ၿႃးသီလူဝ်းၼႃးၼႆႉ ပဵၼ်ဝဵင်းလူင်ၶွင် တိူင်း ၵႃတႃလူဝ်းၼီးယိူဝ်း ၼႂ်းၸိုင်ႈမိူင်းသပဵၼ်ႇ (Spain) ။ ပဵၼ်တိူင်းဢၼ်မၢၵ်ႈမီးလီပဵၼ်သေပိူၼ်ႈ ၼႂ်းၸိုင်ႈမိူင်း ဝႃႈၵၼ်ၼင်ႇၼႆ။

ပၢင်ၵဵပ်းၵၢင်ၸႂ် ၸႄႈမိူင်းသၵွတ်ႇလႅၼ်ႇ (Scotland) ၼႂ်းၸိုင်ႈမိူင်းဢိင်းၵလဵတ်ႈ (UK) တိုၵ်ႉယဝ်ႉၵႂႃႇမိူဝ်ႈ 18/09/2014 လူၺ်ႈ ၾၢႆႇၽၢတ်ႇဢွၵ်ႇလႆႈ 45% ၶွင်ၶႅပ်း သဵင်တင်းမူတ်း ၾၢႆႇဢမ်ႇၽၢတ်ႇဢွၵ်ႇလႆႈ 55% သေယဝ်ႉတူဝ်ႈၵႂႃႇ။

မိူဝ်ႈလဵဝ် ဢွၼ်ၵၼ်တူၺ်းဝႃႈ ပၢင်ၵဵပ်းၵၢင်ၸႂ်တီႈ ၵႃတႃလူဝ်ႊၼီႊယိူဝ်ႊ မိူဝ်ႈဝၼ်းဢႃးတိတ်ႉ 09/11/2014 တေပဵၼ်ၸိူင်ႉႁိုဝ်။ လွင်ႈယင်ႇသဵင်ၵမ်းလိုၼ်းတႄႉဝႃႈ ၵူၼ်းၶႂ်ႈၽၢတ်ႇဢွၵ်ႇမီး 58.8% ဢမ်ႇၶႂ်ႈၽၢတ်ႇဢွၵ်ႇမီး 31.9% ။ ၵူၺ်းၵႃႈ လွင်ႈယင်ႇသဵင် (poll) ၼႆႉမၼ်းဝႃႈယၢပ်ႇ။ ၸိူင်ႉၼင်ႇ သၵွတ်ႇလႅၼ်ႇၵေႃႈ မိူဝ်ႈယင်ႇသဵင် မီးၵူၼ်းၶႂ်ႈၽၢတ်ႇဢွၵ်ႇၼမ်တႄႉတႄႉ။ ၵူၺ်းၽိူဝ်ႇထတ်း ပၢင်တွတ်ႈၶႅပ်းသဵင်ယဝ်ႉ ၵၢၼ်ႉၵႂႃႇ။

မီးလွင်ႈၼိုင်ႈ မိူင်းသပဵၼ်ႇ ဢမ်ႇမိူၼ်ဢိင်းၵလဵတ်ႈၼႆႉ ၵဵဝ်ႇလူၺ်ႈပိူင်ငဝ်ႈပိုင်းမိူင်း (ၵမ်ႈၽွင်ႈဝႃႈ လၵ်းမိူင်း) ၼၼ်ႉယဝ်ႉ။ လၵ်းမိူင်းသပဵၼ်ႇ ၶေႃႈ 8 ၼႆႉ ၸီႉၸမ်ႈၼႄဝႆႉဝႃႈ “လွင်ႈၽွမ်ႉႁူမ်ႈၸိုင်ႈမိူင်းၼႆႉ ဢမ်ႇၸၢင်ႈပၼ်လူႉလႅဝ်လႆႈ” (Indissoluble unity of the nation) လႄႈ မွပ်ႈမၢႆဝႆႉ ၼႃႈတီႈပုၼ်ႈၽွၼ်း တီႈတပ်ႉသိုၵ်း တႃႇတေႁပ်ႉႁွင်းဝႆႉ “လွင်ႈၽွမ်ႉႁူမ်ႈ” ၼႆႉ။ တူၺ်းယဝ်ႉ ဢမ်ႇပေႃးပၢႆႈပိူင်ႈလၵ်းမိူင်း 2008 ဢၼ်တပ်ႉသိုၵ်းမၢၼ်ႈ တိုတ်ႉၸၼ်/ၶဵၼ်ႇတႅမ်ႈဝႆႉလႄႈ ၸႂ်ႉတိုဝ်းယူႇမိူဝ်ႈလဵဝ်ၼႆႉ။

ယွၼ်ႉၼၼ် တႆးႁဝ်းၸိူဝ်းၶႂ်ႈတင်ႈမိူင်းၵွၼ်းၶေႃလႄႈသင်၊ ဢမ်ႇဢၢၼ်းၽၢတ်ႇဢွၵ်ႇသေ ၶိုင်ႁဵတ်းၶုၼ် ၼိူဝ်မၢၼ်ႈလႄႈသင်၊ လီလႆႈပႂ်ႉတူၺ်းလွင်ႈၼႆႉယူႇ။ ဢၼ်ဢမ်ႇလီလူင်လိုမ်းၼႆႉတႄႉ ပဵၵ်ႉဝႃႈသူၸဝ်ႈ ဢမ်ႇပႂ်ႉတူၺ်းၵေႃႈ ၶုၼ်မိူင်းႁဝ်းမိူဝ်ႈလဵဝ် ၸိူဝ်းၵူဝ်ဝၢၼ်ႈမိူင်းတႅၵ်ႇယၢႆႈၼၼ်ႉ တိုၼ်းပႂ်ႉတူၺ်းဢမ်ႇႁၢင်ႉ ၼၼ်ႉယဝ်ႉ။

ပေႃးၶဝ်ပႂ်ႉတူၺ်းယဝ်ႉ တေဢမ်ႇယူႇလၢႆလၢႆ၊ တေဢဝ်မႃးတႅၵ်ႈတင်းမိူင်းႁဝ်းသေ ထုၵ်ႇၶဵင်ႈတေၶဵင်ႈ၊ ထုၵ်ႇယၢၼ်းတေယၢၼ်းၼႆၼၼ်ႉ လီသႂ်ႇၸႂ်ဝႆႉ။