ပူၼ်ႉမႃးမိူဝ်ႈဝၼ်းတီႈ 11/08/2014 ၽွင်းတႅၼ်းသၽႃးၵူၼ်းမိူင်း (သၽႃးလၢင်ႈ) ၶဵတ်ႇပိုၼ်ႉတီႈ/လိူၵ်ႈတင်ႈ မၢႆ 2  ၵုၼ်ႁဵင်၊ ၼၢင်းဝႃႇၼု လူင်းပိုၼ်ႉတီႈ ႁူပ်ႉထူပ်းပီႈၼွင်ႉၵူၼ်းဝၢၼ်ႈၵူၼ်းမိူင်း တီႈႁိူၼ်းလုင်းယွတ်ႈတႆး ပွၵ်ႉ 4 ဝဵင်းပၢင်လူင်။ ဢုပ်ႇၵုမ် လွင်ႈၵၢၼ်ပူၵ်းပွင်ဝၢၼ်ႈဢိူင်ႇလႄႈ ၼမ်ႉၵတ်ႉၵူၼ်းၼုမ်ႇ၊ ပိူဝ်ႈတႃႇ ပူၵ်းပွင်ပိုၼ်ႉတီႈ တူင်ႇတၢင်ႇ ဝၢၼ်ႈဢိူင်ႇ ႁႂ်ႈပေႃးၶိုၼ်ႈယႂ်ႇမႂ်ႇသုင်။

ပီႈၼွင်ႉၵူၼ်းမိူင်း ၸိူဝ်းၶဝ်ႈႁူမ်ႈပၢင်ႁူပ်ႉထူပ်းဢုပ်ႇၵုမ်ၼႆႉ ၼွၵ်ႈၼိူဝ်သေပီႈၼွင်ႉပၢင်လူင် ၸုမ်းဝူင်းမဵတ်ႉတႃႇယဝ်ႉ ယင်းမီးထႅင်ႈပီႈၼွင်ႉလွႆလႅမ် လၢႆးၶႃႈ မိူင်းၵိုင် ၸိူဝ်ႈၼႆႉထႅင်ႈ။

ပိူဝ်ႈတႃႇပူၵ်းပွင်ဝၢၼ်ႈဢိူင်ႇ ၶိုၼ်ႈယႂ်ႇမႂ်ႇသုင်ၼႆႉ ဝၼ်းတီႈ 13/08/2014 (မိူဝ်ႈၼႆႉ) ၼၢင်းဝႃႇၼု တေပွၵ်ႈမိူဝ်းတီႈ ၵုၼ်ႁဵင်-ၵႃလီႉသေ တေႁူပ်ႉထူပ်းပီႈၼွင်ႉၼႂ်းၵုၼ်ႁဵင်-ၵႃလီႉ ထႅင်ႈ။ ၼွၵ်ႈသေၼၼ်ႉ တေလူလွမ်ထတ်းတူၺ်း လွင်ႈၵၢၼ်ငၢၼ်းဢၼ်ႁဵတ်းသၢင်ႈဝႆႉၸိူဝ်းၼၼ်ႉ မီးလွင်ႈၶိုပ်ႈၼႃႈၶိုၼ်ႈသင်ႉၸိူင်ႉႁိုဝ် ၸိူဝ်းၼႆႉ။

ၸၢႆးၸၢမ်ၶမ်း ဢၼ်ပဵၼ်ၽူႈၵမ်ၵပ်း ၸုမ်းဝူင်းမဵတ်ႉတႃႇ ၵေႃႈလၢတ်ႈ တီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- ယူႇတီႈႁဝ်းၶႃႈသေ ၶႂ်ႈသၢၼ်မိုဝ်းၶဝ်ႈဢွၵ်ႇ ၶႂ်ႈထွမ်ႇသဵင်ႁူဝ်ၸႂ်ၵူၼ်းဝၢၼ်ႈၵူၼ်းမိူင်း ပိူဝ်ႈတႃႇပူၵ်းပွင်ၼႂ်းပိုၼ်ႉတီႈ ႁႂ်ႈပေႃးၶိုၼ်ႈသင်ႉ ၶိုၼ်ႈသုင်။ ၶႂ်ႈထွမ်ႇသဵင်ၵူၼ်းဝၢၼ်ႈၵူၼ်းမိူင်း ဢၼ်လႆႈႁူပ်ႉတၢင်းယၢပ်ႇၽိုတ်း ယွၼ်ႉၺႃး ၽေးသိုၵ်းသိူဝ်ၸိူဝ်း ၼၼ်ႉပႃး- ဝႃႈၼႆ။