လၵ်းသဝ်ႁိၼ်ပၢင်လူင် မၢႆတွင်းဝၼ်းၸိုင်ႈမိူင်းႁူမ်ႈတုမ် 1947 တီႈပၢင်လူင်၊ ဢၼ်ၶိုၼ်းမႄးပူၵ်းပွင်ၵေႃႇၵုမ်း သဵင်ႈငိုၼ်းႁူဝ်ႁဵင်သႅၼ် ပိုတ်ႇပၢင်ၵႅဝ်ႈမိူဝ်ႈၼႆႉ။

ဝၼ်းတီႈ 12/02/2014 ဢၼ်ပဵၼ် ဝၼ်းၸိုင်ႈမိူင်းႁူမ်ႈတုမ် ၶွပ်ႈၶူပ်ႇ 67 ပီတဵမ်မိူဝ်ႈၼႆႉ လၵ်းသဝ်ႁိၼ် ပၢင်လူင် လၵ်းထၢၼ် တီႈမၢႆတွင်း ဝၼ်းၸိုင်ႈမိူင်းႁူမ်ႈတုမ် 1947 တီႈပၢင်လူင်၊ ဢၼ်ၶိုၼ်းမႄးပူၵ်းပွင် ၵေႃႇၵုမ်း/ယုၵ်ႉတူဝ်မႃး ၶၢဝ်းယၢမ်း 3 လိူၼ်သေ သဵင်ႈငိုၼ်းၵႂႃႇႁူဝ်ႁဵင်သႅၼ်ၼၼ်ႉၵေႃႈ ပိုတ်ႇပၢင်ၵႅဝ်ႈ ဝၼ်းမိူဝ်ႈၼႆႉ။ လွင်ႈၼႆႉ ပိူဝ်ႈတႃႇ ၶုၵ်းထူပ်းယွင်ႈယေႃးၸိုင်ႈမိူင်းႁူမ်ႈတုမ် ၶွပ်ႈၶူပ်ႇ 67 ပီ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ လႆႈႁူႉဝႃႈဝၼ်းတီႈ 12/02/14 ယၢမ်းၵၢင်ၼႂ် 10 မူင်း၊ ၸွမ်ၽွင်းလူင်မိူင်းတႆး ၸဝ်ႈဢွင်ႇမျၢတ်ႈ မႃးၶဝ်ႈႁူမ်ႈပိုတ်ႇပၢင်၊ တေမႃးဢၢၼ်ႇၼႄပႃး လိၵ်ႈသူင်ႇထိုင်ၸွမ်ၸိုင်ႈတဵင်းၸဵင်ႇ ၾၢၵ်ႇတွၼ်ႈမႃးတႃႇ ဝၼ်းၸိုင်ႈမိူင်းႁူမ်ႈတုမ် ဢၼ်ၸတ်းတီႈပၢင်လူင်- ၼႆယဝ်ႉ။

ပိူဝ်ႈတႃႇပိုတ်ႇပၢင်ပွႆး ႁပ်ႉပၢင်ပွႆးၸိူဝ်းၼႆႉ ၶၢၼ်းႁွင်ႉဢဝ်ၵူၼ်းၼုမ်ႇ ၼႂ်းၵေႃလိၵ်ႈလၢႆးလႄႈၾိင်ႈငႄႈတႆး 100 ၵေႃႉ၊ ၼႂ်းၵေႃလိၵ်ႈလၢႆးလႄႈၾိင်ႈငႄႈပဢူဝ်း 100 ၵေႃႉ၊ ႁႂ်ႈသႂ်ႇသိူဝ်ႈၶူဝ်းၸၢဝ်းၶိူဝ်းၽႂ်မၼ်းသေ မႃးၶဝ်ႈႁူမ်ႈပၢင်ပိုတ်ႇ ပၢင်ၵႅဝ်ႈ- ၼႆယဝ်ႉ။

ၵၢၼ်တူင်ႉၼိုင်မိူဝ်ႈပိုတ်ႇပၢင်ၵႅဝ်ႈၼႆႉ ႁွင်ႉဢဝ်လုၵ်ႈဢွၼ်ႇႁူင်းႁဵၼ်းမွၵ်ႈ 400 ၵေႃႉ မႃးၵႃႈၼႄတၢင်းၵႃႈ “ပပႂႃး” သေတႄႇ ပိုတ်ႇပၢင်ၵႅဝ်ႈ၊ ၼႄ ပႃးၸဵမ်တၢင်းၵႃႈ ၸၢဝ်းၶိူဝ်းၸိူဝ်းၼႆႉ- ၼႆယဝ်ႉ။

လၵ်းသဝ်ႁိၼ်ပၢင်လူင်ၼႆႉ လူင်ပွင်ၸိုင်ႈၼေႇပျီႇတေႃႇလၢတ်ႈဝႆႉဝႃႈ တေဢွၵ်ႇပၼ်ငိုၼ်း ပိူဝ်ႈတႃႇ ပူၵ်းပွင်ၶိုၼ်းတႃႇငိုၼ်း 7,000 သႅၼ်၊ ၵူၺ်းၵႃႈ တေႃႇထိုင်ယၢမ်းလဵဝ်ၵေႃႈ ဢမ်ႇသူင်ႇသင်မႃး၊ လူင်ပွင်ၸိုင်ႈ မိူင်းတႆးလႄႈ ၾၢႆႇလိူမ်ႈလႆႇမိူင်းတႆး လႆႈဢဝ်ငိုၼ်းၸႅၵ်ႈသေႁဵတ်းသၢင်ႈၶိုင်ပွင်မႃး၊ တင်းမူတ်းသဵင်ႈငိုၼ်း 1,400 သႅၼ်- ၼႆယဝ်ႉ။

လိူၼ်ၾႅပ်ႊၿိဝ်ႊရီႊ 7 ဝၼ်း ဢၼ်မီးၸိုဝ်ႈလၢႆၸိုဝ်ႈဝႃႈ ဝၼ်းမိူင်းတႆး၊ ဝၼ်းၶိူဝ်းတႆး ႁိုဝ် ဝၼ်းၸိူဝ်ႉၸၢတ်ႈ ၸိုင်ႈတႆး (Shan National Day)ၼႆႉ တႄႇတင်ႈမီးမႃးမိူဝ်ႈ ဝၼ်းထိ 07/02/1947 ။ လိူၼ်ၾႅပ်ႊၿိဝ်ႊရီႊ 11 ဝၼ်း 1947 ၽူႈၼမ်းၸိုင်ႈတႆး တင်း ၸဝ်ႈၾႃႉ လႆႈၸ်ႂၵၼ်တႅပ်းတတ်းလိူၵ်ႈဢဝ် ဝၼ်းထိ 07/02/1947 ပဵၼ်ဝၼ်းၸၢတ်ႈ၊ တုင်းၸၢတ်ႈ လိူင်ၶဵဝ်လႅင် ၼႂ်းၵၢင်ဝူင်းလိူၼ်ၶၢဝ်၊ ၽဵင်းၵႂၢမ်းၸၢတ်ႈ “ၶိူဝ်းႁဝ်းၶိူဝ်းရႃႇၸႃႇ” 3 ပိူင် လႄႈ ႁူဝ်ပဝ်ႈလူင်ၶွင်ႊသီႊၸိုင်ႈတႆး ၸဝ်ႈၾႃႉလူင်ၼမ်ႉသၼ်ႇ ၸဝ်ႈၶုၼ်ပၢၼ်းၸိင်ႇ (ၸၢဝ်းၶိူဝ်းပလွင်ႈ) လႆႈပိုၼ်ၽၢဝ်ႇ လွင်ႈမၵ်းမၼ်ႈ 3 ပိူင်ၼၼ်ႉ ပဵၼ်ၶိူင်ႈပိူင်မဵတ်ႇမၢႆ တၢင်တူဝ်ၵူၼ်းမိူင်းတႆး ၵူႈၸၢဝ်းၶိူဝ်း။

လိူၼ်ၾႅပ်ႊၿိဝ်ႊရီႊ 12 ဝၼ်း ပီ 1947 ပဵၼ်ဝၼ်းၽူႈဢွၼ်ႁူဝ်မိူင်းတႆး (ၸဝ်ႈၾႃႉလႄႈတူဝ်တႅၼ်းၵူၼ်းမိူင်း) တင်းၽူႈဢွၼ်ႁူဝ်မၢၼ်ႈ (ၸွမ်သိုၵ်းဢွင်ႇသၢၼ်း) ႁူမ်ႈၵၼ်လူင်းလၢႆးမိုဝ်းလိၵ်ႈႁူမ်ႈမၢႆပၢင်လူင်သေ ႁူမ်ႈၵၼ်ၵေႃႇတင်ႈ ၸိုင်ႈမိူင်းႁူမ်ႈတုမ် (မိူင်းမၢၼ်ႈ) မႃးတေႃႇထိုင်ဝၼ်းမိူဝ်ႈၼႆႉ။ မိူဝ်ႈလဵဝ် ၶွပ်ႈၶူပ်ႇ 67 ပီတဵမ်ယဝ်ႉ။ လိူၼ်ၾႅပ်ႉၿိဝ်ႊရီႊ 7 ဝၼ်း ဢၼ်ပဵၼ်ဝၼ်းၸိူဝ်ႉၸၢတ်ႈၸိုင်ႈတႆးၵေႃႈ ပဵၼ်သဵၼ်ႈတၢင်း ယၢင်ႈၸူး ၾႅပ်ႉၿိဝ်ႊရီႊ 12 ဝၼ်း၊ ဢၼ်ပဵၼ်ဝၼ်း ၸိုင်ႈမိူင်းႁူမ်ႈတုမ်ၼႆႉ။