ၸၢဝ်းၶိူဝ်းပဢူဝ်း သွင်ၵေႃႉၽူဝ်မေး ၵႂႃႇႁႃယႃႈယႃ ၼႂ်းထိူၼ်ႇ ယဵပ်ႇၺႃးမၢၵ်ႇတႅၵ်ႇၾၢႆႇဢွၵ်ႇ မိူင်းပွၼ်၊ တင်းသွင် တိူဝ်ႉဝၢတ်ႇၸဵပ်း လိူဝ်ၸႂ်။ ၸုမ်းပဢူဝ်း ၸီႉၼႄးဝႃႈ ပဵၼ်ၼမ်ႉမိုဝ်းသိုၵ်းတႆး ။

ပူၼ်ႉမႃးမိူဝ်ႈဝၼ်းတီႈ 01/11/2014 ဢိင်ၼိူဝ်မၢၵ်ႇတႅၵ်ႇ ၾၢႆႇဢွၵ်ႇမိူင်းပွၼ်သေ ၸုမ်း/တပ်ႉသိုၵ်း ၸိူဝ်ႉၸၢတ်ႈပဢူဝ်း (PNO/PNA) ၸီႉၼႄးဝႃႈ ပဵၼ်ၼမ်ႉမိုဝ်း တပ်ႉသိုၵ်းၸိုင်ႈတႆး (RCSS/SSA) ႁၢင်ႈၵၢင် မၢၵ်ႇတေႃႇၵူၼ်းမိူင်း၊ ႁဵတ်းႁႂ်ႈၵူၼ်းမိူင်းလႆႈတိူဝ်ႉဝၢတ်ႇၸဵပ်းႁၢဝ်ႈႁႅင်း 2 ၵေႃႉ၊ မိူဝ်ႈလဵဝ် လႆႈသူင်ႇၶဝ်ႈႁူင်းယႃ ယူႇဝႆႉ တီႈဝဵင်းလွႆလႅမ်။

ၵဵဝ်ႇၵပ်းလွင်ႈၼႆႉ ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- ဢၼ်တိူဝ်ႉဝၢတ်ႇၸဵပ်း 2 ၵေႃႉၼၼ်ႉ ပဵၼ် လုင်းမွင်ႇၶျိတ်ႉ တင်း ပႃႈၼၢင်းႁွမ်။ သွင်ၶႃဢွၵ်ႇၵႂႃႇႁႃယႃႈယႃ တီႈၾၢႆႇဢွၵ်ႇဝၢၼ်ႈ ၸိတ်ႉၸီႇ၊ ယၢၼ်ဝဵင်း မိူင်းပွၼ် 1 လၵ်း၊ ယဵပ်ႇၺႃးမၢၵ်ႇ ယၢမ်းဝၢႆးဝၼ်း 1 မူင်း။ လုင်းမွင်ႇၶျိတ်ႉ တိူဝ်ႉၺႃးတီႈ ဢူၵ်းၾၢႆႇသၢႆႉ။ ပႃႈၼၢင်းႁွမ် တိူဝ်ႉၺႃးၶွပ်ႇတိၼ်ၾၢႆႇၶႂႃ ၊ လႆႈမႆႈၸႂ် တေလႆႈတႅပ်း၊ ၵွပ်ႈမႆႈၸႂ်ႁႅင်းလႄႈ ယၢမ်းဝၢႆးဝၼ်း 3 မူင်းၶိုင်ႈ လႆႈသူင်ႇၵႂႃႇယူတ်းယႃဝႆႉတီႈႁွင်ႈယႃ ရတၼႃႇ ဝဵင်းလွႆလႅမ်။ ၶႃသွင်ၵေႃႉၼႆႉ ယူႇၼိူဝ်သဵၼ်ႈတၢင်းမႂ်ႇ ပွၵ်ႉႁုင်းၵၢတ်ႇ ဝဵင်းမိူင်းပွၼ်- ဝႃႈၼႆ။

ၵဵဝ်ႇၵပ်းလွင်ႈမၢၵ်ႇတႅၵ်ႇၼႆႉ ၽူႈၶၢၼ်ပၢၵ်ႇ RCSS ၸဝ်ႈႁၢၼ်လၢဝ်သႅင်လၢတ်ႈဝႃႈ- မိူဝ်ႈလဵဝ် ၵဵဝ်ႇၵပ်းလွင်ႈ ႁၢင်ႈမၢၵ်ႇ ႁဵတ်းႁႂ်ႈၵူၼ်းမိူင်းလႆႈၸဵပ်းသႅပ်ႇ လႆႈလူမ်ႉတၢႆၼႆႉ ႁဝ်းၶႃႈဢမ်ႇမီးပေႃႇလသီႇ။ လွင်ႈၸီႉၼႄးမႃး တၢင်းႁဝ်းၶႃႈၼႆႉ မၼ်းတေပဵၼ်လွင်ႈၶဝ်ႈၸႂ်ၽိတ်းၵူၺ်း။ ပေႃႇလသီႇၶွင် RCSS/SSA ၶၢဝ်းယၢမ်းၵိုတ်းသိုၵ်း ၼႆႉ တႃႇတေႁၢင်ႈၵၢင်မၢၵ်ႇတေႃႇၵၼ် တေႃႇသိုၵ်းလူင်ပွင်ၸိုင်ႈ ၸိူင်ႉၼင်ႇၵူႈပွၵ်ႈ မၼ်းဢမ်ႇမီးယဝ်ႉ၊ တႃႇတေ ႁဵတ်းႁႂ်ႈၵူၼ်းမိူင်းလႆႈတုၵ်ႉယၢပ်ႇၽိုတ်ႇ ၶၢၼ်ၸႂ်ၸွမ်းႁဝ်းၵေႃႈ ဢမ်ႇမီး။ ပိူင်လူင်မၼ်း ဢၼ်ႁဵတ်းႁႂ်ႈမီး ၵၢၼ်လူႉ /ဝၢတ်ႇ/ တၢႆၸိူဝ်းၼႆႉ ႁဝ်းၶႃႈတေႁဵတ်းႁႂ်ႈမၼ်းလူတ်းယွမ်း/ဢေႇၵႂႃႇၼႆ ႁဝ်းလႆႈဢုပ်ႇဢူဝ်းၵၼ် ၼႂ်းပၢင်ၵုမ်ငဝ်ႈငုၼ်းသေ တမ်းဝၢင်းပေႃႇလသီႇဝႆႉ။ လွင်ႈၼႆႉ လႅပ်ႈတေဢမ်ႇပဵၼ်လႆႈ၊ ၸၢင်ႈပဵၼ်လွင်ႈ ၶဝ်ႈၸႂ်ၽိတ်းၵၼ်ၵူၺ်း၊ ႁဝ်းၶႃႈတေၶိုတ်းထတ်းသၢင် တပ်ႉႁဝ်းၶႃႈၶိုၼ်းယူႇ- ဝႃႈၼႆ။

ၽူႈၶၢၼ်ပၢၵ်ႇ RCSS ယင်းသိုပ်ႇထတ်းသၢင်ဝႃႈ- ဢၼ်ပဵၼ်မႃးၸိူဝ်းၼႆႉ မၼ်းလီဝူၼ်ႉ၊ မိူဝ်ႈပႆႇၵေႃႇသၢင်ႈ လွင်ႈငမ်းယဵၼ်ၼႆႉ ၸုမ်းယိပ်းၵွင်ႈၵၢင်ႇပဢူဝ်းတင်းတႆး ယၢမ်ႈယူႇႁူမ်ႈၵၼ်မႃး၊ ဢမ်ႇမီးပၼ်ႁႃၵၼ်၊ ၽိူဝ်ႇၵိုတ်း တိုၵ်း ၵေႃႇသၢင်ႈလွင်ႈငမ်းယဵၼ်ယဝ်ႉ ပၼ်ႁႃဢၼ်ၼႆႉ ယႂ်ႇႁႅင်းမႃးဝႆႉ။ ၵွပ်ႈၼၼ် သွင်ၾၢႆႇၼႆႉ တေလႆႈဝႆႉၸႂ် ၵႂၢင်ႈၵႂၢင်ႈသေၶဝ်ႈႁႃၵၼ် ႁူမ်ႈၵၼ်ၵႄႈလိတ်ႈ။ ပေႃးဢမ်ႇၼၼ် ၸၢင်ႈၵႂႃႇၶိုၼ်းမိူၼ်ၵူႈပွၵ်ႈ၊ ၵႂႃႇၶူၼ်ႉသွၵ်ႈၶိုၼ်း ပိုၼ်းၵဝ်ႇ တႆးပေႉၵိၼ်ပဢူဝ်း-ပဢူဝ်းယၢမ်ႈပေႉၵိၼ်တႆးသေ ပၼ်ႁႃၸၢင်ႈယႂ်ႇၶိုၼ်ႈ။ ၵွပ်ႈၼၼ် လွင်ႈၼႆႉ တေလႆႈဝႆႉၼၵ်းတင်းသွင်ၾၢႆႇသေ ၵႄႈလိတ်ႈၵႂႃႇ၊ ၵူဝ်မၼ်းပဵၼ်ပယေႃးၵ ၸုမ်းတီႈသၢမ်ၶဝ်ၵဝ်းၼႂ်းၵႄႈမၼ်း- ဝႃႈၼႆ။

လုင်းမွင်ႇၶျိတ်ႉ ဢႃႇယု 54 ၊ ၸိုဝ်ႈပေႃႈ လုင်းတိၼ်ႇထုၼ်း၊ ၸၢဝ်းၶိူဝ်းပဢူဝ်း (ဢမ်ႇမီးဝႂ်ၵိုၵ်းတူဝ်) ၵိူဝ်းလီ သႃသၼႃပုတ်ႉထ၊ ႁဵတ်းၵၢၼ်ႁႆႈၼႃး။ ၵေႃႉပဵၼ်မေးၼၢင်း ပႃႈၼၢင်းႁွမ် ဢႃႇယု 43 ၊ ၸိုဝ်ႈပေႃႈလုင်းၺုၼ်ႉ ၸၢဝ်းၶိူဝ်းပဢူဝ်း (ဢမ်ႇမီးဝႂ်ၵိုၵ်းတူဝ်)။ ၵိူဝ်းလီသႃသၼႃပုတ်ႉထ၊ ႁဵတ်းၵၢၼ်ႁႆႈၼႃး။