ၵူၼ်းမိူင်းမူႇၸေႊဢဵၼ်ႁႅင်း 600 ပၢႆ ႁူမ်ႈၵၼ်ၼႄၵၢင်ၸႂ် တေႃႇၶွမ်ႊပၼီႊ ဢွင်ႇၵရုၼႃႇ ဢၼ်ၵဵပ်း ယုၵ်း ယၢၵ်း ၶွမ်ႊပၼီႊဢၼ်ဢဝ်ယုၵ်းယၢၵ်းမႃးပႅတ်ႈ ၼႂ်းပွၵ်ႉၼႂ်းဝၢၼ်ႈ- မၢၼ်ႈဝဵင်းဢၼ်မီးၼိူဝ်သဵၼ်ႈတၢင်းၵႂႃႇ ၼမ်ႉၶမ်းႁဵတ်းႁႂ်ႈမဵၼ်တူႇလႄႈဝၢၼ်ႈမိူင်းႁၢင်ႈၸႃႉ။


ဝၼ်းထိ 20 /08/2017 ၼႆႉ ၵူၼ်းမိူင်းမူႇၸေႊဢဵၼ်ႁႅင်း 600 ပၢႆ ႁူမ်ႈၵၼ်ၼႄၵၢင်ၸႂ်တေႃႇ ၶွမ်ႊပၼီႊ ဢွင်ႇၵရုၼႃႇ ဢၼ်လႆႈႁပ်ႉမဝ်ႁဵတ်းၵၢၼ်လိူမ်ႈလႆႇ(ပတ်းၽဵဝ်ႈဝဵင်း) ဝဵင်းမူႇၸေႊ။ ၵူၼ်းမိူင်းၸိူဝ်းဢၼ်ၼႄ ၵၢင်ၸႂ်တုၵ်းယွၼ်းလၢႆၶေႃႈ ပိူင်လူင်ႁႂ်ႈၽဵဝ်ႈပၼ်ယုၵ်းယၢၵ်း ဢၼ်မႃးပႅတ်ႈတီႈမၢၼ်ႈဝဵင်းသဵင်ႈသဵင်ႈ။

ၶွမ်ႊပၼီႊဢွင်ႇၵရုၼႃႇၼႆႉ ၵဵပ်းယုၵ်းယၢၵ်းမႃးပႅတ်ႈတီႈပၢင်ႇပိတ်ႉမၢၵ်ႇၼင် ပွၵ်ႉမၢၼ်ႈဝဵင်းမႃးမီးလၢႆပီ ၵူၼ်းမိူင်းတုၵ်းယွၼ်းမႃးလၢႆပွၵ်ႈၵေႃႈ ဢမ်ႇၵႄႈလိတ်ႈပၼ် ။ ပၢင်ၼႄၵၢင်ၸႂ်ၼႆႉ ၶွၼ်ႈတုမ်ၵၼ်တီႈဝတ်ႉ ၵွင်းမူးၶမ်း (ဝိႁၢရ်ၵျွင်းၸၢၼ်း) သေပႆၵႂႃႇထိုင်တီႈပွၵ်ႉမၢၼ်ႈဝဵင်း ၶၢဝ်းတၢင်းမီးမွၵ်ႈ 1လၵ်းပၢႆ။


ၸၢႆးၵမ်ႇ ၽူႈၶၢၼ်ပၢၵ်ႇပၢင်ၼႄၵၢင်ၸႂ်လၢတ်ႈဝႃႈ“ ဢၼ်ၶွမ်ႊပၼီႊဢဝ်ယုၵ်းယၢၵ်းမႃးပႅတ်ႈၼႆႉ မၼ်းတုမ်ႉ တိူဝ်ႉပၢႆးယူႇလီၵူၼ်းဝၢၼ်ႈတႄႉတႄႉ။ ပေႃးၶၢဝ်းၾူၼ်းဢၢႆမၼ်းၵေႃႈမဵၼ်တူႇ၊ ၵူၼ်းဝၢၼ်ႈၵိၼ်ၶဝ်ႈပေႃးဢမ်ႇ ဝၢၼ်လႆႈ။ ပေႃးၶၢဝ်းႁႅင်ႈသမ်ႉမႃးၽဝ်ပႅတ်ႈယုၵ်းယၢၵ်း။ ႁဵတ်းႁႂ်ႈလူမ်းဢမ်ႇၸိုၼ်ႈသႂ်။ ၵွပ်ႈၼၼ်လႄႈၶႂ်ႈႁႂ်ႈၶွမ်ႊ ပၼီႊၵိုတ်းၵၢၼ်ပႅတ်ႈယုၵ်းယၢၵ်းႁိမ်းၸမ်ဝၢၼ်ႈ” ဝႃႈၼႆ။


ၵူၼ်းမိူင်းဢွၼ်ၵၼ်တုၵ်းယွၼ်းဝႃႈ ႁႂ်ႈၶွမ်ႊပၼီႊဢွင်ႇၵရုၼႃႇ မႃးၽဵဝ်ႈပႅတ်ႈယုၵ်းယၢၵ်း တင်းသဵင်ႈ။ ႁႂ်ႈၵိုတ်း ၵၢၼ်ဢဝ်ယုၵ်းယၢၵ်းမႃးပႅတ်ႈၸမ်ဝၢၼ်ႈၸိူဝ်းၼႆႉ။


“ ၵႃႈဢၼ်ၶဝ်မႃးၵဵပ်းၽဵဝ်ႈယုၵ်းယၢၵ်းၼႆႉ ပေႃးႁိူၼ်းလဵၵ်ႉ-လႆႈသႂ်ႇ2,000ပျႃး ပေႃးႁိူၼ်းယႂ်ႇ 3,000 ပျႃး ပေႃးႁၢၼ်ႉတၢင်းၶၢႆတႄႉၼိုင်ႈႁၢၼ်ႉ 6,000 ပျႃး - လႆႈသႂ်ႇတီႈၶွမ်ႊပၼီႊၵူႈလိူၼ်”  -ၼႆၸၢႆးၵမ်ႇသိုပ်ႇ လၢတ်ႈထႅင်ႈၼင်ႇၼႆ။


မိူဝ်ႈ 2015  ၶွမ်ႊပၼီႊလၢႆလၢႆဢၼ် ၶႅင်ႇၵၢၼ်မဝ်သိုဝ်ႉ (တိၼ်ႇတႃႇ) တႃႇလႆႈၵဵပ်းယုၵ်းယၢၵ်း ႁဵတ်းၵၢၼ်လိူမ်ႈ လႆႇ ၼႂ်းဝဵင်းမူႇၸေႊ။ ၶွမ်ႊပၼီႊဢွင်ႇၵရုၼႃႇလႆႈထိ 3 သေတႃႉ လႆႈႁပ်ႉၵၢၼ်လိူမ်ႈလႆႇ ဝဵင်းမူႇၸေႊ တႃႇ 30ပီဝႃႈၼႆ ။