ငဝ်းလၢႆးၵမ်းလိုၼ်းၵၢၼ်ၵိုတ်းတိုၵ်းဝူင်ႈၵၢင် RCSS/SSA တင်းလူင်ပွင်ၸိုင်ႈမၢၼ်ႈ၊ ၵဵဝ်ႇၵပ်းၶၵ်ႉတွၼ်ႈ ၵၢၼ်သိုၵ်း ၵၢၼ်မိူင်း မိူဝ်းၼႃႈ သွင်ၾၢႆႇသိုပ်ႇႁၢင်ႈႁႅၼ်းၸိူင်ႉႁိုဝ် - ၵေႃၶၢဝ်ႇၽူႈတွႆႇႁွၵ်ႈလႆႈတိုဝ်ႉတၢင်းတွင်ႈထၢမ်ၽူႈၶၢၼ်
ပၢၵ်ႇ RCSS/SSA ၸဝ်ႈႁၢၼ်လၢဝ်သႅင်မီးၸိူင်ႉၼင်ႇၼႆ။

ထၢမ်။ ။ မႂ်ႇသုင်ၶႃႈ ဢွၼ်တၢင်းသုတ်း ၶႂ်ႈယွၼ်းထၢမ်ဝႃႈ ဝၢႆးတူၵ်းလူင်းၵိုတ်းတိုၵ်း ဢုပ်ႇဢူဝ်းၵၼ်တင်းၸၼ်ႉၼေပျီႇ တေႃႇယဝ်ႉ ၶၵ်ႉတွၼ်ႈႁဵတ်းသၢင်ႈၵၢၼ်ငၢၼ်းထိုင်ၶၵ်ႉတွၼ်ႈလႂ်ယဝ်ႉၶႃႈ။
တွပ်ႇ။ ။ ႁဝ်းၶႃႈႁၢင်ႈႁႅၼ်းၵူၼ်းသိုၵ်းလူင်းၵႂႃႇပၵ်းတၢင်းမိူင်းတေႃႉ မိူင်းထႃး။ ၸွမ်းၼင်ႇလႆႈတူၵ်းလူင်းဢုပ်ႇၵုမ်ၵၼ်တင်း လူင်ပွင်ၸိုင်ႈသေ မိူဝ်ႈလဵဝ်ၾၢႆႇလူင်ပွင်ၸိုင်ႈၸတ်းၽူႈၵွၼ်းတိူင်းသိုၵ်းသၢမ်ၸဵင်ႇ မႃးပႂ်ႉၸတ်းပၼ်တႃႇတီႈတမ်းသဝ်းတပ်ႉ သိုၵ်းႁဝ်းၶႃႈ။

ထၢမ်။ ။ လႆႈႁၢင်ႈႁႅၼ်း ၶၼ်ႈတွၼ်ႈ မီးသင်ၽွင်ႈ။

တွပ်ႇ။ ။ ၶၼ်ႈတွၼ်ႈဢွၼ်တၢင်းတႄႉ ႁဝ်းၶႃႈတေဢုပ်ႇၵၼ်တင်းၽူႈၵွၼ်းတိုင်းသိုၵ်းသၢမ်ၸဵင်ႇၶမ်းသေ တမ်းဝၢင်းတီႈ ယူႇသဝ်းၵူၼ်းသိုၵ်းႁဝ်းၶႃႈၵွၼ်ႇ။ ၶၼ်ႈတွၼ်ႈထိသွင် တေႁဵတ်းတီႈယူႇသဝ်းၼႃႈႁိူၼ်းၵူၼ်းသိုၵ်းသေ ဢွၼ်လုၵ်ႈမေးၵူၼ်း သိုၵ်းၶဝ်ႈမႃးယူႇသဝ်း။ ၶၼ်ႈထိသၢမ်သမ်ႉ တေတမ်းဝၢင်းႁဵတ်းပၼ်တီႈယူႇသဝ်း ၵူၼ်းမိူင်းၸိူဝ်းပၢႆႈၽေးပႆႇမီးတီႈယူႇသဝ်း ၶဝ်။ ဝၢႆးၼၼ်ႉ တေသိုပ်ႇၵေႃႇသၢင်ႈ ပၢႆးမၢၵ်ႈမီး ၶွင်ၵူၼ်းမိူင်း ၵူၼ်းသိုၵ်း ၶပ်ႉတၢမ်းၵၼ်ၵႂႃႇ။

ထၢမ်။ ။ ငိၼ်းၶၢဝ်ႇဝႃႈ ၵႅမ်ၽူႈၵွၼ်းတိူင်းသိုၵ်း သၢမ်ၸဵင်ႇၵဵင်းတုင် ပႃးႁႅင်းသိုၵ်း မႃးပွတ်းမိူင်းထႃးၼမ်ဝႆႉ ဝႃႈၼႆဢေႃႈ ။ ၼႆႉပဵၼ်ၵွပ်ႈသင်ၶႃႈ။

တွပ်ႇ။ ။ တႃႇမႃးဝၢင်းသိုၵ်းလႄႈ တူဝ်ၶဝ်ၵေႃႈမႃးႁၢင်ႈႁႅၼ်းၸွမ်း။ သိုၵ်းဢၼ်မႃးၸွမ်းၵေႃႈ ပဵၼ်သိုၵ်းမႃးဢဝ်ႁူမ်ႇလူမ်ႈၽူႈ ၵွၼ်းတိူင်းသိုၵ်းၵူၺ်း။

ထၢမ်။ ။ တႃႇဢုပ်ႇဢူဝ်းၶၵ်ႉတွၼ်ႈတၢင်းၼႃႈမီးဝႆႉၸိူင်ႉႁိုဝ်။

တွပ်ႇ။ ။ ၶၼ်ႈတွၼ်ႈတၢင်းၼႃႈၼႆႉတႄႉ လူဝ်ႇမႄးဢုပ်ႇၵၼ်လွင်ႈတမ်းဝၢင်းတီႈယူႇသဝ်း ဢၼ်ပႆႇလူင်းတူဝ်/တႅၵ်ႇလႅင်း၊ ၸိူဝ်းဢၼ်မီးပၼ်ႁႃၵၼ်ၵေႃႈ ႁႂ်ႈပေႃးဢေႇၵႂႃႇ။ လွင်ႈတၢင်းထိသွင်ၵေႃႈ ၵဵဝ်ႇၵပ်းၵၢၼ် ပူၵ်းပွင်ၵူႈပိူင်ပိူင် မိူၼ်ၼင်ႇပူၵ်း ပွင်ၵူၼ်းမိူင်း ၵူၼ်းသိုၵ်းၸိူဝ်းၼႆႉ။ ထႅင်ႈၶေႃႈသမ်ႉ ၵဵဝ်ႇၵပ်းၵၢၼ်ၽဵဝ်ႈ မူၺ်ႉယႃႈမဝ်းၵမ် တေႁူမ်ႈမိုဝ်းဢုပ်ႇၵုမ်ၵၼ် တင်းလူင်ပွင်ၸိုင်ႈသေ ႁဵတ်းသၢင်ႈၵႂႃႇၸွမ်းၶၼ်ႈတွၼ်ႈ ဢၼ်ႁဝ်းၶႃႈလႆႈ တိုတ်ႉၸၼ်ဝႆႉ။ တႃႇဢုပ်ႇဢူဝ်းၵၢၼ်မိူင်းတႄႉ ပေႃးၵူႈၸၢဝ်းၶိူဝ်းတူဝ်ႈတၼ်းယဝ်ႉၵေႃႈ ၸွမ်း ၼင်ႇႁဝ်းၶႃႈ လၢတ်ႈၵၼ်ဝႆႉၼၼ်ႉ တေႁူမ်ႈၵၼ်ဢုပ်ႇဢူဝ်းၵႂႃႇ။

ထၢမ်။ ။ တႃႇဢုပ်ႇၵၢၼ်မိူင်းသမ်ႉ ႁဵတ်းသင်လႆႈပႂ်ႉၵူႈၸၢဝ်းၶိူဝ်းၶႃႈ။  

တွပ်ႇ။ ။ ၵွပ်ႈဝႃႈၵၢၼ်မိူင်းၼႆႉ ဢမ်ႇၸႂ်ႈၵၢၼ်မုၵ်ႉၸုမ်းႁဝ်းၶႃႈၵူၺ်း၊ ၵဵဝ်ႇၵပ်းၵူႈၸၢဝ်းၶိူဝ်းတင်း ၵူၼ်းမိူင်း ႁဝ်းၶႃႈတင်းသဵင်ႈ၊ တေဢဝ်ၶေႃႈလႆႈၸႂ်ၼႂ်း ၸၢဝ်းၶိူဝ်းႁဝ်းၶႃႈတင်းမူတ်း။ လိူဝ်ၼၼ်ႉ တေႁူမ်ႈၵၼ်တင်း ပႃႇတီႇၵၢၼ်မိူင်းသေ တေဢုပ်ႇဢူဝ်း ၸွမ်းၼင်ႇလူင်ပွင်ၸိုင်ႈၶဝ်ႁၢင်ႈႁႅၼ်းပၼ်ႁဝ်းၶႃႈ။ ယွၼ်ႉၼၼ် ႁဝ်း ၶႃႈလႆႈပႂ်ႉၵူႈၸၢဝ်းၶိူဝ်းတူဝ်ႈတၼ်းသေ ၵူၼ်းမိူင်း ပႃႇတီႇၵၢၼ်မိူင်း မုၵ်ႉၸုမ်းဢၼ်ၵဵဝ်ႇၶွင်ႈ ႁႂ်ႈပေႃးၸၢင်ႈ လႆႈဢုပ်ႇဢူဝ်းတူၵ်းလူင်းၵၼ် ၵွပ်ႈၼၼ်လႄႈ ႁဝ်းၶႃႈလႆႈပႂ်ႉၶဝ်။

ထၢမ်။ ။ ၼႂ်းတႆးၵေႃႈ မီးသွင်ပႃႇတီႇၵၢၼ်မိူင်း (သိူဝ်ၽိူၵ်ႇ၊ ႁူဝ်သိူဝ်) တပ်ႉသိုၵ်းၵေႃႈ တၢင်းႁွင်ႇ တၢင်းၸၢၼ်း - တႃႇတေႁူပ်ႉ ဢုပ်ႇၵၼ် ၽွမ်ႉႁူမ်ႈၵၼ်ၼၼ်ႉ မီးၽႅၼ်ၵၢၼ်ၸိူင်ႉႁိုဝ်။

တွပ်ႇ။ ။ မီးၽႅၼ်ၵၢၼ်တႃႇႁူပ်ႉထူပ်းဢုပ်ႇဢူဝ်းၵၼ်ယူႇၶႃႈ ၵူၺ်းၵႃႈတိုၵ်ႉပႂ်ႉၶၢဝ်းယၢမ်းယူႇ၊ ၵွပ်ႈဝႃႈတိုၵ်ႉႁႃႁဵတ်းၵၢၼ်မႃး ပဵၼ်ၶၵ်ႉပဵၼ်တွၼ်ႈၵူၺ်း။ ထႅင်ႈဢိတ်းၵေႃႈ တေမီးတိုဝ်ႉတၢင်းတႃႇႁူပ်ႉထူပ်းဢုပ်ႇဢူဝ်း တင်းၶဝ်ၸဝ်ႈယူႇၶႃႈ။

ထၢမ်။ ။ ပၢင်တိုၵ်းသိုၵ်းသိူဝ်ဢၼ်ၵႆႉပဵၼ်ယူႇတၢင်းပွတ်းႁွင်ႇ ပွတ်းၸၢၼ်းၸိူဝ်းၼႆႉ ငဝ်းလၢႆးၵမ်းလိုၼ်းသုတ်းပဵၼ်ၸိူင်ႉ ႁိုဝ်ၶႃႈ။

တွပ်ႇ။ ။ ပၢင်တိုၵ်းဢၼ်ပဵၼ်ၸွမ်းလႅၼ်လိၼ်၊ ပွတ်းႁွင်ႇၸိူဝ်းၼႆႉ ယဵၼ်ၵႂႃႇယဝ်ႉၶႃႈ။ ယွၼ်ႉဝႃႈ မိူဝ်ႈဝၼ်းထိ 27/02/12 ၵူၼ်းလူင်ႁဝ်းၶႃႈ လႄႈ ၵူၼ်းလူင်ၼႂ်းလူင်ပွင်ၸိုင်ႈလႆႈႁူပ်ႉထူပ်းဢုပ်ႇဢူဝ်းၵႄႈၶႆပၼ်ႁႃ ႁႂ်ႈပေႃးမူတ်းၵဵင်ႈ။ ယွၼ်ႉလႆႈ မႃးဢုပ်ႇဢူဝ်းၵၼ်လႄႈ ပၼ်ႁႃဢၼ်ၵိူတ်ႇၶိုၼ်ႈၼႂ်းၵၢၼ် သိုၵ်းၵေႃႈ ဢေႇလူင်းၵႂႃႇသေ ပၢင်တိုၵ်းၵေႃႈယဵၼ်ၵႂႃႇယဝ်ႉၶႃႈ။

ထၢမ်။ ။ ႁႂ်ႈပေႃးလႆႈဝၢင်းၸႂ်ၼႆႉ မီးလွင်ႈတူၵ်းလူင်းမၼ်ႈၵႅၼ်ႇၵၼ်ဝႆႉၸိူင်ႉႁိုဝ်ၶႃႈ။

တွပ်ႇ။ ။ ၸွမ်းၼင်ႇႁဝ်းၶႃႈလႆႈဢုပ်ႇဢူဝ်းၵၼ်ဝႆႉဝႃႈ ႁဝ်းၶႃႈၵိုတ်းသိုၵ်းၼႆႉ တပ်ႉႁဝ်းၶႃႈ ၵူးၼ်းႁဝ်းၶႃႈမီးတီႈလႂ် ၽႅဝ်တီႈ လႂ်ၵေႃႈ တေၵိုတ်းတီႈၼၼ်ႈ ယူႇသဝ်းတီႈၼၼ်ႈ။ ၸူဝ်ႈပႆႇမီးၶေႃႈတူၵ်းလူင်းမႂ်ႇၼႆႉ ၸွမ်း ၼင်ႇဢၼ်ၶႂ်ႈလႆႈၶႂ်ႈပဵၼ် ထုၵ်ႇ လႆႈထုၵ်ႇပဵၼ်သေ တေဢုပ်ႇဢူဝ်း ၵၼ်ၵႂႃႇပဵၼ်ၶၵ်ႉပဵၼ်တွၼ်ႈ။ ၶဝ်ၸဝ်ႈ ဝႃႈ ပၼ်ႁႃဢၼ်ၵိူတ်ႇၶိုၼ်ႈမႃးၼႆႉ ပဵၼ်လွင်ႈ ဢမ်ႇပွင်ႇၸႂ် ၶဝ်ႈၸႂ်ၽိတ်းၵၼ်ၵူၺ်း၊ ၼင်ႇႁိုဝ်တေ ဢမ်ႇ ၵိူတ်ႇၶိုၼ်ႈထႅင်ႈၼႆႉ ယူႇတီႈလူင်ပွင်ၸိုင်ႈတေဢဝ်ပုၼ်ႈၽွၼ်း ၵႂႃႇ။

ထၢမ်။ ။ တၢင်းႁူဝ်မိူင်းၼႆႉၶႃႈလူး တေႁၢင်ႈႁႅၼ်းၵႂႃႇမိူဝ်ႈလႂ်ၶႃႈ။

တွပ်ႇ။ ။ တၢင်းႁူဝ်မိူင်းၼႆႉ တေပႂ်ႉထွမ်ႇတၢင်းလူင်ပွင်ၸိုင်ႈၶဝ် တေႁဵတ်းၵႂႃႇၸွမ်းၼင်ႇဢၼ် ၶဝ်တူဝ်ႈတၼ်း ပေႃးပႆႇတူဝ်ႈ တၼ်းၵေႃႈ ႁဝ်းၶႃႈတေပႂ်ႉ။ ၶဝ်ႈၸဝ်ႈတူၵ်းလူင်းဝႆႉဝႃႈ မိူင်းထႃး တင်း ႁူဝ်မိူင်းၼၼ်ႉ ၶဝ်ၸဝ်ႈႁၼ်လီ တူၵ်းလူင်းမွပ်ႈပၼ် ၶွင်ႊသီႊဢဝ်ၶိုၼ်းၸိုင်ႈတႆး ႁဵတ်းပဵၼ်တီႈယူႇသဝ်းငဝ်းငုၼ်းၶွင်ႊသီႊ ဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆးၵႂႃႇမီးဝႆႉၼႂ်း ၶေႃႈတူၵ်းလူင်းဢၼ် ႁဝ်းၶႃႈလႆႈလူင်းလၢႆးမိုဝ်း မိူဝ်ႈပၢင်ၵုမ်ၸၼ်ႉမိူင်းႁူမ်ႈတုမ်ယဝ်ႉ။ ၵူၺ်းၵႃႈ တႃႇလူင်းၵႂႃႇတၢင်းႁူဝ် မိူင်းတႄႉ ပႂ်ႉႁႂ်ႈၶဝ်တူဝ်ႈတၼ်းၵွၼ်ႇ တေဢုပ်ႇဢူဝ်းၵၼ်ထႅင်ႈၵမ်းၼိုင်ႈ။

ထၢမ်။ ။ မိူင်းထႃးတင်း ႁူဝ်မိူင်းၼႆႉ ဢၼ်လႂ်တေပဵၼ်ငဝ်ႈငုၼ်းဢၼ်ယႂ်ႇၶႃႈ။

တွပ်ႇ။ ။ တေမီးငဝ်ႈငုၼ်းပၵ်းဝႆႉတၢင်းသွင်တီႈ  တေပဵၼ်တီႈယူႇသဝ်းၶွင်ၵူၼ်းသိုၵ်းလႄႈ ၵူၼ်းမိူင်းႁဝ်းၶႃႈ။

ထၢမ်။ ။ လိုၼ်းသုတ်း ၶၵ်ႉတွၼ်ႈတၢင်းၼႃႈ မီးၽႅၼ်ၵၢၼ်ၸိူင်ႉႁိုဝ်ၶႃႈ။

တွပ်ႇ။ ။ ဝၼ်းတေႁူပ်ႉဢုပ်ႇၵၼ်ထႅင်ႈတႄႉပႆႇလႆတႅပ်းတတ်း၊ ၶၵ်ႉတွၼ်ႈတႃႇသိုပ်ႇၵႂႃႇၶၢဝ်းတၢင်းၼႃႈတႄႉ တေႁဵတ်းၵႂႃႇ ၸွမ်းၶေႃႈတူၵ်းလူင်းလႆႈ ၸႂ်ၶွင်ႊသီႊဢဝ်ၶိုၼ်းၸိုင်ႈတႆးလႄႈ လူင်ပွင်ၸိုင်ႈမီးဝႆႉၼၼ်ႉၵႂႃႇ ၵမ်းၶၵ်ႉၵမ်းတွၼ်ႈႁႂ်ႈပေႃးၶႅမ်ႉ လႅပ်ႈလီမႃး။ ႁႂ်ႈဝၢၼ်ႈမိူင်းၵတ်းယဵၼ်။ ၵၢၼ်ၵတ်းယဵၼ် ဢၼ်လူင်ပွင်ၸိုင်ႈ ၶပ်းၶိုင်ယူႇၼၼ်ႉ ႁႂ်ႈပဵၼ်ၵႂႃႇၸွမ်း ၶၵ်ႉတွၼ်ႈ ၶၵ်ႉတွၼ်ႈလႂ်ၶၵ်ႉတွၼ်ႈၼၼ်ႉ။ ၾၢႆႇႁဝ်းၶႃႈတႄႉၼင်ႇ ၵူၼ်းမိူင်း ၶႂ်ႈလႆႈ ၶႂ်ႈပဵၼ် ႁဝ်းၶႃႈတေၶတ်းၸႂ်ႁဵတ်းသၢင်ႈၵႂႃႇ။ ပၼ်ႁႃ ဢၼ်ၵိူတ်ႇၶိုၼ်ႈၼၼ်ႉ ႁဝ်းၶႃႈတေ ၶတ်းၸႂ် ၵႄႈ လိတ်ႈမူၼ်ႉမႄးၵႂႃႇၶိုတ်းတၼ်းယူႇ။ ၵွပ်ႈၼၼ်လႄႈ မီးၸိူင်ႉႁိုဝ်ၵေႃႈ ႁႂ်ႈၵူၼ်းမိူင်းႁဝ်းၶႃႈ ၼႄႉၼမ်း/ပၼ်တၢင်းႁၼ်ထိုင်တီႈႁဝ်းၶႃႈ။ တူဝ်ထူပ်းၵေႃႈလီ တႅမ်ႈလိၵ်ႈၵေႃႈလီႁႂ်ႈၶဝ်ၸဝ်ႈပေႃး မီးတိုဝ်ႉတၢင်းၼၼ်ႉ ႁဝ်းၶႃႈတေပိုတ်ႇတိုဝ်ႉတၢင်းပၼ်။ ႁဝ်းၶႃႈတေသူင်ႇတူဝ်တႅၼ်း ၵႂႃႇႁူပ်ႉထူပ်းၵူၼ်းမိူင်း ထွမ်ႇသဵင်ၵူၼ်း မိူင်း၊ ပႃႇတီႇၵၢၼ်မိူင်းႁဝ်းၶႃႈၶႂ်ႈပဵၼ်သင်မီးသင်ၼၼ်ႉ ႁဝ်းၶႃႈတေထွမ်ႇသေ ဢဝ်မႃးႁဵတ်းသၢင်ႈၵႂႃႇ ၸွမ်းၼင်ႇၵၢင်ၸႂ် ၵူၼ်းမိူင်း။