မိူဝ်ႈလဵဝ် မီးၶၢဝ်ႇပႆႇယိုၼ်ယၼ်ဝႃႈ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) တင်း ၶွင်ႊသီႊဢဝ်ၶိုၼ်း ၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၶိုင်ပွင်ဢုပ်ႇဢူဝ်းၵၼ် ပိူဝ်ႈတႃႇႁူမ်ႈမိုဝ်းၵၼ် တၢင်းၵၢၼ်သိုၵ်း။

တပ်ႉသိုၵ်းၸိုင်ႈတႆး 2 ၸုမ်း လွႆတႆးလႅင်း တင်းဝၢၼ်ႈႁႆးၼႆႉ တိုၵ်ႉႁူပ်ႉဢုပ်ႇၵၼ် တီႈပၢင်ၵုမ်ၽူႈၼမ်းတႆး ဢၼ်ၸတ်း တီႈဝဵင်းလူင်မိူင်းၵွၵ်ႇ (ၵုင်းထဵပ်ႈ) ပူၼ်ႉမႃးမိူဝ်ႈဝၼ်းတီႈ 2-4/10/2014 ။

မိူဝ်ႈပၢင်ၵုမ်ဝၼ်းတီႈ 03/10/2014 ၼၼ်ႉ ၸွမ်သိုၵ်းယွတ်ႈသိုၵ်း ႁူဝ်ပဝ်ႈ RCSS လၢတ်ႈဝႃႈ- လူင်ပွင်ၸိုင်ႈမၢၼ်ႈ ၸွမ်ၸိုင်ႈတဵင်းၸဵင်ႇ ပဵၼ်ၵူၼ်းၵေႃႇသၢင်ႈလွင်ႈငမ်းယဵၼ်၊ ၽူႈၵွၼ်းသိုၵ်းသုင်သုတ်း မိၼ်းဢွင်ႇလၢႆႇ သမ်ႉပဵၼ် ၵူၼ်းယႃႉလႅဝ်လွင်ႈငမ်းယဵၼ်။ ဢၼ်မၢၼ်ႈ ႁၢင်ႈသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) တီႈတႃႈၽႃသွင်ႇ ၼၼ်ႉ ႁဵတ်းႁႂ်ႈတပ်ႉသိုၵ်းၸိုင်ႈတႆး 2 ၸုမ်း ၸမ်ၸႂ်ၵၼ်မႃး၊ ပေႃးႁဝ်းဢမ်ႇၽွမ်ႉၵၼ်ၵမ်းၼႆႉ တေပႂ်ႉၽွမ်ႉၵၼ်မိူဝ်ႈလႂ်- ဝႃႈၼႆ။

တပ်ႉတႃႈၽႃသွင်ႇ SSPP/SSA ၼႆႉ လႆႈထွၼ်ပၼ်သိုၵ်းမၢၼ်ႈၵႂႃႇ ယၢမ်းၵၢင်ၶိုၼ်း ဝၼ်းတီႈ 02/10/2014 ၊ ယွၼ်ႉ သိုၵ်းမၢၼ်ႈဢဝ်ၶိူင်ႈၵွင်ႈလူင် 60mm သွင်ႁဵင်ႁႃႈပၢၵ်ႇ (2,500) လုၵ်ႈ။ မၢၵ်ႇ 120mm ႁႃႈပၢၵ်ႇ (500)လုၵ်ႈ၊ မၢၵ်ႇ 81mm ၵေႃႈ ၼပ်ႉႁူဝ်ပၢၵ်ႇလုၵ်ႈ ယိုဝ်းလေႃႇသႂ်ႇ။