ႁွင်ႈၵၢၼ်ၾၢႆႇၵၢၼ်ၵႃႉၶၢႆ (กระทรวงพาณิชย์ ) တေၸတ်းပၢင်ပွႆးတမ်းၼႄ/သိုဝ်ႉၶၢႆၶူဝ်းၵုၼ်ႇသိၼ်ၵႃႉလႄႈ ၸတ်းပႃးပၢင်ဢုပ်ႇၵုမ် တႃႇပူၵ်းပွင်ပၢႆးမၢၵ်ႈမီး လႅၼ်လိၼ် ၽူႈႁဵတ်းၵၢၼ်ပၢႆးမၢၵ်ႈမီးၼႂ်းမိူင်းတႆး ဢိၵ်ႇၽူႈမီးပုၼ်ႈၽွၼ်း လွင်ႈပူၵ်းပွင်ပၢႆးမၢၵ်ႈမီးတေၶဝ်ႈႁူမ်ႈ။


ႁွင်ႈၵၢၼ်ၶၢဝ်ႇထႆး Prachachat.net ပိုၼ်ၽၢဝ်ႇဝႃႈ- ပေႃးထိုင်မႃးဝၼ်းတီႈ 25-29 /08/2017 ၶၢဝ်းတၢင်း 5 ဝၼ်းၼႆႉ ႁွင်ႈၵၢၼ်ၾၢႆႇၵၢၼ်ၵႃႉၶၢႆ (กระทรวงพาณิชย์ ) ထႆး တေၸတ်းႁဵတ်းပၢင်ပွႆးၼႄ ၶူဝ်းၵုၼ်ႇ တီႈႁူင်းႁႅမ်း မႄႈၶူင် ၻဵၼ်ႊတႃႊ ၿူႊတိၵ်ႊ ၸႄႈဝဵင်း မႄႈသၢႆ ၸႄႈတွၼ်ႈ ၵဵင်းႁၢႆး လႅၼ် လိၼ်ထႆး - တႆး ။

ၼႂ်းပၢင်ပွႆးၼႆႉတေမီးၵုၼ်ႇတၢင်းၶၢႆဢၼ်လုၵ်ႉတီႈၸႄႈတွၼ်ႈပွတ်းႁွင်ႇမႃး မိူၼ်ၼင်ႇ ၵဵင်းႁၢႆး၊ ၽယဝ်ႊ၊ မိူင်းပေႇ ၊ မိူင်းၼၢၼ်ႊၸိူဝ်းၼႆႉလႄႈ ၶူဝ်းၵုၼ်ႇၼႂ်းမိူင်းထႆးဢိၵ်ႇ 300 ႁၢၼ်ႉတေ မႃးဝၢင်းၶၢႆၼႂ်းပၢင်ပွႆး ။


လိူဝ်ၼၼ်ႉ တေမီးၽူႈယႂ်ႇၵူၼ်းလူင်လႄႈ ၽူႈႁဵတ်းၵၢၼ်ပၢႆးမၢၵ်ႈမီး ၼႂ်းမိူင်းတႆး မိူၼ်ၼင်ႇတူၼ်ႈ တီး၊ ၵဵင်းတုင်၊ တႃႈၶီႈလဵၵ်း၊ မူႇၸေႊၸိူဝ်းၼႆႉ တေမႃးၶဝ်ႈႁူမ်ႈလႄႈ ဢုပ်ႇၵုမ်ၵၼ် တႃႇပူၵ်းပွင်ပၢႆး မၢၵ်ႈမီးၸဵမ်ၸိူဝ်းၼႆ။


ၼၢင်းၽၵၢႆႊမၢသ်ႊ ဝဵၼ်ႊရႃႊ ၵႅမ်ၽူႈၵွၼ်းၾၢႆႇၵၢၼ်ၵႃႉၶၢႆ လၢတ်ႈဝႃႈ- “ ပၢင်ပွႆးပွၵ်ႈၼႆႉလၢမ်းဝႆႉ ဝႃႈ တေမီးၵူၼ်းမႃးၼမ် ဢမ်ႇဝႃႈၽူႈႁဵတ်းၵၢၼ်ပၢႆးမၢၵ်ႈမီး တၢင်းမိူင်းတႆး၊ မိူင်းႁူမ်ႈတုမ်မၢၼ်ႈလႄႈ ပီႈၼွင်ႉၵူၼ်းထႆး၊ ယွၼ်ႉဝႃႈ ၽွင်းပၢင်ပွႆးၼႆႉ ဢမ်ႇလူဝ်ႇႁဵတ်းဝတ်းဝႂ်သင် ၽႂ်ၵေႃႈ တေၶၢမ်ႈလၢၼ်ႇ လႅၼ်လိၼ်ၵႂႃႇမႃးငၢႆႈလူမ်ၸႂ် ” ဝႃႈၼႆ ။


ပူၼ်ႉမႃး ဝၼ်းတီႈ 18/08/2017 ၸွမ်းႁူၺ်ႈႁၢဝ်းလွႆ ႁူဝ်ၼမ်ႉသၢႆ/ ၼမ်ႉမႄႈၶၢဝ် ၾူၼ်တူၵ်းႁၢဝ်ႈ ႁႅင်း ၼမ်ႉသၢႆ ၼွင်းလူၼ်ႉသွင်ၾင်ႇၼႂ်းၸႄႈ ဝဵင်းတႃႈၶီႈလဵၵ်းတင်း မႄႈသၢႆ ႁၢဝ်ႈႁႅင်းလႄႈ ႁဵတ်းႁႂ်ႈ ၶူဝ်းၶွင်လူႉသုမ်းၼမ် ၼင်ႇႁိုဝ်တေၸၢင်ႈလႆႈၶိုၼ်းပူၵ်းပွင်ပၢႆးမၢၵ်ႈမီးၼႆသေ ၸင်ႇ ၸတ်းပၢင်ပွႆးၼႆႉ ဝႃႈၼႆ။ Photo by Prachachat.net