ၶမ်ႈၶိုၼ်း လိူၼ်သိပ်းသွင်မူၼ်း ဝၼ်းၽူႈလၵ်ႉၼၼ်ႉ  ၵူၼ်းလုၵ်ႉတၢင်းမိူင်းမၢၼ်ႈ ဢၼ်မႃးၵိၼ်ၸၢင်ႈ ႁဵတ်းမၢၵ်ႇဢုတ်ႇ ယူႇတီႈလၢႆးၶႃႈ၊ ၵႂႃႇလၵ်ႉၵိၼ်ၵႆႇ ၵူၼ်းဝၢၼ်ႈ၊ လၵ်ႉၵိၼ်ၵႆႇ ပေႃႉထုပ်ႉႁႅမ်ၸဝ်ႈႁိူၼ်း ဝၢတ်ႇၸဵပ်း ၵူၺ်းပႆႇပေႃး ၵၢဝ်ႇႁႃၸႅင်ႈၵႂၢမ်း ပိုတ်ႇၶၻီး (ဢမု) ၸွႆးတြႃးၸဝ်ႈႁိူၼ်းပႃးထႅင်ႈ။

ၸၢႆးၵေႃးလိင်ႇတ ၸဝ်ႈႁိူၼ်း ၵေႃႉၺႃးပေႃႉထုပ်ႉ

မိူဝ်ႈဝၼ်းတီႈ 07/11/2014 (ၶမ်ႈၶိုၼ်းလိူၼ်သိပ်းသွင်မူၼ်း) တီႈဝဵင်းလၢႆးၶႃႈ၊ ပွၵ်ႉ 7 ၊ ဝၢၼ်ႈၼွင်မိူင်းၼၼ်ႉ မီးၵူၼ်းလုၵ်ႉတၢင်းမိူင်းမၢၼ်ႈ ဢၼ်မႃးႁဵတ်းၵူၼ်းၵိၼ်ၸၢင်ႈ ႁဵတ်းမၢၵ်ႇဢုတ်ႇ ယူႇတီႈဝၢၼ်ႈၼွင်မိူင်း၊ ၸိုဝ်ႈၸဵင်ႇတိၼ်ႇဢွင်ႇ လႄႈ ဢွင်ႇတိၼ်ႇသူၺ်ႇ တင်း တႆးၵေႃႉထႅင်ႈ 2 ၵေႃႉ၊ ႁူမ်ႈတင်းမူတ်း 4 ႁဵတ်းၵေႃႉ ၵႂႃႇလၵ်ႉၵိၼ်ၵႆႇ တီႈႁိူၼ်းလုင်းၵေႃးလိင်ႇတ ဢၼ်ပဵၼ်ၸဝ်ႈၶွင်ႁူင်းၸၢၵ်ႈၶူၵ်ႉတမ်ၶဝ်ႈ။ ၸိူဝ်းၶဝ်ၵႂႃႇလၵ်ႉယဝ်ႉ လၵ်ႉထႅင်ႈသေ ၵိူတ်ႇၶိုၼ်ႈမႃးလိူင် ပေႃႉႁႅမ်ၵၼ်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းယူႇႁိမ်းႁွမ်းၵိၼ်ၸမ် ဢမ်ႇၶႂ်ႈဢွၵ်ႇၸိုဝ်ႈ ၵေႃႉၼိုင်ႈလၢတ်ႈဝႃႈ- ၶီႈလၵ်ႉၸိူဝ်းၼႆႉ မိူဝ်ႈႁူဝ်ၶမ်ႈၼၼ်ႉ မႃးလၵ်ႉၵႆႇသွင်ၵမ်း။ ၵမ်းၼိုင်ႈ လႄႈၵမ်းသွင်ၼၼ်ႉ မႃးလၵ်ႉၵႂႃႇၵႆႇၵမ်းသွင်တူဝ်။ ၵမ်းတီႈ သၢမ်မႃး 9 မူင်းပၢႆပၢႆ မႃးလၵ်ႉထႅင်ႈၵမ်းၼိုင်ႈ။ ၵမ်းတီႈသၢမ်ၼႆႉ ၸဝ်ႈႁိူၼ်းႁူႉတူဝ်သေ ဢဝ်ၵၢင်ႇၵွၼ် ပိုတ်းႁႂ်ႈၵႆႇတူၵ်းၸႂ်သေပၢႆႈပႅတ်ႈ (ပဵၼ်ၶူၵ်ႉၸၢၵ်ႈ၊ ဢမ်ႇႁဵတ်းလဝ်ႉၵႆႇ၊ ပၼ်ၵႆႇၼွၼ်းၼိူဝ်ၵွၼ်း) ၵႆႇဝိၼ်ပၢႆႈၵႂႃႇ တၢင်းလႂ်ၽွင်ႈၼႆ ၸဝ်ႈႁိူၼ်းသမ်ႉၸွမ်းတူၺ်းၵႆႇလႄႈ ပေႃးဝၢႆႇမႃးတၢင်းလင်ၵေႃႈ ၺႃးၵူၼ်းလၵ်ႉၵႆႇၶဝ် ဢဝ်ၶွၼ်ႉထုပ်ႉသႂ်ႇ၊ ၸဝ်ႈႁိူၼ်းၵေႃႈ ထုပ်ႉတွပ်ႇတႅၼ်းၶိုၼ်း၊ ၵူၺ်းၵႃႈ ၵေႃႉလဵဝ် ဢမ်ႇပေႉၵူၼ်းသီႇၵေႃႉ ၼၼ်ႉလႆႈလႄႈ ၸင်ႇႁွင်ႉသႅၼ်ႇ ၵူၼ်းႁိမ်းႁွမ်းၸိူဝ်းယူႇၵိၼ်ၸမ်ၵၼ်မႃးၸွႆႈ။

ၵူၼ်းႁိမ်းႁွမ်းမႃးၸွႆႈၶႄသေ ပဵၼ်ပၢင်ႁႅမ်ၵၼ် ထဵင်ႈၵၼ်သေယဝ်ႉတူဝ်ႈၵႂႃႇ။ ၸၢႆးၵေႃးလိင်ႇတ ၸဝ်ႈႁိူၼ်း ထုၵ်ႇပေႃႉထုပ်ႉႁူဝ်တႅၵ်ႇ၊ ၵူၼ်းႁိမ်းႁွမ်းၸိူဝ်းမႃးၸွႆႈၶႄၵေႃႈ ၵမ်ႈၽွင်ႈၵေႃႈၺႃးပေႃႉၼင်ႇၵဝ်ႇ။ ၸုမ်းၽူႈလၵ်ႉ ၵေႃႈ တိူဝ်ႉၸဵပ်းၵႂႃႇၽွင်ႈသေ ႁၢႆၵႂႃႇမွၵ်ႈ 20 မိၼိတ်ႉ၊ ၵႂႃႇႁွင်ႉၵူၼ်းၶဝ်ထႅင်ႈသေ ပွၵ်ႈၶိုၼ်းမႃး၊ မႃးႁွင်ႉ သႅၼ်ႇတႃႉ ပၢၼ်းၽိတ်းၸဝ်ႈႁိူၼ်း တင်းႁိူၼ်းႁိမ်းႁွမ်း၊ မႃးယႃႉႁူဝ်ႉ ဢဝ်မၢၵ်ႇႁိၼ်ဝိုတ်ႉသိုင်း သႂ်ႇႁိူၼ်းပိူၼ်ႈ ၸိူဝ်းၼႆႉ၊  ၵူၼ်းဝၢၼ်ႈ ၽႂ်ၵေႃႈဢမ်ႇႁတ်းဢွၵ်ႇႁိူၼ်းၵႂႃႇတူၺ်းၶဝ်- ၵူၼ်းယူႇႁိမ်းၵိၼ်ၸမ် လၢတ်ႈ။

ဝၢႆးၼၼ်ႉ ပလိၵ်ႈတင်းၵူၼ်းလူင်ဝၢၼ်ႈ ႁွတ်ႈၽႅဝ်မႃးဢွင်ႈတီႈၵိူတ်ႇလိူင်ႈသေ ၸုမ်းၽူႈလၵ်ႉၶဝ် ဢွၼ်ၵၼ်ပၢႆႈ ၵႂႃႇသေ ယဵၼ်ၵႂႃႇ။ ၵူၺ်းၵႃႈ ၽိူဝ်ႇၵၢင်ၼႂ်မိူင်းလႅင်းမႃး (ၸုမ်းၽူႈလၵ်ႉ) ၾၢႆႇဢွင်ႇတိၼ်ႇသူၺ်ႇ တင်း ၸဵင်ႇတိၼ်ႇဢွင်ႇ ၶဝ်ၵႂႃႇၸႅင်ႈၵႂၢမ်း/ ၸွႆႈတြႃးတီႈလုင်းၵေႃးလိင်ႇတ။ ၵႂႃႇတၢင်ႇလၢတ်ႈတီႈ ႁူင်းပလိၵ်ႈသေ ၵၢဝ်ႇႁႃ ၸႅင်ႈၵႂၢမ်း ပိုတ်ႇၶၻီး (ဢမု)ဝႆႉ။ ၾၢႆႇၸၢႆးၵေႃးလိင်ႇ တင်း ၵူၼ်းႁိမ်းႁွမ်း ၸိူဝ်းၺႃးၸုမ်းၽူႈလၵ်ႉ ယႃႉႁူဝ်ႉ ႁိူၼ်း၊ ဢဝ်မၢၵ်ႇႁိၼ်ဝိုတ်ႉသိုင်းသႂ်ႇႁိူၼ်းၸိူဝ်းၼႆႉၵေႃႈ ၵႂႃႇၸႅင်ႈၵႂၢမ်းဢဝ်လိူင်ႈ(ၸွႆးတြႃး)ၵူၼ်းလၵ်ႉ ၼင်ႇၵဝ်ႇ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းမိုတ်ႈတပ်ႉပလိၵ်ႈၵေႃႉၼိုင်ႈလၢတ်ႈဝႃႈ- ၶဝ်ၸိူဝ်းၼႆႉ လႆႈၵႂႃႇၶဝ်ႈႁူင်းယႃၵူႈၾၢႆႇ၊ ၾၢႆႇၸၢႆးၵေႃးလိင်ႇတၵေႃႈ ႁူဝ်တႅၵ်ႇ လႆႈယဵပ်ႉ 7 ႁွႆးသေ လႆႈဢဝ်ၵႂႃႇဝႆႉတီႈႁူင်းယႃသင်ၶ လၢႆးၶႃႈ။ ၶဝ်သီႇၵေႃႉ ၼၼ်ႉ (ၸုမ်းၵူၼ်းလၵ်ႉ) ၵႂႃႇယူတ်းယႃတီႈႁူင်းယႃၵူၼ်းမိူင်း တီႈလၢႆးၶႃႈဝႆႉ၊ ယွၼ်ႉဝႃႈ ၵူဝ်ၶဝ်ၵႂႃႇ ၽိတ်းပေႃႉ ႁႅမ်ၵၼ် ၼႂ်းႁူင်းယႃထႅင်ႈ။ ၵဵဝ်ႇၵပ်းလွင်ႈၼႆႉ ၶၻီး (ဢမု) မၼ်း တိုၵ်ႉမီးယူႇတီႈႁူင်းပလိၵ်ႈ တင်းမူတ်း- ဝႃႈၼႆ။

ၾိင်ႈၽူႈလၵ်ႉ/ၶီႈလၵ်ႉၼႆႉ မိူဝ်ႈၵူႈပွၵ်ႈ ၾၢႆႇမၢၼ်ႈႁွင်ႉဝၼ်းပွႆးၵႃဢမ်ႇတိုၼ်ႇ (ၵျီးမၼူဝ်းပွႆး)။ မိူဝ်ႈပၢၼ် ၶုၼ်ႁေႃၶမ်းမၢၼ်ႈ ငထႅတ်ႉၽျႃးၼၼ်ႉ မၼ်းၸဝ်ႈမီးၸႂ်ၶႂ်ႈၸႅၵ်ႇဝၢၵ်ႈငိုၼ်းတွင်းပၼ် တီႈၵူၼ်းၽၢၼ်၊ လူၺ်ႈတႅမ်ႈလိၵ်ႈသေ ဢဝ်ၵႂႃႇပႃႉတိတ်းဝႆႉတီႈႁိူၼ်းၵူၼ်းဝၢၼ်ႈၵူၼ်းမိူင်း၊ ၵူၼ်းဝၢၼ်ႈၵူၼ်းမိူင်းၶဝ်ၵေႃႈ ၵႂႃႇဢဝ်။ ၵူႈပွၵ်ႈၼၼ်ႉ လၵ်ႉၵၼ် ဢဝ်တၢင်းမူၼ်ႈတၢင်းၵျေႃႇ၊ ၵူၺ်းၵႃႈ ဝၢႆးမႃးသမ်ႉပဵၼ်ပႃးပွႆးၶီႈလၵ်ႉ၊ လၵ်ႉၵၼ်၊ တင်ႈၸႂ်လၵ်ႉၶူဝ်းၶွင်ၵၼ်။ ပေႃးထိုင်မႃး လိူၼ် 12 မူၼ်း ၵႂႃႇလၵ်ႉၵိၼ်ၵႆႇၵၼ်။ ၾိင်ႈထုင်းမၢၼ်ႈၼႆႉ ၵူၼ်းၸၢဝ်းၶိူဝ်းၵေႃႈယိူင်ႈႁဵတ်းၸွမ်း၊ ၵွပ်ႈဝႃႈ ၸဝ်ႈၼႃႈတီႈ ၵူၼ်းမီးဢမ်းၼၢၸ်ႈ(ဢႃႇၼႃႇ)ၶဝ် ပွႆႇပၼ်ဝႆႉ။