ပိူဝ်ႈတႃႇပိုတ်ႇၶိုၼ်း သဵၼ်ႈတၢင်းၵိဝ်ႇၽႃဝွၵ်ႈ (ၼွင်ဢုၵ်း) BP1 လႅၼ်လိၼ်ထႆး- တႆးၼႆႉ ၸဝ်ႈၼႃႈတီႈတပ်ႉသိုၵ်း မိူင်းထႆး တင်း ၾၢႆႇသိုၵ်းမၢၼ်ႈ ဢၼ်ယူႇၼႂ်းပိုၼ်ႉတီႈ ႁူပ်ႉထူပ်းၵၼ် ဝၢႆးႁဵတ်းပၢင်ပွႆး ၶူင်းၵၢၼ်ၽိုၼ်ပႃႇ ဢႃႊသျႅၼ်ႊ၊ ဢၼ်မီးၵၢၼ်ၵႃရဝသင်ၶ၊ ပၢင်ပွႆးပိုတ်ႇၵၢတ်ႇ၊ တွၼ်ႈၸိူဝ်ႉၽၼ်း တူၼ်ႈမႆႉတူၼ်ႈတွၵ်ႇၵၼ် ၸိူဝ်းၼႆႉ။ သွင်ၾၢႆႇႁူပ်ႉထူပ်းၵၼ် တီႈလႅၼ်လိၼ်သေ မီးၶၢဝ်ႇဢွၵ်ႇမႃးဝႃႈ တေပိုတ်ႇၽၵ်းတူလႅၼ်လိၼ် သဵၼ်ႈတၢင်း BP1 ဝႆးဝႆးၼႆႉ- ၼႆယဝ်ႉ။

 
သဵၼ်ႈတၢင်းလႅၼ်လိၼ် ၵိဝ်ႇၽႃႈဝွၵ်ႈၼႆႉ BP1 ၼႆႉ တေႃႇၼႃႈမိူင်းထႆး ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ၊ မိူင်းတႆး ၵိင်ႇၸႄႈဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ။ သဵၼ်ႈတၢင်းၼႆႉ လူင်ပွင်ၸိုင်ႈၸုမ်းသိုၵ်းမၢၼ်ႈ ပိၵ်ႉဢိုတ်းမႃးၸဵမ်မိူဝ်ႈ 2001  ၽွင်းတပ်ႉသိုၵ်းမၢၼ်ႈ တင်း တပ်ႉသိုၵ်းၸိုင်ႈတႆး (SSA) ယိုဝ်းၵၼ် ၸွမ်းလႅၼ်လိၼ် ၼႂ်းပီ 2001 ၊ မီးၵၢၼ်ႁၢင်ႈႁႅၼ်း တေပိုတ်ႇၶိုၼ်းၼႂ်းပီ 2015 တၢင်းၼႃႈၼႆႉ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽွင်းတႅၼ်းၶဵတ်ႇ/ ပိုၼ်ႉတီႈလိူၵ်ႈတင်ႈမၢႆ 2 (ပႃႇတီႇသိူဝ်ၽိူၵ်ႇ) မိူင်းတူၼ် ၸၢႆးဝိၼ်းမျၢတ်ႉဢူး လၢတ်ႈဝႃႈ- ၾၢင်ႁၢင်ႈဢၼ်တေပိုတ်ႇတႄႉ ပႆႇႁၼ်လၢၵ်ႇလၢႆးသင်။ ၵူၺ်းၵႃႈ ပူၼ်ႉမႃးမွၵ်ႈ 1-2 လိူၼ်ၼႆႉ ၾၢႆႇၵဵပ်းၶွၼ်ႇ (Custom) ၵေႃႈ မႃးတီႇတီႈလိၼ် ဢဝ်တီႈယူႇၸိူဝ်းၼႆႉ ၵေႃႈႁၼ်။ ၼွၵ်ႈသေၼၼ်ႉ ၾၢႆႇၵူတ်ႇၵူၼ်းၶဝ်ႈမိူင်း (လဝၵ) ၵေႃႈမႃးတူၺ်းၶိုၼ်းတီႈ တႃႇတေပၵ်းလုမ်းပၵ်းၸႆး ၸိူဝ်းၼႆႉယူႇ။ ၵူၺ်းၵႃႈ ဢၼ်ဝႃႈတေပိုတ်ႇပဵၼ်တၢင်းၵၢၼ်ၼႆတႄႉ ပႆႇလႆႈငိၼ်းၶၢဝ်ႇငၢဝ်းသင်။ မိူဝ်ႈလဵဝ် ၶႃႈႁၢပ်ႇၵၢၼ်ၶုၼ် ပိူဝ်ႈတႃႇမႃးပၵ်းပႂ်ႉလႅၼ်လိၼ် ဢၼ်လိူဝ်မႃးၵေႃႈပႆႇႁၼ်- ဝႃႈၼႆ။

ယူႇတီႈၶႃႈႁဝ်းသေ ပိူဝ်ႈတႃႇပိုတ်ႇသဵၼ်ႈတၢင်းလႅၼ်လိၼ်ဝွင်ႇၼႆႉ ယၢမ်ႈတၢင်ႇလၢတ်ႈမႃးၼႂ်းသၽႃး ပွၵ်ႈၼိုင်ႈယဝ်ႉ၊ ၵူၺ်းၵႃႈ ၾၢႆႇၽူႈမီးပုၼ်ႈၽွၼ်းၶဝ်သမ်ႉလၢတ်ႈဝႃႈ- သဵၼ်ႈတၢင်းၼႆႉ မၼ်းဢမ်ႇၵဵဝ်ႇၶွင်ႈတင်း လူင်ပွင်ၸိုင်ႈမိူင်းတႆး၊ မၼ်းၵဵဝ်ႇၶွင်ႈလူင်ပွင်ၸိုင်ႈၵၢင် ၼေႇပျီႇတေႃႇ ၵမ်းသိုဝ်ႈ။ ၵွပ်ႈၼၼ်  လွင်ႈၼႆႉ ၶႃႈၵေႃႈဢမ်ႇၸၢင်ႈသိုပ်ႇတၢင်ႇထႅင်ႈသေ လႆႈၵိုတ်းၵႂႃႇ- ဝႃႈၼႆ။

ၸဝ်ႈၼႃႈတီႈ ၾၢႆႇၽွင်းငမ်းမိူင်းထႆး ၵေႃႉၼိုင်ႈလၢတ်ႈဝႃႈ- မိူဝ်ႈဝၼ်းတီႈ 14/08/2014 ၼၼ်ႉ ႁဝ်းၶႃႈမီးၵၢၼ်ပိုတ်ႇၶူင်းၵၢၼ်ပႃႇမႆႉ ဢႃႊသျႅၼ်ႊ၊ ၼိမၼ်တၼ သင်ၶ တၢင်းမိူင်းတႆး 4 တူၼ်၊ တၢင်းမိူင်းထႆး 5 တူၼ်သေ ၵၢပ်ႈသွမ်း၊ ႁူမ်ႈၵၼ်လဵၼ်ႈႁႅင်း၊ ႁဵတ်းပၢင်ပွႆးပိုတ်ႇၵၢတ်ႇ၊ တွၼ်ႈၸိူဝ်ႉၽၼ်းတူၼ်ႈမႆႉတူၼ်ႈတွၵ်ႇ မိူဝ်းတၢင်းမိူင်းတႆး ႁႂ်ႈလႆႈမိူဝ်းၽုၵ်ႇ။ ၾၢႆႇတၢင်းမိူင်းထႆးတႄႉ တႃႇတေပိုတ်ႇလၢၼ်ႇလႅၼ်လိၼ်ၼႆႉ ပိုတ်ႇ ၽၵ်းတူမႃးတႃႇသေႇ၊ တုၵ်းယွၼ်းၾၢႆႇမၢၼ်ႈမႃးတႃႇသေႇ။ ၵူၺ်းၵႃႈ လူင်ပွင်ၸိုင်ႈမၢၼ်ႈ ပႆႇတူဝ်ႈတၼ်းလႄႈ ပႆႇၸၢင်ႈႁဵတ်းႁိုဝ်- ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းၵႃႉတၢင်းလၢင်းၶိူဝ်းၵေႃႉၼိုင်ႈ ၵေႃႈလၢတ်ႈဝႃႈ-ပေႃးဝႃႈလုၵ်ႉဢဝ်လႅၼ်လိၼ်ထႆး မိူဝ်းၸွမ်း သဵၼ်ႈတၢင်းတႃႈၶီႈလဵၵ်း-ၵဵင်းတုင် - တူၼ်ႈတီး၊ သမ်ႉလုၵ်ႉဢဝ်တီႈလႅၼ်လိၼ် BP1 -ပုင်ႇပႃႇၶႅမ်- မိူင်းတူၼ်- မိူင်းပၼ်ႇ- လၢင်းၶိူဝ်း မိူဝ်းတူၼ်ႈတီးၼႆၸိုင် လၵ်းမၼ်းပိူင်ႈၵၼ်ပၢၵ်ႇပၢႆ။ ၾၢႆႇၼိုင်ႈ ဝဵင်းလူင်တီႈ 2 ၶွင်မိူင်းထႆး ၵဵင်းမႆႇၵေႃႈ ပေႃးလုၵ်ႉတႃႈၶီႈလဵၵ်းၵႂႃႇၵဵင်းမႆႇ ၵီႊလူဝ်ႊမၼ်းမီးယူႇ 300 ပၢႆ၊ ပေႃးလုၵ်ႉ BP1 ၵႂႃႇၵဵင်းမႆႇ မီး 160 ၵူၺ်း။ ထႅင်ႈလွင်ႈၼိုင်ႈ ပေႃးဝႃႈမိူဝ်းသဵၼ်ႈတၢင်းတႃႈၶီႈလဵၵ်း-ၵဵင်းတုင် မီးလၢၼ်ႇ/ ၵဵတ်ႉၼမ်၊ လႆႈသႂ်ႇၶွၼ်ႇၸွမ်းတႃႈၸွမ်းတၢင်းၵေႃႈၼမ်။ ပေႃးဝႃႈမိူဝ်းတၢင်း BP1 လၢၼ်ႇဢေႇ၊ ၶူဝ်းၵုၼ်ႇ သိၼ်ၵႃႉၵေႃႈ ထိုင်ဝႆး၊ ၵူၼ်းမိူင်းၵေႃႈတေၶႅၼ်းၸႂ်၊ ၵၢၼ်ၵႃႉၵေႃႈတေပဵၼ်- ဝႃႈၼႆ။

ၵႃႈၵွၼ်ႇပူၼ်ႉမႃး ၼင်ႇႁိုဝ်တေဢမ်ႇပိုတ်ႇသဵၼ်ႈတၢင်းလႅၼ်လိၼ် BP1 လႆႈၼႆႉ ၾၢႆႇပေႃႈၵႃႉၶဝ် ၵႂႃႇယဵတ်ႈမွၼ် တၢင်းၵဵင်းတုင် (တိူင်းသိုၵ်းသၢမ်ၸဵင်ႇ)။ တၢင်းၵဵင်းတုင်ၵေႃႈ ဢိင်ဢၢင်ႈဝႃႈ သဵၼ်ႈတၢင်းလႅၼ်လိၼ် BP1 ၼႆႉ မၼ်းသုၵ်ႉသၵ်ႉ၊ ဝၢၼ်ႈမိူင်းပႆႇမီးလွင်ႈႁူမ်ႇလူမ်ႈ၊ ပႆႇၸၢင်ႈပိုတ်ႇ- ၵမ်ႈၽွင်ႈလၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၽွင်းတႅၼ်းၸၢႆးဝိၼ်းမျၢတ်ႉဢူး လၢတ်ႈဝႃႈ- လွင်ႈၼႆႉ မၼ်းပဵၼ်ၵၢၼ်ဢၢင်ႈဢၼ်ၼိုင်ႈၵူၺ်း၊ ပေႃးတႅၵ်ႈၵၼ်တင်း တႃႈၶီႈလဵၵ်းၸိုင် ၸုမ်းယိပ်းၵွင်ႈၵၢင်ႇတၢင်း ပုင်ႇပႃႇၶႅမ်ၼႆႉ ဢေႇလိူဝ်တၢင်းတႃႈၶီႈလဵၵ်း တႄႉတႄႉ။ ပေႃးတႅၵ်ႈၵၼ်ယႃႈမႃႉၵေႃႈ တေႃႇၼင်ႇၼၼ်၊ ပေႃႈၵႃႉ ယႃႈၾိၼ်ႇယႃႈမႃႉ ပွတ်းဝဵင်းပုင်ႇပႃႇၶႅမ်ၼႆႉ ယင်းဢမ်ႇၶႂ်ႈမီးလူးၵွၼ်ႇ၊ တၢင်းတႃႈၶီႈလဵၵ်းၼႆႉ မၼ်းၼမ်။ ၵွပ်ႈၼၼ် ဢၼ်ဝႃႈၸုမ်းယိပ်းၵွင်ႈၵၢင်ႇၼမ် ပီႇတုၸိတ်ႉၼမ်ၸိူဝ်းၼႆႉ မၼ်းပဵၼ်ၶေႃႈဢၢင်ႈမၼ်းၵူၺ်း- ဝႃႈၼႆ။