ၸုမ်းၵူၼ်းၼုမ်ႇမိူင်းၶိူဝ်း ၸတ်းႁဵတ်းပၢင်ပိတ်ႉမၢၵ်ႇၼင် မွၵ်ႇဢဝ်ၸုမ်းပိတ်ႉမၢၵ်ႇၼင်ၼမ်ႉမၢဝ်းသႂ် ဢၼ်မီးၵူၼ်းၼုမ်ႇထုင်ႉမၢဝ်း၊မူႇၸေႊ၊ၼမ်ႉၶမ်း ႁူမ်ႈၶွတ်ႇၽွတ်ႈဝႆႉၼၼ်ႉ ၶႅင်ႇၵၼ်တီႈ ပၢင်ပိတ်ႉ မၢၵ်ႇၼင်မိူင်းၶိူဝ်း။


ဝၼ်းတီႈ 13-14/08/2017 ၸုမ်းၵူၼ်းၼုမ်ႇမိူင်းၶိူဝ်း ၸတ်းႁဵတ်းပၢင်ပိတ်ႉမၢၵ်ႇၼင် တီႈမိူင်းၶိူဝ်း ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ မီးၸုမ်းပိတ်ႉမၢၵ်ႇၼင် ၼမ်ႉမၢဝ်းသႂ် ဢၼ်လုၵ်ႉတၢင်းထုင်ႉမၢဝ်းမႃး တင်း ၸုမ်းမိူင်းၶိူဝ်း ပိတ်ႉမၢၵ်ႇၼင်ၵၼ်တီႈပၢင်ပိတ်ႉမၢၵ်ႇၼင် မိူင်းၶိူဝ်း၊ ၵူၼ်းပၼ်ႁႅင်းမီးၼပ်ႉႁဵင်။

ၸၢႆးမၢဝ်းႁၢၼ် ႁူဝ်ၼႃႈၵူၼ်းၼုမ်ႇမိူင်းၶိူဝ်းလၢတ်ႈဝႃႈ - “ ယိူင်းဢၢၼ်းႁဝ်းၶႃႈတႄႉၼင်ႇႁိုဝ်ၵူၼ်း ၼုမ်ႇတေမီးလွင်ႈၵပ်းသိုပ်ႇၶဝ်ႈႁႃၵၼ်၊ ၸမ်ၸႂ်ၵၼ်၊ ၵွင်ႉသၢၼ်ၵၼ်၊ ႁူမ်ႈလဵၼ်ႈဢဵၼ်ႁႅင်းၸွမ်းၵၼ် ၼင်ႇႁိုဝ်တေၵႆယၢၼ်ယႃႈမဝ်းၵမ်၊ ၼႂ်းတႆးႁဝ်းၼႆႉဢမ်ႇပေႃးတူင်ႉၼိုင်သႂ်ႇၸႂ်လွင်ႈၵၢၼ်လဵၼ်ႈဢဵၼ် ႁႅင်း၊ သိုပ်ႇၼႆႉၵႂႃႇၶႂ်ႈႁႂ်ႈမီးၵူၼ်းသူၼ်ၸႂ်ပိတ်ႉမၢၵ်ႇၼင်ၼမ်ၼမ် ၼင်ႇႁိုဝ်ၸုမ်းပိတ်ႉမၢၵ်ႇၼင်တႆး ပေႃးတေၶိုၼ်ႈယႂ်ႇၶိုတ်းၸၼ်ႉလုမ်ႈၾႃႉ ” ဝႃႈၼႆ။


ၸုမ်းမိူင်းၶိူဝ်းၼႆႉတႄႇပိတ်ႉမၢၵ်ႇၼင်မႃးမိူဝ်ႈပီ 2009 ၵူၺ်းၵႃႈၼႂ်းၵႄႈၼၼ်ႉဢိင် ၼိူဝ်ငဝ်းလၢႆးသေ လႆႈယင်ႉၵႂႃႇ ထိုင်မႃးပီ2015 ၸင်ႇၶိုၼ်းတူင်ႉၼိုင် ၵူႈပီမွၵ်ႇဢဝ်ၸုမ်းပိတ်ႉမၢၵ်ႇၼင် ႁိမ်းႁွမ်းမိူၼ် ၼင်ႇၸုမ်းၵူၼ်းၼုမ်ႇဝဵင်းမိူင်းယႆ၊ ၸုမ်းၼမ်ႉလၼ်ႈ၊ ၸုမ်းၼႃးမူၼ်း၊ ၸုမ်းသႅင်ၵႅဝ်ႉ ၸိူဝ်းၼႆႉသေၶႅင်ႇၵၼ်။


ဝၼ်းတီႈ 17/07/2017 ၼၼ်ႉၵေႃႈ ဝဵင်းၼမ်ႉၶမ်း ၸတ်းႁဵတ်းပၢင်ယုၵ်ႉယွင်ႈ ၸုမ်းပိတ်ႉမၢၵ်ႇၼင် ၼမ်ႉၶမ်း FC ဢၼ်ၵႂႃႇပိတ်ႉပေႉပိူၼ်ႈမူတ်း တီႈမိူင်းၶွၼ်မႃး ပၢင်ယုၵ်ႉယွင်ႈ ၸတ်းႁဵတ်းတီႈႁွင်ႈႁပ်ႉ ၶႅၵ်ႇ (တႆး) ပွၵ်ႉ ၵွင်းၼွင်မူဝ် ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ မီးၸုမ်းပိတ်ႉမၢၵ်ႇၼင်၊ ၵေႃလိၵ်ႈ လၢႆး၊ ၽူႈယႂ်ႇၵူၼ်းလူင်ၼႂ်းပွၵ်ႉၼႂ်းၾၢႆႇ၊ ၽူႈပၼ်ႁႅင်းၸႂ်ၼႂ်းပွၵ်ႉ/ၼႂ်းၾၢႆႇမႃး ၶဝ်ႈႁူမ်ႈ 150ၵေႃႉ။ ၼႂ်းၸုမ်းပိတ်ႉမၢၵ်ႇၼင် ၼမ်ႉမၢဝ်းသႂ်ၼၼ်ႉ မီးၸုမ်းပိတ်ႉမၢၵ်ႇၼင်ၼမ်ႉၶမ်း FC ၶဝ်ႈပႃးဝႆႉ။