ၽူႈယႂ်ႇၵူၼ်းလူင်ဝႃႉ ၼႂ်းၼႃႈလိၼ်သိုၵ်း 171 ၶဝ်ႈႁူမ်ႈ ပၼ်ႁႅင်း ပၢင်ပွႆးႁပ်ႉတွၼ်ႈပီမႂ်ႇတႆး 2107 ဢၼ်ၸတ်း တီႈငဝ်ႈၸိုင်ႈလွႆတႆးလႅင်း ၶွင်ၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA) မိူဝ်ႈ 13-14/12/12 ။

ၸဝ်ႈလၢဝ်မိူင်း တူဝ်တႅၼ်းဝႃႉ UWSA မွၵ်ႇလၢတ်ႈၵႂၢမ်းဝႃႈ- ၼႂ်းၸိုင်ႈမိူင်းႁူမ်ႈတုမ်မၢၼ်ႈ မိူင်းႁဝ်း ၵေႃႈငဝ်းလၢႆးလႅၵ်ႈလၢႆႈမႃး လွႆးလွႆးယဝ်ႉ၊ ႁဝ်းၶႃႈၵေႃႈတေလႆႈၽွမ်ႉႁူမ်ႈၵၼ်၊ တေလႆႈပဵၼ်ၼမ်ႉၼိုင်ႈ ၸႂ်လဵဝ်ၵၼ်ယဝ်ႉ၊ ဢဝ်ၼႆႉၵႂႃႇၼႃႈၸၢဝ်းၶိူဝ်းတႆး လႄႈၸၢဝ်းၶိူဝ်းဝႃႉ တေဢမ်ႇမီးလွင်ႈၸႂ်ႉႁႅင်းသိုၵ်း တိုၵ်းတေႃးၵၼ်၊ မိူဝ်းၼႃႈၼႆႉ တေမီးလွင်ႈႁူမ်ႈမိုဝ်းၵၼ်ၾၢႆႇၽုၵ်ႇသွမ်ႈ၊ ပၢႆးယူႇလီလႄႈႁဵတ်းၵၢၼ်ၵႃႉ ႁူမ်ႈၵၼ်။ ၼွၵ်ႈသေၼၼ်ႉ ႁႂ်ႈမႅတ်ႇပႅင်းပႂ်ႉပႃးၾိင်ႈငႄႈႁိတ်ႈႁွႆးၸၢဝ်းၶိူဝ်းၽႂ်မၼ်း ယႃႇႁႂ်ႈၸူမ်ႁၢႆ ၵႂႃႇ- ဝႃႈၼႆ။

ႁူဝ်ပဝ်ႈ RCSS/SSA ၸဝ်ႈယွတ်ႈသိုၵ်းမွၵ်ႇလၢတ်ႈတီႈၽူႈသိုဝ်ႇၶၢဝ်ႇထႆးဝႃႈ- ပီၼႆႉပဵၼ်ပီထိ 2 ဢၼ်ၵေႃႇသၢင်ႈလွင်ႈငမ်း ယဵၼ်ၼႂ်းၸိုင်ႈတႆးမႃး၊ တေသၢင်ႈလွင်ႈႁူမ်ႈမိုဝ်းၵူႈၸၢဝ်းၶိူဝ်း ၼႂ်းၸိုင်ႈမိူင်း ႁူမ်ႈတုမ်မၢၼ်ႈသေ ၵႄႈလိတ်ႈပၼ်ႁႃၵၢၼ်မိူင်း ၸွမ်းလွၵ်းလၢႆးၻီႊမွၵ်းၶရေႊသီႊ လႄႈတေၽဵဝ်ႈ မူၺ်ႉ ယႃႈမဝ်းၵမ်ႁႂ်ႈမူတ်းႁၢႆၵႂႃႇၼႂ်းၽႅၼ်ႇလိၼ်ၸိုင်ႈတႆး- ဝႃႈၼႆ။

ပၢင်ပွႆးပီမႂ်ႇတႆး လွႆတႆးလႅင်းပီ 2012 ၼႆႉ ၼွၵ်ႈၼိူဝ်သေ ၸဝ်ႈၼႃႈတီႈတူဝ်တႅၼ်း ၼႃႈလိၼ်သိုၵ်း 171 ၶွင်တပ်ႉသိုၵ်း မိူင်းဝႃႉၽွမ်ႉႁူမ်ႈ (UWSA) ၶဝ်ႈႁူမ်ႈယဝ်ႉ တူဝ်တႅၼ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၵေႃႈၶဝ်ႈ ႁူမ်ႈပၼ်ႁႅင်း- သိုဝ်ႇထႆး thaipbs.co.th ဢွၵ်ႇၵႂႃႇ ၼင်ႇၼႆ။  ယူႇတီႈပီႈၼွင်ႉဝႃႉသေ ယင်းမႃးၼႄပႃးတၢင်းၵႃႈၾိင်ႈထုင်း ၸၢဝ်းၶိူဝ်းဝႃႉ- လႆႈႁူႉၼင်ႇ ၼႆ။