ပီႈၼွင်ႉတႆး ၸိူဝ်းၶဝ်ႈႁဵတ်းၵၢၼ် ၼႂ်းၵဵင်းမႆႇ 50 ပၢႆၵႂႃႇတၢၼ်းလိူတ်ႈ မၢႆတွင်း ယေႃးမုၼ်ငဝ်းဝၼ်းမႄႈ ၸိုင်ႈထႆး ဝၼ်းၵိူတ်ႇၸဝ်ႈၼၢင်းႁေႃၶမ်း ၶွပ်ႈတဵမ် 85 ပီ။


ဝၼ်းတီႈ 12/08/2017 ယၢမ်းၵၢင်ၼႂ် 8 - 11 မူင်း ၸုမ်းႁႅင်းၵၢၼ်ၽွမ်ႉႁူမ်ႈ Workers Solidarity Association (WSA) ဢိၵ်ႇတင်း ပီႈၼွင်ႉႁႅင်းၵၢၼ်တႆး ၸိူဝ်းႁဵတ်းၵၢၼ် ၼႂ်းၵဵင်းမႆႇ ႁူမ်ႈၵၼ် ၵႂႃႇတၢၼ်းလိူတ်ႈတီႈလုမ်းၶႂႆႇ ၶႃပႄလႅင် ဝဵင်းၵဵင်းမႆႇ ၸိုင်ႈထႆး ယိူင်းၸူးထိုင် ၼႂ်းဝၼ်းၵိူတ်ႇၼၢင်းႁေႃၶမ်းထႆး သူမ်ႊၻဵတ်ႊ ၽရႃႊ ၼၢင်းၸဝ်ႈသီႊရိႊၵိတ်ႊ ၽရႃႊပရူမ်ႊရႃႊၶျီႊၼီႊၼၢတ်ႊ ဢႃယု ၶွပ်ႈတဵမ် 85 ပီ ဝႃႈၼႆ။

ၼၢင်းမူၺ်လႅင်း ႁူဝ်ပဝ်ႈ ၸုမ်းႁႅင်းၵၢၼ်ၽွမ်ႉႁူမ်ႈ (WSA) ၵဵင်းမႆႇ လၢတ်ႈဝႃႈ “ ဢၼ်ႁဝ်းၶႃႈ မႃးလူႇတၢၼ်းလိူတ်ႈၼႂ်း ဝၼ်းမႄႈၼႆႉ ယိူင်းၸူးထိုင် မႄႈၽႅၼ်ႇလိၼ် ၸိုင်ႈထႆး ႁႂ်ႈပၢႆးယူႇလီတဵမ်ထူၼ်ႈ ႁႂ်ႈဢႃယုယိုၼ်းယၢဝ်း။ ယဝ်ႉၵေႃႈ ယိၼ်းၸူမ်း တီႈမႄႈၽႅၼ်ႇလိၼ် ၸိုင်ႈထႆး ပၼ်ပီႈၼွင်ႉႁႅင်းၵၢၼ်တႆး လႆႈပိုင်ႈ ဢိင်ႁူမ်ႈၽူၺ်း ၸူဝ်ႈၵႅပ်ႉၸူဝ်ႈ ၶၢဝ်းသေ လႆႈႁဵတ်းၵၢၼ်ႁႃၵိၼ်လဵင်ႉတွင်ႉ” ဝႃႈၼႆ။


သိုပ်ႇလၢတ်ႈထႅင်ႈ ဢၼ်ႁဝ်းၶႃႈ မႃးလူႇလိူတ်ႈၼႆႉ ထႅင်ႈပိူင်ၼိုင်ႈၵေႃႈ ႁဝ်းၶႃႈ လႆႈၵူတ်ႇထတ်းပၢႆးယူႇလီ ႁဝ်းၵေႃႈပႃး။ ယူႇတီႈၾၢႆႇမေႃယႃၶဝ် လၢတ်ႈႁဝ်းၵမ်းလဵဝ်ဝႃႈ ႁဝ်းမီးတၢင်းပဵၼ်သင် ဝႃႈၼႆ။


ၵဵဝ်ႇၵပ်းလွင်ႈၼႆႉ ယူႇတီႈၸုမ်းႁႅင်းၵၢၼ်ၽွမ်ႉႁူမ်ႈ ၵဵင်းမႆႇ လႆႈဢွၼ်ဢဝ်ပီႈၼွင်ႉႁႅင်းၵၢၼ်တႆး ၶဝ်ႈႁူမ်ႈ တၢၼ်းလိူတ်ႈ ၼႂ်းဝၼ်းမႄႈၼႆႉပေႃးပႃးပီၼႆႉ မီးၶၢဝ်းတၢင်း 9 ပီယဝ်ႉ ၼိုင်ႈပီလႂ် ဢွၼ်ဢဝ်ပီႈၼွင်ႉတႆး တၢၼ်းလိူတ်ႈ ဢမ်ႇယွမ်း 50 ၵေႃႉ ဝႃႈၼႆ။


ၸုမ်းႁႅင်းၵၢၼ်ၽွမ်ႉႁူမ်ႈ (WSA) ၵဵင်းမႆႇၼႆႉ ၵေႃႇတင်ႈမႃး မိူဝ်ႈပီ 2007 လိူၼ်ၵျုႊလၢႆႊ ဝၼ်းတီႈ 22 ယိူင်း ဢၢၼ်း ပုၼ်ႈတႃႇၸွႆႈထႅမ်ႁႅင်းၵၢၼ်၊ ပၼ်တၢင်းႁူႉၵဵဝ်ႇၵပ်းမၢႆမီႈ/ၵူတ်ႇမၢႆ ႁႅင်းၵၢၼ်၊ ပၼ်တၢင်းႁူႉၵဵဝ်ႇၵပ်း လုၵ်ႈလဵင်ႉ တင်းပေႃႈ လဵင်ႉ/မႄႈလဵင်ႉ (ၼၢႆးၸၢင်ႈ) ပွင်ႇၸႂ်ၵၼ်လႄႈ သုၼ်ႇလႆႈသုၼ်ႇပဵၼ်ႁႅင်းၵၢၼ် ၸိူဝ်းၼၼ်ႉ ဝႃႈၼႆ။


ထိုင်မႃး ယၢမ်းႁူဝ်ၶမ်ႈ 6 မူင်းသမ်ႉ ပီႈၼွင်ႉတႆး၊ ၸုမ်းတူင်ႉၼိုင်တူင်ႇဝူင်းတႆး ဢဵၼ်ႁႅင်း 60 ပၢႆ ဢွၼ်ၵၼ် ၶဝ်ႈႁူမ်ႈ ပၢင်ၵႅဝ်ႈ ၵႃရဝ တႆႈတဵၼ်း သူင်ႇပွၼ်းထိုင်ၼၢင်းႁေႃၶမ်း ၸိုင်ႈထႆး တီႈသူၼ်မွၵ်ႇႁေႃၶမ်း (ရၢတ်ႉၶျၽရိုၵ်း) ဝဵင်းၵဵင်းမႆႇ ၸိုင်ႈထႆး ၼႆယဝ်ႉ။