ၸၢႆးၼေႃႇၶမ်း ဢၼ်လၢႆၾၢႆႇၸိၼႄးဝႃႈ ပဵၼ်ၸဝ်ႈပေႃႈ ၵႄႇယႃႈပွတ်းတွၼ်ႈသၢမ်ၸဵင်ႇၶမ်း၊ ၵဵပ်းၵိၼ်ၶွၼ်ႇယႃႈ လႄႈၶွၼ်ႇႁိူဝ်းၶိုၼ်ႈလူင်းၼႂ်းမႄႈၼမ်ႉၶွင် ဢိၵ်ႇတင်း ၵဵဝ်ႇၶွင်ႈၵူၼ်းတၢႆ 13 ၵေႃႉ ၼႂ်းမႄႈၼမ်ႉၶွင် ဢၼ်ၺႃး တိၺွပ်း တိုၵ်ႉဝၢတ်ႇၸဵပ်းဝႆႉသေ မီးတီႈဝဵင်းၸၼ် မိူင်းလၢဝ်း။

လႅင်ႇၶၢဝ်ႇပႆႇယိုၼ်ယၼ်လႆႈ ပွင်ႇလၢတ်ႈမႃးဝႃႈ- ၸၢႆးၼေႃႇၶမ်း ဢၼ်ထုၵ်ႇတၢင်းၵၢၼ်လၢဝ်းတိလႆႈ တေႃႇထိုင်မိူဝ်ႈလဵဝ် တိုၵ်ႉဝၢတ်ႇၸဵပ်းဝႆႉသေမီးယူႇတီႈဝဵင်းလူင်ဝဵင်းၸၼ် မိူင်းလၢဝ်း။ လၢႆၾၢႆႇဝႃႈ မၼ်းၸၢႆးဢမ်ႇယူႇလီ ႁၢဝ်ႈႁႅင်းဝႆႉၵႃႈပူၼ်ႉမႃး ၼၼ်ႉ ပဵၼ်ယွၼ်ႉမၼ်းဝၢတ်ႇၸဵပ်းဝႆႉ။ မိူဝ်ႈလဵဝ် ၸဝ်ႈၼႃႈတီႈၶႄႇၶဝ်ၵေႃႈ မႃးၽႅဝ် မိူင်းလၢဝ်း- ဝႃႈၼႆ။

ၸၢႆးၼေႃႇၶမ်း မီးၶၻီး/ဢမုဝႆႉ ၼႂ်းမိူင်းလၢဝ်း 7 ၶၻီႊ၊ မိူင်းမၢၼ်ႈမီး 15 ၊ ၶႄႇမီး 29 ၶၻီး။ ၵွပ်ႈမၼ်းမီးၶၻီး ဝႆႉၼႂ်းမိူင်း လၢဝ်းလႄႈဝၢႆးထုၵ်ႇတိၺွပ်းမႃးၼႆႉ မၢၼ်ႈယွၼ်းၵေႃႈလၢဝ်းပႆႇပၼ်၊ ထႆးယွၼ်းၵေႃႈပႆႇပၼ်၊ ၶႄႇယွၼ်း ၵေႃႈပႆႇပၼ်။

လွင်ႈၸၢႆးၼေႃႇၶမ်းထုၵ်ႇတိၺွပ်းၼႆႉ ႁၢၼ်ႉတေႃႇမိူဝ်ႈလဵဝ် ၺႃးတိတီႈလႂ်တႄႉတႄႉ ယင်းပႆႇႁူႉတႅတ်ႈတေႃး ၼႄႉၼွၼ်း။ ဢၼ်လၢတ်ႈလႆႈၼႆႉ ပဵၼ်ၼႂ်းၸႄႈတွၼ်ႈၿေႃႇၵႅဝ်ႈ၊ မိူင်းလၢဝ်းၵူၺ်း။ ၵမ်ႈၽွင်ႈဝႃႈ ၺႃးတိတီႈႁူၺ်ႈသၢႆး၊ ၵမ်ႈၽွင်ႈဝႃႈ ၺႃးတိတီႈႁိူၼ်းမေးၼၢင်းမၼ်း ဢၼ်ပဵၼ်ၸၢဝ်းတႆးလိုဝ်ႉတီႈမိူင်းမွမ်း၊ ၵမ်ႈၽွင်ႈၵေႃႈဝႃႈ ၺႃးတိတီႈတူၼ်ႈၽိုင်ႈ တီႈပၢင် လွင်း/ၶႃႊသီႊၼူဝ်ႊ ၶိင်ႊရူဝ်ႊမႅၼ်ႊ ဢၼ်ၸၢဝ်ႇဝူၺ်ႉ ပဵၼ်ၸဝ်ႈၶွင်။ သမ်ႉလႆႈႁူႉဝႃႈ ပဵၼ်ၶႄႇၵေႃႉဝၢင်းၽႅၼ်ႁူမ်ႈမိုဝ်းၵၼ် တင်းၸဝ်ႈၼႃႈတီႈလၢဝ်းဢွၼ်ၵၼ်ၵႂႃႇတိ။ ၵမ်ႈၽွင်ႈဝႃးၺႃးတိၼႂ်းၵၢင်မႄႈၼမ်ႉၶွင်ၽွင်းၶၢမ်ႈၼမ်ႉ လုၵ်ႉၾင်ႇမိူင်းတႆး ၵႂႃႇၾင်ႇလၢဝ်း လူၺ်ႈၵၼ်ၵူၼ်း 8 ၵေႃႉ။