ၸၢႆးႁိၼ်ပဝ်း (ၸၢႆးၶျိတ်ႉငူၺ်ႇ)ၼႆႉ ပဵၼ်ၵူၼ်းလဵၼ်ႈႁႅင်း ၾၢႆႇၵၢမ်ႈၼိူဝ်ႉမၢၵ်ႈ (ၵႃႇယပလ)၊ ယၢမ်ႈၶဝ်ႈ ၶႄႉၶဵင်ႇတီႈဝဵင်းလိူဝ်ႇသေ လႆႈတီႈၼိုင်ႈ 3 ပီထပ်းၵၼ်၊ မိူဝ်ႈလဵဝ် ႁၢင်ႈႁႅၼ်းဝႆႉတႃႇတေၵႂႃႇၶႅင်ႇတီႈ မိူင်းၶၢင်ထႅင်ႈ- ၼႆယဝ်ႉ။

မၼ်းၸၢႆးၼႆႉ ပေႃႈၸိုဝ်ႈ ၸၢႆးၶျိၼ်ႉပဝ်း၊ မႄႈၸိုဝ်ႈၼၢင်းဢေယိင်း၊ တီႈယူႇဝဵင်းမိူင်းၵုတ်ႈ၊ ပဵၼ်ၵူၼ်းၶိူဝ်း မိူင်းဝၼ်း ၶိူဝ်းႁိူၼ်းႁိၼ်၊ ၼပ်ႉထိုဝ်ၵိူဝ်းလီ ပုတ်ႉထသႃသၼႃ၊ ၶဝ်ႈပၢင်ၶႄႉၶဵင်ႇ 30 ပွၵ်ႈပၢႆ၊  ဢွင်ႇပေႉ လႆႈသူး (ရၢင်းဝလ်း) ၼႂ်း 1-3 ၵူႈပၢင်။ တၢင်တူဝ် ၸၼ်ႉၸႄႈမိူင်း ၸၼ်ႉတိူင်းသေ ၶဝ်ႈၶႄႉၶဵင်ႇ။ ၵႃႈပူၼ်ႉမႃး  တၢင်တူဝ်မိူင်းတႆးပွတ်းႁွင်ႇသေ ၶဝ်ႈၶႄႉၶဵင်ႇၸၼ်ႉတိူင်း လႆႈသူးတီႈ 3 - ၼႆယဝ်ႉ။

ၼွၵ်ႈၼိူဝ်သေ ပဵၼ်ၵူၼ်းလဵၼ်ႈႁႅင်း ၾၢႆႇၵၢမ်ႈၼိူဝ်ႉမၢၵ်ႈ၊ ပဵၼ်ၶူးသွၼ်ၾၢႆႇလဵၼ်ႈႁႅင်းယဝ်ႉ ၸၢႆးႁိၼ်ပဝ်းၼႆႉ ပေႃးၶၢဝ်းမႆႈ ႁူင်းႁဵၼ်းလူင်ပွင်ၸိုင်ႈဢိုတ်းႁပ်းမႃးၸိုင် ၵႃႈပူၼ်ႉမႃးၼႆႉ ႁပ်ႉပဵၼ်ၶူးသွၼ်လိၵ်ႈတႆး မႁႃႈတူဝ်ထႅင်ႈ- ၼႆယဝ်ႉ။

မၼ်းၸၢႆးလၢတ်ႈဝႃႈ- ဢၼ်တေၶႅင်ႇတၢင်းၼႃႈၼႆႉ ပေႃးပိူၼ်ႈလိူၵ်ႈၶႃႈတႄႉ ၶႃႈတေလႆႈတၢင်တူဝ်မၼ်းတလေး (ဝဵင်းတႃႈလိူဝ်ႇ)သေ ၵႂႃႇၶႅင်ႇ၊ ယွၼ်ႉပိူဝ်ႈဝႃႈ မိူင်းၵုတ်ႈႁဝ်းၼႆႉ တူၵ်းဝႆႉၼႂ်းတိူင်းမၼ်းတလေး။ ႁဝ်းၶႃႈၶႂ်ႈတၢင်တူဝ်မိူင်းတႆးသေၶႅင်ႇယူႇၵေႃႈ မၼ်းဢမ်ႇၸၢင်ႈႁဵတ်းႁိုဝ်- ဝႃႈၼႆ။

ၾၢႆႇၼိုင်ႈတၢင်းၼိုင်ႈ ၵူၼ်းၸၢႆးတႆး (မဵဝ်းထုတ်ႉၼၢႆႇ) ဢၼ်ၵႂႃႇၶႅင်ႇလွင်ႈတူဝ်ၶိင်းလဝ်းၼွၵ်ႈမိူင်းၵေႃႈ တၢင်ႇမိူင်းယင်းယွင်ႈယေႃးဝႃႈ လဝ်းလိူဝ်ၶူဝ်ႊရီႊယိူဝ်ႊထႅင်ႈလူးၵွၼ်ႇ- ၼႆယူႇ။