ႁူင်းသဝ်း သင်ၶၸဝ်ႈ တီႈတိူၵ်ႈသွၼ်လိၵ်ႈ ဝတ်ႉဝိႁၢရ်တေႃးယ ဝဵင်းလႃႈသဵဝ်ႈ ၺႃးၾႆးၾႃႉသျွတ်ႉမႆႉ လူႉသုမ်း ၸွမ်းၾႆးၵႃႈၶၼ်ငိုၼ်း ၼပ်ႉႁူဝ်သိပ်းလၢၼ်ႉ။


ဝၼ်းတီႈ 13/08/2017 ၶၢဝ်းယၢမ်း 10 မူင်းပၢႆ ႁူင်းသဝ်း သင်ၶၸဝ်ႈ တီႈဝတ်ႉတေႃးယ ပွၵ်ႉ 10 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ထုၵ်ႇၾႆးမႆႈ ႁိုင် ၼိုင်ႈၸူဝ်ႈမူင်း ပၢႆၾႆးၸင်ႇမွတ်ႇ၊ ၾႆးၾႃႉ တႄႇသျွတ်ႉမႆႈတီႈၶိူင်ႈၸၼ်ၾႆး( တိူၵ်ႈ Tramsformar) သေ လၢမ်းမႆႈႁူင်းသဝ်း သင်ၶၸဝ်ႈတင်းလင်။

ၸဝ်ႈၶူးထမ်မထၸ ၵႅမ်ၽူႈၵွၼ်းဝတ်ႉတေႃးယ  ဝဵင်းလႃႈသဵဝ်ႈ လၢတ်ႈဝႃႈ “ ၾႆးမႆႈၼႆႉ တႄႇၶၢဝ်းယၢမ်း 10 မူင်းပၢႆ လုၵ်ႉတီႈသၢႆၾႆးဢၼ်ၵဝ်ႇၼၼ်ႉ သျွတ်ႉတီႈၶိူင်ႈၸၢၵ်ႈၸၼ်ႁႅင်းတၢင်ႇၾႆးၼၼ်ႉ မၼ်းၶႅမ်ႈတီႈၼၼ်ႈယဝ်ႉ ၾႆးသမ်ႉ လႅၼ်ႈၶဝ်ႈသျွတ်ႉၼႂ်းႁွင်ႈလုၵ်းၸဝ်ႈထဝ်ႈ။ မိူဝ်ႈၽွင်းၼၼ်ႉ ၸဝ်ႈထဝ်ႈၼၼ်ႉသမ်ႉဢမ်ႇယူႇ ၵႂႃႇမီးတၢင်းၼွၵ်ႈ ႁဵတ်း ၼၼ်သေ ဢဝ်ၾႆးလၢမ်းမႆႈႁၢဝ်ႈႁႅင်းၶႄဢမ်ႇပေႉ၊ ၾၢႆႇႁူတ်းၾႆးမႃးၸွႆႈၸင်ႇၶႄလႆႈ” ဝႃႈၼႆ။


သိုပ်ႇလၢတ်ႈထႅင်ႈဝႃႈ ၵဵဝ်ႇၵပ်းလွင်ႈၼႆႉ လွင်ႈမၢတ်ႇၸဵပ်းလွၼ်ႇမႆႈၸွမ်းၾႆးတႄႉ ဢမ်ႇမီးသေၸဝ်ႈသေတူၼ်။ ၶူဝ်းၶွင် ၼႂ်းႁူင်းသဝ်းၼၼ်ႉၵေႃႈ မႆႈၵႂႃႇၸွမ်းၾႆး ပပ်ႉပိတၵၢတ်ႈ 60 ပပ်ႉပၢႆ၊ ၶူဝ်းၸဝ်ႈထဝ်ႈသမ်ႉ မိုဝ်းထိုဝ်ၼိုင်ႈလုၵ်ႈ၊ ငိုၼ်း 3-4 မိုၼ်ႇ၊ မူင်းၵူၺ်းၶမ်း ၼိုင်ႈသဵၼ်ႈ။ ႁူင်းသဝ်းၼႆႉ ဢဝ်မႆႉသၵ်းႁဵတ်းဝႆႉလႄႈ ပေႃးၼပ်ႉသွၼ်ႇငိုၼ်း တေတူၵ်းမႅၼ်ႈငိုၼ်း ဢမ်ႇယွမ်း 300 သႅၼ်ပျႃးၼႆႉ ဝႃႈၼႆ။


ၾႆးမႆႈၵမ်းၼႆႉ သင်ၶၸဝ်ႈ၊ ၵူၼ်းၼႂ်းပွၵ်ႉၼႂ်းသူၼ် ဢဝ်လူတ်ႉတၢင်ႇၼမ်ႉ 2 လမ်း မႃးၸွႆႈႁူတ်း၊ ၸဝ်ႈၼႃႈ တီႈၾၢႆႇ ၶႄၾႆးၸႄႈဝဵင်းလႃႈသဵဝ်ႈၵေႃႈ ဢဝ်လူတ်ႉတၢင်ႇၼမ်ႉႁူတ်းၾႆး 8 လမ်း မႃးၸွႆႈႁူတ်း ႁိုင်ၸူဝ်ႈ မူင်းပၢႆသေ ၸင်ႇမွတ်ႇ ယဵၼ်ယဝ်ႉတူဝ်ႈၵႂႃႇ ဝႃႈၼႆ။


ဝတ်ႉတေႃးယ ဝဵင်းလႃႈသဵဝ်ႈၼႆႉ ပဵၼ်တိူၵ်ႈသွၼ်လိၵ်ႈ သင်ၶၸဝ်ႈ။ ပီၼႆႉ သင်ၶၸဝ်ႈဢၼ်မႃး ၶိုၼ်ႈႁဵၼ်း မီး 103 တူၼ် ဝႃႈၼႆ။