တႆးဝဵင်းသီႇပေႃႉ ဢႃယု 33 ပီ ၵေႃႉၼိုင်ႈၵႂႃႇ ႁဵတ်းၵၢၼ်ၼႂ်းၸိုင်ႈထႆး ၺႃးၾႆးၾႃႉသျွတ်ႉတၢတ်ႈ လႆႈတတ်းပႅတ်ႈ မိုဝ်းတင်းသွင်ၶွၼ်ယဝ်ႉ ၾၢႆႇႁူင်းယႃဝႃႈ တေလႆႈတတ်းပႅတ်ႈ ၶႃၶွၼ်သၢႆႉမၼ်းၸၢႆးထႅင်ႈ ဝႃႈၼႆ။


ဝၼ်းတီႈ 25/08/2017 ဝၼ်းမိူဝ်ႈၼႆႉ မေႃယႃ တီႈႁူင်းယႃသူၼ်ၻွၵ်ႇ ဝဵင်းၵဵင်းမႆႇ လၢတ်ႈဝႃႈ ၸၢႆးလႃႉထုၼ်း တေလႆႈတတ်းပႅတ်ႈထႅင်ႈၶႃၶွၼ်သၢႆႉမၼ်းၸၢႆး ထႅင်ႈၶွၼ်ၼိုင်ႈ ယွၼ်ႉဝႃႈ မီးငဝ်းလၢႆးၼိူဝ်ႉတီႈၶႃမၼ်းၸၢႆး တေလၢမ်း ၼဝ်ႈထႅင်ႈ ဝႃႈၼႆ။


ၸၢႆးဢွင်ႇၺုၼ်ႉ ၵေႃႉပဵၼ်ၼွင်ႉၸၢႆး ၸၢႆးလႃႉထုၼ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈၼႆႉ မေႃယႃၶဝ် တေႁွင်ႉၶဝ်ႈႁွင်ႈၽႃႇတတ်းၶႃႈယဝ်ႉ။ မေႃယႃၶဝ်ဝႃႈ တေလႆႈတတ်းပႅတ်ႈ ထႅင်ႈၶွၼ်ၼိုင်ႈ တၢင်းၾၢႆႇသၢႆႉ တႄႇဢဝ် ႁူဝ်ၶဝ်ႇ လူင်းတႂ်ႈ။ ၵူၺ်းၵႃႈ မိူဝ်ႈဝူင်ႈပူၼ်ႉၼၼ်ႉ မေႃယႃၶဝ် ၸႂ်ႉၶႃႈႁဝ်းၵႂႃႇတမ်းဝၢင်းဝႆႉ ငိုၼ်း 4 မိုၼ်ႇဝၢတ်ႇ။ ၵဵဝ်ႇၵပ်းလွင်ႈငိုၼ်းၼႆႉ ၶႃႈႁဝ်းၶဝ် မီးတၢင်းယၢပ်ႇၽိုတ်ႇတႄႉတႄႉ တေႃႈလဵဝ် ငိုၼ်းမီးၼႂ်းမိုဝ်းၶႃႈႁဝ်း 5 ၽၼ်း ၵူၺ်း။ ငိုၼ်း 5 ၽၼ်းဝၢတ်ႇၼႆႉ ပဵၼ်ငိုၼ်းဢၼ်ပီႈၼွင်ႉတႆးႁဝ်း ၸွႆႈၵမ်ႉထႅမ် ပၼ်မႃးၶႃႈဢေႃႈ။ ၶႃႈႁဝ်းဝူၼ်ႉဝႃႈ တေယွၼ်းတမ်းဝႆႉငိုၼ်း 3 ႁဵင်ဝၢတ်ႇတူၺ်းၵွၼ်ႇ ၸွင်ႇတေလႆႈတႄႉဢမ်ႇႁူႉ။ ငိုၼ်း 4 မိုၼ်ႇၼႆ ၶႃႈတေၵႂႃႇဢဝ်တီႈလႂ်မႃးလႆႈၵမ်းလဵဝ်ၶႃႈ။ ၼႂ်းလိူၼ်ၼႆႉ ၶႃႈႁဝ်းတိုၵ်ႉလႆႈႁဵတ်းၵၢၼ် မီး 8 ဝၼ်း ၵူၺ်း ။ ပီႈလူဝ်း ၶႃႈၵေႃႈ တွင်ႉယႂ်ႇဝႆႉ” ဝႃႈၼႆ။

ၵဵဝ်ႇၵပ်းလွင်ႈၼႆႉ မိူဝ်ႈပူၼ်ႉမႃး ဝၼ်းတီႈ 10/08/2017 ၼၼ်ႉ မေႃယႃၶဝ် လႆႈတတ်းပႅတ်ႈမိုဝ်း တင်းသွင်ၶွၼ် တီႈႁူင်းယႃသူၼ်ၻွၵ်ႇ။ မိူဝ်ႈၼႆႉၵေႃႈ မေႃယႃၶဝ် တေတတ်းပႅတ်ႈထႅင်ႈ ၶႃၶွၼ်သၢႆႉ တႄႇ ဢဝ် ႁူဝ်ၶဝ်ႇလူင်းတႂ်ႈ ဝႃႈၼႆ။


မိူဝ်ႈပူၼ်ႉမႃး ဝၼ်းတီႈ 20/07/2017 ယၢမ်းၵၢင်ၶမ်ႈၼၼ်ႉ ၸၢႆးလႃႉထုၼ်း ၵႂႃႇယဵပ်ႇ/ယိပ်းၺႃးသၢႆၾႆးၾႃႉ တီႈၶႅမ်ႊ (ႁွင်ႈထႅဝ်လိုဝ်ႈသဝ်းၵူၼ်းႁဵတ်းၵၢၼ်) တီႈဝဵင်းဢယုတ်ႉထယႃး။ လႆႈၶဝ်ႈယူတ်းယႃတူဝ် တီႈႁူင်းယႃ ဢႃယုတ်ႉထယႃး ၶၢဝ်းတၢင်း 20 ဝၼ်းပၢႆ၊ တီႈၼၼ်ႈ ဢမ်ႇမီးပီႈၼွင်ႉလႄႈ ၵေႃႉပဵၼ် ၼွင်ႉၸၢႆး ၸၢႆးလႃႉထုၼ်း ၸင်ႇဢဝ်တူဝ် ၸၢႆးလႃႉထုၼ်း မႃးသိုပ်ႇယူတ်းယႃတူဝ်တီႈ ႁူင်းယႃ သူၼ်ၻွၵ်ႇ ဝဵင်းၵဵင်းမႆႇ ၸိုင်ႈထႆး ဝႃႈၼႆ။


ၸၢႆးဢွင်ႇၺုၼ်ႉ သိုပ်ႇလၢတ်ႈဝႃႈ ၶႃႈႁဝ်း ယွၼ်းတၢင်းၸွႆႈထႅမ် တီႈပီႈၼွင်ႉတႆးႁဝ်း ၽူႈမီးၼမ်ႉၸႂ်ၸေႇတၼႃႇထႅင်ႈ ယႂ်ႇယႂ်ႇၼမ်ၼမ်ၶႃႈ ႁူမ်ႈၸွႆႈႁဝ်းၶႃႈ ပီႈၼွင်ႉၽွင်ႈ တေႃႈလဵဝ် ၶႃႈႁဝ်း လႆႈႁပ်ႉလုမ်းလႃးပႃးထႅင်ႈ ၵေႃႉပဵၼ်ပီႈလူဝ်း မေးပီႈဢၢႆႈၶႃႈႁဝ်းၼႆႉ ယွၼ်ႉဝႃႈ ပီႈလူဝ်းၶႃႈႁဝ်းၵေႃႈ ပႃးတွင်ႉဝႆႉ 3-4 လိူၼ်ယဝ်ႉ ပႆႇၸၢင်ႈႁဵတ်းၵၢၼ်။ ထႅင်ႈၾၢႆႇ ၼိုင်ႈၵေႃႈ ပီႈဢၢႆႈၶႃႈႁဝ်း သမ်ႉပဵၼ်ၸိူင်ႉၼႆထႅင်ႈ ဝတ်းဝႂ်ပီႈလူဝ်းႁဝ်း ဢၼ်တၢင်ႇယွၼ်းတီႈဢယုတ်ႉထယႃး ၼၼ်ႉၵေႃႈ ဢမ်ႇၸၢင်ႈၵႂႃႇႁဵတ်းယဝ်ႉလႄႈ ယၢမ်းလဵဝ် ပီႈလူဝ်းၶႃႈၵေႃႈ ဢမ်ႇမီးဝတ်းဝႂ်သင်ယဝ်ႉ” ဝႃႈၼႆ။


တေႃႈလဵဝ် ၸၢႆးလႃႉထုၼ်းၼႆႉ ယူတ်းယႃတူဝ်ဝႆႉတီႈ ႁူင်းယႃသူၼ်ၻွၵ်ႇ ၸႄႈဝဵင်းၵဵင်းမႆႇ ၸိုင်ႈထႆး။ သင်ဝႃႈ ပီႈၼွင်ႉၽူႈမီးၼမ်ႉၸႂ် ၸေႇတၼႃႇၶဝ် ၶႂ်ႈၵမ်ႉထႅမ်ငိုၼ်းတွင်းလႄႈသင်၊ ၶွင်ၵိၼ်ယမ်ႉလႄႈသင်၊ ၵႂႃႇသူႇၸႂ်း ဢႅဝ်ႇယဵမ်ႈလႄႈသင်၊ ၵပ်းသိုပ်ႇလႆႈတီႈမၢႆၾူၼ်း ၸၢႆးဢွင်ႇၺုၼ်ႉ 094-735-1314 သေၵမ်း ဝႃႈၼႆ။


ၸၢႆးလႃႉထုၼ်းၼႆႉ ပဵၼ်လုၵ်ႈၸၢႆးလုင်းၸိင်ႇတႃႇ ပႃႈၺုၼ်ႉ ယူႇဝၢၼ်ႈပၢင်ၶႄႇ ဢိူင်ႇသူပ်းတုင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ မီးပီႈၼွင်ႉ 4 ၵေႃႉ၊ မၼ်းၸၢႆးပဵၼ်ၵေႃႉတီႈ 2  ။