ပေႃးဝႃႈ ၸွမ်ၸိုင်ႈမိူင်းဢမႄႊရိၵႃႊ ဢူဝ်ႊၿႃႊမႃႊ ၽႅဝ်ႁွတ်ႈမႃးမိူင်းမၢၼ်ႈ၊ ႁူဝ်ပဝ်ႈပႃႊတီႊႁူဝ်သိူဝ် (SNLD) ၸဝ်ႈၶုၼ်ထုၼ်းဢူး တေၵၢဝ်ႇလၢတ်ႈ ၵဵဝ်ႇၵပ်း လွင်ႈငမ်းယဵၼ် လႄႈ လွင်ႈၵိုတ်းယိုဝ်းပတ်းပိုၼ်ႉၸိုင်ႈမိူင်း မိူင်းမၢၼ်ႈ တီႈမၼ်းၸဝ်ႈ။ ပိူဝ်ႈတႃႇႁႂ်ႈမၼ်းၸဝ်ႈ သူၼ်းဢီး ဝွၵ်ႇလၢတ်ႈပၼ်တီႈလူင်ပွင်ၸိုင်ႈ။

ၸွမ်ၸိုင်ႈမိူင်းဢမႄႊရိၵႃႊ ဢူဝ်ႊၿႃႊမႃႊ Photo: internet

ၸဝ်ႈၶုၼ်ထုၼ်းဢူး ႁူဝ်ပဝ်ႈငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) လၢတ်ႈဝႃႈ- ၸၢဝ်းၶိူဝ်းၼႂ်းမိူင်းမၢၼ်ႈ ဢၼ်ၶႂ်ႈလႆႈၶႂ်ႈပဵၼ်ယူႇမိူဝ်ႈလဵဝ်ၼႆႉ ပဵၼ်လွင်ႈငမ်းယဵၼ်၊ တေႃႇထိုင် မိူဝ်ႈလဵဝ် ႁိုင်မႃး 67 ပီယဝ်ႉ၊ လွင်ႈငမ်းယဵၼ်ပႆႇလႆႈႁဵတ်းသၢင်ႈ သင်သေပိူင်၊ ပႆႇမီးငမ်းယဵၼ်သင်- ဝႃႈၼႆ။

ၽူႈၼမ်းၼႂ်းၵူႈလွင်ႈလွင်ႈ ပႃႊတီႊႁူဝ်သိူဝ် ၸၢႆးၼုတ်း လၢတ်ႈဝႃႈ- မိူဝ်ႈပႃႊတီႊႁူဝ်သိူဝ် (SNLD) လႆႈႁူပ်ႉဢုပ်ႇ ၵၼ်တင်း ၸုမ်းၽွင်းတၢင် မိူင်းဢမႄႊရိၵၼ်ႊ ပူၼ်ႉမႃးမိူဝ်ႈ 2-3 ဝၼ်းၼၼ်ႉၵေႃႈ ၵဵဝ်ႇၵပ်းလွင်ႈငမ်းယဵၼ် လႄႈ လွင်ႈၵိုတ်းယိုဝ်းပတ်းပိုၼ်ႉၸိုင်ႈမိူင်းၼၼ်ႉ လႆႈသပ်းလႅင်းၼႄၽွင်ႈယဝ်ႉ၊ ပေႃးထိုင်ၸွမ်ၸိုင်ႈ ဢူဝ်ႊၿႃႊမႃႊ မႃးၼႆ ႁႂ်ႈလၢတ်ႈဢူဝ်ႊၿႃႊမႃႊ သူင်ႇႁႅင်းဢီးတီႈလူင်ပွင်ၸိုင်ႈမၢၼ်ႈၼႆ ၼၼ်ႉၵေႃႈ လႆႈလၢတ်ႈ ၼႄၶဝ်ၵႂႃႇယဝ်ႉ- ဝႃႈၼႆ။

ၸၢႆးဢၢႆႈပဝ်း ႁူဝ်ပဝ်ႈပႃႊတီႊသိူဝ်ၽိူၵ်ႇ (SNDP) ၵေႃႈ လၢတ်ႈဝႃႈ- ပေႃးဢမ်ႇမီးလွင်ႈငမ်းယဵၼ် ဝၢၼ်ႈမိူင်း ဢမ်ႇၼိမ်သဝ်း၊ လွင်ႈႁုၼ်ႈမုၼ်းၶိုၼ်ႈယႂ်ႇမႂ်ႇသုင်ၵေႃႈ တေဢမ်ႇမီးမႃးလႆႈ။ ၵွပ်ႈၼၼ် ပေႃးၸွမ်ၸိုင်ႈ ဢူဝ်ႊၿႃႊမႃႊမႃးတႄႉ ႁဝ်းမုင်ႈမွင်းဝႃႈ ၵဵဝ်ႇၵပ်းလွင်ႈငမ်းယဵၼ်ၼႆႉ မၼ်းၸဝ်ႈၵေႃႈ တေၸွႆးသူင်ႇႁႅင်းဢီး၊ တေလၢတ်ႈတီႈလူင်ပွင်ၸိုင်ႈမိူင်းမၢၼ်ႈယူႇ- ဝႃႈၼႆ။

ၽွင်းတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ဝၢၼ်ႈတူင်ႈ မၢႆႇဢူင်းၶၢႆႇ (ၸၢဝ်းၶိူဝ်းတဢၢင်း) လၢတ်ႈဝႃႈ- မုင်ႈမွင်းဝႃႈ ပေႃးၸွမ်ၸိုင်ႈဢူဝ်ႊၿႃႊမႃႊ မႃးမိူင်းမၢၼ်ႈ၊ တေမႃးလၢတ်ႈပၼ် ၵဵဝ်ႇၵပ်းလွင်ႈ ၻီႊမူဝ်ႊၶရေႊၸီႊ၊ ၵၢၼ်လႅၵ်ႈလၢႆႈယၢင်ႈၸူးၻီႊမူဝ်ႊၶရေႊၸီႊ လႄႈ လွင်ႈငမ်းယဵၼ်မိူင်းမၢၼ်ႈယူႇ။ ၵွပ်ႈဝႃႈ တေႃႇထိုင်ယၢမ်း လဵဝ်ၼႆႉ ၶၵ်ႉတွၼ်ႈလွင်ႈငမ်းယဵၼ်မိူင်းမၢၼ်ႈ ဢမ်ႇႁၼ်ၶိုၼ်ႈယႂ်ႇမႃးသင်သေ ၼိမ်ဝႆႉယူႇၸိုင်ႈၸိုင်ႈ- ဝႃႈၼႆ။

ၸွမ်ၸိုင်ႈဢူဝ်ႊၿႃႊမႃႊ ၽႅဝ်ႁွတ်ႈမႃးၵုၼ်ဢေႊသျိူဝ်ႊ ၸဵင်ႇၸၢၼ်းဝၼ်းဢွၵ်ႇ ပိူဝ်ႈတႃႇမႃးၶဝ်ႈႁူမ်ႈ ပၢင်ၵုမ် လူင် ၸိၵ်းၸွမ်ဢႃႊသျႅၼ်ႊ။ တေမႃးၽႅဝ်တီႈမိူင်းမၢၼ်ႈ ဝၼ်းတီႈ 13/11/2014 ။ ပွၵ်ႈၼႆႉ ပဵၼ်ၶၢဝ်း တၢင်းၵမ်းတီႈ 2 ။ ၶၢဝ်းတၢင်း ၵမ်းတီႈ 1 ပဵၼ်မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ 2012 ။ မိူဝ်ႈၸွမ်ၸိုင်ႈဢူဝ်ႊၿႃႊမႃႊ ၽႅဝ်မႃးမိူင်းမၢၼ်ႈပွၵ်ႈၼၼ်ႉ လႆႈႁူပ်ႉထူပ်းၵၼ်တင်း ၽူႈၼမ်းၸၢဝ်းၶိူဝ်းယူႇ၊ ပႃးတင်းႁူဝ်ပဝ်ႈပႃႊတီႊ ႁူဝ်သိူဝ် ၸဝ်ႈၶုၼ်ထုၼ်းဢူး၊ ၵူၺ်းၵႃႈ လႆႈႁူပ်ႉထူပ်းၸူဝ်ႈၵႅပ်ႉၵူၺ်းသေ ဢမ်ႇလႆႈဢုပ်ႇၶႆႈလၢတ်ႈသင်တႄႉတႄႉ။