ႁူင်းယႃလူင် ဝဵင်းတူၼ်ႈတီးၵူတ်ႇႁၼ် ထႅင်ႈၵူၼ်းၸပ်းတင်းပဵၼ် ၶႆးဝတ်းယႂ်ႇ H1N1 မီးၵႂႃႇယဝ်ႉ 7 ၵေႃႉ ဢၼ်ငမ်းငဝ်းသေ တိုၵ်ႉထတ်းဝႆႉထႅင်ႈ မီး 4 ၵေႃႉ။


ဝၼ်းတီႈ 4-11/8/2017 ၼႆႉမႃး ၻွၵ်ႊတိူဝ်ႊၸၢႆးသေႃႇဝိၼ်းလၢႆႇ ၵႅမ်ၽူႈၸတ်းၵၢၼ်ပၢႆးယူႇလီၵူၼ်းမိူင်း ၸိုင်ႈတႆး ယိုၼ်ယၼ်ဝႃႈ ၵူၼ်းမီးၸိူဝ်ႉမႅင်း တၢင်းပဵၼ်ၶႆႈဝတ်းယႂ်ႇ H1N1 မီး 7 ၵေႃႉယဝ်ႉ၊ ဢၼ်ငမ်းငဝ်း သေ တိုၵ်ႉၵူတ်ႇ ထတ်း မီး ထႅင်ႈ 4 ၵေႃႉ။ ၵူၼ်းၸပ်းတၢင်းပဵၼ် ယူတ်းယႃ တူဝ်ဝႆႉတီႈႁူင်းယႃ ၼၢင်းယိင်းလႄႈ လုၵ်ႈဢွၼ်ႇ တင်း ႁူင်းယႃလူင်ၸဝ်ႈၸၢမ်ႇထုၼ်း ဝဵင်းတူၼ်ႈတီး ၸိုင်ႈတႆး ပွတ်း ၸၢၼ်း ၼႆယဝ်ႉ။

ၻွၵ်ႊတိူဝ်ႊၸၢႆးသေႃႇဝိၼ်းလၢႆႇ လၢတ်ႈဝႃႈ “ ၵူတ်ႇထတ်းႁၼ်ဝႆႉ ၵူၼ်းၸပ်းတၢင်းပဵၼ် ၶႆႈဝတ်းယႂ်ႇ H1N1 မီးၵႂႃႇယဝ်ႉ 7 ၵေႃႉ။ ၼႂ်း 7 ၵေႃႉၼၼ်ႉ ဢွၼ်ႇယိင်း ဢႃယု 3 ၶူပ်ႇ 1 ၵေႃႉ ပဵၼ်ၵူၼ်းတူၼ်ႈတီး၊ လုၵ်ႈဢွၼ်ႇ ဢႃယု 2 ၶူပ်ႇ 1 ၵေႃႉ၊ ဢွၼ်ႇယိင်းၽႃၽႄ 2 ၵေႃႉ၊ ၼၢင်းယိင်း ဢႃယု 20 ပီ 1 ၵေႃႉ၊ ၼၢင်းယိင်းပႃးတွင်ႉ ဢႃယု 27 ပီ 1 ၵေႃႉ ၼႂ်းၶဝ် 5 ၵေႃႉၼႆႉ ပဵၼ်ၵူၼ်းၸႄႈဝဵင်းၵၢတ်ႇလေႃႉ။ ၶဝ် 6 ၵေႃႉၼႆႉ ယူတ်းယႃတူဝ်ဝႆႉတီႈႁူင်းယႃ ၼၢင်းယိင်းလႄႈ လုၵ်ႈဢွၼ်ႇ ဝဵင်းတူၼ်ႈတီး။ ၼွၵ်ႈလိူဝ်ၼၼ်ႉ ၽူႈၸၢႆး ဢႃယု 37 ပီ၊ ၵူၼ်းဝဵင်းၵၢတ်ႇလေႃႉသမ်ႉ ႁပ်ႉယူတ်းယႃဝႆႉတီႈ ႁူင်းယႃလူင် ၸဝ်ႈၸၢမ်ႇထုၼ်း ဝဵင်းတူၼ်ႈတီး။ လိူဝ်ၼၼ်ႉ တိုၵ်ႉ ၵူတ်ႇထတ်းဝႆႉ ၵူၼ်းမိူင်းလႅပ်ႈတေ ၸပ်းတၢင်းပဵၼ်ၼႆႉ မီးထႅင်ႈ 4 ၵေႃႉ” ဝႃႈၼႆ။


ၵူၼ်းၸပ်းတၢင်းပဵၼ် ၶႆႈဝတ်းယႂ်ႇ N1H1 ၼ်ႂ်း 7 ၵေႃႉၼၼ်ႉ ဢွၼ်ႇယိင်းၽႃၽႄ2 ၵေႃႉ လူင်းႁူင်းယႃၵႂႃႇယဝ်ႉ။ ၽူႈၸၢႆး ဢႃယု 37 ပီ ၼၼ်ႉၵေႃႈလူင်း ႁူင်းယႃၵႂႃႇ မိူဝ်ႈဝၼ်းသုၵ်း ပူၼ်ႉမႃးၼႆႉယဝ်ႉဝႃႈၼႆ။ ၸိူဝ်းၼၼ်ႉ လႆႈလူင်းႁူင်း ယႃၵေႃႈ ပၢႆးယူႇလီၶဝ်လီမႃး ၵူႈမိုဝ်ႉၵူႈဝၼ်းယဝ်ႉ ဝႃႈၼႆ။


တႄႇဢဝ် ႁူဝ်လိူၼ်ဢေႃႊၵတ်ႉသ်ထိုင် ဝၼ်းတီႈ 11 ၼႆႉ လႆႈၵဵပ်းသဵၼ်ႈသၢႆမၢႆ လွင်ႈၵူၼ်းၸပ်းတၢင်းပဵၼ် ၶႆးဝတ်းယႂ်ႇ H1N1 ၼႂ်းမိူင်းတႆး ၵူၼ်းမိူင်းၸပ်းတၢင်းပဵၼ် မီး 7 ၵေႃႉ၊ ဢၼ်ထၢင်ႇထိူမ်ဝႆႉ မီး 4 ၵေႃႉ ဝႃႈၼႆ။


ၼႂ်းၼၼ်ႉ မိူင်းႁူမ်ႈတုမ်မိူင်းမၢၼ်ႈပတ်းပိုၼ်ႉ ၵူၼ်းမိူင်း ဢၼ်ၸပ်းတၢင်းပဵၼ် ၶႆးဝတ်းယႂ်ႇ H1N1 မီးၵႂႃႇ 135 ၵေႃႉ၊ လူႉတၢႆၵႂႃႇ 23 ၵေႃႉယဝ်ႉ ဝႃႈၼႆ။