ၸုမ်းၵူၼ်းၼုမ်ႇတႆး TYO ၸတ်းႁဵတ်းပၢင်ပိတ်ႉမၢၵ်ႇၼင် ပိူဝ်ႈႁႂ်ႈၵူၼ်းၼုမ်ႇတႆး မီးလွင်ႈၸမ်ၸႂ်ၵၼ် မိုတ်ႈၵိုဝ်း ၵၼ် မေႃၶဝ်ႈဢွၵ်ႇ ၸွႆႈထႅမ်ၵၼ်သေ ႁၢင်ႇယၢၼ်ယႃႈမဝ်းၵမ်။


ဝၼ်းတီႈ 20 – 24 /08/2017 ၸုမ်းၵူၼ်းၼုမ်ႇတႆး TYO ထုင်ႉမိူင်းၸီး ႁူမ်ႈၵၼ်ၸတ်းႁဵတ်း ပၢင်ပိတ်ႉမၢၵ်ႇ ၼင် တီႈပၢင်ႇပိတ်ႉမၢၵ်ႇၼင် မိူင်းၸီး ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ မီးၸုမ်းပိတ်ႉ မၢၵ်ႇၼင် ထုင်ႉမိူင်းၸီး 4 ၸုမ်းဢဵၼ်ႁႅင်းၸမ်ပၢၵ်ႇ မႃးၶႅင်ႇၵၼ် ၵူၼ်းပၼ်ႁႅင်းမီး 300 ပၢႆ။

ၸၢႆးထုၼ်းၽေႇ ႁူဝ်ၼႃႈၸုမ်းၵူၼ်းၼုမ်ႇတႆး မိူင်းၸီး လၢတ်ႈဝႃႈ  - “ ၵၢၼ်လဵၼ်ႈမၢၵ်ႇၼင်ၼႆႉ ပိူဝ်ႈႁႂ်ႈမီးလွင်ႈ ၸမ်ၸႂ်ၵၼ် ၊ ႁႂ်ႈမီးလွင်ႈၽွမ်ႉႁူမ်ႈၵၼ်၊ ႁႂ်ႈၵူၼ်းၼုမ်ႇၵႆယၢၼ်ယႃႈမဝ်းၵမ်သေႁႂ်ႈပၢႆးယူႇလီၶႅမ်ႉ ” ဝႃႈၼႆ။


ပၢင်ၶႅင်ႇပိတ်ႉမၢၵ်ႇၼင် ထုင်ႉမိူင်းၸီးဢၼ်ၸုမ်းၵူၼ်းၼုမ်ႇတႆး TYO ၸတ်းႁဵတ်းၼႆႉ ပဵၼ်ပွၵ်ႈဢွၼ်တၢင်း သုတ်း မိူဝ်းၼႃႈၵေႃႈတေၶတ်းၸႂ် ၸတ်းႁဵတ်းၵႂႃႇထႅင်ႈ ၼႆယဝ်ႉ။


ၸၢႆးထုၼ်းလႃႉ ႁူဝ်ပဝ်ႈၸုမ်းၵူၼ်းၼုမ်ႇ TYO လၢတ်ႈဝႃႈ - “ ၼင်ႇႁိုဝ်ၵၢၼ်ပိတ်ႉမၢၵ်ႇၼင်ၼႂ်းတႆး ပေႃးတေ ၶိုၼ်ႈယႂ်ႇ ၶိုတ်းလႆႈၸၼ်ႉလုမ်ႈၾႃႉၼၼ်ႉ ႁဝ်းၶႃႈၸတ်းႁဵတ်းပၢင်ၵုမ်သေ တေဝၢင်းၽႅၼ်ၵႂႃႇ ပေႃးလိူၼ်ၼႃႈ (လိူၼ်ထူၼ်ႈ9) ၼႆႉၵေႃႈ တေဢွၼ်ၵၼ်ၸတ်းပၢင်ၶႅင်ႇၵၼ်တီႈထုင်ႉမၢဝ်း ” ဝႃႈၼႆ။


ၸိူင်ႉၼၼ်ၼင်ႇၵဝ်ႇ မိူဝ်ႈဝၼ်းတီႈ 13-14/08/2017 ၸုမ်းၵူၼ်းၼုမ်ႇမိူင်းၶိူဝ်း ၸတ်းႁဵတ်းပၢင် ပိတ်ႉမၢၵ်ႇၼင် တီႈမိူင်းၶိူဝ်း ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ မီးၸုမ်း ပိတ်ႉမၢၵ်ႇၼင် ၼမ်ႉမၢဝ်းသႂ် ဢၼ်လုၵ်ႉတၢင်းထုင်ႉမၢဝ်းမႃး တင်း ၸုမ်းမိူင်းၶိူဝ်း ပိတ်ႉမၢၵ်ႇၼင် ၵၼ် တီႈပၢင်ပိတ်ႉမၢၵ်ႇၼင် မိူင်းၶိူဝ်း၊ ၵူၼ်းပၼ်ႁႅင်းမီးၼပ်ႉႁဵင်။ ယိူင်းဢၢၼ်း ႁႂ်ႈၵူၼ်းၼုမ်ႇၸမ်ၸႂ်ၵၼ်လႄႈ ၵႆယၢၼ်ယႃႈမဝ်းၵမ် ၼင်ႇၵဝ်ႇဝႃႈၼႆ။