ပႃႊတီႊသိူဝ်ၽိူၵ်ႇ (SNDP) ၸႄႈဝဵင်းၼမ်ႉၶမ်း ၶွတ်ႇၽွတ်ႈၶွမ်ႊမတီႊ ပွင်ပဵၼ်ပၢင်သွၼ် ပၼ်ပိုၼ်ႉႁူႉ ၵူၼ်းၼုမ်ႇ တီႈၼိုင်ႈယဝ်ႉတီႈၼိုင်ႈ ၸွတ်ႇတူဝ်ႈ ၸႄႈဝဵင်းၼမ်ႉၶမ်း။ ယိူင်းဢၢၼ်း ပိူဝ်ႈတႃႇႁႂ်ႈၵူၼ်းၼုမ်ႇ ၸၢင်ႈၸွႆႈထႅမ်ၼႃႈၵၢၼ် တႃႇၸိူဝ်ႉၸၢတ်ႈဝၢၼ်ႈမိူင်း။

ပႃႊတီႊသိူဝ်ၽိူၵ်ႇ ၸတ်းပၢင်သွၼ် ပၼ်ပိုၼ်ႉႁူႉၵူၼ်းၼုမ်ႇ ၼႂ်းၸႄႈဝဵင်းၼမ်ႉၶမ်း

ပၢင်သွၼ် ပၼ်ပိုၼ်ႉႁူႉၵူၼ်းၼုမ်ႇ ၼႂ်းၸႄႈဝဵင်းၼမ်ႉၶမ်းၼႆႉ လႆႈမႅင်ႇႁဵတ်း 5 သၢႆ။ သၢႆလွႆၼိူဝ်၊ သၢႆလွႆတႂ်ႈ၊ သၢႆသၢပ်ႇၼမ်ႉ (ၾၢႆႇၼႆႉၼမ်ႉမၢဝ်း)၊ သၢႆၼမ်ႉတႂ်ႈ (ၽၢၵ်ႇပုၼ်ႉၼမ်ႉမၢဝ်း)၊ သၢႆၼမ်ႉၼိူဝ် (ၾၢႆႇပုၼ်ႉ ၼမ်ႉမၢဝ်း) ၸိူဝ်းၼႆႉ။  ၶၢႆႉပၼ်ႇပိုတ်ႇပၢင်သွၼ်ၵႂႃႇ တီႈၼိုင်ႈယဝ်ႉတီႈၼိုင်ႈ တီႈလႂ်ၶၢဝ်းတၢင်း 2 ဝၼ်း။ လိုၼ်းသုတ်း ၸတ်းပၢင်လူင်းပၢင်သွၼ်ယဝ်ႉတူဝ်ႈၵႂႃႇ မိူဝ်ႈဝၼ်းတီႈ 09/11/2014 တီႈဝၢၼ်ႈၵုၼ်ႁႆး ၸႄႈဝဵင်း ၼမ်ႉၶမ်း။

တီႈပၢင်လူင်းပၢင်သွၼ်ၼၼ်ႉ ၵႅမ်ႁူဝ်ပဝ်ႈ ပႃႊတီႊသိူဝ်ၽိူၵ်ႇ (SNDP) ၸႄႈဝဵင်းၼမ်ႉၶမ်း လုင်းသြႃႇၸေႃးလႃႉ လၢတ်ႈဝႃႈ- ၼင်ႇႁိုဝ်ၵူၼ်းၼုမ်ႇ သႅၼ်းႁုၼ်ႈမႂ်ႇႁဝ်း ပေႃးတေမီးပိုၼ်ႉႁူႉ၊ လွင်ႈၶဝ်ႈဢွၵ်ႇႁႃၵၼ်၊ လွင်ႈၶွတ်ႇ လိူတ်ႈပၼ်ႈၵႅၼ်ႇၼႅၼ်ႈၼႃၵၼ်သေ ႁႂ်ႈၸၢင်ႈၸွႆႈထႅမ်လႆႈ ၸိူဝ်ႉၸၢတ်ႈဝၢၼ်ႈမိူင်းၵႂႃႇလႆႈၼၼ်ႉ ၸင်ႇလႆႈပိုတ်ႇ ပၢင်သွၼ် ပၼ်ပိုၼ်ႉႁူႉၵူၼ်းၼုမ်ႇ မႃးၶိူဝ်းၶိူဝ်းယႂ်းယႂ်း တီႈၸႄႈဝဵင်းၼမ်ႉၶမ်းၼႆႉ - ဝႃႈၼႆ။
မေႃသွၼ် ၸိူဝ်းမႃးပၼ်တၢင်းႁူႉတၢင်းႁၼ်ၼၼ်ႉ မီးၸၢႆးၶမ်းၸၢႆး၊ ၸၢႆးၼွႆႉ၊ ၸၢႆးသၢႆၾႃႉ ၸိူဝ်းၼႆႉ။ ႁူဝ်ၶေႃႈ ၸိူဝ်းလႆႈ ပၼ်တၢင်းႁူႉၵႂႃႇၼၼ်ႉ လွင်ႈၻီႊမူဝ်ႊၶရေႊၸီႊ၊ လွင်ႈပၢင်လိူၵ်ႈတင်ႈ (လွၵ်းပိူင် FPTP & PR) ၊ တီႈၵႅပ်ႈမၢႆမီႈ ပိူင်ငဝ်ႈပိုင်းမိူင်း 2008 ၊ သုၼ်ႇလႆႈသုၼ်ႇပဵၼ်ၵူၼ်းလုမ်ႈၾႃႉ၊ လွင်ႈၶွတ်ႇၽွတ်ႈမူႇၸုမ်း၊ လွင်ႈတိတ်းတေႃႇၵပ်းသိုပ်ႇၵၼ် ၸိူဝ်းၼႆႉ။

ပၢင်သွၼ်ၼႆႉ မိူဝ်ႈဝၼ်းတီႈ 27-28/09/2014 ပိုတ်ႇတီႈ သၢႆလွႆၼိူဝ် (8 ဝၢၼ်ႈ) တီႈဝၢၼ်ႈၵွင်းဝဵင်း၊ ၽူႈၶိုၼ်ႈႁဵၼ်း 64 ၵေႃႉ။ ဝၼ်းတီႈ 4-5/10/2014 ပိုတ်ႇတီႈ သၢႆလွႆတႂ်ႈ (9 ဝၢၼ်ႈ) တီႈဝၢၼ်ႈဝဵင်းၵၢင်း၊ ၽူႈၶိုၼ်ႈႁဵၼ်း 88 ၵေႃႉ။ ဝၼ်းတီႈ 25-26/10/2014 ပိုတ်ႇတီႈ သၢႆၼမ်ႉတႂ်ႈ (6 ဝၢၼ်ႈ) တီႈဝၢၼ်ႈမႅင်ႇ၊ ၽူႈၶိုၼ်ႈႁဵၼ်း 52 ၵေႃႉ။ ဝၼ်းတီႈ 1-2/11/2014 သၢႆသၢပ်ႇၼမ်ႉ (6 ဝၢၼ်ႈ) တီႈဝၢၼ်ႈႁွင်း၊ ၽူႈၶိုၼ်ႈႁဵၼ်း 37 ၵေႃႉ။ ဝၼ်းတီႈ 8-9/11/2014 သၢႆၼမ်ႉၼိူဝ် (8 ဝၢၼ်ႈ) တီႈဝၢၼ်ႈၵုၼ်ႁႆး၊ ၽူႈၶိုၼ်ႈႁဵၼ်း 38 ၵေႃႉ။ တင်းမူတ်း 5 ပၢင် 37 ဝၢၼ်ႈ၊ ၽူႈၶိုၼ်ႈႁဵၼ်းမီး 279 ၵေႃႉ။
တီႈပၢင်သွၼ် ပၼ်တၢင်းႁူႉၵူၼ်းၼုမ်ႇ ၵူႈတီႈတီႈၼႆႉ မီးပႃးၵၢၼ်တႅမ်ႈထႅမ် ၽိုၼ်တုမ်ႉတွပ်ႇလႄႈ လုၵ်ႈႁဵၼ်း ၶဝ် ဢွၼ်ၵၼ်တႅမ်ႈတွပ်ႇဝႃႈ ပၢင်ပၼ်ပိုၼ်ႉႁူႉၸိူင်ႉၼႆၼႆႉ လီသိုပ်ႇမီးၵႂႃႇၶိူဝ်းၶိူဝ်းယႂ်းယႂ်း တင်းၼမ်- မေႃသွၼ် ၶဝ်လၢတ်ႈၼင်ႇၼႆ။

မိူဝ်ႈပူၼ်ႉမႃးပီ 2012 တေႃႇ 2014 ၼႆႉၵေႃႈ လႆႈႁဵတ်းပၢၼ်သွၼ် ပၼ်ပိုၼ်ႉႁူႉၵူၼ်းၼုမ်ႇတင်းၼမ် တီႈလုမ်း သိူဝ်ၽိူၵ်ႇ ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ၊ ပႃးၸဵမ်ပၢင်ပၼ်ပိုၼ်ႉႁူႉၵၢၼ်သိုဝ်ႇၶၢဝ်ႇ (Media) ဢၼ် ၸၢႆးႁၵ်ႉၶိူဝ်း ၸုမ်းၶၢဝ်ႇၽူႈတွႆႇႁွၵ်ႈ မႃးပူင်သွၼ်ၵႂႃႇတီႈလုမ်းသိူဝ်ၽိူၵ်ႇ။