ၼႂ်းတိုဝ်ႉတၢင်းၶွပ်ႈႁွတ်ႈ ဝၼ်းၵိူတ်ႇ ၾႃႉၼၢင်းၸဝ်ႈႁေႃၶမ်း ၸိုင်ႈထႆး ႁိုဝ်
ဝၼ်းမႄႈၵႅၼ်ႇၸိုင်ႈထႆး လႄႈ ပီႈၼွင်ႉတႆး 50-60 ၵေႃႉ ၶဝ်ႈႁူမ်ႈၸုတ်ႇတဵၼ်းၸႆး
ယွၼ်းပွလ်းမွပ်ႈတၢၼ်း ၾႃႉၼၢင်းၸဝ်ႈႁေႃၶမ်း တီႈပၢင်ႇၵၢင်ၶူင်ႇၽၵ်းတူတႃႈပႄး။
ဝၼ်းတီႈ 12/08/2014 ၼႆႉ သမႃးၶူမ်းပၢႆးပၺ်ၺႃလႄႈၾိင်ႈငႄႈတႆး လႆႈဢွၼ်ႁူဝ်
ပီႈၼွင်ႉတႆး ၼႂ်းၵဵင်းမႆႇ ၸိူင်ႉၼင်ႇ ၵေႃလိၵ်ႈလၢႆးၾိင်ႈလႄႈတႆး ၵဵင်းမႆႇ
ၸုမ်းႁႅင်းၵၢၼ်ၽွမ်ႉႁူမ်ႈ ၸုမ်းဝတ်ႉသူၼ်ၻွၵ်ႇ ဝတ်ႉပႃႇပဝ်ႈ
ၸုမ်းၶိူဝ်းႁိူၼ်း ၶုၼ်သၢမ်လေႃး
လႄႈပီႈၼွင်ႉတႆးၸိူဝ်းႁဵတ်းၵၢၼ်ယူႇၼႂ်းၵဵင်းမႆႇ
ဢွၼ်ၵၼ်ၶဝ်ႈႁူမ်ႈၸုတ်ႇတဵၼ်းၸႆး ၼွပ်ႇၼွပ်ႈ ၼွမ်း မွပ်ႈ တၢၼ်းယိုၼ်ႈပွလ်း
ၽွၼ်းမင်းၵလ(မူင်းၶူလ်း) ၼႂ်းတိုဝ်ႉတၢင်းတဝ်ႈႁွတ်ႈ
ၶွပ်ႈထိုင်ဝၼ်းၵိူတ်ႇၾႃႉၼၢင်းၸဝ်ႈ ႁေႃၶမ်းၸိုင်ႈထႆး ထူၼ်ႈၵမ်းၼႆႉ
တီႈၽၵ်းတူတႃႈပႄး။
ၽွင်းယၢမ်းႁူဝ်ၶမ်း 6
မူင်းၶိုင်ႈၸုမ်းပီႈၼွင်ႉတႆးႁဝ်းႁွတ်ႈထိုင်တီႈပၢင်ႇၵၢင်ၶူင်ႇၽၵ်းတူတႃႈပႄး၊
မိူဝ်ႈထိုင်ၽွင်းယၢမ်း မွၵ်ႈ 7 မူင်း ႁူဝ်ၶမ်ႈ တူဝ်တႅၼ်း
ၸုမ်းတူင်ႇဝူင်းၵူၼ်း ၶႃႈႁၢပ်ႇၵၢၼ်ၶုၼ် ပွၵ်ႉ / ဢိူင်ႇ / ဝၢၼ်ႈ ၶဝ်
ၶိုၼ်ႈဝၢင်း ၽုမ်ႉတုမ်ႇမူဝ် ၼိူဝ်ႁၢၼ်ႉၶဵင်ႇ
တေႃႇၼႃႈႁုၼ်ႇႁၢင်ႈၾႃႉၼၢင်းၸဝ်ႈႁေႃၶမ်း ၸို်င်ႈထႆး။ တၢင်းၾၢႆႇပီႈၼွင်ႉတႆး
ႁဝ်းသမ်ႉ ၸၢႆးသႅၼ်မွင်း တင်း ၼွင်ႉမူၺ်ၽွင် ပဵၼ်တူဝ်တႅၼ်း
သမႃးၶူမ်းပၢႆးပၺ်ၺႃလႄႈၾိင်ႈငႄႈတႆး ၶိုၼ်ႈၼွပ်ႇမွပ်ႈဝၢင်း တမ်း
ၽုမ်ႉတုမ်ႇမူဝ်တေႃႇၼႃႈႁုၼ်ႇႁၢင်ႈၾႃႉၼၢင်းၸဝ်ႈ
ၼွင်ႉယိင်းသမ်ႉပဵၼ်ၽူႈၵေႃႉယိပ်း ပၢႆႉၸိုဝ်ႈ သမႃးၶူမ်း။ ဝၢႆးသေၼၼ်ႉၵေႃႈ
ၶႃႈႁၢပ်ႇၵၢၼ်ၶုၼ် ၾၢႆႇၸႄႈဝဵင်းၵဵင်းမႆႇတၢၼ်းမွပ်ႈၽုမ်ႉတုမ်ႇမူဝ်။
လိုၼ်းသုတ်းၼႃယၵ(ၼၢႆးယူၵ်ႉ) ၽူႈၵွၼ်းၸႄႈဝဵင်းၵဵင်းမႆႇ ထတ်းသၼႆး ပူရၼုပၵွၼ်း
ၶိုၼ်ႈၶဵင်ႇတေႃႇၼႃႈႁုၼ်ႇႁၢင်ႈ ၸဝ်ႈၼၢင်း ႁေႃၶမ်းသေ
ၵူမ်ႈၵွမ်းၼွမ်းႁူဝ်ၵႃႇရဝ ၵၢဝ်ႇပိုတ်ႇလၢတ်ႈၶေႃႈၵႂၢမ်း
ယိုတ်းမၼ်ႈၵိူဝ်းယမ်ၼပ်ႉထိုဝ်မုၼ်ၵုၼ်း
ၾႃႉၼၢင်းၸဝ်ႈႁေႃၶမ်းဢၼ်ၵိုမ်းမၼ်ႈပၵ်းၾင်ယူႇၼႂ်းႁူဝ်ၸႂ်ထႆးတင်းၸၢတ်ႈၵူႈမိုဝ်ႉၵူႈၶၢဝ်းသေ
ၸုတ်ႇတႆႈတဵၼ်းၸႆး တင်းၽဵင်းၵႂၢမ်း ယုၵ်ႉယွင်ႈငဝ်းမုၼ်ၸဝ်ႈၽႅၼ်ႇလိၼ်။
ဝၢႆးသေၼၼ်ႉၵေႃႈ ပီႈၼွင်ႉတႆး
ဢၼ်သမႃးၶူမ်းပၢႆးပၺ်ၺႃလႄႈၾိင်ႈငႄႈတႆးဢွၼ်ႁူဝ်လၢႆမူႇလၢႆၸုမ်း လႆႈထၢႆႇႁၢင်ႈ
ၵိုၵ်း ၼႃယၵ (ၼၢႆးယူၵ်ႉ) ၽူႈၵွၼ်းၸႄႈဝဵင်းၵဵင်းမႆႇ ထတ်းသၼႆး
ပူရၼုပၵွၼ်းပဵၼ်တီႈတွင်းမၢႆ လွင်ႈဝႃႈ ပီႈၼွင်ႉတႆး ၸိူဝ်းပဵၼ်
ၸႃႇတိၵိုၵ်းမိူင်းၵေႃႈလီ ပုတိ ဢၼ်မႃးပၵ်းလၵ်းပၵ်းထၢၼ်
ႁူမ်ႈတင်းၸိူဝ်းမႃးႁဵတ်းၵၢၼ်ၼႂ်းမိူင်းထႆးၵေႃႈ လႆႈၼႄထိုင်
လွင်ႈတၢင်းၵၢၼ်ၼပ်ႉထိုဝ်ၼိူဝ်ၾႃႉၼၢင်းၸဝ်ႈႁေႃၶမ်းႄလႈၸႂ်မႅတ်ႇပႅင်းငိူၼ်ႈငဝ်ႈပိုၼ်းၸိူဝ်ႉ
သၢႆလိူတ်ႈ ၵူၼ်းၶိူဝ်းတႆး တူဝ်ႈလုမ်ႈၾႃႉ ဢၼ်တိုၵ်ႉမီးႁေႃၶမ်းယူႇယၢမ်းလဵဝ်
ၵိုတ်းပီႈၼွင်ႉထႆးၸိူဝ်ႉႁိူဝ်သၢႆၶိူဝ်းတႆးၼၼ်ႉၵူၺ်း။
