မိူဝ်ႈဝၼ်းတီႈ 08/10/2014 ၊ ၽူႈၵွၼ်းၽႅၼ်ၵၢၼ်လၢႆးတိုၵ်း  (ပိဝ်ႇႁႃႇ) တိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) သိုပ်ႇၾူၼ်ႊ လၢတ်ႈတီႈၽူႈၼင်ႈလုမ်း တပ်ႉသိုၵ်းၸိုင်ႈတႆး (SSPP/SSA) တီႈၶူဝ်လမ်ဝႃႈ- ဢၼ်လႆႈယိုဝ်းၵၼ် ႁိမ်းၵွင်းယႃႈတႆႇၼၼ်ႉ ယွၼ်ႉသိုၵ်းတႆးႁၢင်ႈၵၢင်မၢၵ်ႇဝႆႉ ၼိူဝ်သဵၼ်ႈတၢင်းလူင်လႄႈ တပ်ႉသိုၵ်းမၢၼ်ႈ လႆႈလတ်းထိူၼ်ႇ ၵႂႃႇၽႃႇၺႃးသိုၵ်းတႆး၊  ၸင်ႇလႆႈပဵၼ်ပၢင်တိုၵ်းၵၼ်။

သိုၵ်းတႆး ဢၼ်မီးယူႇတီႈပၢင်ႇၸေႈ ႁႅင်းၵူၼ်း 50 ၵေႃႉၼၼ်ႉ ႁႂ်ႈထွၼ်ဢွၵ်ႇပၼ်ဝႆးဝႆး၊ ယွၼ်ႉပိူဝ်ႈ တပ်ႉသိုၵ်းမၢၼ်ႈ တေသူင်ႇၶူဝ်းၶွင်ၶဝ်ႈၼမ်ႉတၢင်းၵိၼ်ၵူႈလွင်ႈလွင်ႈ ပၼ်သိုၵ်းဢၼ်ယူႇၼႂ်းပိုၼ်ႉတီႈ လႄႈ ဢမ်ႇၸၢင်ႈၵႂႃႇမႃးလႆႈ။ မိူဝ်ႈလဵဝ်ၼႆႉ ႁဝ်းလႆႈၵုမ်း/ႁၢမ်ႈတပ်ႉၾၢႆႇတႂ်ႈႁဝ်းဝႆႉ၊ ၵူၼ်းၾၢႆႇတႂ်ႈႁဝ်းၵေႃႈ ယွၼ်းၶႂ်ႈယိုဝ်းသူယူႇတိၵ်းတိၵ်း- ပိဝ်ႇႁႃႇ ၶူဝ်လမ် လၢတ်ႈၼင်ႇၼႆ။

ၼင်ႇႁိုဝ်ၶေႃႈတူၵ်းလူင်း လွင်ႈငမ်းယဵၼ်တေဢမ်ႇလူႉၼၼ်ႉ ႁႂ်ႈသူငိူင်ႉၶၢႆႉပၼ်၊ ၸိူဝ်းမီးယူႇၸွမ်း သဵၼ်ႈတၢင်းလူင် ၸိူဝ်းၼၼ်ႉၵေႃႈ ၶၢႆႉဢွၵ်ႇပၼ်ဝႆးဝႆး၊ ၵူၼ်းဢွၼ်ႇၾၢႆႇတႂ်ႈႁဝ်းၵေႃႈ ၶႂ်ႈႁၼ်ၽိတ်း ၼိူဝ်ႁဝ်းယဝ်ႉလႄႈ ဢမ်ႇယိူၼ်ႉၵၼ်ႈလႆႈၼိူဝ်သူယဝ်ႉ- ဝႃႈၼႆ။