ၽူႈထတ်းထွင်လိၵ်ႈ (Editor) ၽူႈတွႆႇႁွၵ်ႈတွပ်ႇၶေႃႈ ထၢမ်ဢၼ်ၵမ်ႈၽွင်ႈၶႂ်ႈႁူႉ လႄႈ လၢတ်ႈၼႄ တၢင်းႁၼ် ထိုင် ၼိူဝ်ၸုမ်းၵေႃၵမ်ၵၢၼ်ၶပ်းၶိုင်လွင်ႈငမ်းယဵၼ် ဢၼ်ၶွတ်ႇၽွတ်ႈမႃးမႂ်ႇ ပႃးၸွမ်ၸိုင်ႈတဵင်းၸဵင်ႇ တင်းၵႅမ် 2 ၸၢႆးမွၵ်ႇၶမ်း ဝႃႈ -မၢၼ်ႈၶႂ်ႈႁႂ်ႈဝၢၼ်ႈမိူင်းၵတ်းယဵၼ် ၼႂ်းဝႆးဝႆးၼႆႉ။

ဝၼ်းထိ 08/05/12 (မိူဝ်ႈဝႃး) DVB, BBC ဢွၵ်ႇၶၢဝ်ႇဝႃႈ- မိူဝ်ႈဝၼ်းထိ 03/05/12 တၢင်းၼေႇပျီႇတေႃႇ လႆႈၶိုၼ်းမႄး ၵေႃႇတင်ႈၶွမ်ႊမတီႊ/ၸုမ်းဢုပ်ႇဢူဝ်းလွင်ႈငမ်းယဵၼ်မႂ်ႇ၊ ႁူဝ်ပဝ်ႈပဵၼ်ၸၢႆးမွၵ်ႇၶမ်း၊ ၵႅမ်မီး 3 ၵေႃႉ- 1.ဢူးဢွင်ႇမိၼ်း၊ 2.ဢူးတဵင်းၸေႃႇ၊ 3.ၸွမ်သိုၵ်းလူင်ၸူဝ်းဝိၼ်း (ၽူႈၵွၼ်းသိုၵ်းတိူင်းသိုၵ်းၵဝ်ႇပွတ်းႁွင်ႇ) ၸိူဝ်းၼႆႉ။

ထႅင်ႈၾၢႆႇၼိုင်ႈ မိၸ်ႉၸိမဢွၵ်ႇၶၢဝ်ႇဝႃႈ- ၶွမ်ႊမတီႊဢုပ်ႇဢူဝ်းလွင်ႈငမ်းယဵၼ်ၼႆႉ ၶွတ်ႇၽွတ်ႈဝႆႉ 2 ၸၼ်ႉ။ ၸၼ်ႉၶွမ်ႊမတီႊ ၵေႃႇသၢင်ႈလွင်ႈငမ်းယဵၼ် လႄႈၶွမ်ႊမတီႊၾၢႆႇႁဵတ်းၵၢၼ်။ ၶွမ်ႊမတီႊဢုပ်ႇဢူဝ်း လွင်ႈငမ်းယဵၼ်ၼၼ်ႉ ၸွမ်ၸိုင်ႈ တဵင်းၸဵင်ႇ ပဵၼ်ႁူဝ်ပဝ်ႈႁူမ်ႈပႃးတူႇရသူၺ်ႇမၢၼ်း၊ ၽွင်းလူင်ၾၢႆႇၼႂ်းမိူင်း၊ ဢူးမိၼ်းၸေႃႇ ၽူႈၸွႆႈၵၢၼ်တီႈလုမ်းၸွမ်ၸိုင်ႈ၊ တင်းမူတ်းမီး 12 ၵေႃႉ။ ၾၢႆႇႁဵတ်းၵၢၼ်သမ်ႉ ၸၢႆးမွၵ်ႇၶမ်း ပဵၼ်ႁူဝ်ပဝ်ႈ၊ ႁူမ်ႈပႃးၸွမ်ၽွင်းလူင်ၸႄႈမိူင်းလႄႈ ၽူႈၵွၼ်း တိူင်းၶဝ် ႁူမ်ႈ တင်းမူတ်း 52 ၵေႃႉ၊ ဢူးဢွင်ႇတွင်း တႄႉ ဢမ်ႇပႃးယဝ်ႉ- ဝႃႈၼႆ။

ယွၼ်ႉၵမ်ႈၽွင်ႈတွင်ႈထၢမ်မႃးဝႃႈ- ႁၼ်ထိုင်ၸိူင်ႉႁိုဝ်၊ တေၵႂႃႇလၢႆးလႂ်ၸိူဝ်းၼႆႉလႄႈ ယူႇတီႈၽူႈထတ်းထွင်လိၵ်ႈ (Editor) ၸုမ်းၶၢဝ်ႇၽူႈတွႆႇႁွၵ်ႈတွပ်ႇၵႄႈဝႃႈ- ပေႃးတူၵ်ႇၶိူဝ်းလွင်ႈၼႆႉ ၵဝ်ၶႃႈၶုၵ်းၸ်ႂလႆႈၵႂၢမ်းဢၼ်ၸဝ်ႈႁၢၼ် (ယွင်ႁူၺ်ႈ) လၢတ်ႈ တင်းဢၼ်ၸဝ်ႈယွတ်ႈသိုၵ်းလၢတ်ႈ။

မိူဝ်ႈဢူးဢွင်ႇမိၼ်း မႃးထူပ်းၵၼ်တင်းၵၼ်တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 5 ၸုမ်း (တႆး RCSS/SSA ၊ ယၢင်းၽိူၵ်ႇ KNU ၊ ယၢင်းလႅင် KNPP ၊ ၶၢင် KIO ၊ ၶျၢင်း CNF) တီႈၵဵင်းႁၢႆး မိူဝ်ႈဝၼ်းထိ 19-20/11/2011 ၼၼ်ႉ ဢိင်ၼိူဝ်ဢူးဢွင်ႇမိၼ်း လၢတ်ႈဝႃႈ- ၶၼ်ႈတွၼ်ႈလွင်ႈငမ်းယဵၼ် ဢၼ်ႁဝ်းတေလႆႈႁဵတ်းသၢင်ႈၵႂႃႇမီး 3 ၶၼ်ႈတွၼ်ႈ- 1.ၵိုတ်းယိုဝ်းၵၼ်၊ 2.ၵၢၼ်ပူၵ်း ပွင်၊ 3.ဢုပ်ႇဢူဝ်းၵၢၼ်မိူင်းတေႃႇပေႃးထိုင်ၸတ်းပၢင်ၵုမ်လူင် မိူၼ်ၼင်ႇပၢင်လူင်။ ၵပ်းၵၢႆႇလွင်ႈၼႆႉ ၸဝ်ႈႁၢၼ်ထၢမ်ဝႃႈ- တေႃႇပေႃးၸတ်းလႆႈပၢင်ၵုမ်လူင်မိူၼ်ၸိူင်ႉၼင်ႇ ပၢင်လူင်ၼႆႉ တေလႆႈႁၢင်ႈႁႅၼ်းၸတ်းႁဵတ်းပၢင်ၵုမ်ဢွၼ်ႇပၢင်ၵုမ်းဢိတ်း 12 လိူၼ်တေႃႇထိုင်18 လိူၼ် ၸိူဝ်း ၼႆႉယူႇ။ ဢူးဢွင်ႇမိၼ်းၶိုၼ်းတွပ်ႇဝႃႈ- ၵဝ်ၶႃႈၶႂ်ႈႁႂ်ႈမၼ်းဝႆးလိူဝ်ၼၼ်ႉ- ဝႃႈၼႆ။

ႁူဝ်ၼႃႈၽူႈတွႆႇႁွၵ်ႈထတ်းသၢင်ဝႃႈ- ဢၼ်ဢူးဢွင်ႇမိၼ်းလၢတ်ႈၼႆႉ ငၢမ်ႇမႅၼ်ႈၸွမ်းၽႅၼ်ၵၢၼ်ဢၼ် လူင်ပွင်ၸိုင်ႈ တဵင်းၸဵင်ႇဝၢင်းဝႆႉ၊ ပီ 2013 ၸတ်းၵဵမ်ႊသ် (AEA games) ဢၼ်ၸိုင်ႈမိူင်းၼႂ်းဢေႊသျိူဝ်ႊ ၸဵင်ႇၸၢၼ်းဝၼ်းဢွၵ်ႇ လၢႆလၢႆၸိုင်ႈမိူင်းတေမႃးလဵၼ်ႈၶႅင်ႇ၊ ပေႃးဝၢၼ်ႈမိူင်းဢမ်ႇၵတ်းယဵၼ် ၸတ်းဢမ်ႇလႆႈ။ ပေႃးႁဵတ်းပွႆးၵၢၼ်လဵၼ်ႈႁႅင်းလႆႈ ၸိူင်ႉၼႆ မၼ်းၼႄၾၢင်ႁၢင်ႈဝႃႈ မိူင်းၵတ်းယဵၼ်၊ ဢမ်ႇမီးၽေးၶဵၼ်သင်၊ ၵွပ်ႈၼႆ ၶဝ်ၵေႃႈၼႅတ်ႈၶိုင်ပွင်ႁဵတ်းသၢင်ႈ။

ၼႂ်းပီ 2014 သမ်ႉ မိူင်းမၢၼ်ႈတေၶိုၼ်ႈပဵၼ်ႁူဝ်ပဝ်ႈဢႃႊသျႅၼ်ႊ (Asian) ၊ ၼႆႉၵေႃႈပေႃးဝၢၼ်ႈမိူင်း ဢမ်ႇၵတ်းယဵၼ် ႁဵတ်းဢမ်ႇလႆႈ၊ ထႅင်ႈၾၢႆႇၼိုင်ႈ ၽႅၼ်ၵၢၼ်လူင်ၽဵဝ်ႈမူၺ်ႉယႃႈမဝ်းၵမ် 15 ပီၵေႃႈသုတ်းသဵင်ႈ 2014 ၼင်ႇၵဝ်ႇ၊ ၸိူဝ်းၼႆႉပေႃး ဝၢၼ်ႈမိူင်းဢမ်ႇမီးလွင်ႈငမ်းယဵၼ် ဢမ်ႇၸၢင်ႈႁဵတ်း။ ပီ 2015 သမ်ႉတေမီး ၵၢၼ်လိူၵ်ႈတင်ႈပတ်းပိုၼ်ႉတင်းမိူင်း၊ ၵွပ်ႈၼၼ် လႄႈ လွင်ႈငမ်းယဵၼ်ၼႆႉ တၵ်းလႆႈႁိပ်ႈၼႅတ်ႈၶိုင်ပွင် ႁဵတ်းသၢင်ႈတႄႉတႄႉ၊ တေႁဵတ်းၵႂႃႇထိူင်းထိူဝ်ႉ ဢမ်ႇပဵၼ်။

တေႃႇထိုင်မိူဝ်ႈလဵဝ် ဢၼ်ၸုမ်းၶပ်းၶိုင်လွင်ႈငမ်းယဵၼ် 2 ၸုမ်း၊ ဢူးဢွင်ႇတွင်း လႄႈ ဢူးဢွင်ႇမိၼ်း ဢွၼ်ႁူဝ်ႁဵတ်းသၢင်ႈ မႃးၼႆႉ ၸုမ်းဢူးဢွင်ႇတွင်း ဢုပ်ႇဢူဝ်းတူၵ်းလူင်းလွင်ႈငမ်းယဵၼ်ယဝ်ႉတူဝ်ႈၵႂႃႇ 7 ၸုမ်း၊ ဢူးဢွင်ႇ မိၼ်း 5 ၸုမ်း။ ဢူးဢွင်ႇမိၼ်း ယဝ်ႉတူဝ်ႈၵႂႃႇ 1.တႆး RCSS/SSA ၊ 2.ၶျၢင်း CNF ၊ 3.ယၢင်းၽိူၵ်ႇ KNU ၊ 4.မွၼ်း NMSP ၊ 5.ယၢင်းလႅင် KNPP ၸိူဝ်းၼႆႉ။ ဢူးဢွင်ႇတွင်း 1.ၸုမ်းဝႃႉ UWSA ၊ 2.ၸုမ်းမိူင်းလႃး NDAA-ESS ၊ 3.ယၢင်းပုတ်ႉထ DKBA ၊ 4.ၶွမ်ႊမတီႊလွင်ႈငမ်းယဵၼ်ယၢင်း KPC ၊ 5.တႆး SSPP/SSA ၊ 6.ရၶႅင်ႇ ALP ၊ 7.ၸၢဝ်းၶိူဝ်းၼႃႇၵ NSCN ၸိူဝ်းၼႆႉ၊ ၵူၺ်းၵႃႈ ဢၼ်ဢူးဢွင်ႇတွင်းဢွၼ်ႁူဝ်ဢုပ်ႇဢူဝ်းသေ ဢမ်ႇပဵၼ်ၵၢၼ် မႃးသမ်ႉ မီးၸုမ်းၶၢင် KIO ၊ မၢၼ်ႈယိုဝ်းၵၼ်တင်းၶၢင် တေႃႇထိုင်ဝၼ်းမိူဝ်ႈၼႆႉ (တင်ႈတႄႇ 9/6/11-9/5/12) ၶွပ်ႈတဵမ် 11 လိူၼ် ပၢင်တိုၵ်းယင်းပႆႇယဝ်ႉလႆႈ။ ၵွပ်ႈၼၼ် ဢၼ်ၶွတ်ႇၽွတ်ႈၸုမ်းၶိုင်ပွင် လွင်ႈငမ်းယဵၼ်မႂ်ႇ သေ ဢမ်ႇႁၼ်ပႃးၸိုဝ်ႈဢူးဢွင်ႇတွင်းၼၼ်ႉ ၸၢင်ႈၵဵဝ်ႇလွင်ႈၼႆႉ။

ဢူးဢွင်ႇတွင်းတႄႉဝႃႈ ဢမ်ႇပႃးၵွပ်ႈဢႃႇယုတူဝ်ၵဝ်ႇ လႄႈပၢႆးယူႇလီၼႃႈႁိူၼ်း VOA ႁၢႆးငၢၼ်း မိူဝ်ႈ 30/4/12 လွင်ႈတေ လႅၵ်ႈလၢႆႈၼႆႉ ဢွၵ်ႇၶၢဝ်ႇၸဵမ်မိူဝ်ႈ 29/4/12 ။

ၼွၵ်ႈသေၸုမ်းၶၢင် KIA ယဝ်ႉ ၸုမ်းတႆး SSA တင်း 2 ၸုမ်းၵေႃႈ ပဵၵ်ႉသမ်ႉဢုပ်ႇဢူဝ်းတူၵ်းလူင်း ၵိုတ်းယိုဝ်းၵၼ်မႃးလႆႈလၢႆ လိူၼ်ယဝ်ႉၵေႃႈ တေႃႇထိုင်မိူဝ်ႈလဵဝ် ယင်းတိုၵ်ႉမီးၵၢၼ်ၶဵင်ႈၶႅင်ၵၢၼ်သိုၵ်းတေႃႇၵၼ်ယူႇ၊ ဝၢႆးၵိုတ်းယိုဝ်းၵၼ်မႃးၼႆႉ လႆႈပဵၼ် ပၢင်တိုၵ်းၵၼ်တင်းသိုၵ်းမၢၼ်ႈၼပ်ႉႁူဝ်သိပ်းပွၵ်ႈ။ မိူၼ်ၼင်ႇ SSA လွႆတႆးလႅင်း ဢၢၼ်းၵႂႃႇတမ်းဝၢင်းတီႈယူႇသေ ဢဝ်ၵူၼ်းပၢႆႈၽေး / ၵူၼ်းႁၢမ်းႁႅၵ်းတီႈယူႇၼႂ်းမိူင်း (IDP) ဢၼ်ပၢႆႈမႃးယူႇသဝ်းၸွမ်းလႅၼ်လိၼ်မွၵ်ႈ 8 ႁဵင် ၵႂႃႇယူႇပွတ်း မိူင်းထႃး-ႁူဝ်မိူင်း ၸွမ်းၼင်ႇၶေႃႈတူၵ်းလူင်း လွင်ႈငမ်းယဵၼ် ၵၼ်တင်းလူင်ပွင်ၸိုင်ႈတဵင်းၸဵင်ႇၼၼ်ႉ တေႃႇထိုင်မိူဝ်ႈလဵဝ် ၾၢႆႇတပ်ႉသိုၵ်းမၢၼ်ႈယင်းပႆႇပၼ် လွင်ႈႁူမ်ႈမိုဝ်း၊ ၵွပ်ႈၼၼ် ၵိုတ်းယိုဝ်းၵၼ်မႃးလႆႈ 5 လိူၼ်ယဝ်ႉၵေႃႈ ၵူၼ်းပၢႆႈၽေးၸိူဝ်း တေၶၢႆႉ ၵႂႃႇယူႇ တိုၵ်ႉၶမ်ဝႆႉႁၢၼ်ႉတေႃႇမိူဝ်ႈလဵဝ်၊ မိူဝ်ႈလဵဝ်သမ်ႉထိုင်မႃးၶၢဝ်းႁိုဝ်ႉၶၢဝ်းၾူၼ်တူၵ်းလႄႈ ပိူဝ်ႈတႃႇ ၶၢႆႉၵႂႃႇၼၼ်ႉ ၶႅၼ်းယၢပ်ႇယၢၵ်ႈၵိၼ်းမႃး။

မိူဝ်ႈႁူပ်ႉထူပ်းၵၼ်တင်းၽူႈတွႆႇႁွၵ်ႈ ဝၼ်းထိ 29/04/12 ၼၼ်ႉ ၸဝ်ႈယွတ်ႈသိုၵ်းလၢတ်ႈဝႃႈ- ပေႃးဝႃႈ ဢုပ်ႇဢူဝ်းထႅင်ႈ ၵမ်းၼိုင်ႈထုၵ်ႇလႆႈပႃးတပ်ႉသိုၵ်း၊ ပေႃးဝႃႈဢမ်ႇပႃးၾၢႆႇသိုၵ်းၶဝ် ႁဝ်းႁဵတ်းသင်ၵေႃႈတေထူပ်း တၢင်းယၢပ်ႇၽိုတ်ႇ၊ ၵၢၼ်ႁဝ်းၵေႃႈ တေဢမ်ႇယဝ်ႉလႆႈငၢႆႈငၢႆႈ- ဝႃႈၼႆ။

ၵၢၼ်ဢုပ်ႇဢူဝ်းလႆႈၸႂ်တူၵ်းလူင်းၵိုတ်းယိုဝ်းၵႃႈပူၼ်ႉမႃး ၸၼ်ႉၸႄႈမိူင်းၵေႃႈလီ၊ ၸၼ်ႉၸိုင်ႈမိူင်းႁူမ်ႈတုမ်ၵေႃႈလီ ၾၢႆႇတပ်ႉသိုၵ်းၶဝ်ႈပႃးယူႇ၊ ၵူၺ်းၵႃႈ မိူၼ်ၼင်ႇမႃးႁပ်ႉထွမ်ႇငိၼ်းၸွမ်းႁူႉၸွမ်းလၢႆလၢႆၵူၺ်း။

မီးၵႂၢမ်းထၢမ်ထႅင်ႈဝႃႈ- ပေႃးပႃးၾၢႆႇသိုၵ်းမႃးၼႂ်းၵၢၼ်ဢုပ်ႇဢူဝ်း ၸွင်ႇၵၢၼ်ဢုပ်ႇဢူဝ်းသမ်ႉတေယဝ်ႉငၢႆႈငၢႆႈတႄႉယူႇႁႃႉ။ လွင်ႈၼႆႉ ၽူႈမီးၸၼ်ႉၼႂ်းတပ်ႉ SSA ၵေႃႉၼိုင်ႈလၢတ်ႈဝႃႈ- ပၢင်ဢုပ်ႇဢူဝ်းၵၼ်ၼႆႉ ပေႃးပႃးၾၢႆႇသိုၵ်းၸၢင်ႈတူၵ်းလူင်းၵၼ် ယၢပ်ႇယူႇ၊ ၵွပ်ႈဝႃႈတေမီးၵၢၼ်သဵတ်ႈၵႃႈသဵတ်ႈႁူဝ်ၵၼ် ထဵင်ၵၼ်ၵႂႃႇ ထဵင်ၵၼ်မႃး။ ၵူၺ်းၵႃႈ ပေႃးဝႃႈလႆႈၸႂ်တႅပ်းတတ်း ယဝ်ႉတႄႉ ပိူဝ်ႈတႃႇႁဵတ်းၵၢၼ်ဢွၵ်ႇၼမ်ႉဢွၵ်ႇတူဝ်ၼၼ်ႉ သမ်ႉတေ ငၢႆႈ။ ၾၢႆႇၼိုင်ႈၵေႃႈ ၶေႃႈလႆႈၸႂ်ၵၼ်ဢၼ်ႁဝ်းတူၵ်း လူင်းၵၼ်ၵႃႈပူၼ်ႉမႃးၼႆႉ ပဵၼ်ၶေႃႈလႆႈၸႂ် တၢမ်လၵ်းၵၢၼ် (In principle) ၵူၺ်း၊ မၼ်းဢမ်ႇၸႂ်ႈဢၼ်ႁဵတ်းဢွၵ်ႇၼမ်ႉ ဢွၵ်ႇတူဝ် (In execution) - ဝႃႈၼႆ။

ၸွမ်းၼင်ႇၵမ်ႈၽွင်ႈထၢမ်ဝႃႈ- ႁၼ်ထိုင်ဢၼ်ပႃးၸၢႆးမွၵ်ႇၶမ်းၸိူင်ႉႁိုဝ်ၼၼ်ႉ ႁူဝ်ၼႃႈၽူႈတွႆႇႁွၵ်ႈတွပ်ႇဝႃႈ- ပႃးၸၢႆးမွၵ်ႇ ၶမ်းၼႆႉ မၼ်းၵေႃႈလမ်ႇလွင်ႈယူႇ၊ မိူၼ်ၼင်ႇမီးသၼၢပ်ႈၶႃးတႃးၼႃႈ၊ မၼ်းပဵၼ်ၶိူင်ႈႁဵတ်းႁၢင်ႈ၊ ဢမ်ႇမီးမၼ်းၸဝ်ႈၵေႃႈ လႆႈယူႇ၊ ၵူၺ်းၵႃႈပိူၼ်ႈတေဢမ်ႇပေႃးသူၼ်ၸႂ်၊ ပေႃးမီးမၼ်းတေႁၢင်ႈလီသေ ႁဵတ်းႁႂ်ႈ ပိူၼ်ႈၵေႃႈသူၼ်ၸႂ်၊ ပႃးလီသေ ဢမ်ႇပႃး- ဝႃႈၼႆ။

ထၢမ်ထႅင်ႈဝႃႈ- ႁၼ်ထိုင်ၼိူဝ်ဢၼ်ၾၢႆႇပီႈၼွင်ႉၶၢင်ဝႃႈ ၶႂ်ႈဢုပ်ႇဢူဝ်းတူၵ်းလူင်းၵၢၼ်မိူင်းဢွၼ်တၢင်းၼၼ်ႉၸိူင်ႉႁိုဝ်ၼႆ ၼၼ်ႉ ဢႄႊၻီႊတိူဝ်ႊၽူႈတွႆႇႁွၵ်ႈတွပ်ႇဝႃႈ- ၸၢင်ႈပဵၼ်ယွၼ်ႉ ၾၢႆႇပီႈၼွင်ႉၶၢင်ၶဝ် မီးတူဝ်ထူပ်းတႃႁၼ်လွင်ႈႁဝ်းၵၼ်ႉ လီတေႃႇပိူၼ်ႈ၊ ပိူၼ်ႈသမ်ႉမႃးႁဵတ်းႁၢႆႉတီႈႁဝ်းတိၵ်းတိၵ်း၊ လႆႈႁၼ်ဝႃႈ ၾၢႆႇသိုၵ်းမၢၼ်ႈ ယင်းတိုၵ်ႉႁၢင်ႈသိုၵ်းတေႃႇၶၢင်တေႃႇ မိူဝ်ႈလဵဝ်၊ လွင်ႈၸိူဝ်းၼႆႉ ၸၢင်ႈပဵၼ်လွင်ႈတၢင်းႁဵတ်းႁႂ်ႈ ၶၢင်ၸဵပ်းၸႂ်ဝႆႉသေ ၸင်ႇဝႃႈၶႂ်ႈဢုပ်ႇဢူဝ်းတူၵ်းလူင်းၵၢၼ်မိူင်း ဢွၼ်တၢင်း- ဝႃႈၼႆ။

ၵူၺ်းၵႃႈ ပေႃးဝူၼ်ႉလီလီၼႆ ၵဵဝ်ႇၵပ်းလွင်ႈဢုပ်ႇဢူဝ်းၵၢၼ်မိူင်းၼႆႉ ၸႄႈမိူင်းလဵဝ်ဢုပ်ႇၵေႃႈဢမ်ႇယဝ်ႉလႆႈ၊ ၸုမ်းလဵဝ်ဢုပ်ႇ ၵေႃႈဢမ်ႇယဝ်ႉလႆႈ၊ ႁဝ်းတၵ်းလႆႈႁူမ်ႈၵၼ်လၢႆၸႄႈမိူင်း လၢႆတိူင်းသေဢုပ်ႇၸင်ႇတေယဝ်ႉလႆႈ၊ လၢႆလၢႆၾၢႆႇၸိူဝ်းဢၼ်ထတ်း သၢင်မိူင်းမၢၼ်ႈယူႇ ၵေႃႈဝႃႈၸိူင်ႉၼႆ- ၼႆယဝ်ႉ။