႇ သမ်း ၵိၼ်ယႃႈမဝ်းၵမ်ၵေႃႈ ယွမ်းလူင်းမႃး၊ လွင်ႈၶူဝ်းႁၢႆ ၸွမ်းႁိူၼ်းယေး ၸိူဝ်းၼႆႉၵေႃႈ လူတ်းယွမ်းမႃး။ ထႅင်ႈလွင်ႈၼိုင်ႈ ၵူၼ်းႁဵတ်းႁႆႈ ၼႃးၶဝ်ၵေႃႈ ႁတ်းဢဝ်ၶိူင်ႈၸၢၵ်ႈထႆ ၶိူင်ႈၽုၵ်ႇသွမ်ႈၸိူဝ်းၼႆႉ ဝႆႉၼႂ်းႁႆႈၼႂ်းထဵင်မႃး- ၼႆယဝ်ႉ။

ဢိူင်ႇမေႃႈတွင်းၼႆႉ မီးဝၢၼ်ႈတႆး 7 ဝၢၼ်ႈ၊ ဝၢၼ်ႈၶၢင် 3 ဝၢၼ်ႈလႄႈ ဝၢၼ်ႈတဢၢင်း (ပလွင်ႈ) 4 ဝၢၼ်ႈ- ၼႆယဝ်ႉ။