ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး ၸတ်းႁဵတ်းပၢင်ယုၵ်ႉယွင်ႈ ၽူႈၵတ်ႉၶႅၼ်ႇ ၸိူဝ်းဢွင်ႇပူၼ်ႉ ၸၼ်ႉသိပ်း 56 ၵေႃႉ ၊ တိုၵ်းသူၼ်းႁႂ်ႈပဵၼ်လုၵ်ႈႁဵၼ်းၵတ်ႉၶႅၼ်ႇ ၵမ်ႉၸွႆႈၽႃသႃ လိၵ်ႈလၢႆး ၸိူဝ်ႉၸၢတ်ႈ ဝၢၼ်ႈ မိူင်းၵႂႃႇ ဝႃႈၼႆ။


ဝၼ်းတီႈ 12/08/2017  ယၢမ်းဝၢႆးဝၼ်း 1 မူင်းထိုင် 3 မူင်း ၵေႃလိၵ်ႈလၢႆး/ၾိင်ႈငႄႈတႆး ၸႄႈဝဵင်းတူၼ်ႈတီး ဢွၼ် ႁူဝ်ၸတ်းႁဵတ်းပၢင်ယုၵ်ႉယွင်ႈ လုၵ်ႈႁဵၼ်း ၸိူဝ်းၵတ်ႉၶႅၼ်ႇ ဢွင်ႇပူၼ်ႉၸၼ်ႉသိပ်း ၼႂ်းပီ ၵၢၼ်ႁဵၼ်း 2016-2017 တီႈႁူင်းႁေႃ ၵေႃလိၵ်ႈလၢႆး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။


ၸၢႆးမွင်ႇတိၼ်ႇ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းတူၼ်ႈတီး လၢတ်ႈဝႃႈ “ ယိူင်းဢၢၼ်းဢၼ်လႆႈၸတ်းႁဵတ်း ပၢင်ယုၵ်ႉယွင်ႈလုၵ်ႈႁဵၼ်းၸိူဝ်ႉပူၼ်ႉ ၸၼ်ႉသိပ်းၼႆႉ ၼင်ႇႁိုဝ် လုၵ်ႈဢွၼ်ႇႁဝ်းၶဝ် တေမိုတ်ႈၵိုဝ်းၸမ်ၸႂ်ၵၼ်၊ မိူဝ်ႈၼႃႈမႃး ႁႂ်ႈ မေႃႁူမ်ႈႁွမ်းၵၼ်သေႁဵတ်း ၵၢၼ်ၵႂႃႇတႃႇၸိူဝ်ႉတႃႇၶိူဝ်းႁဝ်းလႄႈ လိၵ်ႈလၢႆးႁဝ်းမိူဝ်းၼႃႈၵႂႃႇ” ဝႃႈၼႆ။

ၼၢင်းဝူဝ်ၽွင်းႁွမ် လုၵ်ႈႁဵၼ်းတႆး ဢၼ်လႆႈလၢဝ်ၸွင်ႈ 6 လုၵ်ႈ လၢတ်ႈဝႃႈ “ ၶႃႈႁဝ်း ယဝ်ႉၸၼ်ႉသိပ်း တီႈႁူင်း ႁဵၼ်းၸၼ်ႉသုင်မၢႆ 4 ဝဵင်းတူၼ်ႈတီးၼႆႉၵူၺ်းၶႃႈ၊ ဢၼ်ၶႃႈႁဝ်းလႆႈဢွင်ႇပူၼ်ႉၸၼ်ႉသိပ်းသေ ဢမ်ႇၵႃး လႆႈပႃး လၢဝ်ၸွင်ႈ 6 လုၵ်ႈၼႆႉပဵၼ်ဢၼ် ၸူမ်းသိူဝ်းတႄႉတႄႉၶႃႈ။ ယဝ်ႉၵေႃႈ ယိၼ်းၸူမ်းတီႈ ပေႃႈမႄႈၼၢင်းလႄႈ ၶူးသွၼ် ဢၼ်လႆႈသွၼ်ပၼ်လိၵ်ႈၼၢင်းမႃးၸိူဝ်းၼၼ်ႉၶႃႈ။ ယိူင်းဢၢၼ်း ဢၼ်ၼၢင်းၶႂ်ႈပဵၼ်တီႈသုတ်းတႄႉ တေႁဵတ်းမေႃယႃဢေႃႈ” ဝႃႈၼႆ။


လုၵ်ႈႁဵၼ်းတႆး ၽူႈၵတ်ႉၶႅၼ်ႇ ၸိူဝ်းဢွင်ႇပူၼ်ႉၸၼ်ႉသိပ်း ၼႂ်းပီၼႆႉလုၵ်ႈႁဵၼ်းလႆႈလၢဝ်ၸွင်ႈ 6 လုၵ်ႈ မီး 2 ၵေႃႉ၊ 5 လုၵ်ႈ 2 ၵေႃႉ၊ 4 လုၵ်ႈ 3 ၵေႃႉ၊ 3 လုၵ်ႈ 5 ၵေႃႉ၊ 2 လုၵ်ႈ 7 ၵေႃႉ၊ 1 လုၵ်ႈ 6 ၵေႃႉလႄႈ ဢၼ် ဢွင်ႇပူၼ်ႉၸၼ်ႉဢမ်ႇပႃးလၢဝ်ၸွင်ႈသမ်ႉ မီး 31 ၵေႃႉ ႁူမ်ႈၵၼ်တင်းမူတ်းမီး 56 ၵေႃႉ ဝႃႈၼႆ။


တီႈပၢင်ယုၵ်ႉယွင်ႈလုၵ်ႈႁဵၼ်းၵတ်ႉၶႅၼ်ႇ ၸိူဝ်းဢွင်ႇပူၼ်ႉၸၼ်ႉသိပ်းၼႆႉ မီးၽူႈယႂ်ႇၵူၼ်းလူင် ပီႈၼွင်ႉၵူၼ်း မိူင်း မႃးၶိုၼ်ႈႁွတ်ႈပၼ်ႁႅင်း မီးမွၵ်ႈ 200 ပၢႆ ဝႃႈၼႆ။


ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းတူၼ်ႈတီး ဢွၼ်ႁူဝ်ၸတ်းႁဵတ်းပၢင်ယုၵ်ႉယွင်ႈလုၵ်ႈႁဵၼ်း ၽူႈၵတ်ႉၶႅၼ်ႇ ၸိူဝ်းဢွင်ႇ ပူၼ်ႉၸၼ်ႉသိပ်းၼႆႉ ၸတ်းႁဵတ်းမႃး ၶၢဝ်းတၢင်း 3 ပီယဝ်ႉ။ မိူဝ်ႈပီ 2014-2015 လုၵ်ႈႁဵၼ်း ၵတ်ႉၶႅၼ်ႇ မီး 45 ၵေႃႉ၊ ပီ 2015-2016 သမ်ႉ မီး 54 ၵေႃႉလႄႈ ပီ 2016-2017 သမ်ႉ 56 ၵေႃႉ ၼႆယဝ်ႉ။