“ငဵင်းၽၢဝ်ႊတေႊသျိၼ်ႊ (Foundation) ဢွၼ်ႁူဝ်ၼမ်း ၼႃႈ ႁဵတ်းပၢင်သွၼ် ႁိုဝ် ပၢင်ဢုပ်ႇဢူဝ်းလႅၵ်ႈလၢႆႈ ၵဵဝ်ႇၵပ်း ၵၢၼ်မိူင်း၊ ယူႇတီႈၽွင်းတႅၼ်းသၽႃး 3 သၽႃး လၢႆပႃႇတီႇ ၶဝ်ႈႁူမ်ႈ တီႈဝဵင်းဢေးတႃႇယႃႇ ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း။

ၵဵဝ်ႇၵပ်းလွင်ႈၼႆႉ ၽွင်းတႅၼ်းဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ ဢၼ်ၵႂႃႇၶဝ်ႈႁူမ်ႈပၢင်လႅၵ်ႈလၢႆႈလၢတ်ႈဝႃႈ- ပၢင်ၵုမ်ဢုပ်ႇဢူဝ်း လႅၵ်ႈလၢႆႈၼႆႉ ႁဵတ်းတီႈဝဵင်းမႂ်ႇဢေးတႃႇယႃႇ၊ ပၢင်မၢၵ်ႇၵွပ်ႉၾ် တီႈႁူင်းႁႅမ်းဢေႇတိၼ်ႇ တင်ႈတႄႇဝၼ်းၸၼ်မႃး၊ တေယဝ်ႉဝၼ်းထိ 11/05/12 မိူဝ်ႈၽုၵ်ႈ။ ဢၼ်မႃးၶဝ်ႈႁူမ်ႈမီးပႃႇတီႇသၢင်ႇသီႈ (USDP) ၊ ပႃႇတီႇသိူဝ်ၽိူၵ်ႇ SNDP , NDF , NUP ၸိူဝ်းၼႆႉ- ဝႃႈၼႆ။

ၵေႃႉဢၼ်ဢွၼ်ႁူဝ်မႃးပၼ်တၢင်းႁူႉတၢင်းႁၼ်ၵဵဝ်ႇၵပ်းၵၢၼ်မိူင်း ပဵၼ်ၽူႈၵမ်ၵပ်းၶူင်းၵၢၼ် တေႃႇယိၼ်ႇယိၼ်ႇဝိၼ်း၊ ၽွင်းတႅၼ်းၸိူဝ်းၶဝ်ႈႁူမ်ႈၼၼ်ႉ ပႃႇတီႇသိူဝ်ၽိူၵ်ႇ 10 ၵေႃႉ၊ သၢင်ႇသီႈ 2 ၵေႃႉ၊ ၽွင်းတႅၼ်း NUP , NDF တင်းၽွင်းတႅၼ်း သုၼ်ႇတူဝ် ဢၼ်ၶဝ်ႈၶေႉၵၢၼ်လိူၵ်ႈတင်ႈႁင်းၵူၺ်း (ဢမ်ႇၸႂ်ႈပႃႇတီႇ)။ လိူဝ်သေၼၼ်ႉ ၽွင်းတႅၼ်းပွတ်းတႃႈၵုင်ႈ၊ ၼႂ်းတိူင်းပၵူဝ်း/သူၺ်ႇၵူႇ/ၵျွတ်ႉၵျီး ၸိူဝ်းၼႆႉမႃးၶဝ်ႈႁူမ်ႈတင်းမူတ်း 24 ၵေႃႉ- ၽွင်းတႅၼ်းဢမ်ႇၶႂ်ႈဢွၵ်ႇၸိုဝ်ႈၼၼ်ႉ သိုပ်ႇလၢတ်ႈထႅင်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၽွင်းတႅၼ်းၵူၼ်းမိူင်း ၸၢႆးတိၼ်ႇ(လၢႆးၶႃႈ) သၽႃးလၢင်ႈ လၢတ်ႈဝႃႈ- ပၢင်သွၼ်ပၢင်လႅၵ်ႈလၢႆႈ ၵဵဝ်ႇၵပ်းၵၢၼ်မိူင်းၸိူင်ႉၼႆ ၵိုင်ႇလီမီးယူႇ၊ ဢမ်ႇၸႂ်ႈပဵၼ်ပၢင်သွၼ်ၼင်ႇၵဝ်ႇ၊ ပဵၼ်ပၢင်လႅၵ်ႈလၢႆႈ တၢင်းႁူႉတၢင်းႁၼ်ၵၼ်၊ ႁႂ်ႈပဵၼ်ၵၢၼ်ယုၵ်ႉယွင်ႈၼမ်ႉၵတ်ႉ (Capacity building) ၊ ဢၼ်ၵဵဝ်ႇၵပ်းၸိုင်ႈမိူင်း မိူၼ်ၼင်ႇဝၢၼ်ႈပိူၼ်ႈမိူင်းပိူၼ်ႈ ႁဵတ်းႁိုဝ်ၶိုၼ်ႈယႂ်ႇမႂ်ႇသုင်မႃး၊ ၸိူဝ်းမီးတူဝ်ထူပ်းတႃႁၼ်ၼွၵ်ႈမိူင်းၵေႃႈ မႃးပိၼ်ႇပႆႇလႅၵ်ႈလၢႆႈၵၼ်၊ ပိူင်လူင်တႄႉ ပိူဝ်ႈတႃႇ ၸွႆႈထႅမ်တူင်ႇဝူင်းၵူၼ်း (Civil society) - ဝႃႈၼႆ။

ဝၼ်းထိ 09/05/12 (မိူဝ်ႈဝႃး) ၽွင်းတႅၼ်းၶဝ်လႄႈၵူၼ်းၸိူဝ်းၶဝ်ႈႁူမ်ႈၶဝ်ၵႂႃႇလဵပ်ႈႁဵၼ်း ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ၊ ၵႂႃႇဝႆႈၽြႃးၽွင်ႇတေႃႇဢူးသေ ဝၢႆးဝၼ်းၵေႃႈ ပွၵ်ႈမႃးၶိုၼ်းတီႈႁူင်းႁႅမ်းဢေႇတိၼ်ႇ တီႈဝဵင်းမႂ်ႇဢေးတႃႇယႃႇသေ ႁူပ်ႉထူပ်း ၽွင်းတၢင်ၼၢင်းယိင်း မီႊရၼ်ႊၼီႊ ဝိူဝ်ႊဝီႊရ် (Melanne Verveer) - ၸၢႆးတိၼ်ႇသိုပ်ႇလၢတ်ႈထႅင်ႈၼင်ႇၼႆ။

ငဵင်းၽၢဝ်ႊၻေႊသျိၼ်ႊ/Foundation) ၼႆႉ ၸၢဝ်းၶၢင် ၻွၵ်းတိူဝ်ႊသပွႆးၵျူၼ်ႊဢွၼ်ႁူဝ်ၶွတ်ႇၽွတ်ႈဝႆႉ၊ ငဝ်ႈလုမ်းပၵ်းဝႆႉ တီႈဝဵင်းတႃႈၵုင်ႈ။ ဢၼ်လၢႆးႁဵတ်းသၢင်ႈမိူၼ်ၼင်ႇ ငဵင်းၽၢဝ်ႊၻေႊသျိၼ်ႊၼႆႉ ယင်းမီးထႅင်ႈ မျၢၼ်ႇမႃႇဢီႊၵရႅတ်ႉ (Myanmar Egress) ထႅင်ႈၸုမ်းၼိုင်ႈ။