ပႃႇတီႇႁူဝ်သိူဝ် ၸတ်းဝၼ်းၶွပ်ႈၶူပ်ႇ 26 ပီ တီႈဝဵင်းၼမ်ႉၶမ်း၊ မီးၵူၼ်းၶဝ်ႈႁူမ်ႈၼပ်ႉႁူဝ်ပၢၵ်ႇ။ မီးၵၢၼ် သပ်းလႅင်းၼႄ ၼႃႈၵၢၼ်တႃငၢၼ်း၊ လွၵ်းပိူင် 8 ၸႄႈမိူင်း လႄႈ 14 ၸႄႈမိူင်း။

မိူဝ်ႈဝၼ်းတီႈ 03/11/2014 ငဝ်ႈငုၼ်းၻီႊမူဝ်ႊၶရေႊၸီႇ ၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ၸတ်းပၢင်ၶုၵ်းထူပ်း ဝၼ်းၶွပ်ႈၶူပ်ႇ 26 ပီ ၶွင်ပႃႊတီႊ တီႈလုမ်းႁူဝ်သိူဝ် ပွၵ်ႉၵွင်းၼွင်မူဝ် ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ မီးၵူၼ်းၶဝ်ႈႁူမ်ႈတင်းမူတ်း 300 ပၢႆ- ၵႅမ်ၽူႈၼမ်းၼႂ်း ပႃႊတီႊႁူဝ်သိူဝ်ၼမ်ႉၶမ်း ၸၢႆးသႅင်ၾႃႉ လၢတ်ႈ။

ပႃႇတီႇႁူဝ်သိူဝ်ၼႆႉ ၵေႃႇတင်ႈပႃႊတီႊမႃး ၶွပ်ႈတဵမ် 26 ပီ မိူဝ်ႈ ဝၼ်းတီႈ 26/10/2014 ။ ၵူၺ်းၵႃႈ မိူဝ်ႈၼၼ်ႉ ဢမ်ႇပဵၼ်ၸတ်းလႄႈ ၸင်ႇမႃးၸတ်း ၵမ်းၼႆႉ။

တီႈပၢင်ၵႅဝ်ႈပိုတ်ႇပၢင်ၼၼ်ႉ ပိုတ်ႇၵႂၢမ်း ယႃႇႁႂ်ႈဢဵၼ်ႁႅင်းႁၢႆ။ တၵ်ႉယမ်တုင်းၸိူဝ်ႉၸၢတ်ႈ လူၺ်ႈပိုတ်ႇ ၽဵင်းၵႂၢမ်းတုင်းၸၢတ်ႈ ၶိူဝ်းႁဝ်းၶိူဝ်းရႃႇၸႃႇ။ ႁူဝ်ပဝ်ႈ ပႃႊတီႊႁူဝ်သိူဝ် ၸၢႆးလိူၼ်မျၢတ်ႈ တီႈၼမ်ႉၶမ်း မွၵ်ႇလၢတ်ႈၶေႃႈၵႂၢမ်းပိုတ်ႇပၢင်။ ၸၢႆးထုၼ်းလႅင်ႇ ၽူႈၼမ်းၼႂ်း သပ်းလႅင်းၼႄၼႃႈၵၢၼ်တႃငၢၼ်း ဢၼ်လႆႈတူင်ႉၼိုင်မႃး- ၸၢႆးသႅင်ၾႃႉလၢတ်ႈ။
ဢိင်ၼိူဝ် ၽူႈသိုဝ်ႇၶၢဝ်ႇၶဝ်ထၢမ် ၵဵဝ်ႇၵပ်းလွင်ႈ ပႃႇတီႇတႆး 2 ပႃႊတီႊဝႃႈ ပႃႊတီႊႁူဝ်သိူဝ် ယိပ်းလွၵ်းပိူင် 8 ၸႄႈမိူင်း၊ သိူဝ်ၽိူၵ်ႇသမ်ႉ ယိပ်းလွၵ်းပိူင် 14 ၸႄႈမိူင်း၊ 8 ၸႄႈမိူင်း တင်း 14 ၸႄႈမိူင်း မၼ်းပိူင်ႈသင်ၵၼ်၊  ဢၼ်လႂ်ပဵၼ်ၸိူင်ႉႁိုဝ်၊ ၼင်ႇႁိုဝ်ၵူၼ်းမိူင်းတေၶဝ်ႈၸႂ်သေ တွတ်ႈၶႅပ်းၵၢင်ၸႂ်ပၼ်ၼၼ်ႉၵေႃႈ  ယူႇတီႈပႃႊတီႊ ႁူဝ်သိူဝ် လႆႈသပ်းလႅင်းၼႄၵႂႃႇ ၼႂ်းပၢင်ဝၼ်းၶွပ်ႈၶူပ်ႇ 26 ပီ။