သိုၵ်းမၢၼ်ႈ ဢၼ်တူင်ႉၼိုင်ၼႂ်းၸႄႈဝဵင်းဝၢၼ်ႈတူင်ႈ ၸိုင်ႈတႆးပွတ်းႁွင်ႇ လႆႈပဵၼ်ပၢင်တိုၵ်းၵၼ်တင်း သိုၵ်းတဢၢင်း။ ၾၢႆႇတဢၢင်းႁူၺ်းသူၼ်းၵူၼ်းဝၢၼ်ႈ ယႃႇႁႂ်ႈၽုၵ်ႇယႃႈ၊ သိုၵ်းမၢၼ်ႈလိုပ်ႈတိုၵ်း လႄႈ လႆႈယိုဝ်းၵၼ်။

Photo: internet

ဝၼ်းတီႈ 04/11/2014 ၵၢင်ၼႂ်ယၢမ်း 06:40 မူင်း တေႃႇထိုင် 7 မူင်းပၢႆ၊ သိုၵ်းမၢၼ်ႈ တပ်ႉၸုမ်းလူင် (တပ်ႉမ) 77 တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ပဵၼ်ပၢင်တိုၵ်းၵၼ် ပွတ်းဝၢၼ်ႈလွၵ်းၸေႈ ၼႂ်းၸႄႈဝဵင်းဝၢၼ်ႈတူင်ႈ ၸိုင်ႈတႆးပွတ်းႁွင်ႇ။ ပၢင်တိုၵ်းၼႆႉ ၾၢႆႇသိုၵ်းတဢၢင်း TNLA ပႂ်ႉလေႃႇသိုၵ်းမၢၼ်ႈ သေ လႆႈပဵၼ်ပၢင်တိုၵ်းၵၼ်။

ၸႄႈဝဵင်းဝၢၼ်ႈတူင်ႈ ၸိုင်ႈတႆးပွတ်းႁွင်ႇၼႆႉ ပိူင်ငဝ်ႈပိုင်းမိူင်း 2008 ဢၼ်ၶဵၼ်ႇတႅမ်ႈဝႆႉ ပၢၼ်ၸုမ်းသိုၵ်းမၢၼ်ႈ တမ်းဝၢင်းဝႆႉပဵၼ် ၼႃႈလိၼ်ၽွင်းငမ်းတူဝ်ၵဝ်ႇတဢၢင်း (ပလွင်ႈ) ။

ၵဵဝ်ႇၵပ်းလွင်ႈပၢင်တိုၵ်းၼႆႉ  ၾၢႆႇတဢၢင်းလၢတ်ႈဝႃႈ- ၾၢႆႇသိုၵ်းမၢၼ်ႈ တၢႆ 8 ၵေႃႉ၊ ဝၢတ်ႇၸဵပ်း 12 ၵေႃႉ။ မိူဝ်ႈလဵဝ်ၼႆႉ သိုၵ်းမၢၼ်ႈတပ်ႉၶလယ 130 တိုၵ်ႉၵႂႃႇ ထႅမ်ႁႅင်းသိုၵ်းယူႇ ပိူဝ်ႈတႃႇၸွႆႈတပ်ႉမၢၼ်ႈ ပွတ်းတွၼ်ႈၼၼ်ႉ။

ၶၢဝ်းၾူၼ်ယိုတ်းႁၢႆသေ တႄႇၶဝ်ႈၶၢဝ်းၵတ်းၼႆႉ မၼ်းပဵၼ်ၽွင်းၶၢဝ်းပိူၼ်ႈႁဵတ်းသူၼ်ယႃႈ၊ ၼင်ႇႁိုဝ် ၵူၼ်းဝၢၼ်ႈၵူၼ်းမိူင်းတေဢမ်ႇႁဵတ်းသူၼ်ယႃႈ/ တေႁၢင်ႇယၢၼ်ယႃႈမဝ်းၵမ်ၼၼ်ႉ ၾၢႆႇတဢၢင်း လႆႈၵႂႃႇ ႁူၺ်းသူၼ်းၵူၼ်းဝၢၼ်ႈၵူၼ်းသူၼ်၊ ၵူၺ်းၵႃႈ သိုၵ်းမၢၼ်ႈသမ်ႉမႃးလိုပ်ႈသိုၵ်းတဢၢင်းလႄႈ  ႁဵတ်းႁႂ်ႈလႆႈပဵၼ် ပၢင်တိုၵ်းၵၼ်- ၾၢႆႇတဢၢင်း လၢတ်ႈၼင်ႇၼႆ။

ၾၢႆႇၼိုင်ႈၵေႃႈ သိုၵ်းမၢၼ်ႈလၢတ်ႈဝႃႈ- သိုၵ်းၸၢဝ်းၶိူဝ်း ၸိူဝ်းယိပ်းၵွင်ႈၵၢင်ႇၶဝ်ၼႆႉ ႁဵတ်းႁႂ်ႈၼႂ်းပိုၼ်ႉတီႈ သုၵ်ႉသၵ်ႉ၊ ၵွပ်ႈၼၼ် တေၸႂ်ႉဢဵၼ်ႁႅင်း 4 တပ်ႉၸုမ်းလူင် (4 တပ်ႉမ)သေ ၵႂၢတ်ႇလၢင်ႉၼႂ်းပိုၼ်ႉတီႈ ၼႂ်းၸိုင်ႈတႆးပွတ်းႁွင်ႇ။

ၼႂ်းၸႄႈဝဵင်းဝၢၼ်ႈတူင်ႈၼႆႉ သိုၵ်းၸၢဝ်းၶိူဝ်း ၸိူဝ်းတူင်ႉၼိုင်ႁူမ်ႈၵၼ် မီး တပ်ႉႁူမ်ႈတုမ်ၸၢဝ်းၶိူဝ်း။ ၼႂ်းၼၼ်ႉ မီးသိုၵ်းတဢၢင်း (TNLA) ၊ သိုၵ်းၶၢင် (KIA) ၊ တပ်ႉသိုၵ်းၵူဝ်းၵၢင်ႉ (MNDAA) ၊ တပ်ႉသိုၵ်းၸိုင်ႈတႆး (SSPP/SSA) ၸိူဝ်းၼႆႉ။

ႁွင်ႈၵၢၼ်ၾၢႆႇၶၢဝ်ႇတဢၢင်း လၢတ်ႈဝႃႈ- ပေႃးပၼ်ၵူၼ်းဝၢၼ်ႈၵူၼ်းမိူင်း ၽုၵ်ႇယႃႈသေ ထိုင်ၶၢဝ်းဢဝ်ၶၢဝ်း ၶုတ်ႇမၼ်း ၸင်ႇၵွႆႈၵႂႃႇၽဵဝ်ႈၼႆႉ တေႁဵတ်းႁႂ်ႈၵူၼ်းဝၢၼ်ႈတိူဝ်ႉၸဵပ်း/သုမ်းၼမ်။ ၵွပ်ႈၼၼ် ၼင်ႇႁိုဝ် ၵူၼ်းဝၢၼ်ႈတေဢမ်ႇလူႉသုမ်းၼမ်ၼႆႉ ၶတ်းၸႂ်ႁူၺ်းသူၼ်း ပၼ်တၢင်းႁူႉတၢင်းႁၼ် ႁႂ်ႈၶဝ်ၽုၵ်ႇမၢၵ်ႇၶဝ်ႈ တဝ်ႈၼမ်ႉ တၢင်ႇၸိူဝ်ႉတၢင်ႇပိူင် ယႃႇႁႂ်ႈၶဝ်ၽုၵ်ႇယႃႈ- ဝႃႈၼႆ။