ၸုမ်းၵူၼ်းၼုမ်ႇတႆး Tai Youth Organization ဢွၼ်ႁူဝ်ၼမ်းၼႃႈသေ ႁူမ်ႈပီႈၼွင်ႉၵူၼ်းဝၢၼ်ႈၵူၼ်းသူၼ် ပိုတ်ႇ လုမ်းၵိင်ႇၽႄ လုမ်းၵူၼ်းၼုမ်ႇတႆး တီႈဝၢၼ်ႈၵွင်းယူမ်း ၸႄႈဝဵင်းလႃႈသဵဝ်ႈ၊ မိူင်းတႆးပွတ်းႁွင်ႇ။


ဝၼ်းတီႈ 13/08/2017 ယၢမ်းဝၢႆးဝၼ်း 3 မူင်းပၢႆ ၸုမ်းၵူၼ်းၼုမ်ႇတႆး TYO ၸႄႈဝဵင်းလႃႈသဵဝ်ႈ ဢွၼ်ႁူဝ် ပီႈၼွင်ႉ ၵူၼ်းဝၢၼ်ႈ ဝၢၼ်ႈၼႃးပုင်ႇ၊ ဝၢၼ်ႈၵွင်းယူမ်းလႄႈ ဝၢၼ်ႈတၢပ်ႈ  ႁူမ်ႈၵၼ်ပိုတ်ႇလုမ်းၵိင်ႇၽႄ ၸုမ်းၵူၼ်း ၼုမ်ႇတႆး ထႅင်ႈတီႈဝၢၼ်ႈၵွင်းယူမ်း ဢိူင်ႇၼမ်ႉပွင်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ မီးပီႈၼွင်ႉၵူၼ်း မိူင်းၶဝ်ႈ ႁူမ်ႈ 100 ပၢႆ ။

ၸၢႆးႁၢၼ်ႇ ႁူဝ်ပဝ်ႈၸုမ်းၵူၼ်းၼုမ်ႇတႆး TYO ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ လၢတ်ႈဝႃႈ “ ဢၼ်ႁဝ်းၶႃႈၶဝ် ပိုတ်ႇလုမ်းၼႆႉ တႃႇၵွင်ႉသၢၼ်တင်းၵူၼ်းဝၢၼ်ႈၵူၼ်းသူၼ်ႁဝ်း သင်ဝႃႈမီးလွင်ႈယၢပ်ႇၽိုတ်ႇသင်မႃး ႁဝ်းႁႃး ပေႃးတေ လႆႈၽွမ်ႉသဵင်ပဵင်းပၢၵ်ႇၵၼ်သေ ၸွႆႈၵႄႈလိတ်ႈၵႂႃႇၸွမ်းၵၼ်။ ထႅင်ႈၾၢႆႇၼိုင်ႈၵေႃႈ ႁဝ်းၶႃႈ ပၵ်းလုမ်း တႃႇဢဝ် တီႈ ယူႇ ၸွႆႈထႅမ်ပီႈၼွင်ႉၵူၼ်းဝၢၼ်ႈၵူၼ်းသူၼ်ႁဝ်း ယွၼ်ႉဝႃႈ မီးၵူၼ်းတၢင်ႇတီႈသီႇလႅၼ်ၶဝ် ၶႂ်ႈဢဝ် ၵူၼ်း တၢင်ႇဝၢၼ်ႈတၢင်ႇဝဵင်း မႃးၶႂၢၵ်ႈပၵ်းယူႇသဝ်း” ဝႃႈၼႆ။


သိုပ်ႇလၢတ်ႈထႅင်ႈဝႃႈ မိူဝ်ႈပူၼ်ႉမႃး ဝၼ်းတီႈ 16/07/2017 ၼၼ်ႉ ၸုမ်းၵူၼ်းၼုမ်ႇတႆးတင်း ၵူၼ်းဝၢၼ်ႈၵူၼ်းသူၼ် ႁူမ်ႈၵၼ် 500 ပၢႆ သၢၼ်ၶတ်း ၽူႈပူၼ်ႉပႅၼ်/ႁွင်ႉဢဝ်ၵူၼ်းတၢင်ႇဝၢၼ်ႈတၢင်ႇမိူင်း မႃးယူႇသဝ်း ၼႂ်းထုင်ႉၼမ်ႉပွင်ႈ ၼၼ်ႉ။ သင်ဢမ်ႇႁူမ်ႈၵၼ်သၢၼ်ၶတ်းၵႅတ်ႇၶႄၸိုင် ဝၢႆးလိုၼ်းမႃးတီႈ လိၼ်သူၼ်ႁႆႈၼႃးၵူၼ်းမိူင်းႁဝ်းၶႃႈ တေတူၵ်း ၵႂႃႇပဵၼ်ၶွင်ၵူၼ်းတၢင်ႇတီႈမူတ်း ဝႃႈၼႆ။


ၵဵဝ်ႇၵပ်းလွင်ႈၼႆႉသေ ၵူၼ်းဝၢၼ်ႈၵူၼ်းသူၼ် ဝၢၼ်ႈၼႃးပုင်ႇ၊ ဝၢၼ်ႈၵွင်းယူမ်းလႄႈ ဝၢၼ်ႈတၢပ်ႈ 3 ဝၢၼ်ႈႁူမ်ႈ ၵၼ်သေ တႅပ်းတတ်းလႆႈၸႂ် ပိုတ်ႇလုမ်းၵိင်ႇၽႄ ၸုမ်းၵူၼ်းၼုမ်ႇတႆး TYO တီႈဝၢၼ်ႈၵွင်းယူမ်းထႅင်ႈ ဝႃႈၼႆ။


ၸုမ်းၵူၼ်းၼုမ်ႇတႆး TYO ၼႆႉ ၶွတ်ႇၽွတ်ႈတင်ႈၶိုၼ်ႈမႃး မိူဝ်ႈပီ 2014 ယိူင်းဢၢၼ်း ၵွင်ႉသၢၼ်ၵူၼ်းၼုမ်ႇတႆး ၶဝ်ႈ ဢွၵ်ႇၵၼ်၊ ပူၵ်းပွင်ၽဝၵူၼ်းမိူင်း ၵၢၼ်မေႃတိၼ်/မိုဝ်း၊ ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇလႄႈ လိၵ်ႈလၢႆးၾိင်ႈငႄႈ ၸဵမ်ၸိူဝ်းၼႆႉ။


လုမ်းၸုမ်းၵူၼ်းၼုမ်ႇတႆး TYO ၼႆႉ ၼႂ်းၸိုင်ႈတႆးပွတ်းၸၢၼ်း ပိုတ်ႇဝႆႉလုမ်းငဝ်ႈငုၼ်း တီႈဝဵင်းတူၼ်ႈတီး၊ ၼႂ်းၸိုင်ႈတႆးပွတ်းႁွင်ႇ၊ ပွတ်းဢွၵ်ႇ၊ ပွတ်းၸၢၼ်း ပိုတ်ႇလုမ်းၽႄဝႆႉ လၢႆလၢႆဝဵင်းယဝ်ႉ ဝႃႈၼႆ။