ဝၼ်းတီႈ 08/10/2014 (ဝၼ်းဢွၵ်ႇဝႃႇလိူၼ် 11 မူၼ်း) တီႈဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ (ၸိုင်ႈထႆး)၊ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဢွၼ်ႁူဝ်ၼမ်းၼႃႈ ပီႈၼွင်ႉတႆးလၢႆမူႇလၢႆၸုမ်း ၼႂ်းၵဵင်းမႆႇ၊ ၸတ်းပၢင်ႁႅၼ်းတၢၼ်းပၼ်ၵူၼ်းမိူင်းတႆး ဢိၵ်ႇၵေႃႉသိုၵ်းၵေႃႉႁၢၼ် ၸိူဝ်းသဵင်ႈမုၼ်ၵႂႃႇ ယွၼ်ႉၽေးသိုၵ်းမၢၼ်ႈ ပိုတ်ႇပၢင်တိုၵ်းတေႃႇ တပ်ႉသိုၵ်းၸိုင်ႈတႆး (SSPP/SSA) ၼႂ်းၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။ ပၢင်ႁႅၼ်းတၢၼ်းၼႆႉ  မီးၽူႈယႂ်ႇၵူၼ်းလူင်တႆး ၼႂ်းတိုဝ်ႉတၢင်း မႃးဢႅဝ်ႇယဵမ်ႈၸႂ်းဢုၼ်ႇၸႂ်းယဵၼ် ပီႈၼွင်ႉတႆး ၼႂ်းၵဵင်းမႆႇ ၶဝ်ႈႁူမ်ႈလၢႆၵေႃႉလၢႆၸဝ်ႈ။

ၽူႈယႂ်ႇၵူၼ်းလူင်တႆး ၸိူဝ်းၶဝ်ႈႁူမ်ႈပၢင်ႁႅၼ်းတၢၼ်းၼႆႉ ပႃႇတီႇႁူဝ်သိူဝ် (SNLD) မီးၸဝ်ႈၶုၼ်ထုၼ်းဢူး ဢွၼ်ႁူဝ်ၼမ်းၼႃႈ၊ ၽူႈၼမ်းၼႂ်းၵူႈလွင်ႈလွင်ႈ ၸၢႆးၼုတ်း၊ ၽူႈၶၢၼ်ပၢၵ်ႇ ၸၢႆးလဵၵ်ႉ၊ ႁူဝ်ပဝ်ႈလုမ်းတူၼ်ႈတီး ၸဝ်ႈၶမ်းပိူင်ႇၾႃႉ၊ ၸၢႆးသၢမ်ၾူၼ်သႅင်၊ ၽူႈႁပ်ႉပုၼ်ႈၽွၼ်းၾၢႆႇသူၼ်းတုမ် ၸၢႆးဢႅၵ်ႉၵ ။ ပႃႇတီႇမႂ်ႇသုင် ၸိုင်ႈတႆး ၽူႈၼမ်းၼႃႈ ၸွမ်ႁၢၼ်သိူဝ်ထႅၼ်ႈ။ ၸုမ်းသိုၵ်းၵူၼ်းမိူင်း သႅင်ၵႅဝ်ႉ ၸဝ်ႈၵၢႆႇၾႃႉ ၸိူဝ်းၼႆႉ။

ဢွၼ်ၼႃႈၼႆႉ ဝၼ်းတီႈ 2-4/10/2014 ၽူႈၼမ်းတႆး 5 မူႇၸုမ်း မႃးႁဵတ်းပၢင်ၵုမ် တီႈမိူင်းၵွၵ်ႇ ၸိုင်ႈထႆး၊ ဢုပ်ႇဢူဝ်းပိူဝ်ႈတႃႇသၢၼ်မိုဝ်းႁူမ်ႈၵၼ် ႁဵတ်းသၢင်ႈၼႃႈၵၢၼ် တႃႇၸိူဝ်ႉၸၢတ်ႈမိူဝ်းၼႃႈ။ ၼႂ်းၼၼ်ႉ မီးပႃႇတီႇႁူဝ်သိူဝ် ႁူဝ်ပဝ်ႈၸဝ်ႈၶုၼ်ထုၼ်းဢူး ၼမ်းၼႃႈ။ ပႃႇသိူဝ်ၽိူၵ်ႇ (SNDP) လုင်းၸၢႆးဢၢႆႈပဝ်း ၼမ်းၼႃႈ။ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းယွတ်ႈသိုၵ်း ၼမ်းၼႃႈ။ ပႃႇတီႇမႂ်ႇသုင်ၸိုင်ႈတႆး (SSPP) ၸွမ်ႁၢၼ်သိူဝ်ထႅၼ်ႈ ဢွၼ်ႁူဝ်ၼမ်းၼႃႈ။ ၸုမ်းသိုၵ်းၵူၼ်းမိူင်း သႅင်ၵႅဝ်ႉ ၸဝ်ႈၵၢႆႇၾႃႉ ၼမ်းၼႃႈ။ ဝၢႆးယဝ်ႉတီႈမိူင်းၵွၵ်ႇယဝ်ႉ လႆႈသိုပ်ႇၶၢဝ်းတၢင်းမႃး သူႇယဵမ်ႈၸႂ်းပီႈၼွင်ႉတႆး တီႈဝဵင်းၵဵင်းမႆႇ။

ဝၼ်းတီႈ 05/10/2014 ယၢမ်း 10:30 မူင်း၊ ၵေႃလိၵ်ႈလၢႆးလႄႈၾိင်ႈငႄႈတႆး (ၵဵင်းမႆႇ) ဢွၼ်ႁူဝ်ၼမ်းၼႃႈ ပီႈၼွင်ႉတႆးၼႂ်းၵဵင်းမႆႇ၊ ပႃးၸဵမ်ၼုမ်ႇႁၢႆးၸၢႆးယိင်းတင်းၼမ် ႁူမ်ၸူမ်းႁပ်ႉတွၼ်ႈၽူႈၼမ်းတႆး ၸိူဝ်းလုၵ်ႉ ၼႂ်းမိူင်းမႃးၸွမ်းသၢႆၵၢၼ်ဝိၼ် မိူဝ်ႈႁွတ်ႈၽႅဝ်တီႈၵႂၢင်းႁိူဝ်းဝိၼ် ၵဵင်းမႆႇ ၸိုင်ႈထႆး။ ဝၢႆးႁူမ်ႈပၢင်ႁႅၼ်းတၢၼ်းယဝ်ႉ ၽူႈၼမ်းတႆး ပွၵ်ႈမိူဝ်းၶိုၼ်းတၢင်းမိူင်းၵွၵ်ႇ ပိူဝ်ႈတႃႇပွၵ်ႈၶိုၼ်းမိူဝ်းၼႂ်းမိူင်း။